Indlela Ongazuza Ngayo Eqenjini Lakho Lenkonzo Yasensimini
1. Iziphi izinzuzo zeSifundo Sencwadi Sebandla ezisatholakala naseqenjini lethu lenkonzo yasensimini?
1 Ingabe zikhona izici onomuzwa wokuthi uyazikhumbula ngeSifundo Sencwadi Sebandla? Amaqembu ayemancane futhi isimo sasikhululeke kakhudlwana. Lokhu kwakwenza kube lula ukwakha ubungane obabuba umthombo wesikhuthazo ngokomoya. (IzAga 18:24) Umbonisi wesifundo sencwadi wayekwazi ukuqonda izimo zethu ngabanye futhi ekwazi nokunikeza isikhuthazo esifanele. (IzAga 27:23; 1 Pet. 5:2, 3) Lezi zinzuzo zisatholakala naseqenjini lethu lenkonzo yasensimini.
2. Singasithatha kanjani isinyathelo kuqala ukuze sakhe ubungane obuwumthombo wokusekelana okungokomoya eqenjini lethu lenkonzo yasensimini?
2 Thatha Isinyathelo Kuqala: Ngokuvamile amaqembu enkonzo yasensimini ayalingana namaqembu esifundo sencwadi ngobukhulu. Ubungane obuseduze bungakheka ngokusebenza “ndawonye” nabanye ensimini. (Fil. 1:27) Bangaki oke wasebenza nabo eqenjini okulo? ‘Unganuleka’ yini kulesi sici? (2 Kor. 6:13) Ngaphezu kwalokho, ngezinye izikhathi singase simeme othile eqenjini lethu ukuba ahlanganyele nathi ekuKhulekeleni Komkhaya kwakusihlwa noma esidlweni. Kwamanye amabandla, amaqembu enkonzo yasensimini ayashintshana ngokulungisela isikhulumi esivakashile ukudla. Ngesonto iqembu elabelwe ngalo liyahlangana lidle ndawonye, futhi likhuthazane kungakhathaliseki ukuthi isikhulumi sizoba khona yini esidlweni noma cha.
3. Imaphi amanye amathuba esinawo okuthola ukuhanjelwa kokwalusa eqenjini lethu lenkonzo yasensimini?
3 Nakuba manje ibandla lihlangana kabili kuphela ngesonto, lokhu akusho ukuthi abamemezeli akusafanele bakuthole njalo ukuhanjelwa kokwalusa. Ababonisi bamaqembu bamiswe eqenjini ngalinye ngenjongo yokuba bakhuthaze umuntu ngamunye futhi bamqeqeshe enkonzweni. Uma umbonisi weqembu okulo engakaceli ukusebenza nawe ensimini, kungani ungaceli ukusebenza naye? Ngaphezu kwalokho, umbonisi wenkonzo usebenzisa impelasonto eyodwa inyanga ngayinye ukuze ahlanganyele ensimini nelinye lamaqembu. Emabandleni amancane lapho kunamaqembu ambalwa kuphela enkonzo yasensimini, angase ahlele ukuvakashela iqembu ngalinye kabili ngonyaka. Uyasihlela yini isimiso sakho ukuze ube khona ensimini lapho ekhonza iqembu lenu?
4. (a) Ihlelwa kanjani imihlangano yenkonzo yasensimini? (b) Kungani kufanele sicabangele ukuvula imizi yethu ukuze kuqhutshelwe kuyo imihlangano yenkonzo yasensimini?
4 Ngokuvamile kuwusizo ukuba iqembu ngalinye lihlangane lodwa ukuze liye enkonzweni yasensimini ngezimpelasonto. Ukuba nezindawo eziningana okuhlanganwa kuzo cishe ngesikhathi esifanayo kungenza kube lula ngabamemezeli ukuya kulowo mhlangano mhlawumbe nokuya ensimini. Abamemezeli bangabiwa ngokushesha bese beqonda ngqo ensimini ngaphandle kokulibala. Kungaba lula nangombonisi weqembu ukuba abanakekele kahle labo abaseqenjini lakhe. Nokho, ngezinye izikhathi izimo zingase zenze kufaneleke ukuba amaqembu amabili noma ngaphezulu asebenze ndawonye. Uma kuwukuthi ibandla lihlangana ndawonye ukuze libe nomhlangano wenkonzo yasensimini ngoMgqibelo wokuqala enyangeni noma ngemva kweSifundo Se-Nqabayokulinda, ngokuvamile kuyasiza ukuba iqembu ngalinye lihlale ndawonye futhi umbonisi weqembu anikezwe imizuzu embalwa ukuze ahlele iqembu lakhe ngaphambi kokuba umhlangano wenkonzo yasensimini uphethwe ngomthandazo.—Bheka ibhokisi elithi “Ungawuvula Yini Umuzi Wakho?”
5. Nakuba ilungiselelo leSifundo Sencwadi Sebandla selaphela, yini esingaqiniseka ngayo?
5 Nakuba ilungiselelo leSifundo Sencwadi Sebandla selaphela, uJehova uyaqhubeka esinika konke esikudingayo ukuze senze intando yakhe. (Heb. 13:20, 21) Njengoba sinakekelwa nguJehova, asiswele lutho. (IHu. 23:1) Ziningi izibusiso esizithola eqenjini lethu lenkonzo yasensimini. Uma sithatha isinyathelo kuqala futhi ‘sihlwanyela kakhulu, siyovuna kakhulu.’—2 Kor. 9:6.
[Ibhokisi ekhasini 6]
Ungawuvula Yini Umuzi Wakho?
Amanye amabandla ahlanganisa amaqembu enkonzo yasensimini ngezimpelasonto ngenxa yokuthi ayanele imizi okungahlanganelwa kuyo. Imihlangano yenkonzo yasensimini iyingxenye yelungiselelo lebandla, ngakho kuyilungelo ngempela ukuba iqhutshelwe kwakho. Ungawuvula yini umuzi wakho? Ungangabazi ukuvula umuzi wakho ngenxa nje yokuthi uphansi. Abadala bayocabangela indawo umuzi wakho okuyo nezinye izici ezifanayo nalezo ezazicatshangelwa lapho kukhethwa izindawo zesifundo sencwadi. Uma ungathanda ukuvula umuzi wakho, yazisa umbonisi weqembu okulo.