Thembela KuJehova Ukuba Akhulise
1 “Ngokokuqala ngqá ngathola injabulo engavamile yokusiza ekumiseni ibandla elisha. Lokhu kwathatha iminyaka engaphezu kwemibili yomsebenzi wenkuthalo, imithandazo engapheli nokuthembela KuJehova ‘okhulisayo.’” Labhala kanjalo iphayona eliqotho elabona isidingo sokuthembela kuJehova ukuba akhulise.(1 Kor. 3:5-9) Ekufuneni kwethu abantu abathambekele ezintweni ezingokomoya, nathi siyakudinga ukusekelwa uNkulunkulu ukuze inkonzo yethu ithele izithelo.—Izaga 3:5, 6.
2 Kufanele Kuhlakulwe Ukuze Okutshaliwe Kukhule: Imbewu yeqiniso kudingeka ihlakulelwe ukuze ikhule. Ukuphindela ngemva kosuku noma ezimbili ngemva kokuhambela kokuqala ngokuvamile kuveza izithelo. Fudumala futhi ube nobungane. Yenza omunye umuntu akhululeke. Makungakhulumi wena wedwa. Menze akwazi, futhi mbonise ukuthi unesithakazelo kuyena njengomuntu.
3 Ngo-July kuze kube ngo-August, sizogxila ekuhambiseni izincwajana ezihlukahlukene kubantu esihlangana nabo. Nokho, kudingeka futhi siphindele kubantu ababonisa isithakazelo nesabahambisela izincwadi. Lokhu sikwenza ngokwenza izimpindelo nangokusikisela izifundo zeBhayibheli. (Math. 28:19, 20) Ukuze sikufeze lokhu, singasebenzisa incwajana ethi Yini UNkulunkulu Ayifunayo? ekuqaleni izifundo. Ungase ukuthole kuwusizo lokhu kusikisela okune okulandelayo.
4 Uma wawuxoxe nothile owayekhathazekile ngezinto eziba zimbi ngokwengeziwe ezenzeka ezweni, ungase uvuselele ingxoxo ngokuba uthi:
◼ “Ngikholelwa ukuthi ukhathazeke njengami ngokuwohloka kwesimilo emphakathini wesintu. Sizwa imibiko edumazayo yobudlova basekhaya, okuphumela ekuxhashazweni kwezingane, abazali nabangane bomshado. Futhi kubonakala kuyinto engasho lutho kubantu abaningi ukuba baqambe amanga noma bebe ukuze banelise izidingo zabo. Ucabanga ukuthi uNkulunkulu unendaba yini nokuthi abantu bakuphila kanjani ukuphila kwabo? [Lindela impendulo.] UNkulunkulu wamisa izindinganiso ezithile okufanele umuntu aphile ngazo, futhi aziwona neze umthwalo kithi.” Funda eyoku-1 Johane 5:3. Yibe usumnika incwajana ethi Yini UNkulunkulu Ayifunayo? uyivule esifundweni 10. Funda isigaba sokuqala. Mbonise amazwi nemishwana engomalukeke esekuqaleni kwezigaba 2-6, bese ubuza umninikhaya ukuthi yimuphi umkhuba anomuzwa wokuthi uwulimaza kakhulu umphakathi. Funda isigaba esikhuluma ngawo lowo mkhuba bese nifunda umbhalo owodwa noma emibili uma ithuba livuma. Phetha ngokufunda isigaba 7, bese wenza amalungiselelo okuphindela ukuze niyiqhubekisele phambili ingxoxo.
5 Kulabo oye wahlangana nabo abakhathalela imikhaya yabo, ungase usho okuthile okufana nalokhu:
◼ “Ucabanga ukuthi kunengqondo yini ukulindela ukuba uMdali asinikeze amathuluzi esiwadingayo okwakha ukuphila komkhaya okuphumelelayo?” Lindela impendulo. Yethula incwajana ethi Yini UNkulunkulu Ayifunayo?, uvule isifundo 8, bese uchaza ukuthi lesi sifundo sinezimiso ezivela eBhayibhelini zelungu ngalinye lomkhaya. Cela ukumbonisa indlela esetshenziswa ngayo lencwajana kanye neBhayibheli ukuze azuze kakhulu kuyo. Landela iziyalezo ezitholakala ekhasini 2 lalencwajana. Yenza amalungiselelo okuphindela ukuze niqhubeke nalesi sifundo, noma uma nisiqeda, ungabuyela ukuze nizofunda esinye isifundo umninikhaya asikhethayo encwajaneni.
6 Nansi indlela eqondile ongase uyisebenzise ekusikiseleni isimiso sethu sesifundo seBhayibheli. Mbonise incwajana ethi “Yini UNkulunkulu Ayifunayo?,” bese uthi:
◼ “Lencwajana inemfundo ebanzi, ehlanganisa izimfundiso eziyisisekelo zeBhayibheli. Ekhasini ngalinye, uyothola izimpendulo zemibuzo eye yakhathaza abantu amakhulu amaningi eminyaka. Ngokwesibonelo, Iyini injongo kaNkulunkulu ngomhlaba?” Vula isifundo 5, bese ufunda imibuzo esekuqaleni kwesifundo. Buza umninikhaya ukuthi yimuphi omthakazelisa kakhulu, bese ufunda isigaba noma izigaba eziwuphendulayo, nifunde nemibhalo efanelekile. Chaza ukuthi izimpendulo ezanelisayo zeminye imibuzo zingatholakala kalula nje njengakulona. Sikisela ukuba ubuye nizoxoxa ngomunye umbuzo nempendulo.
7 Noma ungase uthande ukuzama indlela elula yokuqala isifundo seBhayibheli ngokuba uthi:
◼ “Bewazi yini ukuthi ngokusebenzisa nje imizuzu embalwa, ungathola impendulo yombuzo obalulekile weBhayibheli? Ngokwesibonelo, . . .” Yibe ususho umbuzo osekuqaleni kwesinye sezifundo ezisencwajaneni ocabanga ukuthi uzomkhanga umninikhaya. Ukuze uthole okunye ukusikisela ngokuphathelene nemibuzo ongase uyisebenzise, bheka izigaba 15 no-16 esenezelweni se-Nkonzo Yethu YoMbuso ka-March 1997, esinesihloko esithi: “Qunga Isibindi Sokwenza Izimpindelo.”
8 Ukuyamukela ngenjabulo inselele yokwenza izimpindelo nokuqhuba izifundo zeBhayibheli kuyingxenye yokuba ‘izisebenzi ezikanye’ noNkulunkulu. (1 Kor. 3:9) Njengoba sizikhandla ekuhlakuleleni isithakazelo esisitholile futhi sithembela kuJehova ukuba akhulise, siyothola ukwaneliseka kwangempela esingeke sikuthole kunoma imuphi umsebenzi.