ARTÍCULO NI GUISUIDYNO 18
CANCIÓN 65 Lucha por progresar
Mbioxhlas, colguisuʼ Marcos né Timoteo
«Órni guieedlo bitné Marcos, portín sacnébu naʼ ló xchiin Dios» (2 TIM. 4:11).
TEMA
Ximod labúu gacné ejemplos xtuny Marcos né Timoteo mbioxhlas buñguieeu par gap cualidades ni caquiinyibu par gonyibu más por Jehová né por herman.
1, 2. ¿Xí labúu nacaa Marcos né Timoteo par ñony más ló xchiin Jehová?
PAL naclo toib hermano mbioxhlas, sigory nainy gonylo más ló xchiin Jehová né gacnélo más congregación xtunylo. Nigolú rioladxdo rabiʼdo que noʼ xidal mbioxhlas buñguieeu ni raniiny gacné stipnés (Sal. 110:3). Per ngú rioʼ ór naganni. Sigory diti rayopylo mod gonylo más ló xchiin Jehová, portín radzuibylo gonylo cós ni diti nanlo ronylo. O pentzi diti gosaguelo nacaʼlo toib dxiin lainy congregación, portín rasaclo que diti noʼlo puext par gonylo láani. Diti tzoʼlo ló galrrasaʼ, diti nosi looy rasaclo modcu.
2 Marcos né Timoteo cualóyibu galnagan xomodca ni cadudylo, per diti biduʼdyibu lagary que ni bidzuibyibu gonyibu cós ni diti nanyibu ronyibu o ni diti gopyibu experiencia nacaa layibu par ñonyibu dxiin por stipnés. Sigory Marcos bibany né xinaʼ lainy toib yoʼ móz órni apóstol Pablo né Bernabé biruʼ láabu ñony compañer layibu naniʼyibu xtiitz Dios lainy stipnés lagary (Hech. 12:12, 13, 25). Per Marcos gosaguelbu bisiambu lidxbu par ñonybu más ló xchiin Jehová. Primer goyeebu Antioquía né después goyeebu né Pablo né Bernabé stipnés lagary ni riaʼan sitgoluʼ (Hech. 13:1-5). Modcuca, sigory Timoteo golés né bixios né xinaʼ órni Pablo biruʼ láabu ñony predicar né láabu. Timoteo labúu ñony pensary que mbioxhlasa láabu né diti napbu experiencia par guicacuentbu invitación cu (bitzak láani né ni ná 1 Corintios 16:10, 11 né 1 Timoteo 4:12). Per goloʼbu guicbu tzeebu né Pablo né cuaʼbu xidal galnasác (Hech. 16:3-5).
3. a) ¿Ximod nanno que Marcos né Timoteo nigolú gosacyibu par Pablo? (2 Timoteo 4:6, 9, 11; láaca bibiʼ dibuj). b) ¿Xí galrranabdiitz guisuidyno ló artículo reʼ?
3 Dzú nacsayibu mbioxhlas, Marcos né Timoteo bisuidyibu bunyibu tipnés dxiin lainy congregación. Nigolú gosacyibu par Pablo, portín órni ma yaaca gaity apóstol reʼ, goniiny láabu que Marcos né Timoteo ñoʼ né láabu (bíil 2 Timoteo 4:6, 9, 11). ¿Xí cualidades xtuny Marcos né Timoteo buny que ñonladx Pablo layibu? ¿Ximod labúu guisuʼ herman mbioxhlas ejemplo xtunyibu? ¿Né xí consej ni biduʼdy Pablo labúu gacné layibu?
Marcos né Timoteo cuaʼyibu tipnés dxiin dzú nacsayibu mbioxhlas né por ngú Pablo binladx layibu. (Bibiʼ párrafo 3).b
GÓC XOMOD MARCOS: GOSAGUEL GONYLO DXIIN POR STIPNÉS
4, 5. ¿Ximod bislooy Marcos que gosaguelbu gonybu dxiin por stipnés?
4 Mod ná toib referencia, ni gony buñ dxiin por stipnés, raguiñani gonybu rutirigaʼlni láabu par gacnébu stipnés, né diti guisian gonybu láani, ná rioʼ ór naganni. Ngú ni buny Marcos. Órni Pablo diti gosaguel niné láabu ló ni rarop buelt ni goyeebu goniʼbu xtiitz Dios lainy stipnés lagary, sigory bioʼob xcalnabany Marcos (Hech. 15:37, 38). ¿Bireʼganbu né ma diti bunybu dxiin por stipnés la? ¡Yaca!
5 Marcos goyee né xfamilbu Bernabé stipnés lagary par goniʼyibu xtiitz Dios. Midid 11 íz después, órni Pablo goyoʼ press lainy gudx Roma, Marcos góc toibtica ni gocné láabu (Filem. 23, 24). Né apóstol Pablo nigolú biduʼdybu guixquix por galrracné ni biduʼdy Marcos láabu, por ngú goniʼbu que Marcos nigolú bisialdó xcalnabanybu (Col. 4:10, 11).
6. ¿Ximod gocnéni Marcos ni bunybu dxiin toibsi né cristianos ni nadip xfe? (Bibiʼ ñeʼ guiich).
6 Toib cós ni gocnégoluʼ Marcos, láani ngú ni godudybu tiemp bunybu dxiin toibsi né herman ni nadip xfe. Después ni goyoʼbu né Pablo lainy gudx Roma, bunybu dxiin toibsi né apóstol Pedro, ni goyoʼ lainy gudx Babilonia. Nigolú sacró bidzakyibu saʼyibu, por ngú Pedro goleʼ laabu «xiingaʼna» (1 Ped. 5:13). Sigory laʼga bunyibu dxiin toibsi, Pedro góoch láabu ximod bibany né buny Jesús xchiin Jehová, né después Marcos bicaʼ láani ló Evangelio ni sané laabu.a
7. ¿Ximod bisuʼ toib hermano mbioxhlas mod buny Marcos? (Láaca bibiʼ retrat).
7 Marcos goyodieʼbu ló xchiin Jehová né bidzakbu cristianos ni nadip xfe. ¿Ximod labúu guisuʼlo láabu? Pal naplo meta gonylo dxiin lainy congregación né yása guicaʼlo toibni, gop paseins né biyopyra stipnés mod ni labúu gonylo xchiin Jehová né gacnélo herman. Cuá cuidad ejemplo xtuny Seung-Woo, ni nigoreʼ nac anciano. Dzú gócbu mbioxhlas bitzakbu láabu né stipnés herman ni gop xízcabu. Órni bibiʼbu que stipnés herman cuaʼ tipnés dxiin lainy congregación, né láabu yaca, gosacbu que herman diti goloʼ cuent láabu. Bidxin midid goniʼbu de láani né ancianos, né toibtica anciano góoch láabu ñonybu rutirigaʼlni láabu par ñacnébu stipnés ná ñoʼ ór diti nabiʼ stipnés láani. Órcu goloʼbu guicbu gacnébu herman golien né herman ni biquiin galrracné par nadxin ló reunión. Órni rasetnaladxbu láani, nábu: «Bisuʼdi xi láani raduʼdy diitz gony buñ dxiin por stipnés, né biduʼdi cuent que ni gocnéya herman nigolú goloʼ nakitni naʼ».
¿Xigony galán láani que mbioxhlas tudy tiemp né cristianos ni ma nap experiencia? (Bibiʼ párrafo 7).
GÓC XOMOD TIMOTEO: BISLOOY QUE RIOʼLO GALRRASAʼ POR STIPNÉS
8. ¿Xigony goniiny Pablo ñony compañer Timoteo láabu órni goyeebu goniʼbu xtiitz Dios stipnés lagary? (Filipenses 2:19-22).
8 Órni Pablo bibiguet goyguen tipnés gudx ro buñ cuanal láabu, biquiimbu que herman ni nap balory ñony compañer láabu. Primer golúbu Silas, ni góc toib cristiano ni gop experiencia (Hech. 15:22, 40). Né después láaca golúbu Timoteo. ¿Xigony goniiny láabu que mbioxhlas reʼ ñee né láabu? Portín buñ goniʼ sacró de Timoteo (Hech. 16:1, 2). Né láaca portín Pablo gon que Timoteo goyoʼ galrrasaʼ por buñ (bíil Filipenses 2:19-22).
9. ¿Xigony labúu guinino que Timoteo bislooy que goyoʼbu galrrasaʼ por xhermanbu?
9 Desde dzú gosalóbu bunybu dxiin toibsi né Pablo, Timoteo bislooy que más goyoʼbu galrrasaʼ por stipnés, diti por láacabu. Por ngú, Pablo né confianz bisiambu Timoteo lainy gudx Berea par buny animarbu buñ ni laʼra góc cristiano (Hech. 17:13, 14). Órcu Timoteo bisuidy xiroʼ cós de Silas, ni láaca biaʼan lainy gudxcu. Per, después, Pablo bixelbu nosi Timoteo ñee gudx Tesalónica par ñony nadipbu congregación (1 Tes. 3:2). Ló 15 íz ni godudy, Timoteo binladxgoluʼbu xhermanbu né dada gorudxaʼbu né guirá ni gorudxaʼ (Rom. 12:15; 2 Tim. 1:4). ¿Ximod labúu guisuʼ herman mbioxhlas ejemplo xtuny Timoteo?
10. ¿Ximod bisuidy toib hermano ñoʼ galrrasaʼ por stipnés?
10 Toib hermano ni laa Woo Jae bisuidybu ñoʼbu galrrasaʼ por stipnés buñ. Dzú gócbu mbioxhlas, gosacnaganbu naninébu herman golien. Por ngú órni bibiʼbu herman golien ló reunión, nosi goniʼbu dioxh guirá herman reʼ. Par labúu ñacnébu mbioxhlas reʼ, toib anciano góoch láabu ñaibybu herman golien cós ni rioladxbu de layibu. Láaca gochbu Woo Jae ñony pensary ló tipnés cós ni labúu ñoladx herman golien ñan. Woo Jae buny láani. Nigoreʼ ma nacbu anciano né nábu: «Nigoreʼ ma diti rasacnagana guininéya buñ nac nitisi íz ni napyibu. Rasaca sacró portín rientzaaya xcalnagan stipnés, né ngú racné naʼ gaana ximod gacnéya layibu».
11. ¿Ximod labúu guisuidy mbioxhlas tzoʼ galrrasaʼ por herman de congregación? (Láaca bibiʼ retrat).
11 Mbioxhlas, looy láaca labúu guisuidylo guislooylo que rioʼlo galrrasaʼ por stipnés. Órni guidxinlo ló reunión, goniné guirá ni bidxin nac nitisi íz ni napyibu. Gonabdiitz layibu ximod noʼyibu, né bicadiag ni guicapyibu looy. Conforma tudy tiemp, ndeʼ sacné looy par guibiʼlo ximod labúu gacnélo layibu. Pentzi ganlo que toib galtzeʼel ni ma nac buñgolien caquiin galrracné né aplicación JW Library® o que diti napyibu chú guirenéyibu predicación. ¿Labúu ñacnélo layibu né teléfono o tableta xtunyibu o labúu nareʼlo né layibu predicación la? Pal looy rasanirlo né racnélo stipnés, saclo toib galán ejemplo par guidopynac congregación.
Herman mbioxhlas labúu gacnéyibu lainy congregación de xidal mod. (Bibiʼ párrafo 11).
CONSEJ XTUNY PABLO LABÚU GACNÉNI LOOY
12. ¿Xí labúu gony mbioxhlas par gacnéni layibu consej ni biduʼdy Pablo a Timoteo?
12 Pablo binladx Timoteo xomod xiimbu, né por ngú biduʼdybu consej Timoteo par ñeeni galán láabu ló xcalnabánybu né ló xchiin Dios (1 Tim. 1:18; 2 Tim. 4:5). ¿Xí labúu gonylo par láaca gacné guirá consej cu looy? Bíil chop guiich ni bicaʼ Pablo lóo Timoteo, suusi nacaʼbu láani lólo né biyopy mod guibiʼlo ximod labúu guisoblo láani. Guibiʼno tipnés ejemplos.
13. ¿Xí sacné looy par guienlo Dios?
13 «Gop meta guisuidylo guienlo Dios» (1 Tim. 4:7b). Ni guienno Dios raguiñani dipa guisianno láabu né guiniiny gonyno cós ni rioladxbu. Ndeʼ diti nacni toib cós ni ralnéno, xalagary ngú, non guiyopyno mod gapno láani. ¿Ximod gonyno láani? Pablo goniʼ: «Guisuidylo». Ló diitz griego, buñ biquiin diitzreʼ par golexayibu ximod bisuidy buñ par naxony órni nagoʼyibu prueby né stipnés buñ. Guirá buñreʼ, non ñonyibu tipnés cós par ñonyibu gan. Lóono láaca raquiin gonyno tipnés cós par gony nadipno mod radzakno Jehová.
14. ¿Xí láani nac meta xtunyno órni rolno la Biblia? Golexa láani né toib ejemplo.
14 Toibtica cós cu, láani ngú golno la Biblia guirá dzú. Bisetnaladx que órni gonylo láani, meta xtunylo láani ngú gony nadiplo mod radzaklo Jehová. Por ejemplo, buny pensary que cayoʼolo ni góoch Jesús mbioxhlas ric (Mar. 10:17-22). Mbioxhlascu bunybu crer que Jesús ngú Mesías, per diti gopbu xiroʼ fe par ñacbu xpiin Jesús. Ná scú, historiacu náni que Jesús binladx láabu. Pentzi radziguiaʼlo ni Jesús goniné mbioxhlascu né galrronladx. Riendxichni que goniiny láabu que mbioxhlascu nabútzay xi láani ñony. ¿Xí labúu guisuidylo de Jehová? Jesús rasuʼtzaay Bixios, por ngú, historia reʼ raslooyni looy que Jehová gondxiʼ mbioxhlascu (Juan 14:9). Láaca órni gonylo pensary ló mbioxhlas reʼ né mod godudybu, labúu guinabdiitzlo looyca: «¿Xí non goni par guibigaxa más ronoʼ Jehová né goni más por stipnés?».
15. ¿Xigony rasac que mbioxhlas gonyibu rutirigaʼlni layibu par gacyibu toib galán ejemplo? (1 Timoteo 4:12, 13).
15 «Góc toib ejemplo par herman ni nac fiel» (bíil 1 Timoteo 4:12, 13). Pablo gochbu Timoteo que nigolú gosac nasuidybu ñoʼoltzaybu né ñacbu toib galán mextra. Per láaca gochbu Timoteo naslooy cualidades xomod, galnadxiʼ, fe né ñacbu buñ nayaa. ¿Xigony? Portín ni ronyno más nadipni que ni ranino. Buny pensary que herman raiby looy coʼlo toib discurs ni raniʼ ximod gony buñ más ló predicación. Sasaclo más sacró guiniʼlo de láani pal cayonylo rutirigaʼlni looy ló predicación. Ejemplo xtunylo sacnéni ni guiniʼlo (1 Tim. 3:13).
16. a) ¿Ló xí gáay cós labúu gac herman mbioxhlas toib galán ejemplo? b) ¿Xí labúu gony toib mbioxhlas par gacbu toib galán ejemplo por mod raniʼbu?
16 Ló 1 Timoteo 4:12, Pablo bisetlaa gáay cós ro toib mbioxhlas labúu gac toib galán ejemplo. ¿Xigony diti ragoʼlo guiclo guisuidylo láani? Guinino que nainy gonylo dxiin ló primer cós ni rasetlani, «mod raniʼlo». Buny pensary ló cós ni labúu guiniʼlo par gony animarlo stipnés. Pal rabéslo lidx bixioslo né xinaʼlo, ¿labúu guiduʼdylo guixquix layibu por guirá ni ronyibu por looy la? Ló reunión, ¿labúu ñonylo rutirigaʼlni looy par gony comentarlo ló xtiitzcalo la? Né órni ma bilox reunión, ¿labúu ñaibylo toib herman cós ni bioladxlo mod bituʼdybu toib asignación la? Pal ronylo dxiin nadip par gaclo toib galán ejemplo por mod raniʼlo, stipnés buñ sabiʼ que caniʼslo xomod xpiin Dios (1 Tim. 4:15).
17. ¿Xí cós sacné toib mbioxhlas par tzagaʼlbu metas xtunybu? (2 Timoteo 2:22).
17 «Golsit de guirá cós ni rasobladx mbioxhlas né buny xinésni» (bíil 2 Timoteo 2:22). Pablo gochbu Timoteo nabeʼbu tiplad cós ni labúu nacaa láabu par nigaʼlbu metas xtunybu né ñony que ñalsitbu de Jehová. Pentzi rabiʼlo que noʼ tipnés cós ló xcalnabánylo, ni ná diti malni, labúu nagobni tiemp ni labúu naquiinlo par gonylo más ló xchiin Jehová. Por ejemplo, buny pensary balaati tiemp raguitlo pelot, rioʼlo ló internet o raguitlo videojuegos. ¿Labúu naquiinlo tiempcu par gonylo más por Jehová né por herman la? Pentzi labúu guiduʼdylo laalo lainy congregación xtunylo par gacnélo gactzay Salón del Reino o par gony predicarlo né camionguien. Ngú sacné looy tzoʼ ximiglo ni gony animar looy gaplo metas espirituales né tzagaʼlo láani.
GALNASÁC NI RACAʼ BUÑ NI RACNÉ STIPNÉS
18. ¿Xí galnasác cuaʼ Marcos né Timoteo?
18 Marcos né Timoteo bunyibu tipnés sacrificios par gocnéyibu stipnés, né por ni bunyibu ngú cuaʼyibu xidal galnasác né bibanyibu nakit (Hech. 20:35). Marcos goniʼ xtiitz Dios lainy xidal lagary. Né láaca bicaʼbu historia xtuny Jesús. Timoteo gocnébu Pablo par ñoʼ más congregación né buny animarbu herman. Riendxichni que Jehová bibaladx tanli né Marcos né Timoteo por guirá sacrificios ni bunyibu par ñonyibu xchiimbu.
19. ¿Xigony nigolú rasac que mbioxhlas buñguieeu guisob consej xtuny Pablo, né ximod sarecaayibu pal ronyibu láani?
19 ¿Xí rasuidy guiich ni bicaʼ Pablo lóo Timoteo lóono? Que apóstol Pablo nigolú binladxbu ximigbu. Né láaca rasuidyno que Jehová láaca ronladx looy né nainy láabu tzeeni galán looy né tzoʼ nakitlo. Por ngú nigolú rasac guisoblo consej xtuny Pablo né guiniiny looy gonylo más dxiin por herman. Pal ronylo láani, labúu saplo toib galnabány nakit nigoreʼ né ló dzú ni sietra «galnabány ni merpa nac galnabány» (1 Tim. 6:18, 19).
CANCIÓN 80 «Prueben y vean que Jehová es bueno»
a Pedro góc toib buñguieeu ni bislooy mod gosac, por ngú sigory gochbu Marcos ximod gosac né buny Jesús ló xidal cós. Pentzi por ngú, ló Evangelio xtuny Marcos, diti nosi rasetlani ni buny Jesús, láaca ximod gosac Jesús (Mar. 3:5; 7:34; 8:12).
b MOD RAREXA DIBUJ NÉ RETRAT: Xcuent Marcos noʼ guiduʼdybu ni caquiin Pablo né Bernabé órni goniʼyibu xtiitz Dios lainy stipnés lagary. Timoteo riguen toib congregación par gony nadipbu né gony animarbu herman.