Ingabe Unalo I-oda Eliqhubekayo?
1 Kwake kwenzeka yini ukuba uye emhlanganweni wenkonzo yasensimini wabe usuthola ukuthi awunabo omagazini esikhwameni sakho sasensimini? Nokho, khumbula isenezelo se-Nkonzo Yethu YoMbuso ka-September 1995 esasinesihloko esithi “Basebenzise Kahle Omagazini Bethu.” Sasitshela ukuba “sibe ne-oda likamagazini elimile,” sithi: “Faka i-oda ongakwazi ukulifinyelela likamagazini ngamunye kumzalwane osingatha omagazini. Ngalendlela, wena nomkhaya wakho niyobathola njalo omagazini futhi nibe nabanele.” Ingabe usukwenzile lokhu?
2 Kungani ungafaki i-oda lomagazini eliqhubekayo? Uyozizwa unomthwalo wemfanelo owengeziwe wokuhambisa omagazini isonto nesonto, futhi uyoba nenjabulo eyengeziwe ngokwenza kanjalo. Uma kakade usunalo i-oda eliqhubekayo, bukeza kabusha ukuthi uthola inani olidingayo yini ngenyanga evamile enkonzweni. Yiqiniso, sifuna ukukholeka ekulithatheni i-oda lethu isonto ngalinye futhi kufanele sizizwe sinesibopho sokwenza kanjalo. Uma uzoke ungabi bikho ebandleni isikhathi eside, yazisa inceku ephatha omagazini uma ungathanda ukuba omagazini bakho ibanikeze omunye uze ubuye.
3 Sona leso senezelo esicashunwe ngenhla sathi futhi kufanele “sihlele usuku lukamagazini lwasikhathi sonke.” Ingabe ungalusekela yini uSuku Lukamagazini lwamasonto onke? Njengoba kuboniswa IKhalenda LoFakazi BakaJehova Lika-1999, lolu suku lungayo yonke iMigqibelo yonyaka! Ungakweyi ukubaluleka kokusakaza INqabayokulinda ne-Phaphama! Lapho senza umzamo wokuhlanganyela ngokugcwele emsebenzini kamagazini, sisuke ‘siletha izindaba ezinhle’ komakhelwane bethu.—Isaya 52:7.