Hambisa Incwadi Ethi Injabulo Yomkhaya Kubantu Babo Bonke Ubudala
1 Umfana waseCalifornia oneminyaka engu-11 ubudala wezwakalisa indlela ayazisa ngayo incwadi ethi Imfihlo Yenjabulo Yomkhaya. Wabhala: “Ngiyayazisa, futhi ngikhuthaza eminye imikhaya ukuba iyifunde le ncwadi ngoba yinhle ngempela. Iyawusiza . . . nomkhaya wakithi ukuba uthole ukuthula nenjabulo ekhaya.” Okwenzeka kulo mfana kufanele kusikhuthaze ukuba sihambise incwadi ethi Injabulo Yomkhaya kubantu babo bonke ubudala. Nakhu ukusikisela okumbalwa ongase uthande ukukuzama enkonzweni yakho ngo-February.
2 Lapho uhlangana nomuntu osemusha, ungase uthi:
◼ “Abaningi abangontanga yakho bacabanga ngomshado. Kodwa ungakutholaphi ukwaziswa okunokwethenjelwa ngale ndaba? [Lindela impendulo.] Ngokuvamile abasha bayaye bathi abaqiniseki ukuthi sebekulungele yini ukushada. Ake ngikuchathazele lokho le ncwadi ekushoyo ngale ndaba.” Vula ikhasi 14 encwadini ethi Injabulo Yomkhaya, bese ufunda isigaba 3. Yibe usumbonisa isihlokwana ngasinye salesi sahluko. Hambisa incwadi enoqwembe oluqinile ngo-R5,00 noma enoqwembe oluthambile ngo-R3,75, bese uhlela ukuphindela.
3 Lapho uxoxa nomzali, ungase uthi:
◼ “Sixoxa nabazali ngeziqondiso ezithile eziwusizo, ezisebenza ngempela ekukhuliseni abantwana. Ziye zafakwa kule ncwadi ethi Imfihlo Yenjabulo Yomkhaya.” Vula ikhasi 55. Funda isigaba 10, bese ufunda noDuteronomi 6:6, 7, osesigabeni 11. Yibe usumbonisa imisho engomalukeke esezigabeni 12 kuya ku-16. Qhubeka uthi: “Le ncwadi iye yasiza abaningi ukuba baphumelele kakhulu njengabazali.” Hambisa incwadi ngomnikelo ovamile.
4 Lapho ukhuluma nomuntu osekhulile, ungase uthi:
◼ “Lapho sengikufundele leli phuzu elifushane, ngicela ungitshele ukuthi ucabangani.” Vula incwadi ethi Injabulo Yomkhaya ekhasini 169 bese ufunda imisho emibili yokuqala yesigaba 17. Yibe usucela impendulo. Kuye ngempendulo, ungase ufunde ezinye izingcaphuno kule ncwadi ngaphambi kokuba uyihambise.
5 Lapho ulandelela abantu obahambisele incwadi ethi Injabulo Yomkhaya, khumbula ukuzama ukuqala isifundo seBhayibheli. Isifundo 8 encwajaneni ethi Yini UNkulunkulu Ayifunayo? noma isahluko 15 sencwadi ethi Ulwazi singaba indawo ekahle ongaqala ngayo. Lapho senza kanjalo, masenze umzamo wokusiza abantu babo bonke ubudala ukuba bakhe ukuphila komkhaya kobuKristu okujabulisayo.