Indlela Yokusebenzisa Ethi Obani Abenza Intando KaJehova Namuhla?
Incwajana Entsha Eklanyelwe Ukuqondisa Abafundi BeBhayibheli Enhlanganweni
1. Ziyini izinjongo ezintathu zencwajana ethi Intando KaJehova?
1 Ingabe usuqalile ukusebenzisa incwajana entsha ethi Obani Abenza Intando KaJehova Namuhla? Injongo yayo (1) ukujwayelanisa esibafundela iBhayibheli noFakazi BakaJehova, (2) ukubasiza bazi ngalokho esikwenzayo, (3) kanye nokubabonisa indlela inhlangano yethu esebenza ngayo. Incwajana ethi Intando KaJehova inesifundo esiphelela ekhasini elilodwa esingahlanganiswa kalula ngemizuzu emihlanu kuya kweyishumi ngemva kwesifundo ngasinye.
2. Chaza indlela le ncwajana ehlelwe ngayo nezici zayo.
2 Indlela Ehlelwe Ngayo: Le ncwajana ihlukaniswe yaba izingxenye ezintathu, ngayinye exoxa ngesici esihlukile senhlangano kaJehova njengoba kuboniswe ngenhla. Isihloko sesifundo ngasinye kwezingu-28 sibhalwe ngendlela ewumbuzo, kanti izihlokwana ezilandelayo ezibhalwe ngokugqamile ziphendula lowo mbuzo. Izithombe ezithathwe emazweni angaphezu kuka-50 zitholakala kuyo yonke le ncwajana ukuze kuboniswe ukuthi lo msebenzi wethu wenziwa emhlabeni wonke. Izifundo eziningana zinamabhokisi athi “Thola Okwengeziwe” anamacebiso ongakhuthaza umfundi ukuba awasebenzise.
3. Singayisebenzisa kanjani incwajana ethi Intando KaJehova?
3 Indlela Ongayisebenzisa Ngayo: Qala ngokumbonisa umbuzo oyisihloko saleso sifundo. Ngemva kwalokho, njengoba senifunda leso sifundo ndawonye, qokomisa izihlokwana ezibhalwe ngokugqamile. Ekugcineni, xoxani ngemibuzo yokubukeza esekupheleni kwekhasi. Ningafunda sonke isifundo noma nifunde isigaba ngasinye futhi nixoxe ngaso. Sebenzisa ukwahlulela kwakho ekunqumeni ukuthi imiphi imiBhalo ekhonjiwe enizoyifunda. Ungakhohlwa ukuba nixoxe ngezithombe nangamabhokisi athi “Thola Okwengeziwe.” Ezikhathini eziningi, izifundo kufanele zenziwe ngokulandelana kwazo. Nokho, ukhululekile ukweqa uye esifundweni esikhuluma ngephuzu elidingekayo ngaleso sikhathi. Ngokwesibonelo, uma kunomhlangano omncane noma omkhulu osuseduze, ningavele neqe niye esifundweni 11.
4. Kungani ujabula ngokuba naleli thuluzi elisha?
4 Lapho sifunda iBhayibheli nothile simsiza ukuba ajwayelane noBaba wethu wasezulwini. Nokho, kudingeka simfundise nangenhlangano kaJehova. (IzAga 6:20) Yeka ukuthi sijabula kanjani ngokuba naleli thuluzi elisha elenza kube lula ukwenza kanjalo!