Mbirinvuo

Mbori ima fu ome fu Yesu ko nyasa riipa agu akpakarapai dunduko nga ga wiri aboro. Ho Yesu amangi iiriwoapai ni, ko ayuguhe nga ko ima rengba ka nyasariipa gu kpakaraapai dunduko ani arengbanga ka nyasa riipaha ya. Ni kpiapai, ko na ome beko ka batasa rani be agu apai naye na kpakarapai fu wiri aboro—nga ingapai kodihe na sangbanaha nga kaza na kpio. (Mt. 9:1-6; Rom. 5:12, 18, 19) Gu iiriwoapai ko amangihe nayugo gupai nga ko ima rengba ka ‘husa ngbatunga akaza’ dunduko na ki zingisi agu aboro dunduko kpiki. (Mt. 4:23; Yo. 11:43, 44) Ko a na ome beko ka rugusa bavugumo na ki batasi aboro be gbigbita atoro. (Mk. 4:37-39; Rk. 8:2) Nairiwo wai duhe nipa wasa ka ino gupai nga Yekova ima fu ngbatunga gu ome re fu Wiriko! Ani ima rengba kadu na kido nga agu akidohe nga ga weneapai dunduko du tii ga Mbori Kindo nika da ada nirengo. Gu iiriwoapai Yesu amangihe ho ko adu ni ni boro auru kpotosende nayugo gupai furani nga, ko nika manga gi iiriwoapai re rogo zegino dunduko wangia ko Bakindo ga Mbori Kindo. w23.04 3 ¶5-7

Ka si du nga mo rogo kiki dungurati na kini bihe nga i atumbanga bero dedede te, mo ima rengba ka bihe nga mo atumbanga bero berewe kuari te. Ono ka mo asadingo ka mbu fu karagapai ya. Mo mbakadi dungu akaragapai tipa adunguratise ni basasa. Na ka si vura du nga i asianga ro mo fu karagapai ti tonatona sakapai te, mo nika du kindi na amomu ka fu karagapai wa dunguratise nikaa ndu kumbatayo. Ho mo ambakada gu Ngbaõbambu Sinziri ni du tipa wisigoho, mo berẽpa wai du agenewaraga nibasasa na ngbanya dagbaha na gu rii kekeapai re. Ka mo mangihe wo, mo nika duadu na karagapai ngba ro tipa ka pehe ti regbo gu wisigopai re dunduko. Kurigure, mo ima rengba ka mbakada karagapai kuti agu agene waraga nga gu nasaka rogo gu dudunguro arengo yo nga gu si naima rengba ka kpakara tipa ka sakarogoyo. Tipagine si aida mo mangihe ti ni wo? Mbiko si ima rengba kadu nga, dungu aboro akaraganga pai ti regbo gu paparaha re te. Na ka si dunga mo ima mangapai kuti agi aberãpai re ono tifuo dungu adunguratise mo ata gbianga momu kindi ka fu karagapai te? Mo ima rengba ka pepa gu sanahe fu gu boro nanungusaha mo akpinyemu ka karagapai kuti ni mbata fu dunguratise. w23.04 21-22 ¶9-10

Yosefa adu regerege ka mangapai kuti ga Yekova arugapai, na gipai re nasa ko ko du ni wene kumbakudee. Ti aregbo wa bara biata, ko agbia arugapai be Mbori nibipa gako aborokporo. Ti agu aregbo re ni basasa dunduko, ko anaamangapai kuti ni ni kina ipo, zavura ho si anaida ko mangi bakere aˈariapai ni vurũ. (Mt. 1:20; 2:13-15, 19-21) Pa manga Yosefa pai kuti ga Mbori arugapai, asa gupai nga ko banda Maria, ki songodi ri na ki ngerefuo ri. Oni berẽnga pa wai gupai Yosefa amangihe re asa Maria ri kpinyemuko na kini irisiko ni bakerehe! Akumbakuadee, oni ima rengba ka wirika Yosefa ni gbata oni agu arugute du mburuhe rii Baibiri tipa wai ka ngerafuo gaoni aborokporo. Ho oni amangapai ni kuti gi rugute re, ka si vura du vurũ nga si naida oni mangi aˈariapai, oni nayugo nyemuse fu adiaroni na kini nyakasi gaoni rogatise. Wirina du Vanuatu yo, nga gu ri naima manga agarã kurogo rogatise yo niima susa 20 aya: “Ho kumbami agbata ga Yekova arugapai ni na kini mangipai kuti ni, mi nairisako ni bakerehe. Mi nabi tire nga mi ni bandabanda re na kidu na kido kuti agu adiaberã ko amangaha.” w23.05 21 ¶5

Si adunga, agu aYudo naakaraga tiyo nika ngia “ziazia rikaaboro” fu gayo Mbori. (Pa Rug. 7:6) Ono tie, gipai re aayugongo gupai nga, si aaidanga agu aboro nambu Babera mbu manga aˈariapai tipa ka sa ngbarago ti Yekova te te. Badungu agu aYudo i avunguyo Babera yo aima inido kina gu gene aBabera anaaberã kuriapai ngbaha gbiati gayo arugute. Tifuo dungu agarã kusa fuo aYudo karagatiyo ku Yisaraere yo, kina ngba gu Banyaki nangia Nemaya nazere ka ino gupai nga zavura agu agude i avunguyo Yisaraere yo aawirikanga fugo aYudo te. (Pa Rug. 6:6, 7; Nem. 13:23, 24) Waigu ka gu rukutu agude re arengbe ka wirika wai ka kpinyemu Yekova na kini irisiko ka si adu nga i agianga pa-Ebere te—nga gu bangua fugo i ake Fugo Mbori rogoho? (Eza. 10:3, 44) Si aaida agu aYudo re mangi bakere aˈariapai, ono si arengbe kadu taata gbe fuyo tipa i mangi agu aˈariapai re Yisaraere yo, nga gu ba i aakaraga ziazia irisombori ku rogoho yeeye.—Nem. 8:8, 9. w23.05 15 ¶6-7

Si ni gupai nafu kina gberãrago nga, ka si vura du nga ani ima du na nyemu mangapai na kidu na zatise, apai kinaho nika sa rani ka ani da nga ti gaani sásá ya. Ni kpiapai, “rago gbia kuti mamu” ima rengba ka dia gaani regbo na berãrani ani kidu na kina wiri bete regbo gbua ka mangapai ka da ti gaani sásá. (Batu. 9:11) Ani ima rengba ka gbiatirani na akpakarapai nga gu rengbe ka sa rani ani du na gberãrago na ka ome adunga tirani ya. (Snz. 24:10) Wa du ani nga kpakpa aboro ani ima rengba ka manga gu ingahe nga gu nika sa ha furani ni kpakarakpakaraha ani da ti gaani sásá. (Rom. 7:23) Watadu ani ima rengba kadu na mbugo. (Mt. 26:43) Ginipai rengbe ka undo rani ho adu nga apai ni furani wenengai ya? Mo tingidi gupai nga, ka pai mangi nga gu sa ro ka mo da nga ti gamo sásá ya, gipai re ayugongo gupai nga mo mbu manga asadatise ka da ti ni ya te. Baibiri nape gupai nga ani ima rengba ka gbiatirani na akpakarapai bara dunguhe. Ono tie, si nayugo gupai ayugu ziazia nga ani ima rengba ka da ti gaani sásá berewe. Ho mo aasada ni ka da ti gamo sásá si ki vura du vurũ nga si ni kpakarakpakaraha, mo nayugoho fu Yekova nga mo naida ka sa ngbarago tiko. Nairiwo wai du Yekova na ngbarago ho ko abi ro ni mo ni asadi ka da ti gamo sásá! w23.05 30 ¶14-15

Mangasunge abazakigene naundo paranga kumba tipa ni ini wai ka mangasunge wenengai na agu aboro du sino yo ni bakiakia. Si naundo ni a ni wiriki wai ka mangasunge ni tatamana na gu marã ni agbia ru na ki mbu kaa gbarasa marã. (Frp. 4:11-13) Gu wene gene rengbe boro ka tona sunge Kindo ti aregbo dũ ngbaha nga ni manga ni sunge moundo abazakigene na si naundo boro nidu regerege ka tona sunge abazakigene. Tingbafuo i tona sunge abazakigene, i ima rengba ka yamba yo tipa gu kura angbatunga sunge Kindo ti aregbo dũ, kodihe na mangasunge meka arago watadu sunge Betere. Si naida agu awirina nga akumba du na gu sásá nga ga ka rẽ ka da ni abaakumba rogo dungurati undo agu awirinayo du rogo dungurati. Baibiri nape gupai nga agu akumba namanga ome ka da ti gi sunge re “nakpi nyemu wene sunge.” (1 Tim. 3:1) Si naida wirina rẽ mbata ka da ni moundo abaakumba. Amoundo abaakumba naundo abaakumba tipa ka ngerafuo awirina rogo dungurati ngba dungu agene. Abaakumba na amoundo abaakumba naundo awirinayo niumbasitise na kini tungusipai. w23.12 28 ¶14-16

Garã Bakindo Yosiya adu nga 16 ho ko atona gbata Yekova ni. Ko aaida ka wirikapai tipa Yekova na ka manga gupai Ko akpinyemuhe. Ono tie, raka aadunga taata fu gi paranga bakindo re te. Ti gu regbo re, dungu aboro naairiso ziree ambori, sidu, si aaida Yosiya du na wingbaduse tipa ka za yo ti manga gupai re. Na ko aima du na wingbaduse! Mbata fu garã Yosiya da ti 20, ko atona ka dia ziree irisombori kusayo rogo ringara. (2 Peka 34:1-2) Ka si vura du nga mo kindi tooni, mo ima rengba ka diaberã tipa ka wirika Yosiya ni gbata mo Yekova na ki wiriki wai kadu na tambuahe tipa asino Ko. Pa manga mo gipai re nika undo ro mo du na nyemu ka kpara gamo raka fu Yekova. Waigu gipai re nika du na maapai kurii gamo raka? Luke nga gu ko nazi bapatiza ho garãko adu ni 14 aya, “Tona awere ka ndu kumbatayo, mi nikaa maa pa iriso Yekova ni bambatapai rogo gimi raka yo na kini asadi ka sa ngbarago ti ko.” (Mk. 12:30) Nairiwo wai si nika du nipa maku foro ka mo kpinyemu ka manga kina gu bangisapai re! w23.09 11 ¶12-13

Ho gu mokedi nangia Pauro ake gi waraga re ni, gu dungurati i azakihe Tesaronike yo aadianga garã sa te. Si nawiraha wa agu akumba i asiayo i naangera kurii apai aadunga na inohe gbe te na i aima manga dungu aingahe. Wa si avura du wo, si aaida aida i naayugo irisa fuyo. Wa bakere gberãngbi ambeda, si ima rengba ka ida ani naangera kina koyo du agu abaakumba ni du rogo gaani dagbarago tipa arugapai zavura susi wai ani angera koyo du yo ni awere. Si ima rengba kadu nga ani adunga na rengba kaa gbia arugapai be awirina rogo rii-basunge nga ga zegino na rogo abe-basunge te; sidu, si ni nyanyakipa pai ka kpinyemu gaani abaakumba awere na kini irisi yo. Ka kina gini apai vura kaa manga, ani du na rubangirise, ka zanga maaberãrani kina kuti gayo aingahe, ono ani moiberãrani kuti gupai nga Yekova vurube Kristo nanungusa gi ruru akumba re. Kina wai kpakpari naabanda rii banzengere, gaani maabangirise tipa bata nabanda berãrani na kini undo rani ani berẽ wenengai. Ani ima ino gupai nga guhe gi zegino re narengbe ka fuhe sunge ti ni te. (Frp. 3:8) Gaani maabangirise naundo rani ani nye zezeredi na ki zanga wo. w23.06 11-12 ¶11-12

Agu aboro nadegatuyo fu “de abiatise” watadu mumungo dee nagbiatiyo na siapai: Ya mo i adia gari yambahe kugume watadu i nika ká ha? Wene nduapai kinaho si aida ani ne gu mangaapai nga ga wasiwasi kodaba ti ni. I fura tipa “de abiatise” watadu mumungo dee nga ri naya: “Dĩdĩ ime nziri ki susi.” (Snz. 9:17) Ginihe nga “dĩdĩ ime”? Baibiri naringbisa gu kodaba arogotise narengbe kaa gbia ngbarago ti ni kuti wene ime nazambuasi boro. (Snz. 5:15-18) Gu kumba na dee niima manga rogatise kuti andiko ima rengba ka gbia ngbarago ti kodaba. Ono gipai re kia gbe na “dĩdĩ ime.” Nga gu i narengbe ka ya ti ni wasiwasi kodaba. Agu aboro ninaamanga wasiwasi kodaba dedede ni naaõkaha aõka ti kura aboro, wakina wai iradĩ ninaagbu ka dĩ ahe. “Dĩdĩ ime” ima rengba kaa ngera wa gupai du ni wenehe ka si du nga agu aboro namanga gipai re naberã ha nga boro ho nika inopai tipa gupai i amangaha te. Nga gu riko gbegberẽ pa nangahe! Yekova nabi apai dunduko. Ka si du nga Yekova aidanga na gaani pai berewe te, si nga gu riko gbegberẽpai kisusi nga gu rengbe ka manga rani, si ni ‘nzinziri he’ watadu ni wenepai te.—1 Kor. 6:9, 10. w23.06 22 ¶7-9

Ginipai rengbe mo ka mangaha ka si dunga mo amanganga kparakpee kina boro ngbaduro yo fu Yekova te watadu mo agbianga ngbarago berewe ni bakerehe ti sunge tungusapai wagu nadu mbata te? Ka mo danga kuti gu digisopai nga ga Yekova toro tiro berewe ya te. Mo nga kpakpa boro, na gamo nyemuapai ima rengba ka ariatihe ti kura aregbo. Ka si dunga mo na bakere nyemupai berewe te, mo berẽkurii gu kpiapai nga ga gu mokedi nangia Pauro. Wa vura duhe nga Pauro aˈasadi ka wirika Yesu, ko aima ino gupai nga ti kura aregbo, ko adunga na bakere nyemu ka manga gupai ko akpinyemu ka mangaha te. Pauro aima diaberã ka nyasa gako sunge tungusapai si ki vura du vurũ nga nyemuhe anaadunga tiko ti kura aregbo te. Wakina gure a, ka mo namanganga gamo adiaberã gbua ringbisihe kuti gamo bipai ya. Mo diberã ka manga gupai du ni ruruhe si ki vura du vurũ nga mo aidanga nzunzu ka mangaha te. Ka mo nye kaa manga gupai du ni ruruhe, wa regbo nikaa susa, gamo bipai ima rengba ka ariatihe.—1 Kor. 9:16. w24.03 11-12 ¶12-13

Ani ima rengba ka yugo nyemuse fu awirinarani a nida ani ni abakureayo na kini di regbo na yo. (2 Kor. 6:11-13) Dungu rani rogo agu adungurati du na dungu awirina rogoyo nga aguyo du apai tipa yo kia ti gaani na du asino yo ni bakiakia a. Ani ima rengba ka nyakasa gaani nyemuse tipa yo ni maa ani berãrani kuti wene asino yo. Ho ani awirika ka bi aboro ni wai Yekova abi yo, ani nayugoho nga ani nakpinyemu yo. Si nika ida ani kpinyemu awirinarani ti regbo bakere gberãngbi. Ho bakere gberãngbi nika tona ni, waigu Yekova nika banda rani? Oni bingo gupai Yekova apehe fu gako aboro ti gu regbo i azubo gu Babera naadu mbata: “Oni yé, gimi aboro, oni rími ku rogo gaoni abambu, ki kisi gaoni angbadimo fuo roni, oni óko tironi ngbutuko toni daho pa imisiri ngbaduse ka susa ni.” (Yes. 26:20) Si nangera wa ani nika pekafuo kina ngbatunga gu rugapai re ti regbo bakere gberãngbi. w23.07 6-7 ¶14-16

Aboro ini roni ni agu aboro du na ruru bipai. Mo sananga tiro nga: ‘Ya mo aboro nabi re ni gu boro du na ruru bipai, naida na agu aberãpai nga ga kura aboro, na ki zanga ka kina kuti gupai mi aidaha? Watadu ya mo aboro ninaabi re ni gu kere boro namaa andiko zanga ariaha, watadu boro nyakarii? Ya mo mi naadega ture fu kura aboro na kini mangipai kuti gupai i akpinyemuhe ho rẽhe arẽ ni?’ Ka si du nga ani nayugo gu sino nga ga du na ruru bipai ni bakerehe, gure nga ani nawirika aYekova na Yesu ni bakerehe. Si naida ani du na ruru bipai ho agu apai du tipa rani naˈariatihe ni. Ngbatunga agu aariapai re ima rengba ka ye na agu akpakarapai furani ani aaberãnga paha ya. Ani ima rengba ka gbiatirani na tunguotunguopai nibipa kaza kpotose. Watadu ariapai ima rengba ka manga ni tunguotunguo nibipa mosoro watadu gu tagbagapai nga ga aboro birĩ-zogarago si ki sa gupai nga apai burungo tie rogo gaani raka yo. (Batu. 9:11) Na zavura si ima rengba kadu furani ni kpakarakpakaraha ka si du nga riigbu sana rani ani naairiso Yekova ngba gu kura gene watadu rogo kura ba. Ani ima rengba ka mangapai kuti vovo aariapai kidu na diabese ka ani mangipai kuti agi apai du biama re: (1) ida kuti gu rengopai duho, (2) ngera kumbatayo, (3) maaberãse kurii gupai du ni wenehe, na (4) kini mangipai fu kura aboro. w23.07 21-22 ¶7-8

Gu nebi nangia Daniere angia kina paranga boro ho aBabero adi ko ni ni ziziboro ku Babera yo ko ki du tuturũ ti Yerusarema. Wa vura duhe nga Daniere adu kindi ni paranga ko, aBabero aima inopai tipa ko. I abi gupai nga, kpoto Daniere adu ni bawenehe na ko aye rogo nyanyakipa riikporo. (1 Sam. 16:7) Si du nga agu andu apai aBabero araba ko ti ni tipa ko naamangasunge kua bakindo yo. (Dan. 1:3, 4, 6) Yekova aima kpinyemu Daniere, mbiko gu ngbatunga boro gi paranga kumba re asia kadu nga ni. Ni rengo, ho Yekova ape gupai ni nga Daniere adu wakina Noa na Eyobo, si nawiraha wa garã Daniere adu ho gbua wa 20, sidu, Yekova abi gi ruru paranga nangia Daniere re nga ko adu ni ruruko wakina Noa na Eyobo nga aguyo nairisi Mbori ni ruruyo tipa dungu agarã. (Bam. P. 5:32; 6:9, 10; Eyo. 42:16, 17; Yeze. 14:14) Na Yekova aandu kindi kumbatayo kaa kpinyemu Daniere rogo gako raka yo naabaha.—Dan. 10:11, 19. w23.08 2 ¶1-2

Ho mo adiaberã ni tipa ka ngbe bambu, mo ima rengba ka ida ka wisigo apai dunduko tipa wai gu kpuro re nika du kumbatayo. Ani ima rengba ka mangapai wakina gure a ho ani ageda Baibiri ni na kini wisigihe. Ka si du nga mo na gedaha ni kina boro wiri ipo, mo ima rengba ka wirika kina taata wiri apai—“gu tonatona apai nga ga sangba Mbori.” (Eb. 5:12) Kina wai duhe tipa bambu nga si naida mo “rimi” ku vuru bambu yo tipa ka ino dungu apai tipa ha, si naida mo wisigi Baibiri sirisiri a tipa ka gia tiro na ni wenengai. Gu bawene gene rengbe ani ka wisigo Baibiri ngbaha nga ka bi wai du agu apai i akehe rogo Baibiri yo na ngbanya dagbaha. Mo asadi ka gia tiro na gu rengo mo naidi kutini na ndu gupai mo naidi ti ni kutini. Tipa ka giatirani wenengai na apapara Fugo Mbori, gu kuraapai kinaho si aida ani wisigihe sirisiri. Gu mokedi nangia Pauro angarasi awirinako aKristano nga i wisigi Fugo Mbori sirisiri tipa wa ka i rengbe ‘ka ruga tiyo na gu he nga inahe na bagizaha, na basonaha na badunguraha’ nga ga rengo. Si aima rengba ka undo yo tipa ‘nduyo du nyanyaki’ rogo idapase yo. (Ef. 3:14-19.) Si naida ani mangi kina gu bangisapai re. w23.10 18 ¶1-3

Baibiri na dungu akpiapai rogoho nga ga agu aboro naadu na hipai watadu zerangbaduse a. Si ima rengba kadu ni wenepai foro ka manga wetekapai tipa agu akpiapai re. Ni kpiapai, wa si avura du nga i ambedi Davide ko du ni bakindo aYisaraere kumbatayo mbuko kindi tooni, si aaida ko sungudi tipa dungu agarã mbata fu ko gbia mbatabakindo. Simona na Ana airisi Yekova ni ruruyo wa i aapido gu Masiya i akidopa ko. (Rk. 2:25, 36-38) Wa mo nikaa wisigopai tipa ngbatunga agi apangbanga re, mo ngere tipa karagapai kuti agi asanahe re: Ginipai narengbe ka undo gi boro re niyugu zerangbaduse? Waigu ni agbia undo ni du ni na zerangbaduse? Waigu rengbe mi ka wirika ni? Mo ima rengba a ka gbia undo ni wirika mo pai tipa agu aboro naayugongo zerangbaduse ya. (1 Sam. 13:8-14) Mo ima rengba ka sana tiro nga: ‘Ginipai nasa gupai nga ka i du nga na zerangbaduse ya? Gini gbegberẽ apai namangi yo mbiko i aadunga na zerangbaduse te?’ w23.08 25 ¶15

Gu mokedi nangia Petero adu ni ruruko; ko aambunga ai pai si rugusiko ti pekafuo Yesu te. Ko ayugu gako padu ni ruruse ti kura regbo sa ho Yesu ape gupai ni gako abawiriki aaruganga tiyo na ni ya. (Yo. 6:68) Kuba gupai nga dungu aboro sungudi Yesu mbata watadu ka sanako ko sakirogoyo, i ambu pekafuo Yesu. Ono Petero aambunga pekafuo Yesu te. Ko adu ni ruruko na ki pe gupai nga, kina Yesu sa ‘du agu apai be ko nga ga nyenye unga.’ Yesu aima ino gupai nga Petero gbiati kura gako abawiriki nika mbuko ambu. Wa si avura du wo, ko adu na kido nga Petero nika karagatiko akaraga na ki nye ni ruruko. (Rk. 22:31, 32) Yesu aima rugatiko na gupai nga ‘toro nakpi nyemu he ono borose anyaka nga ya.’ (Mk. 14:38) Zavura ho Petero aoro rimo Yesu ni, Yesu aambunga gako bawiriki te. Tingbafuo i zingisi Yesu be kpio, ko ayugu tiko fu Petero—si nawiraha wa ho Petero adu ni nisako. (Mk. 16:7; Rk. 24:34; 1 Kor. 15:5) Oni berẽnga pa wai gupai re anyakasi Petero nga guko naadu na gberãrago tipa gupai ko amangihe! w23.09 22 ¶9-10

Mbori nambupai watadu ka dada agu aingapai nga ga agu aboro du na idapase. Ko nambupai fuyo na ko aberãnga pa gayo aingapai berewe te. (Tam. 32:1, 2) Ko nabi ngbatunga agu aboro re nga i na pai tiyo te na i niruru yo mbiko gayo idapase. Wa vura duhe nga i ayambu Abarayama, Davide, na gu kura ga Mbori ruru amoyambu nga i angia ruru aboro, i adu kindi na zangarengba na ni aboro ingapai. Ono mbiko gayo idapase, Mbori abiyo nga ingapai aadunga tiyo te, bambiko i aadu nga wa agu aboro naadu patiyo naadunga na idapase kutiko ya te. (Ef. 2:12) Rogo ga gu mokedi nangia Pauro waraga yo ko akehe fu aRomo, ko asaki gupai fuyo nga si naida na idapase tipa kadu ni bakurea Mbori. Abarayama na Davide angia abakurea Mbori bambiko i adu na idapase kutiko, ani ima rengba kadu ni abakurea Mbori a mbiko gaani idapase. w23.12 3 ¶6-7

Areme, aKristano dunduko du na gu momu beyo nga ga iriso Yekova ni mangayo sunge na gayo regbo, ome, gbiati agu ahe du beyo tipa ka mangasunge fuko. A wa gu mokedi nangia Pauro apehe fu agu aKristano nangia aEbere, ani ima rengba ka “tumo ni motumo tambuahe fu Mbori rogo ko yo dedede, gu zuzuhe nga ga ngbarani nakusa pa rimoko.” Ani rengbe ka yugo gupai nga ani na bakere tambuahe tipa gu momu du ani na ni nga ga iriso Yekova, ni manga ani gupai ngba kisusi rengbe ani ka mangaha ti ngba gako sunge. Gu mokedi nangia Pauro ake agu apai si aida ani naatingidaha dedede wa ani airiso Yekova. (Eb. 10:22-25) Agi apai re nakoda manga kparakpee fu Yekova, gumbapa gaani maabangirise fu kura aboro, nduge tipa adunguratise na kini ngarasi akuarani “ki nimangi he susi, wa bi [ani] he ya ga [Yekova] uru re si nambeda.” Mbembedi kuti digido gu pangbanga du rogo Yugoti, ga Yekova maraika ape agi apai re bara ue tipa ka nyakasapai nga: “Mo írisi Mbori!” (Yugo. 19:10; 22:9) Ka bangirani ya gonga ti agu apai dunduko ani nawirikihe tipa gu ga Yekova bakere yekaru nga ga toro ya na ani naabi gu momu du berani nga ga iriso gaani bakere Mbori na nyanyakipaha! w23.10 29 ¶17-18

Ani dunduko si aida “nyemu akuarani du adu ti rani.” Ono tie, si ni nyanyakipa pai tipa ani tingidi pa gu zahe Yesu apehe nga ‘Gu nyemuse du ti agu yo ni dungu yo [ima rengba] ka zéra.’ (Mt. 24:12) Anga Yesu aape gupai nga badungu gako abawiriki ima rengba ka mbu yugo nyemuse fu akurayo te. Ono si naida ani du na rubangirise ka zanga mbu gu zanga nyemuse du ti aboro rogo gi zegino re si du namaapai kurii wai ani amangapai na akuarani. Na gipai re rirani yo, ani sakingo pai tipa gi nyanyakipa sanahe re nga: Ginipai nika undo rani tipa ani inihe singia gaani nyemuse tipa akuarani ni nyanyakihe? Gene sa ani ayugo banyaka gaani nyemuse ngbaha nga ni wisigo ani pai tipa wai ani amangapai kuti gu kura apai rogo raka yo. (2 Kor. 8:8) Pai sa dagba agu apai rogo raka yo re, nga gu gu mokedi nangia Petero afura tipaha nga: “Ono ti ri apai dunduko oni du na bakere nyemuse dagba roni; mbiko nyemuse nadada badungu ingaapai.” (1 Pet. 4:8) Sidu, gupai ani amangaha ho awirinarani naingisi pai ni kuti rani watadu naimisi rani ni, nika undo rani ani inihe singia gaani nyemuse tipa yo ni nyanyakihe. w23.11 10-11 ¶12-13

Ka si du nga ani nayugo nyemuse fu kina bete aboro rogo dungurati na ka ani ayugongo ho fu agu akurayo ya, gure nga ani amanganga pai kuti gu ga Yesu rugute du tipa nyemuse te. Si nirengo nga, wa gu si adu tipa Yesu, ani ima rengba kadu mbembedi gbe na gu kura aboro, na ka ani adu nga mbembedi gbe na agu akurayo ya. (Yo. 13:23; 20:2) Ono gu mokedi nangia Petero atingidi rani na gupai nga, si naida ani “kpí nyemu” awirinarani dunduko mbiko i nga papara gaani aborokporo. (1 Pet. 2:17) Petero azungodi rani ani ‘kpí nyemu akuarani akpi kakaka kpotorani yo.’ (1 Pet. 1:22) Rogo gi bangiri ba re, kadu na nyemuse “kakaka” nayugo gupai nga ka kpinyemu boro ka si vura du vurũ nga si ima kpakara ka yugo nyemuse fu ni. Ni kpiapai, na ka si du nga wirina imisi rani ngba kura gene? Ti bambata ha, ani ima rengba ka ida ka mangapai na ni kina wai ni namangipai na ani kuba gupai nga ka yugo nyemuse fu ni. Ono tie, Petero aima wirika gupai be Yesu nga irobape asanga ngbarago ti Mbori te. (Yo. 18:10, 11) Petero akepai nga: “Ka oni káraga nga gbegberẽpai fu gbegberẽpai ya, na gberãngba yo fu gberãngba yo a ya; ono ku ba gure oni káraga kina maku.” (1 Pet. 3:9) Ka si dunga mo na kakaka nyemuse, mo nika du na wene sino na kini berẽpa aboro. w23.09 28-29 ¶9-11

Kina ngbarani nazera ka bi wai gude asona niipo na ki da ni sosono boro. Si nawiraha wa agude amanganga ome amanga tipa ka sona te. Ono ka ani aida ka sona ki da ni agu aKristano niima nyaka rogo toro yo, si naida ani mangi ome amanga. (1 Kor. 13:11; Eb. 6:1) Tipa ka da ti gu sasa re, si naida ani du na dudunguro pagume na Yekova. Ani naida aida a na gako ziazia toro si undo rani ani sonosi agu asino nafu ngbarago fuko, ki sonosi wene birĩ mangaapai, na ki mbakaditirani tipa agu asunge rengbe kadu berani kumbatayo. (Snz. 1:5) Yekova akusi aboro i du nga kumba watadu dee. (Bam. P. 1:27) Si taata ka bi gupai nga kpoto akumba na kpoto adee kia, ono kura apai kinaho berewe a du tipa yo kia. Ni kpiapai, Yekova akusi akumba na adee i mangi kuraapai, sidu, si naida aida na agu asino gbiati abirĩ mangaapai nga gu nika undo yo i mangi agu asunge i nafuhe fuyo.—Bam. P. 2:18. w23.12 18 ¶1-2

Ya mo Yesu aaida gupai nga kura boro naamangasunge na rimo Bako? Ii. Kura agbia pambori ti gu regbo re aidi kuti gupai nga si nipa zanga irisa ka yamba rimo Mbori, ono tie, Yesu aaidanga gipai mburuhe aadunga rii Ziazia Kekeapai re ya ká na ko ti iriso rimo Bako te. Oni berẽnga pa gu regbo Yesu ahusi gu kumba naadu na adaimona tiko rogo gu dagbarago nangia ga aGerasa. Aboro adu na bakere gunde na ki zungodi Yesu tipa ko guari kusayo rogo gayo dagbarago, sidu, ko aarakanga rogo gu rago re te. (Mk. 5:16, 17) Wa si avura du wo, Yesu aaida aboro ini rimo Yekova rogo gu dagbarago re. Sidu, Yesu ape gupai fu gu kumba ko ahusi ko re nga ko pe gupai fu gu kura aboro nga gu Yekova amangihe angianga Yesu ya. (Mk. 5:19) Yesu naida ani mangi kina gu bangisapai re areme a—ka yugo rimo Bako fu aboro rogo zegino dunduko! (Mt. 24:14; 28:20) Ho ani amanga gipai ni re, ani nasa ngbarago ti gaani Bakindo nga Yesu. w24.02 10 ¶10

Si nipa maku furani kadu ni papara ga Yekova riigbu ti gi kere kpakarakpakara yangara arame re. Raka rogo gi zegino re nada ni ba kpakarakpakaraha gbe, ono tie, Yekova ima fu awirinarani furani nga aguyo rengbe ka undo rani. (Tam. 133:1) Ko naundo rani ani du dagba agu aborokporo du na ngbarago. (Ef. 5:33–6:1) Ko nafu gu tatamana furani si aida na ni tipa ani du na diabese na kidu na ngbarago. Ono tie, si naida ani mangi ome amanga nyanyaki tipa kaa ndu kumbatayo kindi kaa iriso Yekova ni rururani. Tipagine? Bambiko rago ima rengba ka gberã tirani be gupai gu kura boro namangihe watadu napehe. Rago ima rengba ka gberã tirani a ho ani amanga ingahe ni, gbe ka si du nga ani ima manga gu ingahe re bara dunguhe. Si naida ani kpatagara kuti ngba ga Yekova sunge (1) ho wirinarani idipase naingipai ni kuti rani, (2) ho gaani badiarogatise naba gberãrago ni tirani, na (3) ho du ani ni na gberãrago be gu ingahe ani namangihe. w24.03 14 ¶1-2

Dedede, wo mo nikaa gia agu apangbanga nga ga agu awirina diberã ka kiiso gayo sunge fu Yekova. Isoke, i aima ndu tipa Gu Sukuru Du Tipa Abatungusipa Kindo watadu i aima ga kurogo gu ba du na bakere zingo abatungusipai rogoho. Ka si dunga apai tipa ro wenengai, gure nga wene sasa mo narengbe ka mangaha. Ga Yekova aboro na bakere nyemu ka kiiso gayo sunge tungusapai. (Amo. 16:9) Ono tie, na ka si dunga mo na rengba awere ka mangaha te? Ka mo bingo tiro nga paro kusende ti agu aboro rengbe ka mangaha wo ya. Gupai nyakipaha nga mo naandu kindi kumbatayo kaa hipai. (Mt. 10:22) Ka bangiro gonga ti gupai nga mo nasa Yekova ko du na bakere ngbarago ho mo amanga gupai ni nga gu du mo na rengba ka mangaha nibipa agu apai du tipa ro ya. Gure nga gu nyanyakipa gene rengbe mo kaa pekafuo Yesu ngbaha tifuo gamo bapatiza.—Tam. 26:1. w24.03 10 ¶11

Gu Barani du ngbangbaturũ yo ima kidohe tipa ka mbupai furani ti gaani aingapai ka ani mangi saberã. (Tam. 86:5) Ka rago gberã tirani nzunzu tipa agu aingapai ani namangihe, ani ima rengba ka ida kuti gupai Yekova apehe nga ko ima mbupai furani. Mo tingidi gupai nga Yekova aidanga kina bakere apai berani te. Ko aidanga ani mangi bakere apai nga gu naima fu rii omerani te. Ko na tambuahe tipa ai gupai ani amangaha fuko ho duhe ni nga ani namanga gupai ngba gbe. Kurii gure, oni berẽkurii agu akpiapai nga ga Baibiri du tipa agu aboro nairisi Yekova na kpotoyo yo dũ. Oni berẽnga pa gu mokedi nangia Pauro. Ko afutiko zaaza tipa dungu agarã, kini ndu nunguro tipa akutu amairo kini kusi dungu vovo adungurati. Ono tie, ho apai aˈariatihe ni rogo gako raka yo ka ko adunga berewe na rengba ka tungusapai wa gu ko aakpinyemuhe ya, ya mo gure aayugo gupai nga rago aangbanga ti Yekova na ko te? Oó. Ko aandu kindi kumbatayo kaa manga gupai ome ko arengbe na ni na Yekova aima fu maku fuko. (Amo. 28:30, 31) Wakina gure a, ti kura aregbo, ani ima rengba ka fu ahe fu Yekova ni bakiakia. Ono gupai du na nyanyakipaha fuko nga gu ndupai ani airisoko ti ni. w24.03 27 ¶7, 9

Vurube agu akparakpee Yesu nitiko amangihe fu Yekova, ko amoi kpiapai fu gako abawiriki i pekefuoho. Rogo ga Yesu tungusapai yo naabaha, ko anaamanga kparakpee dedede. Si anaaida ko kpara regbo akpara tipa ka manga kparakpee bambiko dedede dungu apai naanidu tiko na badungu aboro naanidu patiko. (Mk. 6:31, 45, 46) Ko aguari pangbanangbawiso tipa wa ka ko du na regbo beko ka manga kparakpee. Ti kura regbo sa, ko amangi kparakpee yuru sasasa mbata fu ko mangi nyanyakipa diaberã. (Rk. 6:12, 13) Na Yesu amangi kparakpee bara dunguhe rogo gu yuru nadu mbata fu ko kpi tipa wa ka ko moiberãko gbe tipa ka digiso gu kpakarakpakara papara gako sunge nadu auru kpotosende. (Mt. 26:39, 42, 44) Ga Yesu kpiapai nayugo gupai furani nga, ka ani vura du na dungu apai tirani wai vurũ, si naida ani kpara regbo tipa ka manga kparakpee. Wakina Yesu, si ima rengba ka ida gupai nga ani banda regbo abanda tipa ka manga kparakpee—ani rengbe ka guari kina boro ngbawiso watadu ka sungo nyemu kugii regbo yo tipa ka manga kparakpee. Ho ani amangaha ni wo, ani nayugo gupai fu Yekova nga ani ima du na tambuahe tipa gi kparakpara gamahe re. w23.05 3 ¶4-5

Oni bingo gu fugo i namangisunge ane na ni rogo gu veresi du kuari re nga “niuka ku kpotorani yo.” Gu kura buku sa nasakapai tipa Baibiri nape gupai tipa gipai re nga si wa ka i ya “niye ku auru rani wakina ime.” Gi kpiapai re nayugo wai nzunzu Yekova nakpinyemu mbembedi aKristano! Mbedimbedi aKristano ima ino gupai nga i nga “abadiangba rogo Mbori yo,” watadu Mbori ima kpinyemu yo. (Yuda 1) Gu mokedi nangia Yoane ape gayo bipai ho ko ake gupai ni nga: “Oni bi nga ngbatunga gu nyemuse fu Mbori nga Ba fu rani, ya i ya ti rani awiri Mbori.” (1 Yo. 3:1) Ya mo Yekova nakpi kina nyemu mbedimbedi aKristano sa? Oó, Yekova ima yugo gako nyemuse furani dunduko. Gini bakerepai duho nayugo pa ga Yekova nyemuse? Si nga motumo tumorii. Nimanga Yekova gi nyanyakipa pai re, si nayugo pa gu nyemuse boro aayugongo ho mbata ya! —Yo. 3:16; Rom. 5:8. w24.01 28 ¶9-10

Gi veresi du kuari re nayugopa gu gene Davide adibe gako agunde ngbaha nga: Wa si avura du vurũ nga gako raka adu ngba kerepai, ko aberẽkurii pa gupai si adu nga Yekova nika mangaha fuko kumbatayo. Davide aima ino gupai nga Yekova nika batasa ko abatasa ti wene regbo. Gu kurapai berewe nga, Yekova aima pe gupai nga Davide nika ngia bakindo aYisaraere. (1 Sam. 16:1, 13) Fu Davide, ai gupai Yekova akidohe tipaha, ko aima du na kido nga si nika manga amanga. Ginipai Yekova nakidohe ka mangaha foro? Ani aberãnga gupai nga si naida ko banda rani be akpakarapai dunduko te. Ono wa vura duhe wo, ai agu akpakarapai mo agbia tiro na ni rogo gi sino raka re, Yekova nika diaha adia kusayo rogo gu vovo zegino naye kumbatayo. (Yes. 25:7-9) Ni rengo, Bakusirani na ome tiko ka zingisa kpikpi aboro, ka husa rani be akaza na ki di agu aboro dunduko kusayo nasoga rani.—1 Yo. 4:4. w24.01 6 ¶12-13

Mo berẽkurii gamo kparatise na bapatiza. Mo amangi agu adiandue re mbiko mo aaida ka songodapai kubara Yekova yo. Mo berẽ kusayo kuti gupai naundo ro mo idi kuti gupai nga mo ima gbia rengo. Mo agbia ndikidi inohe tipa Yekova na ki sonosi iriso na nyemuse koyo du gu Bamo ni du ngbangbaturũ yo. Mo asonosi idapase na si ki fõngbaduroyo mo sa berãro. Ngbaduroyo afõ ro tipa mo mbu gu gbegberẽ mangapai mo aamangaha na kini raki ringbisihe kuti gupai Mbori akpinyemu. Mo aima du na ngbarago ho mo abi ga Yekova mbupai ni koyo du mo ni. (Tam. 32:2) Mo atona kaa ndu tipa agu adunguratise nga ga aKristano na ki tona kaa gumba gu weneapai fu kura aboro mo awirikihe. Wa du mo awere ni gu Kristano naima kpara gani raka fu Yekova na ki zi bapatiza, mo awere nata ngba gu gene nga ga unga, na mo nika mangapai na ome ro dunduko kaa ndu kindi ngbaha. (Mt. 7:13, 14) Mo dunga adu nyanyaki, zanga wo rogo gamo kparatise yo fu Yekova na kini gisangba gako andiko. w23.07 17 ¶14; 19 ¶19

Niberã mo kurii gu kparakpee mo amangihe nga ga kparatise fu Yekova, mo nika gbia ome tipa ka ká ai asada. Ni kpiapai, ya mo mo rengbe ka tona ba nyemuro ti ga kura boro badia rogatise? Wagusa te! Mo aima kido Yekova nga mo amanganga ngbatunga pai wa gure te. Ka si dunga mo ambunga gbegberẽ aberã si sono rogo ro yo te, mo asota nga na ni kusa tipa ka nyasa riipaha te. Mo nika “ne gu gene” nga ga “gbegberẽ aboro.” (Snz. 4:14, 15) Pa berã ani kurii gu kpiapai nga ga Yesu ima rengba ka undo rani. Ko aima diaberã tipa ka sa ngbarago ti Bako. Wakina Yesu, mo diberã ka ne ai gupai niipo mo na inihe nga si rengbe ka ba gberãrago ti gu Mbori mo akpara tiro fuko. (Mt. 4:10; Yo. 8:29) Gupai mo amangaha ho mo agbia tiro ni na akpakarapai watadu ho du mo ni ni asadiasadi ro ka manga gupai du ni irairaha ima rengba ka yugo gupai nga mo naida ka ‘peka fuo’ Yesu. Na mo ima rengba kadu na gu kido nga Yekova nika undo ro aundo mo naapekafuo Yesu kindi. w24.03 9-10 ¶8-10