Yakhanani Ngokuphendula Emihlanganweni
1 KumaHeberu 10:24 sikhuthazwa ukuba “sivuselelane othandweni nasemisebenzini emihle.” Lokhu kuhlanganisa nokwakhana ngokunikeza izimpendulo eziwusizo emihlanganweni yebandla. Kungani kufanele siphendule? Singakwenza kanjani lokhu? Obani abazuzayo?
2 Cabanga ngezikhathi eziningi ozuzayo ngazo lapho uzwa abanye benikeza izimpendulo ezilula nezicacile ezenza uqonde kangcono futhi zikuqinise ngokomoya. Nawe unelungelo lokubenzela okufanayo. Uma uhlanganyela, ubonisa isifiso sakho ‘sokudlulisela isipho esithile esingokomoya’ sokukhuthaza bonke abakhona.—Roma 1:11, 12.
3 Indlela Yokunikeza Izimpendulo Ezinhle: Unganikezi izimpendulo ezinde, ezihlanganisa wonke amaphuzu asesigabeni. Izimpendulo ezinde ngokuvamile azishayi emhloleni futhi zingase ziqede abanye amandla okuphendula. Impendulo yokuqala esigabeni kufanele ibe mfushane, iphendule umbuzo osencwadini. Khona-ke, labo abanikeza izimpendulo ezinezelayo bangabonisa indlela engokoqobo indaba esebenza ngayo noma babonise ukuthi imibhalo isebenza kanjani. Bheka INcwadi Yokuchasisa Isikole, amakhasi 90-2.
4 Uma ukuphendula kukwenza ube nexhala, lungiselela impendulo emfushane kusengaphambili, bese ucela umqhubi ukuba akukhombe kuleso sigaba. Ngemva kokukwenza lokhu emihlanganweni eminingana, ukuhlanganyela kuyoba lula. Khumbula ukuthi uMose noJeremiya babengalethembi ikhono labo lokukhuluma obala. (Eks. 4:10; Jer. 1:6, umbhalo waphansi we-NW) Kodwa uJehova wabasiza ukuba bamkhulumele, nawe uyokusiza.
5 Ubani Oyozuza Ngezimpendulo Zakho? Uyazuza wena ngokwakho ngoba izimpendulo zakho zigxilisa iqiniso kakhudlwana engqondweni nasenhliziyweni yakho, okukwenza kube lula ukuba ukhumbule leyo ndaba kamuva. Futhi, abanye bayazuza ngokuzwa izimpendulo zakho ezakhayo. Siyakhuthazeka uma sonke, kungakhathaliseka ukuthi singomakad’ebona, sibancane, sinamahloni noma sisanda kuhlanganyela, senza umzamo wokukhuluma ngokholo lwethu emihlanganweni yebandla.
6 Ngokuqinisekile siyothola ukuthi ‘amazwi ashiwo ngesikhathi sawo mahle kangakanani’ lapho esetshenziselwa ukwakhana emihlanganweni!—IzAga 15:23.