Ukuzinikela Ngokuzithandela Ekwenzeni Yonke Imisebenzi Emihle
1 Incwadi ethile yezwe yabhekisela koFakazi BakaJehova, ithi: “Kungaba nzima ukuthola amalungu anoma yiliphi elinye iqembu asebenza kanzima enkolweni yawo njengoba kwenza oFakazi.” Kungani oFakazi BakaJehova besebenza kanzima kangaka nangomoya wokuzithandela?
2 Esinye isizathu siwukuthi banomuzwa wokuphuthuma. UJesu waqaphela ukuthi wayenesikhathi esilinganiselwe sokuqeda umsebenzi wakhe emhlabeni. (Joh. 9:4) Njengoba iNdodana kaNkulunkulu ekhazinyulisiwe iphuma inqoba phakathi kwezitha zayo namuhla, abantu bakaJehova bayaqaphela ukuthi banesikhathi esilinganiselwe sokwenza umsebenzi wabo. Ngenxa yalokho, bayaqhubeka bezinikela ngokuzithandela ekwenzeni inkonzo engcwele. (IHu. 110:1-3, qhathanisa ne-NW.) Njengoba kudingeka izisebenzi ezengeziwe ukuze zingenise isivuno, abanakuyekethisa emizamweni yabo. (Math. 9:37, 38) Ngakho, bazama ukulingisa uJesu, owabeka isibonelo esiphelele sokusebenza ngokuzithandela nangenkuthalo emsebenzini wakhe.—Joh. 5:17.
3 Esinye isizathu sokuba oFakazi BakaJehova basebenze ngomphefumulo wonke njengokungathi basebenzela uJehova siwukuthi inhlangano yabo yomhlaba wonke ihlukile kuwo wonke amanye amaqembu. Izinhlangano zenkolo zezwe zidinga isikhashana nomzamo omncane nje kubalandeli bazo. Abakukholelwayo kukuthinta kancane noma akukuthinti nhlobo ukuphila kwabo kwansuku zonke, ukusebenzelana kwabo nabanye, noma izinto abaziphishekelayo ekuphileni. Njengoba bentula amandla ashukumisayo okholo lweqiniso, baye baphikelela befuna ukuba abelusi babo ‘bakhulume nabo okuthophayo,’ babaqinisekise ngokuthi umzamo wabo omncane wanele. (Isaya 30:10) Abefundisi babo baye babenzela umusa ‘ngokubakitaza izindlebe,’ befaka umoya wokungabi nandaba nokuvilapha okungokomoya.—2 Thim. 4:3.
4 Yeka umehluko phakathi kwabantu bakaJehova! Yonke into ephathelene nokukhulekela kwethu ihilela umzamo, ukuzikhandla, nomsebenzi. Nsuku zonke nakukho konke esikwenzayo, senza lokho esikukholelwayo. Nakuba iqiniso lisilethela injabulo enkulu, lidinga ‘ukushikashikeka okukhulu’ ukuze sikwazi ukwenza lokho elikudingayo. (Qhathanisa neyoku-1 Thesalonika 2:2.) Ukunakekela nje imithwalo yemfanelo yokuphila kwansuku zonke kwanele ukuba kugcine iningi labantu limatasa. Nokho, asizivumeli lezi zinto ukuba zisivimbele ekubekeni izithakazelo zoMbuso kuqala.—Math. 6:33.
5 Lokho esikunikeziwe ukuba sikwenze enkonzweni kaJehova kuzuzisa kakhulu futhi kuphuthuma kangangokuba sishukunyiselwa ukuba ‘sithengisise’ ithuba kwezinye izinto esiziphishekelayo futhi silisebenzise ngokunenzuzo ngokwengeziwe ezintweni ezingokomoya. (Efe. 5:16) Njengoba sazi ukuthi ukuzinikela kwethu kokuhlonipha uNkulunkulu nomoya wokuzithandela kuyamjabulisa uJehova, sinento enkulu kunazo zonke esishukumisayo ukuba siqhubeke nomsebenzi wethu onzima. Ngenxa yezibusiso esizitholayo manje namathemba okuphila okuzayo, ukuzimisela kwethu kuwukuba siqhubeke ‘sisebenza kanzima futhi sizikhandla’ ngenxa yezithakazelo zoMbuso.—1 Thim. 4:10.
6 Ukuzinikela Nomoya Wokuzidela: Abantu abaningi namuhla benza izidingo nezithakazelo zezinto ezibonakalayo zize kuqala ngaphezu kwakho konke okunye. Banomuzwa wokuthi benza kahle ngokugxilisa ukunaka kwabo kulokho abazokudla, abazokuphuza, noma abazokugqoka. (Math. 6:31) Benganelisekile ngezidingo ezingokwenyama, bashukunyiswa umgomo wokujabulela ukuphila okuhle ngokugcwele manje futhi ‘babe nezinto eziningi ezinhle ezibekelelwe iminyaka eminingi, ukuze bakhululeke, badle, baphuze, bazijabulise.’ (Luka 12:19) Umuntu ovamile osontayo unomuzwa wokuthi noma yimuphi umzamo womuntu siqu odingwa inkolo yakhe uwukugxambukela emalungelweni akhe. Umqondo wokushiya noma ngisho wokunciphisa ezinye izinto ezibonakalayo aziphishekelayo noma wokuyeka into ethile emjabulisayo uyamcasula. Njengoba ukucabanga kwakhe kugxile kuyena ngokwakhe, ukuhlakulela umoya wokuzidela akuyona into engokoqobo, akunakwenzeka.
7 Thina siyibheka ngenye indlela lendaba. IZwi likaNkulunkulu liye laphakamisa indlela esicabanga ngayo kangangokuba sicabanga imicabango kaNkulunkulu kuneyabantu. (Isaya 55:8, 9) Ekuphileni sinemigomo ebaluleke ngaphezu kweminako engokwenyama. Ukulwelwa kobukhosi bukaJehova nokungcweliswa kwegama lakhe kuyizindaba ezibaluleke kunazo zonke endaweni yonke. Ukubaluleka kwalezi zindaba kukhulu kangangokuthi, ngokuqhathaniswa, zonke izizwe “zinjengento engelutho phambi kwakhe.” (Isaya 40:17) Noma imuphi umzamo wokuphila ukuphila kwethu ngendlela eyishaya indiva intando kaNkulunkulu kumelwe ubhekwe njengowubuwula.—1 Kor. 3:19.
8 Ngakho nakuba ezinye izinto ezibonakalayo zidingeka futhi ezinye ziwusizo ekwenzeni imisebenzi yoMbuso, siyaqonda ukuthi azizona ngempela ‘izinto ezibaluleke ngokwengeziwe.’ (Fil. 1:10) Sivumelana nalokho okushiwo kweyoku-1 Thimothewu 6:8 ngokulinganisela iminako yethu yezinto ezibonakalayo futhi sizame ngokuhlakanipha ukugcina izinhliziyo zethu zigxile ‘ezintweni ezingabonwayo ezimi phakade.’—2 Kor. 4:18.
9 Lapho sicabanga ngokwengeziwe ngemiqondo kaNkulunkulu, sikhathazeka kancane ngezinto ezibonakalayo. Uma sicabanga ngalokho uJehova asesenzele khona kakade nezibusiso ezimangalisayo azithembisele ikusasa, siyazimisela ukwenza noma ikuphi ukuzidela athi asikwenze. (Marku 10:29, 30) Simkweleta khona kanye ukuba khona kwethu. Ukube bekungengenxa yesihe nothando lwakhe, besingeke sikujabulele ukuphila manje futhi besingeke sibe nalo nhlobo ikusasa. Sizizwa sinesibopho sokuzinikela, ngoba konke esikwenzayo enkonzweni yakhe “yilokho obekufanele sikwenze.” (Luka 17:10) Noma yini esicelwa ukuba siyibuyisele kuJehova, sihlukana nayo sijabula, sazi ukuthi ‘siyovuna kakhulu.’—2 Kor. 9:6, 7.
10 Izisebenzi Zokuzithandela Zidingeka Manje: Kusukela ekuqaleni kwalo, ibandla lobuKristu langena enkathini yomsebenzi onzima. Kwakudingeka kunikezwe ubufakazi obungashwampuluzi ngaphambi kokugumbuqelwa kweJerusalema ngo-70 C.E. Phakathi naleso sikhathi abafundi bakaJesu ‘babematasa kakhulu ngezwi.’ (IzE. 18:5) Ukwanda okusheshayo kwenza kwadingeka ukuba kuqeqeshwe abavangeli abengeziwe nabelusi abanamakhono nokusebenzisa usizo lwabo. Amadoda anokuhlangenwe nakho ekusebenzelaneni nezikhulu zezwe kanye nabanye abanamakhono abakwazi ukuqondisa ukuqoqwa nokwabiwa kwezinto ezibonakalayo babedingeka. (IzE. 6:1-6; Efe. 4:11) Nakuba babembalwa ababevelele, iningi lalingaqhamile. Kodwa bonke ‘bazikhandla ngamandla,’ besebenza ndawonye ngenhliziyo yonke ukuze baqede umsebenzi.—Luka 13:24.
11 Nakuba ngokuqhathaniswa sasisincane isidingo somsebenzi wokuzikhandla ngesilinganiso somhlaba wonke phakathi kwamakhulu eminyaka alandela, ukuvuselelwa okukhulu komsebenzi woMbuso kwaqala lapho uJesu ethatha amandla akhe oMbuso ngo-1914. Ekuqaleni, babembalwa abaqaphela ukuthi isidingo sezisebenzi ezisebenzela izithakazelo zoMbuso sasiyoba sikhulu kangaka, kudingeke usizo lwezigidi zabasebenza ngokuzithandela emazweni asembulungeni yonke.
12 Namuhla inhlangano ingene yagamanxa emisebenzini ehlukahlukene kakhulu eye yadla izimali ezishisiwe. Umsebenzi woMbuso uqhubekela phambili ngesivinini esikhulu. Ukuphuthuma kwezikhathi zethu kusishukumisela ekubeni sizikhandle futhi sisebenzise yonke impahla esinayo ukuze sifeze lomsebenzi okudingeka wenziwe. Njengoba isiphelo saso sonke isimiso esibi sezinto sisondela kangaka, silindele ngisho nowengeziwe umsebenzi onzima ezinsukwini ezizayo. Inceku kaJehova ngayinye ezinikezele imenywa ukuba izinikele ngokuzithandela emsebenzini ophuthumayo wokuqoqa.
13 Yini Okudingeka Yenziwe? Singasho siqinisile ukuthi ‘kunokuningi kokukwenza emsebenzini weNkosi.’ (1 Kor. 15:58) Emasimini amaningi isivuno sivuthiwe, kodwa izisebenzi zimbalwa. Simenywa ukuba ingxenye yethu singayenzi nje kuphela ekufakazeni ngokungashwampuluzi kuyo yonke insimu yethu kodwa nasekuhlangabezaneni nenselele yokukhonza lapho kunendingeko enkudlwana khona.
14 Kuyancomeka ukubona indlela oFakazi abazinikela ngayo ngokuzithandela ekwenzeni eminye imisebenzi kuzo zonke izingxenye zomhlaba. Lemisebenzi ingase ihlanganise ukusebenza ngokuzithandela ekwakhiweni kwezindawo zokukhulekela, ukukhonza emihlanganweni, nokusiza ngezikhathi zenhlekelele kanye nokuhlanza iHholo LoMbuso lebandla njalo. Mayelana nalomsebenzi wamuva, kufanele sihlale siqikelela njalo ukuthi iHholo LoMbuso lishiywa lihlanzekile futhi lihlelekile ngemva komhlangano ngamunye. Ukwenza imisebenzi engase ibhekwe njengephansi kubonisa ukuwaqonda kahle amazwi kaJesu akuLuka 16:10: “Umuntu okholekile kokuncane kakhulu ukholekile nakokukhulu, futhi umuntu ongalungile kokuncane kakhulu akalungile nakokukhulu.”
◼ Ukusekela Imisebenzi Yebandla: Nakuba ibandla ngalinye lisebenza njengengxenye yayo yonke inhlangano futhi lithola isiqondiso ‘esigqileni esikholekile nesiqondayo,’ lakhiwe abamemezeli boMbuso ngabanye. (Math. 24:45) Elikufezayo kuxhomeke kakhulu ekutheni kungakanani uFakazi ngamunye azimisele nakwazi ukukwenza. Ibandla ligxila ekushumayeleni izindaba ezinhle ensimini yalo, ekwenzeni abafundi abasha, bese liyabaqinisa ngokomoya. Ngamunye wethu angabamba iqhaza kulomsebenzi. Singazibekela nemigomo esifundweni somuntu siqu, ukuba nengxenye eyakhayo emihlanganweni, nokusiza abanye abantulayo phakathi ebandleni. Lemisebenzi ivula amathuba amaningi amahle okuba sibonise ukuzimisela kwethu.
◼ Ukuhola Ezikhundleni Zokwengamela: Ukuqondiswa kwebandla ngalinye uJehova uye wakuphathisa abadala balo abamisiwe. (IzE. 20:28) Laba ngamadoda aye azikhandla ukuze afanelekele leli lungelo. (1 Thim. 3:1) Cishe umzalwane ngamunye ebandleni unalo ikhono elithile lokuthwala imithwalo yemfanelo ethé xaxa. Abazalwane abaningi basakhula ngokomoya futhi kudingeka baqhubeke bekhula ngaphansi kwesiqondiso nosizo lothando lwabadala bebandla. Lamadoda kufanele abe abafundi abakhuthele beBhayibheli nezincwadi zethu. Bangabonisa ukuzimisela kwabo ngokuthobela abadala abamiswe ngomoya, balingise ukholo lwabo, futhi bahlakulele izimfanelo ezifuneka kubabonisi.—Heb. 13:7, 17.
◼ Ukungenela Inkonzo Yesikhathi Esigcwele: Ngokuyinhloko, ibandla lisebenzela ukushumayela izindaba ezinhle. (Math. 24:14) Yeka isibusiso okuba yiso lapho abashisekayo beqinisa imizamo yabo ngokubhalisa njengamaphayona! Ngokuvamile lokhu kuhilela ukuba benze ukulungisa ekuphileni kwabo siqu. Kungase kudingeke benze okunye ukulungisa ukuze baqhubeke kulomkhakha okhethekile wenkonzo. Kodwa labo ababambelelayo kuleli lungelo kunokuba baliyeke ngemva konyaka noma ngaphezulu ngenxa yokudumala okuthile kwesikhashana bangaqiniseka ukuthi bayothola isibusiso sikaJehova esicebile. Abadala abanothando nabanye abavuthiwe bangaba neqhaza ekuphumeleleni kwamaphayona, bawakhuthaze ngezwi nangesenzo. Yeka umoya omuhle oboniswa abantu abasha abaqonda ngqó emsebenzini wokuphayona lapho beqeda esikoleni! Kuyiqiniso nangabantu abadala ababhalisa njengamaphayona avamile lapho nje izibopho zabo zokuziphilisa zincipha. Yeka ukwaneliseka okutholwa umKristu ozinikezele lapho ebambisana ngaleyo ndlela nokusheshisa kukaJehova umsebenzi wokuqoqa!—Isaya 60:22.
◼ Ukuhlanganyela Emsebenzini Wokwakha Nokulungisa Izindawo Zokuhlangana: Kuye kwakhiwa amakhulu amaHholo OMbuso esimanje kanye namaHholo Omhlangano amaningi. Ngokumangalisayo, cishe wonke umsebenzi uye wenziwa abafowethu nodade abaye banikela ngokuzithandela ngesikhathi namakhono abo. (1 IziKr. 28:21) Izinkulungwane zezisebenzi zokuzithandela zigcina lezi zakhiwo zisesimweni esihle ngokwenza noma yimiphi imisebenzi engase idingeke. (2 IziKr. 34:8) Njengoba lomsebenzi ungesinye isici senkonzo engcwele, labo abasizayo bazinikela ngokuzithandela, bengaceli ukuba bakhokhelwe ngenkonzo yabo kulokhu, njengoba nje bebengeke bacele ukuba bakhokhelwe ngokushumayela endlini ngendlu, ngokunikeza izinkulumo zeningi ebandleni, noma ngokusiza ngomsebenzi womhlangano wesifunda noma wesigodi. Lezi zisebenzi zokuzithandela zinikela ngezinkonzo zazo ngesihle ekuklameni nasekwakheni izindawo zokukhulekela kube udumo kuJehova. Ngokulangazela zisiza ngezinto ezinjengokugcwalisa izincwadi zomthetho, ukugcina umbhalo wezimali, ukuxhumana nabantu abadayisayo, nokubala ukuthi kudingeka izinto ezingakanani. Lezi zinceku zikaJehova eziqotho azizibali izindleko zomsebenzi noma ngandlela-thile zifune ukuzuza ngokwezinto ezibonakalayo kungaba ngendlela eqondile noma engaqondile ezinkonzweni ezizenzayo, ngoba wonke amakhono nezimali zazo zinikelwe kuJehova. (Bheka INkonzo Yethu YoMbuso ka-February 1992, ikhasi 3, isigaba 10.) Lomsebenzi udinga izisebenzi ezikhuthele ezenza izinkonzo zazo ‘ngomphefumulo wonke njengokungathi zenzela uJehova.’—Kol. 3:23.
15 Khona-ke, yini eyenza ukuzithandela kwabantu bakaJehova kube ingqayizivele? Umoya wokupha. Ukupha kwabo ngesandla esivulekile kuhilela okungaphezu kwemali noma izinto ezibonakalayo—‘bazinikela bona ngokwabo ngokuzithandela.’ (IHu. 110:3, qhathanisa ne-NW.) Lokhu yiwona mongo wokuzinikela kwethu kuJehova. Sivuzwa ngendlela ekhethekile. Sithola “injabulo eyengeziwe” futhi ‘sivuna kakhulu’ ngoba abanye bayakwazisa lokho esikwenzayo, bese besibuyisela nabo. (IzE. 20:35; 2 Kor. 9:6; Luka 6:38) UMuphi wethu omkhulu kunabo bonke uBaba wethu wasezulwini, uJehova, ‘othanda umuphi onamileyo.’ (2 Kor. 9:7) Uyosibuyisela ngokuphindwe kayikhulu, ngezibusiso eziyohlala phakade. (Mal. 3:10; Roma 6:23) Ngakho lapho uvulelwa amalungelo enkonzweni kaJehova, ingabe uyozinikela ngokuzithandela futhi uphendule njengo-Isaya: “Nangu mina; ngithume mina”?—Isaya 6:8.