Oni Mbedi Na Mbori

Ya Mo Rago Naangba ti Yekova Watadu ka Gberã Tiko?

KA KARAGAPAI du kuti gu sanahe re nga Ii, gu kura sanahe kini ka kura berewe nga: Ya mo gaani mangaapai rengbe ka ba ngbarago watadu gberarago ti Mbori? Gu kura abawisigipai dudunguroo tipa raka naraki bakuru kusayo agumba gupai nga ani arengbanga ka ba ngbarago watadu gberarago ti Mbori te. I agumba gupai nga boro ho du na maapai kurii Mbori te, sidu, boro ho rengbe ka ba ngbarago watadu gberarago tiko te. Ono Ziazia Kekeapai nagumba gu kurapai kia, si nagumba gupai nga Yekova naberã aberã tipa agu apai ani amangaha. Oni makianga agu afugo du rogo Atambuahe 78:40, 41.

Atambuahe kapita 78 nafura tipa ga Mbori mangaapai na agu aYisaraere nadumbata. Tifuo Yekova kusiyo be sunge kanga Ezipeta yo, ko aidi ka manga kparakpara pagume naayo. Ko afu gu kidohe fuyo nga ka i nye niruruyo ko yo du ko ni, i adani gako “wene ũkumuko” na ko amangasunge naayo tipa ka digiso gako ringbisapai. I aidi gupai Yekova agumbaha na ki mangi Ndiko nga ga mokido naako. Ono ya mo i amangi gupai i amangi mozunga nga i nika mangaha?​—Gate 19:3-8.

Bake papara Atambuahe ayaa: “Na nge agu arago i anasa mungu kuti ko ngbakungba yo.” (Veresi 40) Gu veresi ngbe tifuo gure nayaa: “I aasadi Mbori berewe na berewe.” (Veresi 41) Agi averesi re gumba gupai nga i aasamungu kuti Mbori berewe na berewe. Gi gayo samungu re atona ngbutuko fuo kurayo Ezipeta yo. I atona ka kpakana Yekova kini gumba gupai nga ko angeranga berewe fuoyo te watadu ko aidanga ka ngera berewe fuoyo te. (Pa Geda Aboro 14:1-4) Gu kura umba buku abasafugo Ziazia Kekeapai ninaamangasunge nani agumba gupai nga gu fugo nga “I anasa mungu kuti ko” re, “rogoyo rengbe kadu nga ‘ i anyakasi kpotoyo yo fu Mbori’ watadu ‘i aya fu Mbori wee, Oó.’” Ono wa si aanivura duwo, Yekova aanimbupai ambu fuyo ho i aanisaberã ni bambiko ko nga boro inapai. Ono i aanikaragatiyo berewe ki samungu kutiko na si kini ndu kinawo sa.​—Atambuahe 78:10-19, 38.

Ginipai naanimangi Yekova ho i aanisamungu ni kutiko berewe? Veresi 40 nagumba gupai nga i ‘aanirungosiko.’ Gu kura sasa fugo gu veresi re nayawee, i “aanasako rago naagberã tiko.” Gu kura buku sa afura tipa gupai nanaamanga Mbori ho i anisamungu ni kutiko ki yaa: “Kina wai gu mangaapai nga ga gude basasangba ninaaimisa ngbadu avunguni, kinawo a i aimisi ga Yisaraere Ziazia Ko.”​—Veresi 41.

Ginipai rengbe ani ka wirikaha rogo agi averesi nga ga Atambuahe re? Si nafu kina wasa furani ka ino gupai nga Yekova naka kuti airisiko nyanyaki na ko azanga bee tiyo nikina boro ipo te. Gu kurapai berewe ani awirikaha nga gaani mangaapai rengbe arengba ka ba gberarago ti Yekova. Ginipai tie pa ino oni gupai nga gaoni mangaapai rengbe arengba ka ba gberarago ti Yekova asa roni oni mangihe? Ya mo si nasa roni oni idi ka manga gupai du niruruhe?

Kuba gupai nga ka manga ingapai nga gu nika ba gberarago ti Yekova, si naida ani sia ka manga gupai nga gu du niruruhe nga gu nika sa ngbadu Yekova si ngi angi. Kina boro gupai re ko aida airisiko mangihe, bambiko sangbako nga: “Ako wire, mo dú ni iratatamana, ka fu ngbarago fu kpotore yo.” (Snz. 27:11) Gu kura he ho ngba kisusi nga gu rengbe ani ka fuhe fu Yekova susi gu nga ani raki gaani raka ngba gu gene naye na ngbarago ku kpotoko yo te.

[Gu sura du ti kpewaraga 32]

Gu kura he ho ngba kisusi nga gu rengbe ani ka fuhe fu Yekova susi gu nga ani raki gaani raka ngba gu gene naye na ngbarago ku kpotoko yo te