ARTÍCULO NI GUISUIDYNO 29
CANCIÓN 121 Necesitamos autodominio
Nanísi guiguaʼno par diti gonyno galkié
«Colguiguaná né colgony oración guirá ór par diti tzaguiabto ló tentación» (MAT. 26:41).
TEMA
Non gonyno rutirigaʼlni lóono par diti gonyno galkié né láaca par diti gonyno cós ni gony que tzaguiabno loni.
1, 2. a) ¿Xí abís bidudy Jesús? b) ¿Xigony biab xpiin Jesús ló tentación? (Láaca bibiʼ dibuj).
«ESPÍRITU noʼni puext, per beʼel laidyno diti nadipni» (Mat. 26:41b).a Né diitzreʼ Jesús bislooy, que gontzaybu que buñgudxlio nacno buñ galkié né rachéno, per láaca gochbu lóono gapno cuidad diti tudy midid gapno confianz lóocano. Antes ni naniʼ Jesús diitzreʼ, xpiimbu goniʼ que dipa sasianyibu Jesús (Mat. 26:35). Sacró ngú ni goniiny layibu, per diti bidudyibu cuent que diti nagan ñony buñ ni ná stipnés órni ñoʼ galnagan. Por ngú Jesús góoch layibu: «Colguiguaná né colgony oración guirá ór par diti tzaguiabto ló tentación» (Mat. 26:41a).
2 Órni gonásyibu Jesús, ¿xí buny xpiimbu? Nabanni, diti biguaʼyibu naní, né biabyibu ló tentación. Diti gonyibu pal goxincuca nanás buñ Jesús né bunyibu ni goniʼyibu diti ñonyibu: bisianyibu Jesús (Mat. 26:56).
Jesús góoch xpiin diti ñaisyibu né naguaʼyibu naniʼ par diti ñabyibu ló tentación, per layibu bisianyibu Jesús. (Bibiʼ párrafos 1 né 2).
3. a) Pal diti nainy lóono guisianno Jehová, ¿xigony diti non gapno confianz lóocano? b) ¿Xí guisuidyno ló artículo reʼ?
3 Lóono láaca dipa tudy midid gapno confianz lóocano. Nigolú, guiráno ma goloʼno guicno diti guidudyno lagary tzoʼ ni galsit lóono de Jehová. Per láaca nacno buñ galkié, né labúu tzoʼ ni guichiin lóono gonyno cós mal (Rom. 5:12; 7:21-23). Tiptisi, labúu guicalóno tentación ni rasac naganno diti gonyno. Pal diti nainy guisianno Jehová né Jesús, non guisobno ni raiby Jesús lóono né guiguaʼno naní. Né ngú ni guisuidyno ló artículo reʼ. Primer, guibiʼno ló xi cós non gapno cuidad. De ngú, guisuidyno ximod gapno lóono par diti tzaguiabno ló tentación. Né láaca, guisuidyno xi labúu gonyno par guiguaʼno naní guirá ór.
¿LÓ XÍ CÓS NON TZOʼNO NANÍ?
4, 5. ¿Xigony non guiguaʼno naní par diti gonyno galkié ni diti nac nirodann?
4 Tipnés galkié diti nacni galkié rodann xomod stipnés, per ná scú, labúu gonyni que ma diti guidzaktzayno Jehová. Né láaca, labúu gonyni que gonyno galkié rodann.
5 Guiráno racalóno tentación, per tigaagano napno debilidad xtunyno. Por ngú gadzéga tentación sacalóno. Por ejemplo, pentzi tipnés cayony rutirigaʼlni layibu par diti gonyibu toib galkié rodann, xomod galyoxh. Pentzi stipnés raniiny gony cós buidy, xomod ni kityibu ro nacyibu buñguieeu o ro nacyibu buñgonaʼ o guibiʼyibu pornografía. Né stipnés cayonyibu rutirigaʼlni layibu par diti guidzuitzyibu nimaca, gacyibu buñ farmay né guidzuibyibu buñgudxlio. Por ngú Santiago goniʼ que «tigaaga buñ radudy ló prueby, órni raniiny gonybu ni raniiny beʼel laidybu» (Sant. 1:14).
6. ¿Xí non guidudyno cuent?
6 ¿Nanlo xí debilidad naplo la? Toib riesga láani gonyno suusi diti ñapno debilidad o gonyno pensary que dxich noʼno né diti siabno loni (1 Juan 1:8). Guisetnaladxno que Pablo goniʼ que buñ ni nap «cualidad espiritual» láaca non guicaayibu cuidad láacayibu par diti guisacloyibu ngúca (Gál. 6:1). Nigolú racnéni lóono diti guiscúno lóocano né guidudyno cuent que diti tampa noʼno dxich (2 Cor. 13:5).
7. ¿Xí cós non gapno? Bisetlaa toib ejemplo.
7 Pal ma bidudyno cuent xi debilidad napno, ¿xí non gonyno? ¡Non gonyno dxiin loguiaʼni! Gonyno pensary ló ndeʼ: ló dzú ni see, ¿niis púti labúu ñoʼ buñ lainy toib gudx ni nap muros? Niis roʼ puert. Por ngú non ñapyibu lagarycu. Scúca non gapno lóono ro más naguel guiabno (1 Cor. 9:27).
¿XIMOD LABÚU GAPNO LÓONO?
8, 9. ¿Xí láani non ñony mbioxhlas ni ritlaa ló capítulo 7 xtuny Proverbios par diti ñonybu toib galkié rodann? (Proverbios 7:8, 9, 13, 14, 21).
8 ¿Ximod labúu gapno lóono ló toib tentación? Guibiʼno xi rasuidy lóono capítulo 7 xtuny Proverbios. Cu ritlaa de toib mbioxhlas ni buny toib galkié rodann né toib buñgonaʼ yox. Versículo 22 ritlaa que mbioxhlas reʼ cuanal buñgonaʼ reʼ. Versículos ni ritlaa nír rasetlaa que mbioxhlas reʼ buny tipnés cós ni dxoga dxoga buny que ñabbu ló galkié reʼ.
9 ¿Xí cós bunybu? Primer, godudybu órni ma cayogueʼel «gaxca ro sagaʼ buñgonaʼcu». De ngú, goyeebu niis roʼ rabés buñgonaʼcu (bíil Proverbios 7:8, 9). Después, órni bibiʼbu buñgonaʼ reʼ diti bibiguetbu niis ro sieedbu, nili golsitbu. Xalagary ngú bidudybu lagary que gonaʼ reʼ ñoo bixit láabu né naniné láabu de galrrascad ni ma bunycuentbu, sigory biyopybu mod que mbioxhlas reʼ ñony pensary que diti nacbu toib buñ mal (bíil Proverbios 7:13, 14, 21). Pal mbioxhlas reʼ diti ñony guirá ndeʼ, diti ñabbu ló tentación nili ñonybu galkié.
10. Xomodca mbioxhlas ni ritlaa ló Proverbios, ¿xí galrraché labúu gony buñ ló naareʼ?
10 Nitisi xpiin Jehová labúu nasaclóo modreʼ. Pentzi ñonybu toib galkié rodann né después nasacbu que guirá ndeʼ góc tiptisi. Labúu naniʼbu: «Diti naana ximod biaba loni». Pal rasetnaladxbu guirá ni bunybu, sigory sadudybu cuent que bunybu xidal cós ni buny que biabbu ló tentación reʼ. Pentzi bidzakbu buñ ni diti non nadzakbu, golúbu galnakit ni diti nac galán o goyeebu lagary ro diti non ñeebu o goyoʼbu ló internet ronoʼ cós yox. Sigory ma diti bunybu oración, ma diti bíilbu la Biblia, ma diti goyeebu reunión o ma diti buny predicarbu. Xomod gosaclóo mbioxhlas ni ritlaa ló Proverbios, sigory guirá ndeʼ diti gocni «tiptisi».
11. Pal diti nainy lóono gonyno toib galkié, ¿xí láani gonyno?
11 ¿Xí rasuidyni lóono? Diti gonyno galkiécu né láaca diti gonyno tipnés cós ni labúu gony que tzaguiabno ló galkié. Né ngúpa ni goniʼ Salomón después ni bisetlabu de mbioxhlas reʼ né gonaʼ yox reʼ. Órni bisetlaabu de buñgonaʼ reʼ goniʼbu: Diti guinitlo ló xinésbu (Prov. 7:25). Né láaca bidudybu consej reʼ: «Golsit de láabu né diti guibigaxlo roʼ xpuertbu» (Prov. 5:3, 8). Ló chop tzónsi diitz, pal diti nainy lóono gonyno toib galkié, non galsitno de guirá ni labúu gony que gonyno galkié.b Ndeʼ labúu quiñaani tipnés cós o tipnés dxiinien ni par tipnés cristianos ditini mal, per ni nanno que labúu gonyni que lóono tzaguiabno ló toib tentación (Mat. 5:29, 30).
12. ¿Xí láani goloʼ Job guic, né ximod ñacnéni láabu naguaʼbu naní? (Job 31:1).
12 Pal diti nainy lóono gonyno cós ni labúu gony que tzaguiabno ló galkié, labúu guisuʼno ejemplo xtuny Job. Par dipa nabiʼbu tipnés buñgonaʼ né pensary yox. Goloʼbu guicbu ñonybu ndeʼ, goniʼbu: «Naʼ ma buni toib acuerdo né bisalóya» (bíil Job 31:1). Ni ñapbu respet acuerdo ni bunybu, ñacnéni láabu par dipa ñonybu galyoxh. Lóono láaca non coʼno guicno guisagaʼdxichno par diti gonyno ni toib cós ni labúu gony que tzaguiabno ló toib tentación.
13. ¿Xigony non gapno cuidad né ni ronyno pensary? (Láaca bibiʼ dibuj).
13 Láaca non gapno cuidad né guirá ni ronyno pensary (Éx. 20:17). Noʼ tipnés ni ná que diti noʼ xi nac pal ronyibu pensary que cayonyibu cós mal, pal diti nigolúpa cayonyibu láani. Per diti scú nacni. Laʼga más ronyno pensary gonyno cós mal, más saniiny lóono gonyno láani. Ma lóocano ragoʼno toib tentación ni guisac naganno diti gonyno. Nigolú, sioʼ ór pensary mal sadxinni stiplaʼcani. ¿Xí láani gonyno órcu? Nimaca cueʼno láani tiplad né coʼno cós tzaay xalagaryni. Modcu diti radudyno lagary que pensary mal niʼsni, né gonyni que gonyno toib galkié rodann (Filip. 4:8; Col. 3:2; Sant. 1:13-15).
Non cueʼno tiplad guirá cós ni labúu gony que tzaguiabno ló tentación. (Bibiʼ párrafo 13).
14. ¿Xí láani sacné lóono par guiguaʼno naní par diti tzaguiabno ló tentación?
14 ¿Xí más sacné lóono par guiguaʼno naniʼ né diti tzaguiabno ló tentación? Non gandxichno que ni guisobno ni rony mandary Jehová guirá ór racnéni lóono. Rioʼ ór nagan gonyno que xpensaryno né ni raniiny lóono gonyno, tzoʼni de acuerdo né ni rabés Jehová de lóono, per pal ronyno rutirigaʼlni lóono par gonyno láani saguaʼno sacró né lóocano.
15. ¿Ximod racnéni lóono ni guiniiny gonyno cós tzaay?
15 Non guiniiny lóono gonyno cós tzaay, guianladxno cós mal né gandxiʼno cós tzaay (Amós 5:15). Pal ronyno ngú, sony nadipno ni ma goloʼno guicno de gonyno xinésni né ngú sacné lóono par diti gonyno toib galkié. Né diti ngúsi, sac nadipno par guicalóno toib tentación ni sigory diti cabésno o ni diti labúu cueʼno tiplad.
16. ¿Xigony ni tzodieʼno ló xchiin Dios racnéni lóono par guiguaʼno naní? (Láaca bibiʼ dibuj).
16 ¿Xí labúu gacné lóono par guiniiny gonyno cós tzaay? Gonyno rutirigaʼlni lóono par gonyno xchiin Jehová. Órni noʼno ló reunión o canino xtiitz Dios, cagoʼ nakitno Jehová, né ngú ni raniiny gonyno, órcu láaca nagan par tzoʼ tentación (Mat. 28:19, 20; Heb. 10:24, 25). Ni golno, guisuidyno né gonyno pensary ló Xtiitz Dios racnéni lóono par guianladxno cós mal né gandxiʼno cós tzaay (Jos. 1:8; Sal. 1:2, 3; 119:97, 101). Né guisetnaladxno consej ni bidudy Jesús: «Colgony oración guirá ór par diti tzaguiabto ló tentación» (Mat. 26:41). Órni rabeʼno tiemp par gonyno oración Bixiosno ni noʼ guibá, racnébu lóono né rony nadipno ni raniiny lóono, coʼ nakitno láabu (Sant. 4:8).
Ni tzodieʼno ló xchiin Dios sacnéni lóono par cueʼno tiplad tentación. (Bibiʼ párrafo 16).c
GUIRÁ ÓR GUIGUAʼNO NANÍ
17. ¿Xí galnagan cualó Pedro más de tibuelt?
17 Labúu gonyno gan tipnés debilidad ni napno, per sigory láaca noʼ tipnés ni nagan par gonyno gan. Ngú ni gosaclóo apóstol Pedro órni bidzuibybu buñgudxlio. Tzón buelt goniʼbu que diti bimbubu Jesús (Mat. 26:69-75). Después, goniʼbu né balory de Jesús nisló Sanedrín. Né rolooyni bunybu gan galnadzuʼpy ni gopbu (Hech. 5:27-29). Per chop tzón íz después por ni bidzuibybu guirá buñ ni góc circuncidar ma diti godóbu toibsi né cristianos ni diti góc judío (Gál. 2:11, 12). Debilidad xtunybu bireʼ loguiaʼni stoib. Diti nanno pal labúu bunybu gan láani.
18. ¿Xí labúu guisaclono né tipnés debilidades?
18 Modcuca, pentzi raquiin gonyno rutirigaʼlni lóono par gonyno gan toib debilidad ni bunyno pensary que ma bunyno gan. Toib hermano ná: «Chii íz diti bibiʼya pornografía, né buni pensary que ma buni gan láani. Per vis cu goyoʼrani cu, gocni xomod toib nimal guiʼx ni cabés ór par guinásmu nitisi ni tudy». ¡Galán láani diti bireʼganbu! Biembu que pal nainy láabu gonybu gan tentación cu, non ñonybu rutirigaʼlni láabu guirá dzú, pentzi dada dzú gaitybu. Tzeelbu né ancianos ma gocné láabu né stipnés cós par diti tzaguiabbu ló pornografía stoib.
19. ¿Xí labúu gonyno pal napno toib debilidad ni diti labúu rasianno?
19 Pal napno toib debilidad ni diti labúu ronyno gan, ¿xí labúu gonyno par diti tzaguiabno ló toib galkié xtolni? Guisobno consej ni bidudy Jesús: «Colguiguaná». Dada órni gonylo pensary que cayonylo gan láani, goleʼ tiplad cós ni labúu gony que tzaguiablo ló tentación (1 Cor. 10:12). Buny guirá cós ni racné looy par diti tzaguiablo loni. Proverbios 28:14 ná: «Buñguieeu ni guirá ór rioʼ naní, rioʼ nakitbu» (2 Ped. 3:14).
¿XIMOD RACNÉNI LÓONO NI GUIGUAʼNO NANÍ?
20, 21. a) ¿Ximod racnéni lóono ni guiguaʼno naní? b) Pal ronyno ni nac xcuentno, ¿xí láani sony Jehová? (2 Corintios 4:7).
20 ¿Raquiin guiguaʼno naní par diti tzaguiabno ló tentación la? ¡Scú láani! Galrrabaladx ni tipratsi rasac buñ órni rony galkié diti rigaʼlni galrrabaladx ni racaʼ buñ ni rasob ni ná Jehová (Heb. 11:25; Sal. 19:8). Guisetnaladxno que goyaʼno par gonyno ni nábu (Gén. 1:27). Nosi modcu sioʼ nayaa xcalrrienno né sabanyno por tipzó (1 Tim. 6:12; 2 Tim. 1:3; Jud. 20, 21).
21 Nigolú, «beʼel laidyno diti nadipni» per ndeʼ diti radudy diitz que diti labúu gonyno xitcal. Jehová noʼbu puext par gacnébu lóono (bíil 2 Corintios 4:7). Per guicaano cuidad que láabu radudybu galnadip lóono. Per láaca noʼ ni raquiin gonyno, gonyno rutirigaʼlni lóono guirá dzú par diti tzaguiabno ló tentación. Pal ronyno ni nac xcuentno, gapno confianz que láabu sadudybu fuers lóono ni ranabno láabu ló oración (1 Cor. 10:13). Né xcalrracné Jehová labúu guiguaʼno naní né diti siabno ló tentación.
CANCIÓN 47 Oremos a Dios todos los días
a NI RAREʼ LOGUIAʼ: Órni Jesús goniʼ de «espíritu» ló Mateo 26:41 bidudybu diitz ni noʼno puext gonyno xinésni. Órni goniʼbu «beʼel laidyno» goleʼ loguiaʼbu que nacno buñ galkié, por ngú casi guirá ór ronyno pensary ló cós mal né ronyno cós mal. Por ngú rioʼ ór ná nainy lóono gonyno xinésni, pal diti rapno cuidad labúu guiabno ló tentación né gonyno cós ni la Biblia ná que nac cós mal.
b Toib buñ ni ma buny toib galkié rodann labúu guidzelbu galrracné ló libro ni laa Bibany goxtiguie lesiony 57, números 1 a 3, né ló artículo «Miremos siempre hacia el futuro», ló Guiich ni Caniʼ noviembre íz 2020, páginas 27 a 29, párrafos 12 a 17.
c MOD RAREXA DIBUJ NÉ RETRAT: Toib hermano cayoʼol texto de dzú rosil, cayoʼolbu la Biblia órni cayoobu, né noʼbu ló reunión ni rac lainy xomal.