1 | Oración «Colguisian ladxñabu guirá galrrasaʼ ni napto»
LA BIBLIA NÁ: «Láaca colguisian ladxñabu guirá galrrasaʼ ni napto, portín láabu rioʼbu ló galrrasaʼ por lóoto» (1 PEDRO 5:7).
¿Xí radudyni diitz?
Jehová raiby lóono gaibyno láabu nitisi galnagan o galrrasaʼ ni cacalóno (Salmo 55:22). Nitisi galnagan ná nacni xiroʼ o mitien labúu gaibyno láani Dios. Pal rasacni par lóono láaca rasacni par Jehová, portín Jehová rioʼ galrrasaʼ por lóono né mod rasacno. Par guisacno sacró primer la, raquiin gonyno oración (Filipenses 4:6, 7).
¿Ximod racnéni lóono?
Órni xpensaryno caxoʼ rasacno que noʼno toibno. Portín stipnés diti rien xi galnagan cadudyno ló (Proverbios 14:10). Per Dios riembu xi rasacno né rioʼbu xalagaryno, por ngú labúu gaibyno láabu ximodpa rasacno. Jehová racaabu cuidad lóono, nanbu xi galrrioʼob cacalóno, nanbu xi galnagan cacalóno, por ngú racladxbu gaibyno láabu nitisi cós ni ragoʼ lóono ló galrrasaʼ (2 Crónicas 6:29, 30).
Órni raninéno Jehová, más napno confianz que sanbu lóono. Labúu guisacno xomod toib ni bicaʼ la Biblia ni goniʼ ndeʼ: «Looy ma bibiʼlo xcalrrioʼoba; nanlo xi galrrasaʼ noʼya ló» (Salmo 31:7). Ni ma nanno que Jehová nan ló guirá ni radudyno lóo, labúu gacnéni lóono par diti guireʼganno. Per diti nosi rabiʼbu galrrioʼob ni cadudyno ló. Diti noʼ stoib ni rien lóono xomod Jehová, láabu raquiimbu la Biblia par guisialdóbu xcalnabanyno né gony animarbu lóono.