Sigcine Kahle

Izintshumayelo Zenkonzo Yasensimini Ezisikiselwayo

Indlela Yokusebenzisa Lesi Senezelo

Eziningi zalezi zintshumayelo zavela emakhophini e-Nkonzo Yethu YoMbuso esikhathini esidlule. Zama eziningi ngangokuthanda kwakho emsebenzini wakho wokufakaza, ubone ukuthi ziba namiphi imiphumela. Sigcine kahle lesi senezelo, ubhekisele kuso lapho ulungiselela inkonzo.

Ungamenza umuntu abe nesithakazelo eZwini likaNkulunkulu uma uhlala ephuzwini ngokushesha. Buza umbuzo oqondile, bese ufunda impendulo emfushane engokomBhalo. Ungase uzame lokhu kusikisela:

“Lapho ucabanga ngekusasa, ingabe uzizwa unethemba noma unongabazane? [Lindela impendulo.] IBhayibheli labikezela ngezenzakalo ezisikhathazayo esizibona namuhla kanye nomphumela wazo.”—2 Thim. 3:1, 2, 5; IzAga 2:21, 22.

“Namuhla kunokukhathazeka okukhulu ngempilo. Bewazi yini ukuthi uNkulunkulu uthembisa ukuthi uyozixazulula phakade zonke izinkinga zempilo?”—Isaya 33:24; IsAm. 21:3, 4.

“Bewazi yini ukuthi iBhayibheli libikezela ukuthi ekugcineni kuyoba nohulumeni owodwa kuphela obusa umhlaba wonke?”—Dan. 2:44; Math. 6:9, 10.

“Ucabanga ukuthi izimo ngabe zinjani ukube uJesu Kristu ubebusa umhlaba?”—IHu. 72:7, 8.

“Abantu abaningi bayacwaswa ngenxa yobulili babo, inkolo noma uhlanga. Ucabanga ukuthi uNkulunkulu uzizwa kanjani ngobandlululo olunjalo?”—IzE. 10:34, 35.

“Siyazi ukuthi uJesu Kristu wenza izimangaliso eziningi ngosuku lwakhe. Ukube ubungamcela ukuba enze esinye futhi isimangaliso esisodwa nje, bekungaba yisiphi?”—IHu. 72:12-14, 16.

“Abantu abaningi sebekhathele ukuzwa ngezinkinga njalo. Bafuna ukuzwa ngezixazululo. Kodwa singazitholaphi izixazululo zangempela zezinkinga zethu?”—2 Thim. 3:16, 17.

“Ungakwazi yini ukuwuchaza uMbuso owuthandazelayo eMthandazweni WeNkosi?”—IsAm. 11:15.

Izindlela Zokuqala Ingxoxo

Uhlu lwemibuzo engezansi, olwenziwe ngezihloko zencwadi Ukubonisana, lubonisa ikhasi lapho impendulo ngayinye itholakala khona encwadini:

Ingabe zonke izinkolo zamukelekile kuNkulunkulu? (100)

Umuntu angazi kanjani ukuthi iyiphi inkolo eqondile? (106)

Ingabe bonke abantu abalungileyo baya ezulwini? (196)

Ingabe umuntu kumelwe aye ezulwini ukuze abe nekusasa elijabulisa ngempela? (197)

Ubani obusa leli zwe—uNkulunkulu noma uSathane? (203)

Kungani kunobubi obungaka? (227)

Kungani kubalulekile ukwazi nokusebenzisa igama likaNkulunkulu siqu? (245)

Ingabe uJesu Kristu eqinisweni unguNkulunkulu? (251)

Kungani siguga futhi sifa? (275)

Siyini isimo sabafileyo? (276)

Kungani uNkulunkulu evumela ukuhlupheka? (284)

Iyini injongo yokuphila komuntu? (315)

Yini eyofezwa uMbuso kaNkulunkulu? (357)

Yini engasiza ekuthuthukiseni umshado? (389)

Ingabe zikhona izizathu ezizwakalayo zokukholelwa kuNkulunkulu? (394)

Ingabe uNkulunkulu ngempela unendaba ngalokho okwenzeka kithina bantu? (395)

Ingabe uNkulunkulu ungumuntu woqobo? (396)

USathane uyisidalwa esinamandla kangakanani ezweni lanamuhla? (404)

Ukusikisela Kokuhambisa Incwajana Ethi Yini UNkulunkulu Ayifunayo?

“Akungabazeki ukuthi uzovuma ukuthi abantu abaningi bayakholelwa kuNkulunkulu. Bonke abakholelwa kuye bayavuma ukuthi kukhona uNkulunkulu akufunayo kithi. Okuyikhona abantu abangavumelani ngakho ukuthi, Yini uNkulunkulu ayifunayo kithi?” Yibe usukhipha incwajana ethi Yini UNkulunkulu Ayifunayo?, uvule isifundo 1, nixoxe ngaso.

“Njengoba namuhla ukuphila komkhaya kunezinkinga eziningi kangaka, wake wazibuza yini ukuthi iyini imfihlo yokuthola injabulo yomkhaya?” Ngemva kwempendulo, chaza ukuthi eBhayibhelini, uNkulunkulu wembula imfihlo yangempela yenjabulo yomkhaya. Funda u-Isaya 48:17. Khona-ke, vula isifundo 8 encwajaneni ethi Yini UNkulunkulu Ayifunayo?, ubhekisele kwamanye amavesi eBhayibheli akhonjiwe anikeza isiqondiso esinokwethenjelwa elungwini ngalinye lomkhaya. Funda uhlu lwemibuzo ekuqaleni kwesifundo. Mbuze ukuthi angathanda yini ukufunda izimpendulo.

“Le ncwajana iqukethe imfundo ebanzi yezimfundiso eziyisisekelo zeBhayibheli. Ekhasini ngalinye, uzothola izimpendulo zemibuzo osekungamakhulu eminyaka zikhathaza abantu. Ngokwesibonelo, Iyini injongo kaNkulunkulu ngomhlaba?” Vula esifundweni 5, ufunde imibuzo esekuqaleni kwesifundo. Buza umninikhaya ukuthi yimuphi umbuzo anesithakazelo kakhulu kuwo, bese nifunda isigaba noma izigaba ezihambelana nawo, nifunde nemiBhalo efanelekayo. Chaza ukuthi izimpendulo ezanelisayo kweminye imibuzo zingatholakala kalula njengoba nje nenzile kulo. Sikisela ukubuya ukuze nizoxoxa ngomunye umbuzo.

“Ucabanga ukuthi siyini isizathu sabo bonke ubudlova obusezikoleni zomphakathi? Ingabe bubangelwa ukuntuleka kokuqeqesha kwabazali? Noma kungenzeka yini ukuthi kunesinye isizathu, njengethonya likaDeveli?” Lindela impendulo. Uma umuntu ethi kungenxa yethonya likaDeveli, funda isAmbulo 12:9, 12. Bonisa indima kaDeveli ekubhebhezeleni izinxushunxushu emhlabeni. Khona-ke, vula incwajana ethi Yini UNkulunkulu Ayifunayo? esifundweni 4, bese umbuza ukuthi wake wazibuza yini ukuthi uDeveli wavelaphi. Qhubeka ufunde izigaba zokuqala ezimbili futhi nixoxe ngazo. Uma umuntu ekhetha ukuthi “ukuntuleka kokuqeqesha kwabazali” okuyisizathu sobudlova ezikoleni, funda eyesi-2 Thimothewu 3:1-3, umbonise izici ngokusobala ezinesandla kule nkinga. Khona-ke, vula incwajana ethi Yini UNkulunkulu Ayifunayo? esifundweni 8, ufunde isigaba 5, bese uqhubeka nengxoxo.

“Ucabanga ukuthi kunengqondo yini ukulindela ukuba uMdali asinikeze ulwazi esiludingayo ukuze sakhe ukuphila komkhaya okuphumelelayo?” Ngemva kwempendulo, yethula incwajana ethi Yini UNkulunkulu Ayifunayo? Vula isifundo 8, bese uchaza ukuthi siqukethe izimiso zeBhayibheli zawo wonke amalungu omkhaya. Cela ukumbonisa indlela yokusebenzisa le ncwajana kanye neBhayibheli ukuze azuze nakakhulu.

“Ucabanga ngazo zonke izinselele esibhekana nazo ekuphileni kwanamuhla, ingabe unomuzwa wokuthi umthandazo ungasisiza ngempela? [Lindela impendulo.] Abaningi bathi umthandazo ubanika amandla angaphakathi. [Funda eyabaseFilipi 4:6, 7.] Noma kunjalo, umuntu angase abe nomuzwa wokuthi imithandazo yakhe ayiphendulwa. [Vula incwajana ethi Yini UNkulunkulu Ayifunayo? esifundweni 7.] Le ncwajana ichaza indlela umthandazo ongasizuzisa kakhulu ngayo.”

“Besixoxa nomakhelwane bethu ngokuthi kungani kunezinkolo ezehlukene eziningi kangaka emhlabeni. Nokho, iBhayibheli linye nje kuphela. Ngokombono wakho, kubangelwa yini lokhu kudideka kwezinkolo? [Lindela impendulo. Vula incwajana ethi Yini UNkulunkulu Ayifunayo? esifundweni 13, nifunde imibuzo esekuqaleni.] Uzothola izimpendulo ezanelisayo kuleyo mibuzo ngokufunda lesi sifundo.”

Ngemva kokuhambisela umuntu omagazini INqabayokulinda ne-Phaphama!, mbuze ukuthi ungamfundela yini isigaba esisodwa esifushane. Uma ekuvumela, vula incwajana ethi Yini UNkulunkulu Ayifunayo? esifundweni 5. Mbonise imibuzo ekleliswe ekuqaleni kwesifundo, umcele ukuba alalele impendulo yombuzo wokuqala njengoba ufunda isigaba sokuqala. Ngemva kokufunda isigaba, mbuze umbuzo aphendule. Mhambisele incwajana, uma eyithatha, uhlele ukubuya ukuze azophendula imibuzo emibili elandelayo ohlwini.

Ukusikisela Kokuhambisa Incwadi Ulwazi

Uphethe iBhayibheli ngesandla, qala ngokuthi: “Namuhla sixoxa nawo wonke umuntu okulo mgwaqo wakini ngomBhalo owodwa nje. Uthi: . . . ” Funda uJohane 17:3, bese ubuza: “Uphawulile yini ukuthi yini esithenjiswa yona uma singaba nohlobo olufanele lolwazi? [Lindela impendulo.] Umuntu angalutholaphi lolo lwazi?” Ngemva kwempendulo, mbonise incwadi Ulwazi, bese uthi: “Le ncwadi ibhekisela olwazini oluholela ekuphileni okumi phakade. Yenza kanjalo ngokuphendula imibuzo abantu abavame kakhulu ukuyibuza ngeBhayibheli.” Mbonise uhlu lokuphakathi, bese umbuza ukuthi wake wazibuza yini ngezinye zalezo zihloko.

“Wake wazibuza yini ukuthi ingabe ngempela uNkulunkulu uyakhathazeka ngokungabi nabulungisa nokuhlupheka esikubona yonke indawo noma esibhekana nakho thina ngokwethu? [Lindela impendulo.] IBhayibheli lisiqinisekisa ukuthi uNkulunkulu uyasithanda futhi uyosisiza kulezi zikhathi ezicindezelayo.” Funda izingxenye zeHubo 72:12-17. Vula incwadi Ulwazi esahlukweni 8, umbonise ukuthi inikeza impendulo eduduzayo embuzweni oye wabuzwa yizigidi zabantu, othi, Kungani uNkulunkulu evumela ukuhlupheka? Uma kunokwenzeka, xoxani ngamaphuzu angokomBhalo ahlanganiswe ezigabeni 3 kuya ku-5, noma wenze kanjalo lapho uphindela.

Iningi lethu siye sashonelwa abathandekayo bethu. Wake wazibuza yini ukuthi ingabe siyophinde sibabone futhi? [Lindela impendulo.] UJesu wabonisa ukuthi abathandekayo bethu bangophulwa ekufeni. [Funda uJohane 11:11, 25, 44.] Ngisho noma lokhu kwenzeka emakhulwini eminyaka adlule, kubonisa lokho uNkulunkulu athembise ukusenzela kona.” Vula incwadi Ulwazi esithombeni esisekhasini 85, ufunde amazwi asichazayo. Yibe usumbonisa isithombe esisekhasini 86, bese usikhulumela. Beka isisekelo sokuhambela okulandelayo ngokubuza: “Ungathanda yini ukwazi ukuthi kungani abantu beguga futhi befa?” Phindela ukuze niyoxoxa ngesahluko 6.

“Wake wacabanga yini ukuthi kungani abantu belangazelela ukuphila isikhathi esijana?” Ngemva kwempendulo, vula incwadi Ulwazi esahlukweni 6, ufunde isigaba 3. Bonisana naye ngemiBhalo ekhonjiwe. Ubhekisela emibuzweni emibili esekupheleni kwesigaba, mbuze ukuthi angethande yini ukuzitholela yena izimpendulo. Uma evuma, xoxani ngezigaba ezimbalwa ezilandelayo.

“Sibuza abantu ukuthi bayakukholelwa yini lokhu . . . ” Funda uGenesise 1:1, bese ubuza: “Uyavumelana yini nala mazwi?” Uma umuntu evuma, yibe usuthi: “Nami ngiyavumelana nawo. Nokho, ingabe ucabanga ukuthi uma uNkulunkulu adala zonke izinto, nguye futhi obangela ububi?” Ngemva kokubonga impendulo yakhe, funda umShumayeli 7:29. Vula incwadi Ulwazi isahluko 8, ufunde isigaba 2. Uma engavumelani noGenesise 1:1, mkhuthaze ukuba ahlole ubufakazi bokuthi ukhona uMdali.—Bheka incwadi Ukubonisana, amakhasi 87-8.

“Uyavuma yini ukuthi njengoba izimiso zokuziphatha zanamuhla zishintsha ngokushesha kangaka, sidinga isiqondiso esingasithemba ekuphileni? [Lindela impendulo.] Nakuba liyincwadi endala kunazo zonke, iBhayibheli linikeza iseluleko esiwusizo sokuphila kwanamuhla nokuphila komkhaya okujabulisayo.” Yibe usuvula isahluko 2 encwadini Ulwazi, ufunde isigaba 10 nomusho wokuqala esigabeni 11, kuhlanganise neyesi-2 Thimothewu 3:16, 17.

“Ungathanda yini ukwazi ukuthi ikusasa lisiphatheleni thina nomhlaba? [Lindela impendulo.] IBhayibheli lichaza ikusasa ngezwi elilodwa—iPharadesi! Yilapho uNkulunkulu abeka khona abantu ababili bokuqala lapho ebadala. Phawula le ncazelo yokuthi kumelwe ukuba lalinjani.” Vula incwadi Ulwazi ekhasini 8, ufunde isigaba 9, ngaphansi kwesihlokwana esithi “Ukuphila EPharadesi.” Yibe usukhulumela amaphuzu asesigabeni 10, ufunde umBhalo okhonjiwe, u-Isaya 55:10, 11. Cela ukubuya nizoqhubeka nengxoxo ngokuthi ukuphila ePharadesi elibuyiselwe kuyoba njani, nihlanganise izigaba 11-16.

Lapho uphindela kubantu obashiyele omagazini INqabayokulinda ne-Phaphama!, ungase uthi:

“Ngesikhathi ngilapha ngokudlule, ngajabula ngokuthatha kwakho umagazini INqabayokulinda. Mhlawumbe uye waqaphela ukuthi igama eliphelele lalo magazini lithi, INqabayokulinda Ememezela UMbuso KaJehova. Namuhla ngingathanda ukukuchazela ukuthi uyini lo Mbuso nokuthi ungase usho ukuthini kuwe nomkhaya wakho.” Yibe usuvula incwajana ethi Yini UNkulunkulu Ayifunayo? esifundweni 6, ufunde futhi uchaze okungangalokho ongakwenza ngesikhathi umninikhaya anaso.

“Ngisanda kukuvakashela kulezi zinsukwana, ngakushiyela omagazini INqabayokulinda ne-Phaphama! Lab’ omagazini bakhuthaza inhlonipho ngeBhayibheli nesiqondiso salo sokuziphatha. Ngenxa yokuthi nginomuzwa wokuthi kubalulekile ukuba wonke umuntu aliqonde iZwi likaNkulunkulu, ngibuyile ukuze ngikubonise okuthile okungakusiza ukuba uliqonde.” Mbonise incwajana ethi Yini UNkulunkulu Ayifunayo? noma incwadi Ulwazi, bese usikisela isifundo seBhayibheli.

Lapho uhambisa enye yezincwadi ezindala ezinamakhasi angu-192, ungase uzame le ntshumayelo:

“Kuye kwagcizelelwa kakhulu isidingo sokuba nemfundo enhle. Ngokombono wakho, luhlobo luni lwemfundo umuntu okumelwe aluphishekele ukuze aqinisekise ukuthi uyothola injabulo enkulu nempumelelo ekuphileni? [Lindela impendulo. Khona-ke funda izAga 9:10, 11.] Le ncwadi, [yisho isihloko sencwadi oyihambisayo] isekelwe eBhayibhelini. Ibonisa okuwukuphela komthombo wolwazi olungaholela ekuphileni okuphakade.” Mbonise isibonelo esiqondile encwadini, umkhuthaze ukuba ayifunde.

Ezinye Izincwadi

Izintshumayelo ezisikiselwe zezinye izincwadi nezincwajana ezingangomagazini zingatholakala kuyi-Watch Tower Publications Index ngaphansi kwesithi:

Izintshumayelo [Presentations]

Uhlu Ngokwezincwadi [List by Publication]

Indlela Engagwegwesi

Ukuze uqale isifundo seBhayibheli, zama ukusebenzisa enye yalezi zindlela ezingagwegwesi:

“Bewazi yini ukuthi ngemizuzu embalwa nje, ungathola impendulo yombuzo obalulekile weBhayibheli? Ngokwesibonelo, . . . ” Yibe usuphakamisa umbuzo osekuqaleni kwesinye sezifundo ezisencwajaneni ethi Yini UNkulunkulu Ayifunayo? ocabanga ukuthi siyomkhanga umuntu oxoxa naye.

“Ngize lapha ukuze ngikubonise isimiso sethu sokutadisha nabantu iBhayibheli mahhala. Kuthatha cishe imizuzu emihlanu ukukubonisa indlela esifunda ngayo. Ungaba nayo yini imizuzu emihlanu?” Uma evuma, sebenzisa isifundo 1 encwajaneni ethi Yini UNkulunkulu Ayifunayo? ukuze ubonise indlela enizofunda ngayo, ufunde umbhalo owodwa noma emibili ekhethiwe. Ngemva kwalokho, buza: “Ungayithola nini imizuzu engu-15 ukuze sikwazi ukuhlanganisa isifundo esilandelayo?”

“Abantu abaningi banalo iBhayibheli, kodwa abaqapheli ukuthi liphethe izimpendulo zemibuzo ebalulekile sonke esiyibuzayo ngekusasa lethu. Ngokusebenzisa le nsiza kufunda [incwajana ethi Yini UNkulunkulu Ayifunayo? noma incwadi Ulwazi] isikhathi esingaba yihora ngesonto, ungazuza ulwazi oluyisisekelo lweBhayibheli ngezinyanga ezimbalwa nje. Ngizokujabulela ukukubonisa indlela lesi simiso esisebenza ngayo.”

“Ngikuvakashele ukuze ngikunikeze ithuba lokuzitholela imfundo yeBhayibheli yasekhaya yamahhala. Uma ungangivumela, ngingathanda ukukubonisa ngemizuzu embalwa nje indlela abantu emazweni angaba ngu-200 abaxoxa ngayo ngeBhayibheli ekhaya njengamaqembu emikhaya. Singasebenzisa noma yisiphi kulezi zihloko njengesisekelo sengxoxo. [Mbonise uhlu lokungaphakathi encwadini Ulwazi.] Yisiphi ngokukhethekile onesithakazelo kuso?” Mlinde akhethe. Vula isahluko asikhethile, bese uqala isifundo ngesigaba sokuqala.

“Ngifundisa abantu iBhayibheli mahhala futhi esimisweni sami ngisenezikhala zabafundi abengeziwe. Sisebenzisa le nsiza kufunda yeBhayibheli. [Mbonise incwadi Ulwazi.] Le mfundo ithatha izinyanga ezimbalwa nje futhi iphendula imibuzo enjengokuthi: Kungani uNkulunkulu evumela ukuhlupheka? Kungani siguga futhi sifa? Kwenzekani kwabathandekayo bethu abafileyo? Singasondela kanjani kuNkulunkulu? Ngingakubonisa yini ngesifundo esisodwa indlela esifunda ngayo?”

Uma uye wathola intshumayelo ephumelelayo eba nemiphumela emihle ekuvuseni isithakazelo, qhubeka uyisebenzisa! Mane nje uyenze ivumelane nesipho sencwadi saleyo nyanga.