Иегова «гәҭыха-хьаас шәимоуп»

ИЗБАН Иегова дышшәеиҷаҳауа агәра ганы шәыҟазар зшәылшо? Зегь раԥхьаӡа иргыланы уи ус шакәу Абиблиаҿы иануп. 1 Пиотр 5:7 аҿы иҳәоуп: «Шәыгәҭыхақәа, шәхьаақәа зегьы Иара изшәырха, Иара изышәк, избан акәзар Иара гәҭыха-хьаас шәимоуп». Агәра шәзыргозеи шәара арҭ ажәақәа шиашоу?

ИЕГОВА ҲМАТЕРИАЛТӘ ҬАХРАҚӘА ДРЕИҶАҲАУЕИТ

Анцәа иссиру аҟазшьақәа илоуп. Иҟалап урҭ аҟазшьақәа шәҩыза гәакьа илазарц шәҭахызар. Ауаа қьиаралеи гәыҳалалралеи ианеизыҟоу, лассы-лассы дара еиҩызцәахоит. Иегова иқьиареи игәыҳалалреи есыҽны иаҳбоит. Абар ҿырԥштәык: «Уи ацәгьара ҟазҵогьы, абзиара зуагьы — имра рхаирԥхоит, иқьиоугьы иқьиамгьы ақәа рзаируеит» (Матф. 5:45). Хәарҭас ирылоузеи амреи ақәеи? Урҭ хәарҭас иаҳзаарго рацәоуп, аха иара убас Анцәа амреи ақәеи рыцхыраарала афатә-ажәтә ҳагмырхакәа, ҳагәқәа гәырӷьарыла ирҭәуеит (Аус. 14:17). Ааи, Иегова адгьыл еиуеиԥшым афатә ҳнаҭаларц деиҷаҳауеит, афатә хаа агәахәара ду ҳзаанагоит!

Нас избан аӡәырҩы ауаа амлакра изаго? Избанзар ауаатәыҩсатә напхгаҩцәа ауаа рҭахрақәа реиҷаҳара аҭыԥан, аҭыԥ дуи амали ирышьҭоуп. Иегова иаарласны аԥсыцәгьара ықәигоит, насгьы иахьатәи аполитикатә система Иԥа напхгара ззиуа жәҩантәи Аҳра ала иԥсахуеит. Усҟан аӡәгьы амлакра дагалаӡом. Аха уи аамҭа ааиаанӡа, Анцәа имаҵзуҩцәа зда ԥсыхәа ыҟам рымазарц деиҷаҳауеит (Аԥсал. 36:25 [37:25, АдҾ]). Иаанамырԥшӡои уи бзиа ҳшибо?

ИЕГОВА ҲАРА ҲЗЫ ИААМҬА ДЕИГӠАӠОМ

Аиҩызцәа аамҭа аицхгара бзиа ирбоит. Аҩыза бзиа иаашар хәлаанӡа уиацәажәалар улшоит. Иара ҳагәҭыхақәеи ҳауадаҩрақәеи анизеиҭаҳҳәо, зҿлымҳарала даҳзыӡырҩуеит. Иаҳҳәар ҳалшома убас Иегова изгьы? Хымԥада! Иара ҳаҳәарақәа зҿлымҳарала дырзыӡырҩуеит. Убри азоуп Абиблиаҿы изану: «Шәааҟәымҵӡакәа шәныҳәала» (1 Фес. 5:17).

Иегова ҳаҳәарақәа рзыӡырҩразы аамҭа деигӡаӡом. Иаҳгәалаҳаршәап Абиблиа иану ҿырԥштәык. Иисус апостолцәа алихаанӡа, «аҵх зегьы убраҟа ихигеит, Анцәа диашьапкуа» (Лука 6:12). Уи аҳәараҿы Иисус хаҭа-хаҭала иҵаҩцәа аӡәырҩы рыхьӡ иҳәозҭгьы, рҟазшьақәеи рыԥсыҽрақәеи дрызхәыцуазҭгьы, насгьы Иаб алхра аҟаҵара дицхраарц диҳәозҭгьы ҟаларын. Ианаацәылаша, Иисус идыруан ари амаҵзуразы еиҳа ианаалоз шалихыз. Иегова аҳәарақәа дырзыӡырҩуеит, иара игәаԥхоит гәык-ԥсыкала ҳаниҳәо (Аԥсал. 64:3 [65:2, АдҾ]). Ауаҩы сааҭла дтәаны игәҭыхақәа изеиҭеиҳәозаргьы, Анцәа уи изыӡырҩра еснагь дазхиоуп.

АНЦӘА АНАЖЬРА ДАЗХИОУП

Аҩызцәа гәакьақәагьы анажьра анырцәыцәгьоу ыҟоуп. Зны-зынла акыр шықәса еиҩызцәаз анажьра ахьырцәыцәгьоу аҟынтә, реиҩызара аҵыхәтәа ԥҵәоит. Аха Иегова ус дыҟам. Абиблиа згәы цқьоу ауаа зегьы ргәазҭанаҵоит Анцәа ианажьра иаҳәаларц, избанзар «иара гәшаҭарала иуанаижьуеит» (Ис. [Ис.] 55:6, 7). Избан Анцәа ус зыҟаиҵо?

Зеиԥшыҟам Анцәа ибзиабара анажьра игәазҭанаҵоит. Иара ауаатәыҩса даараӡа бзиа ибоит, убри аҟынтә ауаа агәнаҳаи уи иахылҿиаауа алҵшәа бааԥси рҟынтә иҿихырц азы, Иԥа Иисус дааишьҭит (Иоанн 3:16). Ииашаҵәҟьаны аҿыхра иаҳнаҭо еиҳа еиҳауп. Христос иҿыхратә ԥсхҭынҵара абзоурала, Анцәа бзиа иибо зегьы гәыҭбаарыла иранаижьуеит. Апостол Иоанн иҩуан: «Ҳазҵоу агәнаҳарақәа рыӡбахә аартны аргама ҳрылацәажәозар, усҟан Иара урҭ зегьы ҳанаижьуеит... избан акәзар Уи... диашаҵабыргуп» (1 Иоанн 1:9). Иегова анажьра дахьазхиоу абзоурала, ауаа иара иҩызцәахар рылшоит. Ҳгәы иамыхәаӡои уи ҳара?

ИЦХЫРААРА АНАҲҬАХУ ИҲАИҬОИТ

Аҩыза бзиа ауадаҩра анҳамоу ацхыраара ҳаҭара дазхиоуп. Иҟаиҵома ус Иегова? Аҭак Аԥсалом 36:24 (37:24, АдҾ) аҿы иҳаԥшаауеит: «[Анцәа имаҵзуҩы] акаҳара далагаргь дкаҳауам, Нцәа Ҳазшаз уи инапы кны дааникылоит». Иегова имаҵзуҩцәа еиуеиԥшым азнеишьақәа рыла дрыцхраауеит. Еилҳаргап Карибтәи амшын адгьылбжьаха Санта-Крус аҿы иҟалаз хҭыск.

Уа дынхон ӡӷабк. Лара абираҟ арҳаракра лҽахьалалмырхәуаз азы, класск аҿы аҵара лыцызҵоз лхыччон. Иегова даниҳәа ашьҭахь, уи ус иаанылмыжьырц лыӡбеит. Лара акласс аҿаԥхьа дықәгылеит. Абиблиатә ҭоурыхқәа зну ашәҟәы лхы иархәаны, аҵара лыцызҵоз ирзеиҭалҳәеит Седрахи, Мисахи, Авденагои рҿырԥшы шылнырыз. Лара илҳәеит: «Иегова урҭ ауриацәа ихьчеит, избанзар дара абаҟа иамҵамхырхәаӡеит». Анаҩс уи ашәҟәы аҵара лыцызҵоз ирыдылгалеит, 11-ҩык уи ашәҟәы ргеит. Иқәыԥшу ҳаҳәшьа даараӡа деигәырӷьеит ас еиԥш имариам атема лхы иархәаны зыгәра лго аиҭаҳәара ахьлылшаз. Лара агәра ганы дыҟоуп амчи аҟәыӷареи лызҭаз Иегова шиакәу.

Знымзар-зны Иегова дышшәеиҷаҳауа ала алак-ҩакра шәызцәырҵыр, шәрызхәыц Аԥсалом 33:18—20 (34:17—19, АдҾ); 54:23 (55:22, АдҾ); 144:18, 19 (145:18, 19, АдҾ) ирну ажәақәа. Шәразҵаа акыр шықәса Анцәа имаҵ зуа шәыгәрахаҵара шәыцеиҩызшо шәашьцәеи шәаҳәшьцәеи Иегова дышреиҷаҳауаз, насгьы Анцәа ицхыраара анышәҭаху, шәгәы иҭоу зегьы изеиҭашәҳәала. Иаарласны шәара ижәбоит Анцәа «гәҭыха-хьаас» шәышимоу.