Órni rioʼ desgrasy
¿TOIBTICA buelt ma gosaclolo ndeʼ la? Pal scú láani, nantzaydo que rienlo que buñ ni radudy ló desgrasy reʼ, radzuibyibu, diti raluladxyibu ni cayac, ranit xcalrrienyibu, né dada raitydaʼyibu. Xidal buñ nigolú rareʼganyibu né radopy fuers layibu. Por ngú, ma diti nainy guibanyibu.
Pal ma bisnitlo guirá ni naplo xtol guiérodann, xo rodann o stipnés desgrasy, sigory láaca radopy xfuerslo. Sigory dada cayonylo pensary que ma diti noʼ razón par guibanylo. Per la Biblia ná que noʼ razón par guibanylo né que noʼ razón par gaplo confianz que ló dzú ni sietra sabanyno sacróyen.
ÓRNI MA NANNO NI NÁ LA BIBLIA RADUDYNI ESPERANZA LÓONO
Eclesiastés 7:8 ná: «Más galán órni ralox toib cós que órni rasalóni». Pal gosaclolo toib desgrasy rodann né raquiin salólo stoib, sigory ronylo pensary que diti noʼ razón gonylo láani. Per pal raplo paseins né ronylo xtem, dxoga dxoga sadzaʼ mod nabanylo.
La Biblia ná que sadxin dzú órni «buñ ma diti sacalas rudx» (Isaías 65:19). Diitzreʼ sac cumplirni órni Gobierno xtuny Dios gony Gudxlio reʼ toib lagary móz (Salmo 37:11, 29). Dipa sioʼ más desgrasy. Guirá galrrioʼob né cós ni rastoʼby lóono sanitlóni por tipzó. Dios ni nap Xiroʼ galnadip ná: «Cós ni ma godudy diti sioʼ ni sasetnaladx láani, diti sadxinni lainy galnabany» (Isaías 65:17).
Bunysi pensary: Dios ni bisaʼ lóono ma noʼ ni bunybu par guibanyno goxtiguie ló dzú ni sietra né par gapno esperanza, raniiny láabu guibanyno sacró ló Gobierno xtunybu (Jeremías 29:11). ¿Ragoʼ esperanza reʼ gan xcalnabanylo par guibanylo la? Sally, ni bisetlano ló primer artículo reʼ ná: «Pal ronylo pensary ló galnasác ni guicaʼlo órni gony mandary Gobierno xtuny Dios, sacnéni looy par diti tampa gonylo pensary ló guirá ni gosaclolo né gony guantarylo».
¿Xí mápa mer gony Gobierno xtuny Dios? Buny por ganlo xi gonyni. Modreʼ sadudylo cuent que noʼ razón guibanylo ná ma godudylo ló xiroʼ galrrioʼob, né sadudylo cuent que mápa mer guirá desgrasy reʼ sialadxlo láani. Laʼga cabésno guicaʼno galnasác reʼ, xilitz la Biblia labúu gacnéni looy gony guantarylo guirá desgrasy reʼ. Guisetlano tipnés ejemplos.