Иааигәоума аҵыхәтәа?

Иаҩижьуама Анцәа ауаа дара-дара еиԥырхагахаларц, насгьы ауаатәыҩса рԥеиԥш ашәарҭара иҭадыргылаларц? Мап! Ишаҳбаз еиԥш, иара игәы иҭоуп шәышықәсала ицо агәаҟрақәа рҵыхәтәа аԥҵәара. Ауаатәыҩсеи Адгьыли зшаз шәара ижәдыруазарц иҭахуп: уи аамҭа ааигәахара иаҿуп! Аха излаҳдыруазеи ҳара аҵыхәтәа шааигәоу?

Иааҳгап аҿырԥштәы. Шәара машьынала ныҟәара шәцозар, раԥхьа шәмаршрут гәашәҭоит аинтернет, ахсаала, ма амҩақәҵагақәа рыла. Ахсаалақәа рҿы иану умҩақәызҵо адыргақәа шәанраҩсуа, иалшәхыз аҭыԥ шәшазааигәахо агәра шәнаргоит. Убас еиԥш ҳара Анцәа иҳаиҭеит Иажәа, уа иаирбеит аҵыхәтәа шааигәахо узырбо еилыкка иҟоу адыргақәа — адунеи зегь аҿы иубарҭахо ахҭысқәа. Арҭ акрызҵазкуа ахҭысқәа шымҩаԥысуа ҳанрыхәаԥшуа, ҳара агәра ҳгоит аҵыхәтәахьы уназго аамҭазы ҳшынхо.

Абиблиа иҳаилнаркаауеит адунеизегьтәи аҭоурых аҿы иалагар шакәу ахаан иҟамлац аамҭа, насгьы уи апогеи аҵыхәтәа шакәхо. Арҭ адунеизегьтәи ахҭысқәа еизганы ари апериод ауаатәыҩсатә ҭоурых аҿы иҟаз апериодқәа зегьы ирылнакаалоит. Еилҳаргап Анцәа Иажәаҿы иану уи аамҭа алызкаауа ҷыдарақәак.

1. АДУНЕИЗЕГЬТӘИ АКРИЗИС. Матфеи иҟынтә Аевангелие 24-тәи ахы аҟны иану аԥааимбаражәа ҳхьанарԥшуеит еидкылоу адырга аазырԥшуа адунеизегьтәи хҭысқәак рахь. Уи адырга иаанаго́зар ауп амаҭәарқәа рсистема ахыркәшара, уи ашьҭахь «иԥҵәоит зегьы рҵыхәтәа» (ажәеинраалақәа 3, 14). Еидкылоу адырга иаҵанакуеит зымҽхак дуу аибашьрақәа, амлакра, адгьылҵысрақәа, азакәандара аизҳара, абзиабара аҟамзаара, насгьы ауаа ржьаразы, гызмалрыла иҵәаху адиннапхгаҩцәа рҽазышәарақәа (ажәеинраалақәа 6—26). Ҳәарада, арҭ реиԥш иҟоу ахҭысқәа уаанӡагьы аамҭа-аамҭала иҟалалон. Аха аҵыхәтәа ааигәахацыԥхьаӡа, арҭ ахҭысқәа зегьы аамҭак иалагӡаны имҩаԥыслароуп. Уи адагьы, урҭ ирыцлоит егьырҭ «угәуҽанызҵо адыргақәа», ма аамҭатә ҷыдарақәа хԥа.

2. АУААТӘЫҨСА РҬАГЫЛАЗААШЬА. Абиблиаҿы иануп «аҵыхәтәантәи амшқәа» — аҵыхәтәахьы узго аамҭа — ауаатәыҩса рҭагылазаашьа аицәахарала иалукаауеит ҳәа. Абиблиатә ԥааимбаражәа иаҳәоит: «Ауаа рхы-рыԥсы иашьҭалоит, есааира акы абаҳарҳари ҳәа идәықәлоит, ахамаԥагьара иаанахәоит, рыбыз хәаԥсоит, изхылҵыз ирзымӡырҩуа иалагоит, иҭабуп аҳәара рхадыршҭуеит, ԥсыцқьала аҟазаара мап ацәыркуеит, аӡәы иҩызахара-изааигәахара иашьҭалом, нышәара зқәым ракәхоит, имыцҳәацәахоит, аҽынкылара рцәыӡуеит, игәымбылџьбарахоит, аус хир, аус бзиа аҟаҵара иацәыхарахоит, ичарҳәацәахоит, ԥхашьара злам ракәхоит, рых беиа ирбауеит, Анцәа ицҟазаара аасҭа руаҩытәыҩсатә гәаҳәара ҿыхаа-мыхаақәа ихырхуеит» (2 Тимофеи 3:1—4). Ҳәарада, ауаа уаанӡагьы пату еиқәырҵомызт, аха «аҵыхәтәантәи амшқәа» рзы хыхь еиқәаҳаԥхьаӡаз аҟазшьақәа убриаҟара еицәахеит, аепоха зегь — «ихьанҭоу» аамҭақәа ҳәа азаҳҳәар ҳалшоит. Игәашәҭома шәара узыршәо арҭ атенденциақәа ауаатәыҩса рыбжьара еиҳа-еиҳа ишеицәахо?

3. АДГЬЫЛ АХШЬААРА ИАҾУП. Абиблиаҿы иануп Анцәа адгьыл хызшьаауа ауаа шынирҵәо (Аатра 11:18). Ишԥахыршьаауеи ауаа адгьыл? Арҭ ажәақәа Нои данынхоз аамҭа иазкны Абиблиа иану ажәақәа иреиԥшуп: «Анцәа адгьыл данықәыԥш, ибеит уи ауаа ишхыршьааз: зехьынџьара иҟан ақәымчра, адгьыл аҿы ауаа рыԥсҭазаара ԥхасҭатәын» (Аҟазаара 6:11, 12). Убри аҟынтә, ауаа ирызкны Анцәа иҳәеит: «Сара урҭ ықәысхуеит» (Аҟазаара 6:13). Игәашәҭома шәара адунеи ақәымчра шахыҵәаз узырбо ашьақәырӷәӷәарақәа еиҳа-еиҳа ишырацәахо? Иара убас шәазхәыц: аҭоурых аҿы ауаатәыҩса ишәарҭоу аамҭа иҭагылеит — иахьа ауаа ҳапланета зегь ахшьаара, насгьы уи иқәынхо ауаа зегьы рнырҵәара алшара рымоуп. Ауаа рнапаҿы абџьар рацәаны иҟоуп. Аха ауаа адгьыл даҽакалагьы ихыршьаауеит. Ҳапланетаҿы аԥсҭазаара злашьақәгылоу,— аԥсыԥлагаҩагара иҳацхраауа аҳауа, аԥстәқәеи аҵиаақәеи рдунеи, аокеанқәа,— ииашамкәа рхы иахьадырхәо азы, иааҟәымҵӡакәа ахыбгалара иаҿуп.

Шәазхәыц, ирымазма ауаа шәышықәса раԥхьа амчи алшареи адунеи уаҩ дықәымкәа рықәхра? Аха иахьа ауаа ирымоуп убас еиԥш иҟоу амч — еидыркылаз абџьари рыцҳашьарада ихыршьаауа адгьыли мацара иудырбоит уи. Атехнологиақәа ирласны реизҳара иахҟьаны, ауаа азԥхьагәаҭара, насгьы алҵшәақәа рхылаԥшра иахьӡаӡом. Насыԥны, адгьыл аԥеиԥш ауаа рнапаҿы акәӡам иахьыҟоу. Анцәа ҳапланетаҿы аԥсҭазаара ақәхра аӡәгьы илиршом. Иара хымԥада иҽалеигалоит уи аус, насгьы адгьыл хызшьаауа ықәихуеит!

4. АДУНЕИЗЕГЬТӘИ АЖӘАБЖЬҲӘАРАТӘ УС: Аҵыхәтәа даҽа дыргак адҳәалоуп зымҽхак дуу аус. Абиблиаҿы заа иҳәан: «Аҳра иазку ари ажәабжь бзиа рылаҳәахоит адунеи зегь ахьынӡанаӡааӡо ажәларқәа зегьы рзышаҳаҭразы, убасҟан иааиуеит аҵыхәтәа» (Матфеи 24:14, АдҾ). Ари ажәабжьҳәаратә, насгьы арҵаратә программа адинтә прозелитизм ашәышықәсақәа рыҩныҵҟа иҟанаҵоз аҽазышәарақәа зынӡаск иреиԥшымзароуп. Аҵыхәтәантәи амшқәа рзы ауаа ирылаҳәатәуп иҷыдоу ажәабжь — «аҳра иазку ари ажәабжь бзиа». Ижәдыруама шәара ихадоу ари аус иалахәу динхаҵаратә организациак? Шьоукы ари ажәабжь ауаа ирыладырҵәозаргьы, шаҟа иҭбааузеи уи иҟарҵо аус амҽхак? Ирыладырҵәома ажәабжь бзиа «адунеи зегь ахьынӡанаӡааӡо ажәларқәа зегьы рзышаҳаҭразы»?

«Аҳра иазку ари ажәабжь бзиа» — ҳара ҳсаит атема хада ауп. Уаҟа иаагоуп ари ажәабжь зну апубликациақәа 700 бызшәа инареиҳаны рыла. Ижәдыруама шәара Аҳра иазку ажәабжь бзиа адунеи зегь аҿы изларыларҳәо даҽа хархәагак? Аинтернет ҟалаанӡа акраамҭа шыбжьаз, Иегова ишаҳаҭцәа еицырдыруан Анцәа Иаҳра иазку ажәабжь бзиа рылазҳәо, имааԥсо ажәабжьҳәаҩцәа реиԥш. 1939 шықәса инаркны ажурнал «Ахьчаратә бааш» аҭыжьымҭақәа зегьы рцәаҿы иануп «Иегова Иаҳра рыланаҳәоит» ҳәа. Динтә усумҭак аҿы ианын Иегова ишаҳаҭцәа инарыгӡо ажәабжьҳәаратә ус «шаҟа рҽаладырхәуеи уи амҽхаки акы ишузадымкыло». Ари ажәабжьҳәаратә ус азкуп иаарласны Анцәа Иаҳра иабзоураны, аҵыхәтәа шааиуа зҳәо ажәабжь бзиа.

АДУНЕИЗЕГЬТӘИ АҬОУРЫХ ААЗЫРҲӘЫЗ

Ижәбома шәара арҭ «угәуҽанызҵо адыргақәа» ԥшьба? Шәышықәса ҵуеит ари ажурнал аԥхьаҩцәа аҵыхәтәа шааигәоу еилыркаарц азы адунеи аҿы иҟоу ахҭысқәа рахь ихьанарԥшуеижьҭеи. Аиашазы, аскептикцәа шьоукы ишьақәдырӷәӷәоит афактқәеи астатистикеи асубиективра шрылоу, насгьы урҭ рыԥсахра шымариоу. Иара убас дара ирҳәоит адунеи аҿы аҭагылазаашьа еицәахеит ҳәа агәаанагара мцуп ҳәа, насгьы иахьатәи аимадага абзоурала, аинформациа еиҳа иаартуп. Ус шакәугьы, ицәырҵуеит ауаатәыҩсатә ҭоурых аҿы акы иузадымкыло аамҭа аҵыхәтәахьы ацара ишаҿу узырбо аҷыдарақәа рацәаны.

Аспециалистцәа шьоукы ирыԥхьаӡоит ҳара аиҭакра дуқәа рышәхымс ҳалагылоуп ҳәа. Иаҳҳәап, 2014 шықәсазы ажурнал «Атомқәа ҭызҵаауа рбиуллетень» анаукеи ашәарҭадареи рхеилак ргәырҽанырҵеит ООН Ашәарҭадара Ахеилак ауаатәыҩса ашәарҭара ишҭагылаз (The Bulletin of the Atomic Scientists). Абар аҵарауаа иҟарҵаз алкаа: «Арҭ ашәарҭарақәа игәцаракны рыҭҵаара иҳаилнаркаауеит ауаатәыҩсатә цивилизациа аҵыхәтәахьы иназго атехнологиатә катастрофа ҟалар шалшо». Аӡәырҩы ауаа еиҳа-еиҳа агәра ргоит адунеизегьтәи аҭоурых ааҳәра аамҭа ҳашҭагылоу. Ари аброшиура ҭзыжьуа, насгьы уи аԥхьаҩцәа аӡәырҩы агәра ганы иҟоуп акы иузадымкыло ҳара ҳаамҭа Абиблиаҿы зыӡбахә ану «аҵыхәтәантәи амшқәа» шракәу, уи иаа́нагоит аҵыхәтәа зынӡа ишааигәоу. Уи зегь мыцхәы ихьаамгакәа, ҳаԥхьаҟа иҟалараны иҟоу ахҭысқәа шәреигәырӷьалар шәылшоит. Избан? Избанзар шәара аҵыхәтәа аныҟало шәеиқәхар шәылшоит!