ARTÍCULO NI GUISUIDYNO 30
CANCIÓN 36 Cuidemos nuestro corazón
Lesiony ni rasuidyno de reyes xtuny Israel
«Lóoto sabiʼto ximod diti toibsi midid nac toib buñ ni rony xinésni né toib buñ mal, diti toibsi midid nac toib buñ ni rien Dios né toib ni diti rien láabu» (MAL. 3:18).
TEMA
Ni guisuidyno ximod buny juzgar Jehová reyes xtuny Israel sacnéni lóono guientzaayno xi non gonyno par coʼ nakitno Jehová.
1, 2. ¿Xí rasetlaa la Biblia de tipnés reyes xtuny gudx Israel?
LA BIBLIA rasetlaa más de 40 buñguieeu ni góc rey xtuny Israel né rasetlani mod bibany tipnésyibu.a Por ejemplo, raniʼni que dada rey ni góc buñtzay buny cós mal. Guinino de David. Nanno que gócbu toib rey tzaay, portín Jehová goniʼ: «David [...] cuanal naʼ né guidopy xcalnabany, láabu bunybu xinésni nislóya» (1 Rey. 14:8). Per, gotnébu tzeʼel buñ, né biyopybu mod par ñaity tzeʼel gonaʼcu ló guerr (2 Sam. 11:4, 14, 15).
2 Né láaca goyoʼ rey mal ni buny cós tzaay. Guinino de Rehoboam. Nanno que Jehová goniʼ que rey reʼ bisian láabu, portín goniʼbu que «bunybu cós mal» (2 Crón. 12:14). Per, órni Jehová góoch láabu que diti nadíilbu né 10 tribus xtuny Israel né que nadudybu lagary buñreʼ nabú chú ñac rey xtunyibu, Rehoboam bisob. Né láaca buny dxichbu xidal gudx par diti ñoʼ xi ñony xi enemigbu láani (1 Rey. 12:21-24; 2 Crón. 11:5-12).
3. ¿Xí labúu guinabdiitzno, né xí guisuidyno ló artículo reʼ?
3 Pal guirá reyes buny cós tzaay né cós mal, ¿xigony goniʼ Jehová que tipnésyibu góc fiel né stipnés yaca? ¿Ximod gadzé mod gocyibu? Ni ganno xcalrracapyni sacnéni lóono guientzaayno xi láani non gonyno par coʼ nakitno xcalnabany Jehová. Ló artículo reʼ guisuidyno que órni Jehová buny juzgarbu reyes xtuny Israel, goloʼbu cuent tzón cós reʼ: pal gondxiʼyibu Jehová né guidopy xcalnabanyibu, pal góc arrepentiryibu por xcalkiéyibu né pal buny adoraryibu Jehová.
GONDXIʼYIBU JEHOVÁ NÉ GUIDOPY XCALNABANYIBU
4. ¿Ximod diti toibsi midid góc reyes ni góc fiel né reyes ni diti góc fiel?
4 Guirá reyes ni Jehová goniʼ que góc fiel, gondxiʼyibu Jehová né guidopy xcalnabanyibu.b Por ejemplo, Jehosafat ni góc toib rey tzaay biyopy Jehová né guidopy xcalnabany (2 Crón. 22:9). La Biblia raniʼ de Josías ndeʼ: «Antes de láabu diti goyoʼ ni toib rey xomod láabu, ni nabiguet ronoʼ Jehová né guidopy xcalnabany» (2 Rey. 23:25). Per láaca goyoʼ stipnés reyes ni diti buny ngú. Por ejemplo, Salomón buny cós mal dzú ma yaca guilox xcalmandarybu né «diti bunybu xchiin Jehová Dios xtunybu né guidopy xcalnabanybu» (1 Rey. 11:4). Né ngúca raniʼ la Biblia de stoib rey ni diti góc fiel ni góc laa Abiyam: «Diti bunybu xchiin Jehová Dios xtunybu né guidopy xcalnabanybu» (1 Rey. 15:3).
5. ¿Xí radudy diitz gonyno xchiin Jehová né guidopy xcalnabanyno?
5 ¿Xí radudy diitz gonyno xchiin Jehová né guidopy xcalnabanyno? Radudyni diitz gony adorarno láabu portín nadxiʼno láabu, né diti gonyno láani lafuers o nosi portín ronyno pensary que ngú xinésni. Láaca raguiñani gandxiʼno láabu dada dzú gaityno.
6. ¿Ximod labúu guislooyno que nadxiʼno Jehová né guidopy xcalnabanyno? (Proverbios 4:23; Mateo 5:29, 30).
6 ¿Ximod labúu gacno xomod reyes ni góc fiel né gandxiʼno Jehová né guidopy xcalnabanyno? Non cueʼno tiplad nitisi cós ni labúu guitzoo xcalnabanyno né guichich galnadxiʼ ni napno Jehová, xomod ni gonyno galnakit ni rony mal lóono, gandxiʼno bidxiich, né guidzakno buñ ni diti noʼ pu racné lóono. Pal radudyno cuent que moda cayonyno ngú, nimaca non guitzaʼno (bíil Proverbios 4:23; Mateo 5:29, 30).
7. ¿Xigony non gapno cuidad né cós ni rony mal lóono?
7 Diti guidudyno lagary guidzoo xcalnabanyno. Pal diti rapno cuidad, labúu guiscúno lóocano né gonyno pensary que laʼga rony predicarno, rioʼno reunión né ronyno xidal dxiin lainy xcudx Jehová, diti noʼ ni toib cós ni labúu guixin mod radzakno Jehová. Par guientzaaylo láani, buny pensary que noʼlo fuer né nigolú nachich né cayac buroʼ. Órni nadxinlo rioʼ sigory ñoʼlo lainy chamar. Per ¿nasieglo puert ja? Pal diti nasieglo láani, nimaca ñoʼ buchich lanioʼ. Ndeʼ rasuidyni lóono que par tzoʼno gax de Jehová diti nosi raquiin gonyno xchiimbu. Non «guisiegno puert» a guirá cós ni rony mal lóono, par diti guichich «buu» xtuny gudxliogoxreʼ mod radzakno Jehová né guitzoni xcalnabanyno (Efes. 2:2).
GÓC ARREPENTIRYIBU POR XCALKIÉYIBU
8, 9. ¿Ximod buny rey David né rey Ezequías órni goyoʼ ni buny corregir layibu? (Láaca bibiʼ dibuj).
8 Xomod ma bisuidyno, rey David buny toib galkié rodann. Per, órni Natán goniʼ né láabu por cós mal ni bunybu, David góc buñdxo né góc arrepentirbu (2 Sam. 12:13). Diitz ni bicaʼbu ló Salmo 51 raslooyni que nigolúpa góc arrepentirbu. Diti bunybu suusi cayoʼobni láabu par ñaʼanbu sacró né Natán né diti ñoʼ xi nasaclobu (Sal. 51:3, 4, 17, ro rasalóni).
9 Rey Ezequías láaca biché nisló Jehová. La Biblia ná que «xcalnabanybu gocni farmay, né por ngú Dios bidzuitz né láabu né láaca bidzuitzbu né gudx Judá né gudx Jerusalén» (2 Crón. 32:25). ¿Xigony gócbu toib buñ farmay? Pentzi portín Jehová buñ que ñacbu ric, portín gocnébu Ezequías ñony gan a buñ asirios o portín bisial Jehová láabu de toib galguitz ni nagaity láabu. Sigory galfarmay cu bichiinni láabu ñatzbu nisló Babilonios por guirá cós ni gopbu, né profeta Isaías buny corregir láabu (2 Rey. 20:12-18). Xomodca David, Ezequías góc buñdxo né góc arrepentirbu (2 Crón. 32:26). Né órni Jehová bibiʼ ximod bibany Ezequías, goniʼbu que rey reʼ góc fiel. La Biblia ná: «Bunybu xinésni nisló Jehová» (2 Rey. 18:3).
Rey David né rey Ezequías gocyibu buñdxo né góc arrepentiryibu órni goyoʼ ni buny corregir layibu. (Bibiʼ párrafos 8 né 9).
10. ¿Xí buny rey Amasías órni goyoʼ ni buny corregir láabu?
10 Per, rey Amasías de gudx Judá buny cós tzaay, «per diti né guidopy xcalnabanybu» (2 Crón. 25:2). ¿Pu bichébu? Después ni Jehová gocné láabu ñonybu gan edomitas, Amasías buny adorar xtioxh gudxcu.c Né órni profeta xtuny Jehová buny corregir láabu, rey reʼ diti goyoʼ ló razón né diti gosaguelbu nacadiagbu profeta reʼ (2 Crón. 25:14-16).
11. Mod ná 2 Corintios 7:9, 11, ¿xí non gonyno par guitudy Jehová scásiʼ xcalkiéno? (Láaca bibiʼ retrat).
11 ¿Xí labúu guisuidyno de guirá ejemplos reʼ? Que non gac arrepentirno de xcalkiéno né gonyno rutirigaʼlni lóono par diti gonyno láani stoib. ¿Né pal ancianos rony corregir lóono dada ló toib cós ni par lóono diti tampa rasac ga? Diti gonyno pensary que Jehová ma diti racacuent lóono o que ancianos rabiʼ mal lóono. Portín dada reyes tzaay xtuny Israel biquiinyibu ñoʼ ni nadudy consej né ñony corregir layibu (Heb. 12:6). Por ngú, pal rioʼ ni rony corregir lóono, ¿xí non gonyno? 1) Gacno buñdxo, 2) guitzaʼno ni non guitzaʼno né 3) gonyrano xchiin Jehová né guidopy xcalnabanyno. Pal rac arrepentirno por xcalkiéno, Jehová satudy láani scásiʼ (bíil 2 Corintios 7:9, 11).
Pal rioʼ ni rony corregir lóono 1) non gacno buñdxo, 2) non guitzaʼno ni non guitzaʼno né 3) gonyrano xchiin Jehová né guidopy xcalnabanyno. (Bibiʼ párrafo 11).f
BUNY ADORARYIBU JEHOVÁ
12. ¿Ximod gadzé mod góc rey ni góc fiel né rey ni diti góc fiel?
12 Guirá reyes ni Jehová goniʼ que góc fiel, buny adoraryibu Jehová né buny animaryibu stipnés ñony ngúca. Nigolú, xomod ma bisuidyno, goyoʼ ór bichéyibu. Per layibu nosi buny adoraryibu Jehová né bunyibu rutigoygaʼlni layibu par nanitlóyibu dioxh falz lainy gudx.d
13. ¿Xigony goniʼ Jehová que rey Acab diti góc fiel?
13 ¿Né xí labúu guinino de guirá reyes ni Jehová goniʼ que diti góc fiel? Nanno que diti nosi bunyibu cós mal. Dada Acab ni góc toib rey mal, góc buñdxo né gosacbu mal órni gonbu que Nabot goity xtolbu (1 Rey. 21:27-29). Né láaca bisaʼbu tipnés gudx, né bunybu gan guerr (1 Rey. 20:21, 29; 22:39). Per Acab buny toib cós mal né dipa góc arrepentirbu: tzeelbu bikíil láabu né bunybu que stipnés buñ ñen dioxh falz (1 Rey. 21:25, 26).
14. a) ¿Xigony goniʼ Jehová que rey Rehoboam diti góc fiel? b) ¿Xí láani buny casi guirá reyes ni diti góc fiel?
14 Nigoreʼ guinino de stoib rey ni diti góc fiel: Rehoboam. Xomod ma bibiʼno, bunybu xidal cós tzaay. Per, órni góc nadip xcalmandarybu, bisiambu Xiley Jehová né buny adorarbu dioxh falz (2 Crón. 12:1). Desde dzúcu, goyoʼ ór buny adorarbu Jehová né goyoʼ ór buny adorarbu dioxh falz (1 Rey. 14:21-24). Diti nosi Rehoboam né Acab golsit de religión ni nigolú. Casi guirá reyes ni diti góc fiel gocnéyibu religión falz. Riendxichni que toib cós ni Jehová bibiʼ par naniʼbu que toib rey góc toib rey tzaay o toib rey mal, láani ngú pal buny adorarbu Jehová.
15. ¿Xigony nigolú rasac par Jehová adoración ni nayaa?
15 ¿Xigony nigolú gosac par Jehová que reyes ñony adorar láabu? Primer, portín xchiin rey láani ngú ñacnébu gudx ñony adorar Jehová mod rioladxbu. Ni rarop, portín órni guirá reyes reʼ bieen dioxh falz, diti bunyibu xinésni né buñ né bunyibu stipnés galkié rodann (Os. 4:1, 2). Né láaca, guirá reyes né guirá israelitas góc dedicaryibu Jehová. Por ngú, órni bienyibu dioxh falz, la Biblia ná que gocni suusi ñonyibu galyoxh (Jer. 3:8, 9). Toib buñ ni rony galyoxh ló sentido literal, ronybu galkié nisló tzeelbu, modcuca toib buñ ni rac dedicar Jehová, per después rien dioxh falz, ronybu galkié nisló Jehová (Deut. 4:23, 24).e
16. ¿Ximod diti toibsi midid nac par Jehová toib buñ ni rony xinésni né toib buñ mal?
16 ¿Xí láani rasuidyno? Que non cueʼno tiplad religión falz. Né diti ngúsi; non tzoʼno ló religión ni nigolú né dipa guireʼno loni. Profeta Malaquías nayadit goniʼ ximod diti toibsi midid nac toib buñ tzaay né toib buñ mal: «Lóoto sabiʼto ximod diti toibsi midid nac toib buñ ni rony xinésni né toib buñ mal, diti toibsi midid nac toib buñ ni rien Dios né toib ni diti rien láabu» (Mal. 3:18). Por ngú, diti guidudyno lagary que ni toib cós, nili xcalkiéno né xcalrrachéno cueʼ gan lóono né gonyni que ma diti gonyno xchiin Dios. Ni guisianno Jehová nacni toib galkié rodann.
17. ¿Xigony non gapno cuidad órni guiyopyno ni gac tzeelno?
17 ¿Naclo toib mbioxhlas né ma cayonylo pensary gonylo galtzeʼel la? Diitz ni bicaʼ Malaquías labúu gacnéni looy cutzaylo ni gac tzeʼelo. Buny pensary ló ndeʼ: toib buñ labúu gap cualidades sacróyen; per pal diti cayonybu xchiin Jehová, ¿nálo que nigoreʼ Jehová ná que buñcu rony xinésni la? (2 Cor. 6:14). Pal ñonylo galtzeʼel né láabu, ¿nálo que sacnébu looy ló sentido espiritual la? Bisetnaladx, ná guirá tzeʼel Salomón ni góc de stipnés gudx sigory gop cualidades sacróyen, diti bunyibu xchiin Jehová. Né dxoga dxoga bunyibu que xcalnabany Salomón ñen dioxh falz (1 Rey. 11:1, 4).
18. ¿Xí láani non guisuidy bixios mbiox xiin?
18 Lóoto ni ma noʼ xiin, labúu guiquiinto historias xtuny guirá reyes ni ritlaa ló la Biblia par gacnéto xiinto guiniiny gony xchiin Jehová. Nigolú rasac que xiinto guieen que Jehová goniʼ que toib rey góc toib rey tzaay o toib rey mal pal gocnéyibu stipnés buñ ñony adorar láabu. Colguisuidy xiinto né xtiitzto né mod ronyto que ni gonyno xchiin Jehová, golno la Biblia, tzoʼno reunión né guinino xtiitz Dios, non tzoʼni primer lagary lainy xcalnabányno (Mat. 6:33). Pal diti ronyto ngú, xiinto labúu gony pensary que nacyibu testigo xtuny Jehová nosi portín bixiosyibu né xinaʼyibu nac Testigo. Né conforma tudy tiemp, pentzi ma diti nagoʼyibu Jehová primer lagary né dada labúu nasianyibu galnigolú.
19. Pal toib buñ ralsit de Jehová, ¿ma diti labúu guibiguetbu la? (Láaca bibiʼ cuadriyen ni laa «Looy labúu guibiguetlo ronoʼ Jehová»).
19 Pal toib buñ ralsit de Jehová ¿ma diti labúu guibiguetbu la? Labúu, portín labúu gac arrepentirbu né gacbu ximig Dios stoib. Nigolú, non gacbu buñdxo né guicacuentbu xcalrracné ancianos (Sant. 5:14). Ni guicacuent Jehová láabu stoib, más rasacni que nitisi sacrificio ni gonybu.
20. Pal rasuʼno guirá reyes ni góc fiel, ¿ximod sabiʼ Jehová lóono?
20 ¿Xí láani ma bisuidyno de reyes xtuny gudx Israel? Labúu gacno xomod reyes ni góc fiel pal nadxiʼno Jehová né guidopy xcalnabanyno. Guisuidyno de xcalrrachéno, gac arrepentirno né guitzaʼno ni non guitzaʼno. Né láaca guisetnaladxno que nigolú rasac gony adorarno nosi Dios ni nigolú. Pal diti rasianlo Jehová, láabu láaca saniʼbu que naclo toib buñ ni rony xinésni nislóbu.
CANCIÓN 45 “La meditación de mi corazón”
a Ló artículo reʼ, órni ranino de reyes xtuny gudx Israel ranino de guirá reyes ni buny mandary xcudx Jehová. Tipnésyibu buny mandaryibu chop tribus ni goyoʼ ló reino xtuny Judá, stipnésyibu buny mandary 10 tribus ni goyoʼ ló reino xtuny Israel, né stipnésyibu buny mandary 12 tribus reʼ.
b NI RAREʼ LOGUIAʼ: La Biblia casi guirá ór raquiin diitz galnabany par guiniʼni mod nac buñ, ni raguiña ni raniiny lóono gonyno, xpensaryno, mod ronyno, ni nanno ronyno, ni rachiin lóono gonyno toib cós né metas xtunyno.
c Ralooyni, guirá reyes xtuny stipnés gudx ni diti góc israelitas, gopyibu costumbre de ñony adoraryibu dioxh falz xtuny gudx ni bunyibu gan.
d Rey Asá buny galkié rodann (2 Crón. 16:7, 10). Per, la Biblia ná que bunybu cós tzaay nisló Jehová. Nigolú, primer diti cuacuentbu ni góc corregirbu, per después ralooyni góc arrepentirbu. Par Jehová, cualidades sacróyen ni gopbu más gosacni que xcalrrachébu. Rey Asá nosi buny adorarbu Jehová né bunybu rutigoygaʼlni láabu par nanitlóbu dioxh falz ni goyoʼ lainy gudx (1 Rey. 15:11-13; 2 Crón. 14:2-5).
e Chop mandamientos ni cuá ló Ley xtuny Moisés goniʼni que nosi Jehová non ñony adoraryibu, diti non ñony adoraryibu ni toib cós nili toib buñ (Éx. 20:1-6).
f MOD RAREXA DIBUJ NÉ RETRAT: Toib anciano mbioxhlas, raibybu toib hermano que noʼbu xcalrrasaʼbu, portín hermano reʼ regoluʼ nís ni notz alcohol. Hermano reʼ rac buñdxo, racacuent consej ni bidudy anciano reʼ láabu, ratzaʼbu ni raquiin guitzaʼbu né ronyrabu xchiin Jehová né guidopy xcalnabanybu.