Sanduki Asanahe

◼ Si naida ani wisigi Ziazia Kekeapai na gu boro namanga sonakumbatayo tipa bagizo regbo wai?

Gupai ngba gbe nga ka wisigo Ziazia Kekeapai na gu boro namanga sonakumbatayo daho ní nika nyasa abuku ni ue. Agu abuku re nga What Does the Bible Really Teach? gbiati gu nga “Keep Yourselves in God’s Love.” Kina gu bangisapai re si aida ani mangihe na gu boro zi bapatiza mbata fu ní nyasi agu abuku ue re. Fuo zio ní bapatiza, ani rengbe arengba kindi kaa gasa gu regbo ani adiaha na ní, bange wai ani nakaraga tirani fuoni, na bange wai ani nawisigipai na ní rogo diwi yo. Ka si du nga gu kura batungusipai gasi rani ho ani andu ni ka wisigo Ziazia Kekeapai na gu boro re na kidu pati gu wisigopai re, ní rengbe arengba a ka geda gu regbo re.—Oni bi gu Gaani Sunge Nga ga Kindo nangia ga Marungu 2009 ti kpewaraga 2.

Si naida vovo aboro nyaki anyaka mbata rogo rengo yo wenengai ani ru ka mbu wirikapai naayó. Si naida ‘tarayo’ rimi rogo Kristo yo kidu ni ‘duaduaha rogo idapase’ yo tipa i rengbe ka diabe agu asada i nika gbiatiyo nani. (Koro. 2:6, 7; 2 Tim. 3:12; 1 Pet. 5:8, 9) Kurigure, tipa i yugupai fu gu kura aboro wenengai, si naida i duna gu “inahe nga ga rengo.” (1 Tim. 2:4) Ka ani nyasi wisigo abuku naayó ue, si nika undo yó i ru nyanyaki ngba “gu gene nangbe koyo du unga ni.”​—Mt. 7:14.

Mbata fu i idihe fu boro ní zi bapatiza, si naida abaakumba bi gupai nga ní ima giarogo gu bangua ayugopai nga ga Ziazia Kekeapai wenengai na ní naraka gani raka ringbisihe kutini. Si naida abaakumba du na bakere rubangirise gbe ho i awisigo gu boro ni tipa bapatiza nga gu ní ata nyasanga abuku ue ya. Ka si du nga boro ata rẽnga tipa bapatiza te, si naida abaakumba undo ní tipa ní rẽ tipa bapatiza kumbatayo.​—Oni bi gu buku nga Organized to Do Jehovah’s Will, ti akpewaraga 217-218.

[Gu kpiahe du ti kpewaraga 2]

Si naida vovo aboro nyaki anyaka rogo rengo yo wenengai