IBhokisi Lemibuzo

◼ Uma ibandla licelwa ukuba lisize ekulungiseleleni umngcwabo, kungase kuphakame lemibuzo elandelayo:

Ubani okufanele anikeze inkulumo yomngcwabo? Lesi isinqumo okufanele senziwe amalungu omkhaya. Angase akhethe noma imuphi umzalwane obhapathiziwe onesimo esihle. Uma indikimba yabadala icelwa ukuba ilungiselele isikhulumi, ngokuvamile iyokhetha umdala onekhono ukuba anikeze inkulumo esekelwe ohlakeni lweNhlangano. Nakuba singeke simdumise oshonile, kungase kufaneleke ukudonsela ukunakekela ezimfanelweni eziyisibonelo lowo oshonile azibonisa.

Ngaphambi kwenkulumo yomngcwabo kungase kuqalwe ngengoma futhi kuphethwe ngengoma nomthandazo. Lenkulumo ayenzelwanga ukuhlasela izinkolelo zenkolo yamanga kodwa eyokududuza abashonelwe nokuphakamisa uJehova njengoNkulunkulu wothando nesihe. Umzalwane ngeke avumele umuntu wezwe ukuba abe nengxenye esimisweni ngoba lokhu kungaholela enkonzweni exube izinkolo.

Ingabe lingasetshenziswa iHholo LoMbuso? Lingase lisetshenziswe uma abadala bevumile futhi kungangqubuzani nemihlangano ehleliwe yasikhathi sonke. Ihholo lingase lisetshenziswe uma lowo oshonile ebenedumela elihle futhi eyilungu lebandla noma eyingane encane yelungu lebandla. Uma lowo oshonile ebenedumela elibi emphakathini ngenxa yokuziphatha okungekhona okobuKristu, noma kunezinye izici ezingase zithunaze idumela lebandla, abadala bangase banqume ukungakuvumeli ukusetshenziswa kwehholo.—Bheka incwadi ethi Ukuhlelelwa, amakhasi 62-3.

Ngokuvamile, amaHholo OMbuso awasetshenziselwa imingcwabo yabantu abangakholwa. Kungase kwenziwe okuhlukile uma amalungu omkhaya asele engamalungu akhuthele angabamemezeli ababhapathiziwe, futhi oshonile ebekade aziwa idlanzana ebandleni njengonesimo esihle ngaseqinisweni futhi enedumela elihle lokuziphatha okuhle emphakathini, futhi kungeke kwenziwe amasiko ezwe enkonzweni yomngcwabo.

Lapho benikeza imvume yokusebenzisa iHholo LoMbuso, abadala bayocabangela ukuthi kuwumkhuba ovamile yini ukuba ibhokisi libe khona emngcwabeni. Uma kunjalo, bangase bakuvumele ukuba lilethwe ehholo.

Kuthiwani ngemingcwabo yabantu bezwe? Uma lowo oshonile ebenedumela elihle emphakathini, umzalwane angase ayinikeze inkulumo yeBhayibheli eduduzayo ekhaya noma emathuneni. Ibandla liyokwenqaba ukusingatha umngcwabo womuntu obaziwa ngokuziphatha okubi, okungekho emthethweni noma ondlela yakhe yokuphila ibiphikisana kakhulu nezimiso zeBhayibheli. Ngokuqinisekile umzalwane ngeke abambisane nomfundisi ekuqhubeni inkonzo exube izinkolo noma kunoma imuphi umngcwabo oqhutshelwa esontweni leBabiloni Elikhulu.

Kuthiwani uma lowo oshonile ebesusiwe ekuhlanganyeleni? Ibandla ngeke lihileleke. IHholo LoMbuso ngeke lisetshenziswe. Uma lowo muntu ebenikeza ubufakazi bokuphenduka futhi ebonisa isifiso sokubuyiselwa, unembeza womzalwane ungase umvumele ukuba anikeze inkulumo yeBhayibheli ekhaya noma emathuneni, ukuze anikeze ubufakazi kwabangakholwa futhi aduduze nezihlobo. Nokho, ngaphambi kokwenza lesi sinqumo, kungase kube ukuhlakanipha ukuxoxa nendikimba yabadala futhi acabangele lokho abangase bakusikisele. Ezimweni lapho kungeke kube ukuhlakanipha ukuba lowo mzalwane ahileleke, kungase kufaneleke ukuba umzalwane oyilungu lomndeni womuntu oshonile kube nguyena onikeza inkulumo yokududuza izihlobo.

Esinye isiqondiso singatholakala kuyi-Nqabayokulinda ka-October 15, 1990, amakhasi 30-1; March 1, 1982 ikhasi 31 [w81 9/15, k. 31]; September 15, 1980 amakhasi 5-7 [w80 3/15, kk. 5-7]; December 1, 1978 amakhasi 7-10 [w78 6/1, kk. 5-8]; December 1, 1977 amakhasi 546-7 [w77 6/1, kk. 347-8]; INqabayokulinda yesiNgisi ka-March 15, 1970, amakhasi 191-2; kanye ne-Phaphama! ka-September 8, 1990, amakhasi 22-3 neka-September 22, 1977, amakhasi 15-19 [w77 3/22, kk. 12-15]. Bheka ne-Nkonzo Yethu YoMbuso ka-April 1987, ikhasi 4.