Ukwazisa Amaphayona Esinawo
1 Izisebenzi ezibambisene zoMbuso kaNkulunkulu ziyaqinisana. (Kol. 4:11) Uma sicabangela ukuthi umsebenzi oyinhloko webandla lamaKristu uwukushumayela izindaba ezinhle, kunezizathu eziqhubezelayo zokwazisa izisebenzi zesikhathi esigcwele eziphakathi kwethu.—Marku 13:10; Roma 16:2; Fil. 4:3.
NGANI?
2 Ngendlela eqondile, amaphayona akha ibandla ngokusebenza nabamemezeli abangenakho okuhlangenwe nakho okutheni ezicini ezahlukahlukene zomsebenzi wokushumayela. Lokhu kuhlanganisa ukufakaza ngomagazini, ukulungiselela nokwenza izimpindelo, kanye nokuqalisa nokuqhuba izifundo zeBhayibheli zasekhaya ngendlela ephumelelayo. Ngaphezu kwalokho, amaphayona angabeka isibonelo ekufakazeni ngesibindi ngokwethukela. Ukusekela kwawo amalungiselelo aphakathi nesonto okufakaza njengeqembu kuwanikeza ithuba lokusiza abanye. Ithonya lawo elihle ensimini lingazwiwa ikakhulukazi lapho amaphayona esekela inkonzo yasensimini ngempela-sonto, okuyisikhathi abanye abamemezeli abaningi abakwazi ukusekela ngaso.
3 Amaphayona asiza amabandla ekuyihlanganiseni kahle insimu futhi njalo. Lokhu kwenza abantu bajwayelane kangcono nesigijimi sethu futhi bazizwe bekhululeke ngokwengeziwe lapho sibavakashela ngoba bayazi ukuthi singobani. Amahora amaningi amaphayona awasebenzisa ensimini eshiya izincwadi kwabanesithakazelo futhi ehlakulela isithakazelo—empeleni, etshala futhi enisela izimbewu zeqiniso—angaholela ensimini ekhiqiza ngokwengeziwe.—1 Kor. 3:6.
EBANDLENI
4 Abaningi baye bakhuthazeka ukuba bangenele inkonzo yesikhathi esigcwele ngenxa yokuthi inhliziyo yabo yathintwa intshiseko yamaphayona athembekile. Omunye udade wayenqikaza ukuba iphayona lesikhathi esigcwele ngenxa yokuthi ayengekho ebandleni. Kodwa lapho ekhuthazwa umbonisi wesifunda, waba nesibindi wafaka isicelo sokuba yilo. Ngokushesha nabanye balandela, futhi lelobandla manje linenani elikhulu lamaphayona ashisekayo.
5 Kungase kube nezikhathi lapho abadala beyocela ukuba iphayona lisize umuntu ongasaphumi njalo noma opholile. Lolusizo lungahlanganisa ukumqhubela isifundo seBhayibheli lowomuntu. Ngaleyondlela ukwethembeka kanye nentshiseko yephayona kungavuselela kabusha uthando lwalomuntu ngeqiniso futhi kumsize ekumvuseleleni ukuba asebenzele ukufeza izibopho zokuzinikezela kwakhe.—1 Thes. 5:14.
KHUTHAZANI AMAPHAYONA
6 Amaphayona, nakuba enza okuningi ukuze akhuthaze abanye, nawo ngokwawo ayasidinga isikhuthazo ukuze aqhubeke ejabula enkonzweni yawo. (Roma 1:12) Ingabe ukhuluma kahle ngenkonzo yobuphayona? Wagcina nini ukutusa iphayona ngomsebenzi walo kanye nomoya walo wokuzidela? Amaphayona akwazisa ngokukhethekile ukuba nothile ozosebenza nawo enkonzweni yasensimini phakathi nalawo mahora osuku lapho bembalwa abamemezeli abaphumile. Ingabe ungahamba namaphayona futhi mhlawumbe ube namahora amaningana ekusekeleni umsebenzini wokushumayela?
7 Ungawakhuthaza kanjani ngezinye izindlela amaphayona? Ngaphandle kokutusa, ungabonisa ukwazisa kwakho ngezisebenzi ezinjalo ezizikhandlayo ngendlela ephathekayo ngokuhlanganyela nawo ukudla, ngokuwasiza ngokuzithandela ngezindleko zezinto zokuhamba, ungawasekela nangezinye izindlela kuye ngokwamandla akho.—Qhathanisa neyoku-1 Thesalonika 5:12, 13.
8 Njengoba abadala nezinceku ezikhonzayo behola ebandleni, amaphayona nabamemezeli ayonikeza ukusekela okugcwele emalungiselelweni enkonzo ahlelwe kahle. Ngaleyondlela sonke siyobe sisebenzisa izipho esinazo ‘ekukhonzaneni, kube-yilowo nalowo.’—1 Pet. 4:10, 11.