Sisekele Ngokugcwele Isimiso Sebandla Lenu Somhlangano Weningi
1 Eminyakeni ethile edlule insizwa ethile yathola isimemo semihlangano yebandla lendawo. Njengoba yayifuna iqiniso, yanquma ukuba khona eMhlanganweni Weningi wangaleloSonto, yasheshe yafika ehholo. Ummemezeli othile wayibingelela ngemfudumalo, futhi phakathi nengxoxo wasikisela isifundo seBhayibheli, lensizwa eyasenqaba. Nokho, inkulumo elungiselelwe kahle yayihlaba umxhwele kangangokuba yashintsha umqondo, futhi ngemva komhlangano yasamukela isifundo. Lensizwa yathuthuka ngokushesha futhi yabhapathizwa ngemva kwezinyanga ezimbalwa. Singafunda okungenani izifundo ezintathu eziwusizo kulokhu okuhlangenwe nakho.
2 Okokuqala, uMhlangano Weningi wawumenyezelwe. Ingabe niyazisebenzisa izimemo ezinyathelisiwe ukuze nimemezele isimiso somhlangano webandla lenu? Lapho usihlalo ememezela isihloko senkulumo yeningi ezonikezwa ngesonto elilandelayo, cabanga ngalabo abasensimini yakini abangase babe nesithakazelo esikhethekile kulesihloko, kungakhathaliseki ukuthi ngalesosikhathi bayazifunda izincwadi zethu noma cha. Abanye abantu abakuthandi ukufunda, noma bafunda ngobukhulu ubunzima, kodwa bangase bazimisele ukulalela inkulumo enesihloko esingokomBhalo.
3 Okwesibili, lomuntu omusha wamukelwa ngemfudumalo. Uma uhlela ukufika ehholo ngokushesha ngangokunokwenzeka, ungakwazi ukubingelela abafowenu nodadewenu kanye nabantu abathakazelayo. (Heb. 10:24) Uma umuntu omusha eqala ukuba khona, angase angazi ukuthi yini okufanele ayilindele. Chaza ukuthi imihlangano yethu iqala ngengoma nomthandazo, futhi umtshele indlela umhlangano ozoqhutshwa ngayo. Uma kufaneleka, mmeme ukuba ahlale nawe ukuze ukwazi ukuhlanganyela naye iBhayibheli lakho kanye neculo. Lapho umhlangano usuphethiwe mmeme ukuba axoxe nawe nganoma imiphi imibuzo okungenzeka unayo.
4 Okwesithathu, inkulumo yayilungiselelwe kahle. Labo abanelungelo lokumelela ibandla njengezikhulumi zasobala bachitha isikhathi esiningi belungiselela futhi bebukeza ukwaziswa ukuze kushukumisele izilaleli othandweni olwengeziwe nasemisebenzini emihle. Sonke singaphansi kokucindezeleka namuhla, futhi amaqiniso aqabulayo avela eZwini likaNkulunkulu ayilokho kanye esikudingayo ukuze asisize sikhuthazele. Yiqiniso, kungakhathaliseki ukuthi inkulumo yeningi ingaba ngefundisa kangakanani, ngeke isizuzise uma singakulalelisisi lokho okushiwoyo. Ingabe ngezinye izikhathi uba nobunzima bokugxilisa ingqondo phakathi nenkulumo? Kungase kube usizo ukubhala amaphuzu amafushane, njengoba nje ngokuvamile senza emihlanganweni yethu emikhulu. Qikelela ukuba ulandele eBhayibhelini lakho lapho umBhalo ngamunye ufundwa futhi uchazwa.
5 INhlangano iye yalungiselela izinkulumo zeningi ezikhuluma ngezihloko ezihlukahlukene ezingokomBhalo. Ngombonisi owengamele noma umzalwane okhethwe nguye, indikimba yabadala iqondisa isimiso soMhlangano Weningi webandla. Izihloko ezihlelwe iNhlangano ziyakhethwa ukuze kunakekelwe izidingo zebandla. Ungaphuthelwa yinoma ikuphi kwalokhu kwaziswa okubalulekile, futhi uwusekele ngokugcwele uMhlangano Weningi webandla lenu wamasonto onke.