Órni raity buñ ni nadxiʼlo

«Bisan lagola tisintiempsi goity, né diti labúu buni xitcal par diti ñaitybu. Ná godudy xidal beʼo, órni bisetnaladxi láabu, gocni suusi natzaʼis buñ toib gudxil ladxdaʼya. Rioʼ ór nigolú godó xian naʼ. ¿Xigony goitybu? Láaca gosaca que gopa dool portín diti goyonéya láabu más tiemp» (Vanessa, Australia).

PAL ma goity toibtica buñ ni nadxiʼlo, sigory láaca rioʼ nabannlo, rasaclo que noʼlo toiblo né radopy xfuerslo. Sigory dada radzuitzlo, ragotzlo dool looyca né radzuibylo. Sigory dada ranabdiitzlo looyca pal noʼ razón guibanylo.

Diti mal láani cudxaʼlo, pal ribdxaʼlo radudyni diitz que nigolú binladxlo láabu. Per ¿noʼ ni labúu guisialdó xcalnabanylo nika tidxó la?

¿XÍ LÁANI LABÚU GACNÉ LOOY?

Ná ralooypani diti noʼ ni labúu guichoc ló galrrioʼob ni rasaclo, ni guisetlano nigoreʼ sigory labúu sacnéni looy.

GORUDXAʼ PAL NAINY LOOY

Diti guirá buñ toibsi midid rioʼ nabann, né diti toibsi midid racla xcalrrioʼob buñ. Per órni buñ ribdxaʼ, ngú rasialdó xcalnabanyibu. Vanessa, ni bisetlano nagaa, ná: «Pórsi galrribdxaʼ buni, modcu goleʼya guirá ni goyoʼ lainy xcalnabani». Sofía, ni tisintiempsi goity beel, ná: «Toib galrrioʼob rodann gosaca órni bisetnaladxi ni góc. Gocni suusi naxalyibu ló xi herida né naguipyibu loni. Ná nigolú rioʼobni, raquiin guieer loni par guialni».

GONIʼ NI RONYLO PENSARY NÉ MOD RASACLO

Rioʼ ór wal rioladx buñ tzoʼ toib, per más sasac naganlo guicalólo xcalrrioʼoblo toiblo. Jared, toib mbioxhlas de 17 íz ni goity bixios rasetnaladx: «Sigory nirosondi xi goniya, per nigolú gocnéni naʼ ñaabi stipnés ni bisioʼob xcalnabani». Janice ni bitlaa ló primer artículo reʼ, ná: «Goninéya stipnés buñ, ngú nigolú bisialdó xcalnabani. Bidudi cuent que noʼ ni rien naʼ né que diti noʼya tobi».

CUACUENT XCALRRACNÉ STIPNÉS

Toib doctora ná: «Buñ ni radudy lagary que xfamil o ximig gacné layibu, más naguel rareʼyibu ló galrrioʼob ni noʼyibu ló». Góoch guirá ximiglo xi labúu gonyibu par labúu gacnéyibu looy. Sigory nainy gacnéyibu, per diti nanyibu ximod gonyibu láani (Proverbios 17:17).

BIBIGAX MÁS RONOʼ DIOS

Tina ná: «Órni galguitz cáncer tisintiempsi bigaityni tzeʼela, bisnita ximigdxina ni más gopa confianz, né guirá galnagan ni cualóya ma goodxi láani Dios. Suusipa bireʼ bacaʼal lóoya gonaba Dios nadudy fuers naʼ par labúu nadzelioya. Dios gocné naʼ de xidal mod...». Tarsha, ni gop 22 íz órni goity xinaʼ, rasetnaladx: «Ni biila la Biblia guirá dzú nigolú bisialdóni xcalnabani. Guirága ór gocnéni naʼ ñoni pensary ló cós tzaay».

BUNY PENSARY QUE GUEʼET MA BIÁS

Tina rasetlaa: «Primer, diti noʼ pu gocnéni naʼ que gueʼet guiás. Ni máspa biquiinna ór cú ngú tzeʼela, né ximbioxa biquiinyibu bixiosbu. Per nigoreʼ ni ma godudy tap íz, dipa rialadxi que gueʼet siás. Ngú racné naʼ par diti guireʼgana. Órni roni pensary que tzeʼela ma biás lad gueʼet né caguʼdxi láabu, ngú racné naʼ guibani nakit né goxt».

Sigory diti nimaca sial xcalnabanylo, per ni ná Vanessa sigory sacnéni looy. Láabu nábu: «Ronylo pensary que dipa labúu sareʼlo loni, per dxoga dxoga rareʼ buñ loni».

Bisetnaladx: ná diti labúu sialadxlo láabu, noʼ razón par guibanylo. Né xcalrracné Dios, looy labúu guidzaklo ximiglo né guibanylo goxt. Mápa mer, Dios salísbu gueʼet. Raniiny láabu cuʼdxlo buñ ni nadxiʼlo stoib. ¡Ór cú galrrioʼob ni noʼ lainy xcalnabanylo sanitlóni por tipzó!