«Анцәа иажәа... аус ауеит»

1. Агәра ҳзыргозеи ҳара Анцәа Иажәа аус шауа? (Шәахәаԥш астатиа алагамҭаҿы иаагоу асахьа.)

АНЦӘА имаҵзуҩцәа агәра ргоит Анцәа Иажәа ԥсҭазаара шамоу, насгьы аус шауа (Аур. 4:12). Ҳара иаҳбахьеит Абиблиа ҳаԥсҭазаара, ма егьырҭ рыԥсҭазаара аԥсахразы амч шамоу. Ҳашьцәеи ҳаҳәшьцәеи шьоукы уаанӡа иӷьычуан, анаркотикқәа рыдыркылон, насгьы гәаԥхашәадарала рхы мҩаԥыргон. Даҽа шьоукы ари адунеи аҿы ахьӡи-аԥшеи ма аԥара рыман, аха уеизгьы ак рызхомызт (Еккл. 2:3—11). Иҟоуп имаҷымкәа аҿырԥштәқәа згәы каҳахьаз ауаа Анцәа Иажәа агәыӷра шырнаҭаз ҳзырбо. Шәара ишәгәаԥхозар акәхап «Абиблиа аԥсҭазаара аԥсахуеит» ҳәа хьӡыс измоу астатиақәа рҿы урҭ ахҭысқәа рыԥхьара. Аха ауаа ақьырсиантә ԥсҭазаара иананыло ашьҭахьгьы, Анцәа Иажәа ацхыраарала Анцәеи дареи реизыҟазаашьақәа дырӷәӷәоит.

2. Иаажәга аҿырԥштәы актәи ашәышықәсазы ауаа Анцәа Иажәа шырныруаз узырбо.

² Иџьаҳшьалароума ҳаамҭазы аӡәырҩы ауаа Абиблиа аҵара абзоурала рыԥсҭазаара шьаҭанкыла иахьырыԥсахыз? Мап. Ус еиԥш иҟоу ахҭысқәа иаҳгәаладыршәоит ажәҩан аҿы анхара агәыӷра змаз актәи ашәықәсазы инхоз ақьырсианцәа. (Уаԥхьа 1 Коринфаа рахь 6:9—11.) Анцәа Иаҳра змоуа ауаа рыӡбахә аниҳәоз, апостол Павел иациҵеит: «Шәарҭ шәахьтә шьоукы абраҟа зыӡбахә ҳәоу злаҟаз шәалаҟан». Аха Абиблиеи Анцәа иԥшьоу идоуҳаи рыбзоурала дара аҽыԥсахра рылшеит. Аҵабырг амҩа иананыла ашьҭахьгьы, шьоукы агәнаҳа ӷәӷәақәа ҟарҵеит, убри аҟынтә Анцәеи дареи реизыҟазаашьақәа реиҭашьақәыргылара рықәшәеит. Абиблиаҿы иҳәоуп актәи ашәышықәсазы Анцәа идоуҳала иалхыз қьырсианк аизара далырцеит, аха аамҭак ашьҭахь уи иҽыриашаны дхынҳәит ҳәа (1 Кор. 5:1—5; 2 Кор. 2:5—8). Ҳара даара ҳаигәырӷьоит Анцәа Иажәа абзоурала ҳашьцәеи ҳаҳәшьцәеи рыԥсҭазаара аԥсахра ахьрылшаз.

3. Еилҳаргозеи ари астатиаҿы?

³ Иегова амч ду змоу Иажәа ҳамҭас иҳаиҭеит, насгьы ҳара уи ишахәҭоу еиԥш ҳхы иаҳархәалар ҳҭахуп (2 Тим. 2:15). Ари астатиаҿы ҳара еилҳаргоит уи аҟаҵара шҳалшо 1) ҳаԥсҭазаараҿы, 2) ажәабжь анаҳҳәо, насгьы 3) асцена аҟынтә ианыдҳарҵо. Ари ахцәажәара ҳацхраауеит иҳахәо ҳзырҵо, иҳаиҷаҳауа жәҩантәи Ҳаб иахь абзиабареи аџьшьареи раарԥшра (Ис. 48:17).

ҲАԤСҬАЗААРАҾЫ

4. а) Иҟаҵалатәузеи Анцәа Иажәа ҳнырларц азы? б) Ишԥашәыԥшаауеи шәара Абиблиа аԥхьаразы аамҭа?

⁴ Анцәа Иажәа ҳнырларц азы, ҳара уи иааиԥмырҟьаӡакәа ҳаԥхьалароуп (Иис. Н. 1:8). Ҳәарада, ҳара даара ҳаилахоуп, аха иҳамоу аусқәа хадазаргьы, урҭ Абиблиа аԥхьара иаҳԥырхагамхалароуп. (Уаԥхьа Ефесаа рахь 5:15, 16.) Аӡәырҩы Иегова ишаҳаҭцәа еиуеиԥшым азнеишьақәа рыԥшаауеит есыҽны Абиблиа иаԥхьаларц азы, иаҳҳәап, ашьыжь, ахәылбыҽха, ма шьыбжьон. Дара аԥсаломшәаҳәаҩ имаз ацәаныррақәа рымоуп, уи иҳәеит: «Бзиа ишԥазбо Уара узакәан! Иаахәлаанӡа иара ауп сзызхәыцуагьы» (Аԥсал. 118:98 [119:97, АдҾ]).

5, 6. а) Избан Абиблиаҿы ҳзыԥхьо азхәыцра зхадоу? б) Ишԥашәылшо азхәыцра ахәарҭа шәзаанагаларц аҟаҵара? в) Иарбан хәарҭоу шәара хаҭала ишәзаанаго Анцәа Иажәа аԥхьареи азхәыцреи?

⁵ Ҳара Абиблиа аԥхьара адагьы, ҳзыԥхьо ҳазхәыцлароуп (Аԥсал. 1:1—3). Убасҟан ауп ҳара уа иану алабжьарақәа ҳхы иаҳархәар анҳалшо. Абиблиа аԥхьаразы ҳхы иаҳархәозаалакгьы, икьыԥхьу ашәҟәы ма аелектронтә ҭыжьымҭа акәзаргьы, хықәкыс иҳамоу уи ҳгәаҵанӡа анагара ауп.

⁶ Ишԥаҳалшо Абиблиа иану азхәыцшьа ҳҵар? Ақьырсианцәа аӡәырҩы Абиблиа ианаԥхьо, лассы-лассы иааҭгыланы абас еиԥш иҟоу азҵаарақәа ирызхәыцуеит: еилыскаазеи Иегова изкны? Исылшома ари абиблиатә цыԥҵәахаҿы иану апринцип сыԥсҭазаараҿы ақәныҟәара? Аус здызулар сылшозеи еиҭа? Анцәа ҳиҳәаны Иажәа ҳаназхәыцуа, уи еиҳагьы ҳгәазҭанаҵоит уа иану алабжьарақәа рықәныҟәара. Усҟан ҳара Анцәа Иажәа ҳаԥсҭазаара шаҟа ианырыр алшо ҳбоит (2 Кор. 10:4, 5).

АЖӘАБЖЬ АНАҲҲӘО

7. Ишԥаҳалшо Анцәа Иажәа ажәабжьҳәараҿы алҵшәа аанагалартә еиԥш ҳхы иаҳархәалар?

⁷ Ишԥаҳалшо Анцәа Иажәа ажәабжьҳәараҿы алҵшәа аанагалартә еиԥш ҳхы иаҳархәалар? Актәи, иаҭахуп ажәабжь анаҳҳәо ма егьырҭ ианыдҳарҵо лассы-лассы уи ҳхы иаҳархәалар. Иашьак иҳәеит: «Ҩнаҭацыԥхьаӡа Иегова ихаҭа дшәыцны ажәабжь шәҳәозҭгьы, шәхы шԥамҩаԥыжәгарыз: шәымацара шәцәажәалозу, ма иара дцәажәалартә еиӷьышәшьозу?» Ҳара егьырҭ ажәабжь анырзеиҭаҳҳәо абиблиатә жәеинраалақәа ҳрыԥхьозар, Иегова ауаа драцәажәартә алшара иаҳҭоит. Лассы-лассы ҳазхәыцны иалҳхуа ажәеинраала ауаҩы еиҳа игәаҵанӡа инеир алшоит ҳажәақәа раасҭа (1 Фес. 2:13). Шәхы шәазҵаа: «Идсырбома сара Анцәа Иажәа ауаа, уи азы алшара ансымоу?»

8. Избан ажәабжь бзиа анаҳҳәо, абиблиатә жәеинраалақәа рыԥхьара мацара зазымхо?

⁸ Ҳәарада, ажәабжь ззеиҭаҳҳәо ауаҩы абиблиатә жәеинраалақәа изаԥхьара мацара азхаӡом. Избан? Избан акәзар актәи ашәышықәсазы ишыҟаз еиԥш, иахьагьы аӡәырҩы Абиблиа иану аилкаара рцәыцәгьоуп, ма зынӡагьы ирзеилкаауам (Рим. 10:2). Убри аҟынтә иахәҭам ауаҩы ажәеинраала ҳаизаԥхьазар, иаразнак еиликаауеит ҳәа аԥшра. Иахәҭоуп ажәеинраалаҿы ихадоу азхәыцрақәа ралкаара, иаҳҳәап, урҭ еиҭа инаҵшьны ҳрыԥхьар, насгьы иеилҳаркаар ҳалшоит. Ажәабжь ззеиҭаҳҳәо ирызнаҳго ажәабжь рыхшыҩи ргәи аҟынӡа инеирц азы ус аҟаҵара даара ихадоуп. (Уаԥхьа Лука 24:32.)

9. Иаҳҳәар ҳалшозеи абиблиатә жәеинраала ҳаԥхьаанӡа, ауаҩы Абиблиа пату ақәиҵарц азы? Иаажәга аҿырԥштәы.

⁹ Ҳара ауаҩы Абиблиа пату ақәиҵаларц ҳҭахуп. Убри аҟынтә абиблиатә жәеинраала ҳаԥхьаанӡа, иахәҭоуп иҟаҳҵо адгала ибзианы ҳазхәыцыр. Ҳара иаҳҳәар ҳалшоит: «Шәааи уи аганахь ала Ҳазшаз ииҳәо ҳахәаԥшып». Ақьырсиантә динхаҵара змам ауаҩы иаҳҳәар ҳалшоит: «Шәахәаԥш Иԥшьоу Аҩыра иаҳәо». Адинхаҵарахь аинтерес змам ауаҩы дҳақәшәазар, иаҳҳәар ҳалшоит: «Ишәаҳахьазма шәара ари акыр зхыҵуа иҟәыӷоу аҳәамҭа?» Ҳара ауаа зегь шеиԥшым еилаҳкаауеит, убри аҟынтә досу зегьы аинтерес рызцәыраҳгарц азы, еиуеиԥшым азнеишьақәа ҳхы иаҳархәоит (1 Кор. 9:22, 23).

10. а) Иарбан хҭысу иашьак дзықәшәаз? б) Иаҳзеиҭашәҳәа ауаҩы абиблиатә жәеинраала шәизаԥхьаны игәаҵанӡа ишнажәгаз.

¹⁰ Аӡәырҩы агәра ргеит Анцәа Иажәа ауаа даараӡа анырра шырнаҭо. Абар ҿырԥштәык. Иашьак зықәрахь инеихьаз акыршықәса ҳпубликациақәа ирыԥхьоз хаҵак аҩынтә раан диҭааит. Аиашьа ус баша «Ахьчаратә бааш» аҵыхәтәантәи аҭыжьымҭа изныжьра адагьы, иӡбеит уи ажурнал аҿы иаагаз атема иаҵанакуаз ажәеинраала дизаԥхьарц. Иара 2 Коринфаа рахь 1:3, 4 даԥхьеит, уа иануп: «Агәыразреи агәыжьжьареи Рынцәа... гәаҟрас иҳамақәоу зегьы ҳрылигоит, ҳгәы ижьжьоит». Уи ахаҵа арҭ ажәақәа игәаҵанӡа инеит, убри аҟынтә иара аиашьа урҭ ажәеинраалақәа деиҭарыԥхьарц диҳәеит. Иара иҳәеит уи аамҭазы иԥҳәыси иареи даараӡа агәырҭынчра рҭахын, убри аҟынтә Абиблиа иаҳәо еиҳаны еиликаар иҭаххеит ҳәа. Ишаҳбо еиԥш, Анцәа Иажәа ииашаҵәҟьаны аус ауеит, уи амаҵзураҿы ҳхы ианаҳархәо (Аус. 19:20).

АСЦЕНА АҞЫНТӘ ИАНЫДҲАРҴО

11. Иарбан ҭакԥхықәроу ирыду асцена аҟынтә идзырҵо аишьцәа?

¹¹ Ҳара зегьы даара иаҳгәаԥхоит аизарақәеи аконгрессқәеи рҭаара. Уа Иегова ҳимҵахырхәоит. Иара убас уа ҳара ахәарҭа ду ҳзаазго адоуҳатә дыррақәа ҳауеит. Аишьцәа ҳаҭыр дуны ирыԥхьаӡоит аизарақәа рҿы асцена аҟынтә егьырҭ дырҵара. Убри аамҭазгьы дара еилыркаалароуп аҭакԥхықәра ду шрыду (Иак. 3:1). Аишьцәа иаҳдырҵо Абиблиа шьаҭас иамоу иамаму агәра ганы иҟазар ауп. Асцена аҟынтә арҵара дҵас ишәыдзар, ишԥашәылшо Абиблиа аҵыхәтәанынӡа шәхы иашәырхәар?

12. Ишԥаилшо аиашьа иажәахә Абиблиа шьаҭас иамоу иамаму агәра агара?

¹² Ишәҳәо ажәахә Иԥшьоу Аҩыра шьаҭас иамоу иамаму гәашәҭала (Иоанн 7:16). Иаанагозеи уи? Актәи, шәҽазышәшәала шәажәахә аҿы ахҭысқәеи, аҿырԥштәқәеи, шәҳәашьеи абиблиатә жәеинраалақәа раасҭа ихадоу аҭыԥ аанырымкылаларц. Иара убас ишәгәалашәоз, Абиблиа аҟынтәи ажәеинраалақәа рыԥхьареи урҭ шьаҭас иҟаҵаны арҵареи шеиԥшым. Мыцхәы ажәеинраалақәа шәрыԥхьалар, иҟалап аӡырҩцәа жәеинраалакгьы рызгәнымкылар. Убри аҟынтә иалышәхша ажәеинраалақәа ибзианы шәрызхәыцла, насгьы урҭ шәрыԥхьарц, идеилшәыркаарц, ианаалоу аҿырԥштәы аажәгарц, насгьы урҭ рхы ишадырхәаша дшәырбарц азы аамҭа алышәх (Неем. 8:8). Ажәахә аорганизациа иаҳнаҭо аплан шьаҭас иамазар, уи аплан, насгьы уа иаагоу азхьарԥшқәа ҭышәҵаа. Еилышәкаа аплан аҿы иаагоу апунктқәеи абиблиатә жәеинраалақәеи шеидҳәалоу. Анаҩс убарҭ апунктқәа раарԥшра ишәыцхраауа ажәеинраалақәа алышәх. Аха зегь раԥхьа иргыланы, Иегова шәиҳәала Иажәа аҟынтә иаагоу азхәыцрақәа егьырҭ деилыркаара дшәыцхраарц азы. (Урыԥхьа Ездра 7:10; Ажәамаанақәа 3:13, 14.)

13. а) Ишԥалныри иаҳәшьак аизараҿы илаҳаз абиблиатә жәеинраалақәа? б) Ишԥашәныри шәара аизараҿы абиблиатә жәеинраалақәа шеиҭарҳәоз?

¹³ Австралиа инхо иаҳәшьак аизараҿы илаҳаз абиблиатә жәеинраалақәа даара лгәаҵанӡа инеит. Данхәыҷыз лара илхылгаз рацәан. Аха абиблиатә жәабжь анлаҳа, уи лыдылкылеит, насгьы лыԥсҭазаара Иегова изылкит. Уеизгьы лара Иегова бзиа дшибо аҵыхәтәанынӡа агәра лызгомызт. Аха ԥыҭрак ашьҭахь уи аганахь ала алак-ҩакра даҟәыҵит. Илыцхраазеи уи? Аизараҿы абиблиатә жәеинраалақәа еилдыргон, лара урҭ рызхәыцра далагеит, насгьы Аҩыра иану егьырҭ ажәеинраалақәа ирыдылҳәалеитa. Ишәаҳахьома шәара аизараҿы ма аконгресс аҿы даараӡа шәгәаҵанӡа инеиз абиблиатә жәеинраалақәа? (Неем. 8:12).

14. Ишԥаҳалшо Анцәа Иажәазы аџьшьара ааҳарԥшыр?

¹⁴ Иаашәырԥшуама шәара Иегова иахь аџьшьара Иажәа, Абиблиа, азы? Иара уи ҳамҭас ҳаҭара адагьы, уи наӡаӡа ишҳамазаауа ҳақәиргәыӷит (1 Пиотр 1:24, 25). Ҳара иааиԥмырҟьаӡакәа Анцәа Иажәа ҳаԥхьалар ауп, уа иану алабжьарақәа ҳаԥсҭазаараҿы ҳрықәныҟәалар ауп, насгьы егьырҭ ҳрыцхрааларц азы ҳхы иаҳархәалар ауп. Убас ҳара зыхә ҳараку Иегова Иажәа бзиа ишаҳбо шьақәҳарӷәӷәоит, аха зегь раасҭа ихадоу, уи Автор иахь абзиабареи аџьшьареи ааҳарԥшуеит.