Oni Sa gi Regbo Tingida Pakpio Yesu Re ni Regbo Ngbarago
1. Gini gene rengbe ani ka kiiso gaani sunge tungusapai ngbaha rogo agu adiwi nga ga Tingida Pakpio Kristo?
1 Ya mo oni naida ka kiiso gaoni ngbarago rogo agu adiwi nga Marungu, Zerekpe na Merekoko? Gu gene duho rengbe oni ka kiiso gaoni ngbarago ngbaha nga ka kiiso gaoni sunge tungusapai, na ka rengba du oni ki mangisunge ni moundo abazakigene. Waigu gipai re nika ye na ngbarago furoni?
2. Wai pa kiiso gaani sunge tungusapai nika ye ngbarago furani?
2 Oni Kiisi Gaoni Ngbarago: Yekova akusi rani ani gbia wasa na ngbarago ti irisoko na ki mbiisi gaani azingo nga ga toro. (Mt 5:3) Na ko amangi rani a ani gbia ngbarago ti fu ani he fu kura aboro. (Amo 20:35) Tungusapai nasa rani ani mangiapai ue—nga ka iriso Mbori na ka undo aboro. Si tie ziazia nga mangasunge tungusapai naye na bakere ngbarago. Na kurigure, ka ani atungusapai nibakerehe kinawo a gaani biri tungusapai nikaa kio. Na wa ani nika gbia inohe, ani nika du na kido na ani agundenga ho ani atungusapai ni te. Ani na badungu amamu berani ka manga dezirepai na ka tona wirika Ziazia Kekeapai na aboro. Gipai re nasa tungusapai si du ni pa ngbarago.
3. Tipagine du agu adiwi ti ni nga Marungu na Zerekpe niwene adiwi tipa ka mangasunge ni moundo abazakigene?
3 Agu adiwi nga Marungu na Zerekpe nika ngia wene adiwi tipa ka mangasunge ni moundo abazakigene bambiko ani rengbe ka manga siapai singia ani naida ka mangaha tipa asaa 30 watadu 50. Kurigure, tona Rago Nzengu rogo Marungu 22 ka da kuti Rago Sa Sunge rogo Zerekpe 14 ti regbo Tingida Pakpio Yesu, ani nika manga tua ka yamba aboro tipa Tingida Pakpio Yesu. Adungurati nika du na bakere ngbarago wa badungu aboro nika mangasunge “kina ku bani sa” ka nyasa gayo dagbarago wa rengbe omeyo na ni ti gu regbo re.—Zef 3:9.
4. Ka si du nga ani naida ka mangasunge ni moundo abazakigene, ginipai si aida ani mangihe?
4 Oni Mbakadi Tironi Awere: Ka singia oni atambakada nga tironi te, oni di regbo ka wisigo agu apai du tipa roni ka bi agu aˈ ariapai si naida oni mangihe tipa ka kiiso gaoni sunge tungusapai rogo diwi sa watadu dungu adiwi. Oni mangi kparakpee tipa gipai re. (Yak 1:5) Oni fura na gaoni aborokporo tipa gipai re gbiati agu aboro du ba dunguratise yo. (Snz 15:22) Oni rengbe arengba ka gbia gu ngbarago naye be mangasunge ni moundo abazakigene ka si vura du nga oni nawoka awoka watadu regbo beroni te vurũ.
5. Ginipai rengbe ka manga ka ani kiisi gaani sunge tungusapai ti gi regbo nga ga Tingida Pakpio Yesu re?
5 Yekova naida gako amoyambu du na ngbarago. (Tam 32:11) Ka ani fu tirani ka kiiso gaani sunge tungusapai ti gi regbo nga ga Tingida Pakpio Yesu re, ani nika gbia ngbarago na si nika ye na ngbarago a fu gu Barani du ngbangbaturũ yo.—Snz 23:24; 27:11.