Ya Mo Aboro Dunduko Si Aida Ani Kido Kuti Yo?

FUO gburuwa yo gu ndugu kusayo i ayambaha nga Berlin Wall rogo gu garã nangia 1989, aboro akusi agu apai kuyangura i anaokaha aoka mbata wenengai gbe. Nikpiapai, dee du rimori nga Lydiaa abi gupai nga, gu Rondo nangia ga Banda Ringara i ayambaha nga Stasi nadu rogo gu zogarago nangia ga Germani ku Uroyo, nga gu zogarago nanambakadapai tipa aboro du kina sa rogo apai yo, aduna keke keke apai tipa gu gari apai ri anamangaha nisari ka boro adunga ho nanabihe ya. Kangia si airiwo ti Lydia ka gia pa gu keke keke apai tipa ri re, rago aima gbera tie tiri kisusi ka ino gupai nga, kina boro kumbaari nzunzu nangia gu boro nanavota agi apai nadu tipa ri re fu agi abororondo re. Gu boro nakusi gari apai fu akare, angia gu boro si adu nga ka ri anakido kutini na ngbaduriyo dunduko.

Robert angia sosono bakumba nanabi gako munganga “na bakere irisa kisusi na kini kido kutiko bakere gbe,” wogu gu waraga pangbangaa nga The Times of London agumbaha. I aya tipa gu munganga re wee ko angia “wene sino kumba na ki duna nunga aboro tiko.” Si ki ta du were, Robert kini mo ka kpi nitunguotunguoho. Ginipai namangi, ngbaduko naru watadu kureko nakputa? Oó, anga pai wa ngbatunga gure namangi te. Abazogo ada kuti gu digisopai nga, kina gu ga Robert munganga re nandu ka bi ko kporo yo, gi munganga re kini mo ka ru Robert na kere ngua imo aboro zanga Robert watadu gako aborokporo inihe. Sidu, si tie ziazia nga, gu boro Robert anakido kutini na ngbadukoyo dunduko, kina ni naimi ko.

ALydia na Robert tibarayo ue dunduko ambu be kere gbarasapa kido be kina agu aboro i adu nani kutiyo nga gu naye na gbegbere asangbanaha. Rogo gu kura apai, aboro agbarasanga pa agu akido du akurayo nani kutiyo na gbegbere sangbanaha wa kina gure te. Wa vura duhe wo, pa ba agu aboro gberarago tirani ani akido kutiyo, nivovo pai te. Gu wisigopai sa ka dungura pangbangaa gu riigbu nga ga Germani nga Allensbacher Jahrbuch der Demoskopie amangihe natona rogo 1998 ki da kurogo 2002, ayugu gupai nga, 86 rii kama nga ga bange agu aboro i asasana yo aya wee agu aboro i anakido kutiyo aima ba gberarago tiyo. Isoke ngbatunga gupai re avura manga roni a. Sidu tie, si aidanga si iriwo tirani ka gia gupai nga, gu waraga pangbangaa nga ga Swiss du rimoho nga Neue Zürcher Zeitung atingidi gupai rogo 2002 nga, “rogo agu aringara nambakada ahe du Putu yo na Amerika yo, agu apagume naduku dagba aboro mbiko agu akido i aduku nani kuti akurayo, aima digo nigbere vuru gu dungu agarã susi.”

I Naasonosa Kido Tooni Tooni, Ono I Nagburuwaha Wa Kina Mabangirise

Gine nga kido? Kuti sangba buku sa nga gu buku nasakarogo afugoyo, ya pa kido oni kuti aboro nayugo gupai nga, oni ima ida kuti gupai nga, agi aboro oni angera kubeyo re, abirikanga roni te, i nga airarengo na i arengbanga kita inoaino kini mangi gupai nika imisa roni te. Aboro naasonosa kido kuti akurayo tooni tooni ono agu akurayo re rengbe ka gburuwa gu kido re wa kina mabangirise. Wa dungu aboro abi gupai nga, akurayo aima digo nigbarasipa gu kido i adu nani kutiyo, ya mo si nairiwo tirani ka bi aboro i nimangi ndundu ka kido kuti akurayo? Kuti gu wisigopai ka dungura pangbangaa i amangihe Germani yo rogo 2002, “kina bete bange aboro gbua nadu tooni ti 1 dagba 3 nga ga bange aparanga nadu na kido kuti kura aboro.”

Wa duhe tie were, ani rengbe ka sana tirani ki yaa: ‘Ya mo ruhe aru nirengo ani kido kuti kura boro? Ya mo daha ada ani kido kuti kura boro nga guni rengbe arengba ka fu gberarago fu rani?’

[Gu rukutu kekeapai du bandu kpewaraga yo]

[Gu tingidapai du ti kpewaraga 3]

Gu kura wisigopai sa ka dungura pangbangaa i amangihe, ayugu gupai nga, 86 rii kama nga ga bange agu aboro nakaragapai sa agu asasanahe re, aya wee agu aboro i anakido kutiyo aima ba gberarago tiyo