‘Shumayela Izwi LikaNkulunkulu Ngokugcwele’

¹ Uma ukwazisa ngobuqotho ukuphiwa into enhle, awukubonisi yini ngesimo sakho sengqondo nangezenzo? Akubuzwa nokubuzwa! Ngokuqondene nobuhle nomusa wothando uJehova awudlulisela esintwini, phawula indlela umphostoli uPawulu asabela ngayo. Wathi: “Makabongwe uNkulunkulu ngesipho sakhe samahhala esingachazekiyo”! Sihlanganisani leso ‘sipho samahhala’? Wonke ‘umusa ongafanelwe kaNkulunkulu odlulele’ esiye sawuboniswa, osibonakaliso sawo esikhulu kunazo zonke kwakuyisipho seNdodana yakhe siqu eyaba yisihlengo sezono zethu.—2 Kor. 9:14, 15; Joh. 3:16.

² Ingabe uPawulu wamane wabonga ngomlomo nje? Lutho neze! Wabonisa ukwazisa kwakhe okujulile ngezindlela eziningi. Wayeyikhathalela kakhulu inhlalakahle engokomoya yamaKristu ayekanye nawo futhi efuna ukwenza konke angakwenza ukuze awasize azuze ngokugcwele emseni wothando kaNkulunkulu. Ngokuphathelene nawo, uPawulu wathi: “Njengoba sasinokusondelana okunesisa nani, sakujabulela kakhulu ukungadluliseli kini izindaba ezinhle zikaNkulunkulu kuphela, kodwa nemiphefumulo yethu siqu, ngoba naba abathandekayo kithi.” (1 Thes. 2:8) Ngaphandle kokusiza labo abase beyingxenye yebandla kakade ukuze baqinisekise ukusindiswa kwabo, uPawulu washumayela izindaba ezinhle engakhathali, ehamba izinkulungwane zamakhilomitha ezweni nasolwandle ukuze athole “ababethambekele ngokufanele ekuphileni okumi phakade.” (IzE. 13:48) Ukwazisa kukaPawulu okujulile ngakho konke uJehova ayemenzele kona kwamshukumisela ukuba ‘ashumayele izwi likaNkulunkulu ngokugcwele.’—Kol. 1:25.

³ Ukwazisa kwethu ngakho konke uJehova aye wasenzela kona akusishukumiseli yini ekubeni sibanikeze usizo olungokomoya labo abadinga usizo ebandleni lakithi? (Gal. 6:10) Asishukunyiselwa yini ukuba sihlanganyele ngokugcwele ngangokunokwenzeka ekushumayeleni izindaba ezinhle zoMbuso kuyo yonke insimu yethu?—Math. 24:14.

⁴ Ithuba Lokubonisa Ukwazisa: Unyaka ngamunye iSikhumbuzo sokufa kukaKristu sisinikeza ithuba elikhethekile lokubonisa ukwazisa ngalokho uJehova noJesu abaye basenzela kona. Lona akuwona nje omunye umhlangano noma isikhumbuzo nje sesenzakalo esithile. UJesu wathi: “Qhubekani nikwenza lokhu ningikhumbula.” (Luka 22:19) ISikhumbuzo sokufa kukaKristu siyisikhathi sokuzindla ngohlobo lomuntu uJesu ayilo. Yisikhathi sokukhumbula ukuthi uyaphila nokuthi umatasa namuhla, enenkazimulo nobukhosi abunikwa ngenxa yenkambo yakhe yokuphila yokwethembeka nomhlatshelo. Lo mkhosi futhi uyithuba lokubonisa ukuzithoba kwethu ebunhlokweni bukaKristu njengoba eqondisa izindaba nemisebenzi yebandla lobuKristu. (Kol. 1:17-20) Bonke abantu bakaNkulunkulu kufanele babe khona ngenhlonipho eSikhumbuzweni sokufa kukaKristu. Kulo nyaka siyokuba ngoLwesine, ngo-March 28, 2002, ngemva kokushona kwelanga.

⁵ Ngenxa yomzamo wenkuthalo owenziwa ngaphambi kokugujwa kweSikhumbuzo ngonyaka odlule, saba nenani eliphakeme kunawo wonke labangu-202 271 emazweni angaphansi kwegatsha laseNingizimu Afrika. Bangaki abayoba khona kulo nyaka? Okuningi kuyoxhomeka ‘ekusebenzeni kanzima nasekuzikhandleni’ kwethu, sisiza abaningi ngangokunokwenzeka ukuba babe khona.—1 Thim. 4:10.

⁶ Ngaphandle kokuba khona eSidlweni SeNkosi Sakusihlwa, singase sikwazi ukwandisa umsebenzi wethu wenkonzo yasensimini. Akungabazeki ukuthi amashumi ezinkulungwane zabazalwane nodade ziyoba ngamaphayona asizayo inyanga eyodwa noma ezengeziwe. Unyaka ngamunye eminyakeni emihlanu edlule, siye saba nesilinganiso samaphayona asizayo angu-17 788 phakathi nenkathi yeSikhumbuzo, kusukela ngo-March kuya ku-May. Ungazihlela yini izimo zakho ukuze ujabulele ilungelo lokuba yiphayona elisizayo kulo nyaka? Kuyoba indlela enhle yokubonisa ukwazisa kwakho okuqotho ngelungiselelo likaNkulunkulu lothando lomhlatshelo kaKristu. Ungaqiniseka ngokuthi uJehova uyokubusisa, njengoba okuhlangenwe nakho okulandelayo kubonisa.

⁷ Udade owenza umsebenzi wokuziphilisa isikhathi esigcwele wabhala ngokuhlangenwe nakho kwakhe kokuba yiphayona elisizayo ngo-March odlule: “INkonzo Yethu YoMbuso ka-February 2001 yakhuthaza bonke abazimo zabo zazibavumela ukuba babe amaphayona asizayo phakathi nenkathi yeSikhumbuzo. Njengoba u-March ayeneMigqibelo emihlanu, lokhu kwavumelana kahle nesimiso sami. Ngakho nganquma ukufaka isicelo sami.” Njengoba inyanga iqala, wazibekela umgomo wokuzama ukuqala isifundo seBhayibheli sasekhaya. Ingabe waphumelela? Yebo, ngehora lama-52 lokufakaza kuleyo nyanga! Waphetha ngokuthini? “Kuba khona izibusiso ezimangalisayo lapho senza umzamo othé xaxa.”

⁸ Ziba yini izinzuzo emkhayeni ophayona ndawonye? Umkhaya wabane owenza kanjalo ngo-April odlule wathola ukuthi kwakuyinyanga owawuyoyikhumbula njalo. Umama wathi: “Yeka isimo sengqondo esiqondile esasiba naso usuku ngalunye, njengoba sasimunye enkonzweni! Ukuxoxa ngomsebenzi wethu wansuku zonke enkonzweni kwenza isikhathi sesidlo sethu saba esijabulisayo.” Indodana yathi: “Ngakujabulela ukusebenza ensimini nobaba phakathi nalelo sonto, ngoba ngokuvamile usuke esemsebenzini wokuziphilisa.” Ubaba yena wanezela: “Njengenhloko yomkhaya, ngazizwa nganelisekile ngokwazi ukuthi sasisebenza ndawonye emsebenzini obaluleke kakhulu esikhathini sethu.” Ingabe umkhaya wakho ungaphayona ndawonye? Kungani ningabi nengxoxo yomkhaya ukuze nibone ukuthi kungenzeka yini umkhaya wenu wonke ube amaphayona asizayo phakathi nenkathi yeSikhumbuzo?

⁹ Singamenza Yini U-March Abe Yinyanga Yethu Engcono Kunazo Zonke? Ekuqaleni kuka-2000, INkonzo Yethu YoMbuso yaphakamisa lo mbuzo: “Singamenza Yini U-April 2000 Abe Yinyanga Yethu Engcono Kakhulu?” Kwaba yini ukusabela? Kwafinyelelwa amanani amasha aphakeme kunawo wonke. Kwaba nenani eliphakeme kunawo wonke lenyanga eyodwa lamaphayona asizayo angu-10 126 eNingizimu Afrika. Ngaphezu kwalokho, amanani esaba nawo amahora, okuhanjiswa komagazini, ezincwajana, ezimpindelo, nawezifundo zeBhayibheli ayephakeme kunawo wonke. Uyayikhumbula yini intshiseko eyokhelwa ukwanda okumangalisayo komsebenzi ongokomoya ebandleni lakini phakathi naleyo nyanga ekhethekile? Singakufinyelela yini kulo nyaka noma size ngisho sikudlule lokho esakufeza? Ngomzamo obumbene wabo bonke, u-March 2002 angaba “Yinyanga Yethu Engcono Kunazo Zonke.” Kungani kuwu-March?

¹⁰ Kunezizathu ezimbili ezenza u-March abe yinyanga yomsebenzi ekhethekile. Okokuqala, iSikhumbuzo siyogujwa ngasekupheleni kuka-March, okusinika ithuba elanele ekuqaleni kwaleyo nyanga lokuba simeme abaningi ngangokunokwenzeka ukuba babe khona. Okwesibili, kulo nyaka u-March unezimpelasonto ezinhlanu ezigcwele, okwenza kube lula ukuba yiphayona elisizayo kulabo abasebenzayo noma abafundayo. Kungani ungahlali phansi manje uhlele isimiso esisebenzisekayo, usebenzisa ikhalenda elifakwe kulesi senezelo? Ukuba yiphayona elisizayo kungase kube lula kunokuba ucabanga. Ngokwesibonelo, ngokuhlela ukuba usebenze amahora angu-8 enkonzweni yasensimini impelasonto ngayinye yalezi ezinhlanu, kuyodingeka uhlele ukusebenza amahora angu-10 kuphela engeziwe phakathi nayo yonke le nyanga ukuze ufinyelele amahora angu-50 adingekayo.

¹¹ Yini abadala abangayenza ukuze basize bonke ebandleni ukuba ‘bashumayele izwi likaNkulunkulu ngokugcwele’? Yakhani intshiseko ngezinkulumo emihlanganweni nangezingxoxo zenu siqu. Ababonisi Bezifundo Zencwadi ZeBandla nabasizi babo bangakhuluma nomuntu ngamunye owabelwe eqenjini labo ukuze bamnikeze usizo. Mhlawumbe kungase nje kudingeke amazwi ambalwa esikhuthazo noma ukusikisela okuwusizo. (IzAga 25:11) Abaningi bayobona ukuthi ngokulungisa okuncane esimisweni sabo, bangalijabulela ilungelo lokukhonza njengamaphayona asizayo. Emabandleni amaningi, abaningi, uma kungebona bonke kubadala nezinceku ezikhonzayo nomkabo, babeka isibonelo esihle ngokuba amaphayona asizayo ndawonye phakathi nenkathi yeSikhumbuzo. Lokhu kuye kwakhuthaza abamemezeli abaningi ukuba bazihlanganise nabo. Ngenxa yobuthakathaka bomzimba noma ezinye izimo, abanye abamemezeli bangase bangakwazi ukuphayona, kodwa bangakhuthazwa ukuba babonise ukwazisa kwabo ngokwenza konke okusemandleni abo enkonzweni kanye nabanye ebandleni.

¹² Ukuphumelela kuxhomeke ekuhleleni kwabadala ngokucophelela. Kufanele kuhlelwe imihlangano yenkonzo yasensimini ngezikhathi ezifanelekayo phakathi nalo lonke isonto. Uma kungenzeka, umbonisi wenkonzo uyokwabela abazalwane abafanelekayo kusengaphambili ukuba baqhube yonke imihlangano yenkonzo. Kuyodingeka balungiselele kahle ukuze le mihlangano ingeqi emizuzwini engu-10 kuya kwengu-15, kuhlanganise nokuhlela amaqembu, ukwaba insimu, nokuthandaza. (Bheka IBhokisi Lemibuzo kuyi-Nkonzo Yethu YoMbuso ka-September 2001.) Isimiso somsebenzi wale nyanga kufanele sichazwe ngokucacile ebandleni bese sichonywa ebhodini lezaziso.

¹³ Kufanele kube nensimu eyanele. Umbonisi wenkonzo kufanele ahlangane nomzalwane osingatha amasimu ukuze enze amalungiselelo okusebenza amasimu asetshenzwa ngokwethukela. Kufanele kugxilwe ekusebenzeni imizi yabangatholakali emakhaya, ukufakaza emigwaqweni nasezitolo, nokufakaza kusihlwa. Lapho kufaneleka khona, abanye abamemezeli bangase basizwe ukuba bafakaze ngocingo.

¹⁴ Basize Ukuba Baphinde Bakhonze: Ingabe bakhona ensimini yebandla lakini abangasazishumayeli izindaba ezinhle? Abanjalo baseyingxenye yebandla futhi badinga usizo. (IHu. 119:176) Njengoba ukuphela kwaleli zwe elidala sekuseduze kakhulu futhi izwe elisha seliphambi kwethu, sinesizathu esihle sokwenza wonke umzamo wokusiza asebepholile. (Roma 13:11, 12) Unyaka ngamunye, abantu abangaphezu kuka-1 400 baye balwamukela usizo futhi bavuselelwa kule minyaka emihlanu edlule. Yini esingayenza ukuze sisize abaningi ngokwengeziwe ukuba bavuselele uthando nokuqiniseka ababenakho ekuqaleni?—Heb. 3:12-14.

¹⁵ Indikimba yabadala ingathanda ukuxoxa ngendlela engasiza ngayo labo abaye baphola eminyakeni embalwa edlule. (Math. 18:12-14) Unobhala kufanele ahlole amakhadi oMbiko Wommemezeli Webandla, abhale bonke abaye baphola. Kufanele kwenziwe umzamo okhethekile wokusiza ngelungiselelo lokwalusa. Umdala angase athande ukuhambela ummemezeli othile ngenxa yokuthi wayemjwayele noma babengabangane esikhathini esidlule, noma kungase kucelwe abanye abamemezeli ukuba basize. Kungenzeka ukuthi babemfundela lo muntu osepholile manje futhi bangalijabulela ithuba lokusiza ngokukhethekile kulesi sikhathi sesidingo. Sinethemba lokuthi abaningi balabo ababepholile bayoshukumiseleka ukuba baphinde baqale ukushumayela izwi likaNkulunkulu. Uma befaneleka, asikho isikhathi esingcono ngabo sokuba baqale kunenkathi yeSikhumbuzo!—Ukuze uthole imininingwane eyengeziwe, bheka IBhokisi Lemibuzo kuyi-Nkonzo Yethu YoMbuso ka-November 2000.

¹⁶ Bakhona Yini Abanye Abakufanelekelayo Ukushumayela? UJehova uyaqhubeka ebusisa abantu bakhe ngokungenisa “okunxanelekayo kwabo bonke abezizwe.” (Hag. 2:7) Unyaka ngamunye kunezinkulungwane ezifanelekela ukuba abamemezeli abangabhapathiziwe. Zingobani? Izingane zoFakazi BakaJehova kanye nabafundi beBhayibheli abathuthukayo. Sazi kanjani ukuthi bayafaneleka ukuba babe abamemezeli bezindaba ezinhle?

¹⁷ Izingane ZoFakazi BakaJehova: Izingane eziningi sezihambe nabazali bazo endlini ngendlu iminyaka eminingi, nakuba zingakakhonzi njengabamemezeli abangabhapathiziwe. U-March angaba isikhathi esihle sokuba ziqale. Uzokwazi ngani ukuthi ingane yakho iyafaneleka? Ikhasi 100 lencwadi Ukuhlelelwa Ukufeza Inkonzo Yethu lithi kulapho “umntwana eyisibonelo ekuziphatheni kwakhe futhi ekwazi ukuzikhulumela ngokholo lwakhe ngokukhuluma nabanye ngezindaba ezinhle, eshukunyiswa inhliziyo ukuba enze kanjalo.” Uma ucabanga ukuthi ingane yakho iyafaneleka, khuluma nomunye wabadala oseKomitini Yenkonzo Yebandla.

¹⁸ Abafundi BeBhayibheli Abafanelekayo: Ngemva kokuba umfundi weBhayibheli esengenise ulwazi futhi sekuyisikhathi esithile eba khona emihlanganweni, angase athande ukuba ummemezeli woMbuso. Uma uqhubela umfundi onjalo isifundo, cabangela le mibuzo: Ingabe uyathuthuka, ngokuvumelana nobudala nekhono lakhe? Ingabe useqalile ukuxoxa nabanye ngokwethukela ngokholo lwakhe? Ingabe ‘uyabugqoka ubuntu obusha’? (Kol. 3:10) Ingabe uyahlangabezana nezimfuneko zabamemezeli abangabhapathiziwe, ezihlelwe ekhasini 97-9 encwadini Ukuhlelelwa? Uma kunjalo, kufanele uthintane neKomiti Yenkonzo Yebandla ukuze kwenziwe amalungiselelo okuba abadala ababili bahlangane nawe kanye nalo mfundi. Uma efaneleka, laba badala ababili bayomazisa ukuthi usengaqala ukuhlanganyela enkonzweni yasobala.

¹⁹ Kuthiwani Ngo-April No-May? Lezi nazo kuyoba izinyanga ezikhethekile zomsebenzi owandisiwe enkonzweni yasensimini. Abaningi abazoba ngamaphayona asizayo ngo-March bangase bakwazi ukuphinde benze kanjalo ngo-April noma ngo-May noma ngazo zombili lezi zinyanga. Phakathi no-April no-May, sizohambisa ngokuyinhloko omagazini INqabayokulinda ne-Phaphama! enkonzweni. Yeka imiphumela ezuzisayo abaye baba nayo ekuphileni kwalabo ababafundayo! Lab’ omagazini baye bafeza indima enkulu ekwandeni okumangalisayo okuye kwaba khona emhlabeni wonke. Kuzokwenziwa umzamo okhethekile ngo-April nango-May wokuhambisa omagazini kubantu abaningi ngangokunokwenzeka. Hlela manje ukuba uhlanganyele ngokugcwele.

²⁰ Njengoba kuhlelwa ukuba kwandiswe umsebenzi wokushumayela, ingabe udinga ukwandisa inani lomagazini obathola ngebandla? Kuwo wonke unyaka wenkonzo, sihambisa INqabayokulinda ne-Phaphama! uMgqibelo ngamunye, okuwuSuku Lukamagazini esilukhethile. Nokho, njengoba abaningi bezobe behlanganyela enkonzweni yamaphayona asizayo futhi sonke sizobe sihambisa omagazini izinyanga ezimbili ezigcwele, kungase kudingeke ukuba wandise i-oda lakho likamagazini ebandleni. Uma kunjalo, siza wazise umphathi kamagazini ebandleni lakini ngokushesha. Ngesikhathi esifanayo, umphathi wezincwadi kufanele aqiniseke ukuthi kukhona inani elanele lokusetshenziswa yibo bonke lepheshana elithi Ungathanda Yini Ukwazi Okwengeziwe NgeBhayibheli?

²¹ Abaningi baye bazwakalisa ukwazisa ngesici esikuyi-Nkonzo Yethu YoMbuso esithi “Ongase Ukusho Ngomagazini.” Ingabe uye walisebenzisa ngokunenzuzo leli lungiselelo ngokwazi lezi zethulo zikamagazini eziyisibonelo? Kungani ningasebenzisi ingxenyana yesikhathi sesifundo senu seBhayibheli somkhaya isonto ngalinye ukuze niprakthize lezi zintshumayelo?

²² Yisebenzise Ngokunenzuzo Le Nkathi YeSikhumbuzo: Njengomphostoli uPawulu, masibonise uJehova indlela esisazisa ngayo ‘isipho sakhe samahhala esingachazekiyo’ ngokuhlanganyela ngokugcwele emisebenzini engokomoya ehlelelwe le nkathi yeSikhumbuzo. Lena ihlanganisa (1) ukuhlanganyela ngokugcwele oSukwini Lukamagazini olukhethekile ngo-March 2, 2002; (2) ukuba khona emkhosini wonyaka obaluleke kunayo yonke, ukugujwa kweSidlo SeNkosi Sakusihlwa ngoLwesine, ngo-March 28, 2002; (3) ukusiza abaye baphola ukuba bavuselele ‘uthando ababenalo ekuqaleni’ (IsAm. 2:4; Roma 12:11); (4) ukusiza izingane zethu nanoma ibaphi abafundi beBhayibheli abafanelekayo ukuba babe abamemezeli abangabhapathiziwe; nokuba (5) sihlanganyele ngokugcwele ngangokunokwenzeka emsebenzini wobuvangeli, size ngisho sibe amaphayona asizayo ngo-March nangemva kwakhe.—2 Thim. 4:5.

²³ Sithandaza ngobuqotho ukuba sonke sibe nengxenye egcwele ekushumayeleni izindaba ezinhle zoMbuso kule nkathi yeSikhumbuzo, kanjalo sibonisa ukujula kokwazisa kwethu ngakho konke uJehova aye wasenzela kona.

[Ibhokisi ekhasini 6]

Isimiso Sami Senkonzo Yasensimini Ngo-March 2002

1 2

3 4 5 6 7 8 9

10 11 12 13 14 15 16

USuku

Lukamagazini

17 18 19 20 21 22 23

24 25 26 27 28 29 30

KWELANGA

31

Ungasihlela yini isimiso sengqikithi yamahora angu-50 ukuze ube yiphayona elisizayo ngo-March?