Ирзыԥшузеи Анцәа иаӷацәа, ашәҟәы Аатра излаҳәо ала?

1. Изықәшәозеи Анцәа ижәлар, ашәҟәы Аатра иану инақәыршәаны?

АШӘҞӘЫ Аатра аҟынтә ҳара еилаҳкаауеит Анцәа жәҩантәи Иаҳра анапхгара аура ишалагахьоу, насгьы Аҩсҭаа адгьыл ахь дшылбаашьҭу (Аат. 12:1—9). Ажәҩан аҿы иҟоу уи агәырӷьара рзаанагеит! Аха адгьыл аҿы гәыкала Иегова имаҵ зуа имаҵзуҩцәа рзы аамҭа еиҳагьы ицәгьахеит. Избанзар зыԥсахы еибакны иҟоу Аҩсҭаа игәыԥжәара зегь урҭ ирхигоит (Аат. 12:12, 15, 17).

2. Иҳацхраауазеи ачҳара аарԥшны Аҩсҭаа иҿагылара?

² Иҳацхраауазеи ачҳара аарԥшны Аҩсҭаа иҿагылара? (Аат. 13:10). Аԥхьаҟа иҟалараны иҟоу ахьаҳдыруа даара иҳацхраауеит. Апостол Иоанн иҩит ҳаԥсҭазаара шеиӷьхо. Иаҳҳәап, Анцәа иаӷацәа зегь ықәигоит. Шәааи ҳахәаԥшып ашәҟәы Аатра аҿы Анцәа иаӷацәа злаарԥшу асимволқәа, насгьы Анцәа урҭ дышрықәыӡбо.

АСИМВОЛҚӘА РЫЛА ИААРԤШУ АНЦӘА ИАӶАЦӘА

3. Шәрыхцәажәа ашәҟәы Аатра иану символқәак.

³ Ашәҟәы Аатра актәи ажәеинраалаҿы иануп уа зыӡбахә ҳәоу ахҭысқәа асимволтә ҵакы шрымоу (Аат. 1:1). Анцәа иаӷацәагьы асимволтә бызшәала рыӡбахә ҳәоуп. Раԥхьа ҳара иаҳбоит «амшын иааҭыҵуаз агыгшәыг, уи быжь-хыки жәа-тәыҩаки ахагылан» (Аат. 13:1). Уи даҽа гыгшәыгк ашьҭанеиуеит. Иоанн иҳәеит ишибаз «адгьыл иҩхәыҵыҵыз даҽа гыгшәыгк, уи... агәылшьап шцәажәоз аиԥшгьы ицәажәон». Иара «ажәҩан аҟынтә адгьыл ахь амцагьы аанашьҭуеит» (Аат. 13:11—13, АдҾ). Аҵыхәтәаны иаацәырҵуеит акаҳԥы дзықәтәоу «иҟаԥшьы уаркалеиуаз агыгшәыг». Арҭ х-гыгшәыгк Анцәа Иеговеи иара Иаҳреи ажәытә аахыс ираӷацәоу аадырԥшуеит. Шәааи урҭ зусҭцәоу еилаҳкаап (Аат. 17:1, 3).

4, 5. Ишԥаҳацхраауеи Даниил 7:15—17 иану ажәақәа ашәҟәы Аатра иану асимволқәа рҵакы аилкаара?

⁴ Уи азы ашәҟәы Аатра злаҩу асимволтә бызшәа зеиԥшроу ҳдыруазароуп. Уи аҿы Анцәа Иажәа ахаҭа ҳацхраауеит. Ашәҟәы Аатра аҿы иаагоу асимволқәа егьырҭ абиблиатә шәҟәқәа рҿгьы иаҳԥылоит. Иаҳҳәап, Даниил иибаз аԥааимбаражәатә ҵакы змаз аԥхыӡқәа руак аҿы ибеит ԥшь-гыгшәыг дуӡӡак амшын ишааҭыҵыз (Дан. 7:1—3). Нас Даниил ихаҭа иҳәеит урҭ агыгшәыгқәа ԥшьҩык аҳцәа ма ԥшь-напхгарак шаадырԥшуа. (Шәаԥхьа Даниил 7:15—17.) Уи ибзианы иҳаилнаркаауеит Аатра аҿы зыӡбахә ҳәоу агыгшәыгқәагьы аҳәынҭқаррақәа шаадырԥшуа.

⁵ Шәааи уажәшьҭа ашәҟәы Аатра иану асимволқәа ҳрылацәажәап. Ҳара еилаҳкаауеит Абиблиа ахаҭа урҭ рҵакы аилкаара ишҳацхраауа. Ҳалагап х-гыгшәыгк рыла. Ҳара ҳахцәажәоит: 1) урҭ иаадырԥшуа, 2) урҭ ирыхьуа, насгьы 3) уи ҳара иаҳдыруазар зхадоу.

АНЦӘА ИАӶАЦӘА ЗУСҬЦӘОУ ЕИЛКААХЕИТ

6. Иаанарԥшуазеи быжь-хык зхагылоу агыгшәыг? (Аатра 13:1—4).

⁶ Иаанарԥшуазеи быжь-хык зхагылоу агыгшәыг? (Шәаԥхьа Аатра 13:1—4.) Иазгәашәҭ уи алеопард ишеиԥшу, ашьапқәа амшә ашьапқәа ишреиԥшу, асаса алым асаса ишеиԥшу, насгьы жәа-тәыҩак шахагылоу. Иџьоушьаша, Даниил 7-тәи ахаҿы зыӡбахә ҳәоу ԥшь-гыгшәыгкгьы убас ирыхцәажәоит. Аха урҭ злеиҩудырааша ихадоу ҷыдарак ыҟоуп: ашәҟәы Аатра аҿы ус изыхцәажәо гыгшәыгк ауп ԥшь-гыгшәыгк ракәымкәа. Ус анакәха, уи ҳәынҭқаррак мацара акәӡам иаанарԥшуа. Уи агыгшәыг «хылҵшьҭрас иҟоу, жәларыс иҟоу, бызшәас иаԥу иара анапаҵаҟа иҟан» (Аат. 13:7). Уи иаанагоит ари агыгшәыг иамоу амчра ҳәынҭқаррак иамазар алшо амчра аасҭа акырӡа ишеиҳау. Убри аҟынтә уи агыгшәыг аҭоурых аҿы ауаа напхгара рзызуаз аҳәынҭқаррақәа зегь аанарԥшуеитb (Еккл. 8:9).

7. Иаадырԥшуазеи агыгшәыг иахагылоу ахқәа хаз-хазы?

⁷ Иаадырԥшуазеи агыгшәыг иахагылоу ахқәа хаз-хазы? Аатра 17-тәи ахы уи аилкаара иҳацхраауеит. Уа 13-тәи ахаҿы зыӡбахә ҳәоу агыгшәыг ахаҿсахьа иахцәажәоит. Иоанн иҩит быжь-хык уи быжьҩык аҳцәа шракәу: «Урҭ рахьтә хә-ҩык ҭахахьеит, аӡә дыҟоуп, егьи макьана дмааицт, данааилакгьы аамҭа кьаҿк аҩнуҵҟа ауп дахьаанхауа» (Аат. 17:9, 10). Аҩсҭаа ихы иаирхәоз аҳәынҭқаррақәа зегь рҟынтә быжь-ҳәынҭқаррак иалкааны иарбоуп, насгьы ахқәа ҳәа рызҳәоуп. Амчра ду змаз урҭ аҳәынҭқаррақәа рҿы ирацәаҩны Анцәа имаҵзуҩцәа нхон, мамзаргьы урҭ рнапхгаҩцәа Анцәа ижәлар ирышьҭашәарыцон. Апостол Иоанн ихаан урҭ рҟынтә хә-ҳәынҭқаррак иааны ицахьан. Урҭ рахь иаҵанакуеит: Египет, Ассириа, Вавилон, Мидо-Персиа, насгьы Бырзентәыла. Амчра ду змаз афбатәи аҳәынҭқарра, Рим, Иоанн ихаан напхгара ауан. Нас иарбан ҳәынҭқарроу иаанарԥшуа аҵыхәтәантәи, абыжьбатәи ахы?

8. Иаанарԥшуазеи агыгшәыг абыжьбатәи ахы?

⁸ Абыжьбатәи ахы иаанарԥшуа аилкаара Даниил ишәҟәы ҳацхраауеит. Иарбан амчра ду змоу ҳәынҭқарроу «Иҳақәиҭу имш» азы, ари адунеи аҵыхәтәантәи амшқәа рзы, напхгара зуа? (Аат. 1:10). Уи Великобританиеи Еиду Аштатқәеи роуп. Убри аҟынтә иаҳҳәар ҳалшоит, зымчқәа еидызҵаз урҭ ҩ-ҳәынҭқаррак Аатра 13:1—4 аҿы зыӡбахә ҳәоу агыгшәыг иахагылоу абыжьбатәи ахы ауп ҳәа.

9. Иаанарԥшуазеи асыс атәыҩақәа иреиԥшу ҩ-тәыҩак зхагылоу агыгшәыг?

⁹ Аатра 13-тәи ахаҿы аӡбахә ҳәоуп асыс атәыҩақәа иреиԥшу ҩ-тәыҩак зхагылоу, насгьы агәылшьап еиԥш ицәажәо агыгшәыг. Уигьы Великобританиеи Еиду Аштатқәеи аанарԥшуеит. Уи агыгшәыг «ауаа рҿаԥхьа аџьашьахә дуӡӡақәа ҟанаҵоит, ажәҩан аҟынтә адгьыл ахь амцагьы аанашьҭуеит» (Аат. 13:11—15, АдҾ). Аатра 16-тәи, 19-тәи ахқәа рҿы ҩ-тәыҩак зхагылоу агыгшәыг «амц-ԥааимбар» ҳәа азҳәоуп (Аат. 16:13; 19:20). Даниил иԥааимбаражәа излаҳәо ала Великобританиеи Еиду Аштатқәеи «зегь ԥыххааса-иҟәыбаса» иқәырҵоит (Дан. 8:19, 23, 24). Уи Аҩбатәи адунеизегьтәи аибашьра аан инаӡеит. Британиатәи, насгьы америкатәи аҵарауаа иҭрыжьыз атомтә бомбақәа Иапониа ианаларыжь ашьҭахь аибашьра еилгеит. Великобританиеи Еиду Аштатқәеи урҭ абомбақәа ауаа ианрыларыжь «ажәҩан аҟынтә адгьыл ахь амцагьы» лбаарышьҭит ҳәа ҳҳәар ҳалшоит.

10. Иаанарԥшуазеи агыгшәыг ахаҿсахьа? (Аатра 13:14, 15; 17:3, 8, 11).

¹⁰ Анаҩс ҳара даҽа гыгшәыгк ҳбоит. Уи быжь-хык зхагылоу агыгшәыг иеиԥшуп, аха иҟаԥшьуп. Иара быжь-хык зхагылоу агыгшәыг ахаҿсахьа, насгьы аабатәи аҳ ҳәа азҳәоупc. (Шәаԥхьа Аатра 13:14, 15; 17:3, 8, 11.) Аԥааимбаражәа излаҳәо ала, уи аҳ зны дыҟан, нас дықәҵит, аха дырҩегь дцәырҵит. Арҭ ажәақәа аҳәынҭқаррақәа ринтересқәа зыхьчо ООН ибзианы ианаалоит. Раԥхьа уи «Лига Наций» аҳасабала иҟан. Аҩбатәи адунеизегьтәи аибашьра аан уи хыбгалеит, аха нас ООН аҳасабала ҿыц ицәырҵит.

11. Иҟарҵозеи асимволтә ҵакы змоу агыгшәыгқәа, насгьы избан урҭ ҳарцәымшәалар зҳалшо?

¹¹ Апропаганда рхы иархәаны арҭ агыгшәыгқәа, даҽакала иуҳәозар аҳәынҭқаррақәа ауаа Иеговеи ижәлари ирҿадыргылоит. Урҭ адгьыл аҳцәа зегьы «еидгыланы, иеицхырааны Зегьзку Анцәа имш ду аҿагыларазы» аибашьра Армагеддон аҿы еизыргоит (Аат. 16:13, 14, 16). Аха ҳара ҳзыцәшәаша ҳәа акгьы ыҟаӡам. Усҟан Анцәа Иегова инапхгара иадгыло зегь еиқәирхоит (Иез. 38:21—23).

12. Ирзыԥшузеи асимволтә ҵакы змоу агыгшәыгқәа?

¹² Ирзыԥшузеи асимволтә ҵакы змоу агыгшәыгқәа? Аатра 19:20 аҿы иануп: «Агыгшәыг иара убраҟа илышьҭагәа иркит, дыркит уи иацыз амц-ԥааимбаргьы, уи агыгшәыг дацхраауа аџьашьатәқәа ҟаиҵон, иара амҳәыр заархази ахаҿсахьа иеихырхәози хихуан: агыгшәыггьы, амц-ԥааимбаргьы лаганы мцала, тыҩшала еилабылуаз-еилашуаз аӡиа иаларыжьит». Анцәа иаӷацәа амчра рнапаҿы ишыҟазаауа иаалырҟьаны наӡаӡа иқәгахоит.

13. Ишԥарықәыӷәӷәо аҳәынҭқарцәа ақьырсианцәа?

¹³ Иаа́нагозеи уи ҳара ҳзы? Ҳара ҳқьырсианцәоуп, убри аҟынтә Анцәеи иара Иаҳреи гәыкала ҳарзыҟазароуп (Иоанн 18:36). Убри аҟынтә ҳара аполитика зынӡагьы ҳҽалаҳмырхәлароуп. Аха уи даара ианыцәгьоу ыҟоуп, избанзар аҳәынҭқарцәа ажәалагьы услагьы ҳрыдгылазар рҭахуп. Урҭ ирҳәо ҟазҵо агыгшәыг адырга роуеит (Аат. 13:16, 17). Аха Иегова дара дырзыразӡам, насгьы наӡаӡатәи аԥсҭазаара роуӡом (Аат. 14:9, 10; 20:4). Убри аҟынтә аҳәынҭқарцәа иҟарҵозаалакгьы ҳара анеитралитет ҳахьчалароуп.

«АКАҲԤЫ» АХЬЫМӠӶ ЛЫРГАНЫ ДЫҚӘГАХОИТ

14. Изымбатәбарахазеи Иоанн? (Аатра 17:3—5).

¹⁴ Шәаԥхьа Аатра 17:3—5. Уи ашьҭахь Иоанн дибеит «иҟаԥшьы уаркалеиуаз агыгшәыг иақәтәаз аԥҳәыс». Еицырдыруа уи акаҳԥы — Вавилон ду ауп. «Уи илыцкаҳԥуан адгьыл аҳцәа». Иоанн иҳәеит: «Сара исзымбатәбаран уи лбара, лыхәаԥшра» (Аат. 17:1, 2, 6).

15, 16. Иаанарԥшуада Вавилон ду, насгьы иабантәиаадыруеи уи?

¹⁵ Иаанарԥшуада Вавилон ду? Уи акаҳԥы аҳәынҭқаррақәа рнапхгаҩцәа дрыцкаҳԥуеит (Аат. 18:9). Асимволтә бызшәала иуҳәозар лара адгьыл аҳцәа дрықәтәаны илҭаху длырҟаҵарц даҿуп. Ус анакәха, уи аԥҳәыс аполитикатә еиҿкаара аалырԥшуеит ҳәа ҳазҳәаӡом. Уи Аҩсҭаа идунеи иахәҭаку аԥсыцәгьара злоу акоммерциагьы аалырԥшӡом. Избанзар ашәҟәы Аатра аҿы акоммерциа «аҭуџьарцәа» ҳәа азҳәоуп (Аат. 18:11, 15, 16).

¹⁶ Лассы-лассы Абиблиаҿы «акаҳԥра» ҳәа иҳәоу ажәа, Анцәа имаҵ ҳуеит ҳәа зҳәо, аха амцмҵахырхәара зҽалазырхәуа, ма ари адунеи иатәу егьырҭ аусқәа ирҿу ауаа аанарԥшуеит (1 Аш. 5:25; Иак. 4:4). Аха Анцәа гәыкала имаҵ зуа, ахаҵа дзымбац аԥҳәыс дзымбац ҳәа рызҳәоуп (Аат. 14:4; 2 Кор. 11:2). Ажәытәан Вавилон аҿы амцдинхаҵарақәа зегь раасҭа ирылаҵәаны иҟан. Убри азоуп Анцәа ицәымӷу амцдинхаҵарақәа зегьы Вавилон ду ҳәа зрызҳәоу. Убри аҟынтә адунеи аҿы иҟоу амцдинхаҵарақәа зегьы уи акаҳԥы лоуп ҳәа ҳҳәар ҳалшоит (Аат. 17:5, 18; шәаԥхьа астатиа «Что такое Вавилон Великий?» асаит jw.org аҿы).

17. Иазыԥшузеи Вавилон ду?

¹⁷ Иазыԥшузеи Вавилон ду? Аатра 17:16, 17 (АдҾ) аҿы иану ари азҵаара аҭак ҳнаҭоит: «Иубаз жәа-тәыҩаки агыгшәыги акаҳԥы дырцәымӷхоит, дыхдырҵәоит, дыцәҳәы-ҟьантазӡа дынрыжьуеит, лжьы рфоит, нас амца далажьны дырбылуеит, избанзар Анцәа урҭ игәҭакы нарыгӡарц ргәаирԥхеит». Ус анакәха, Иегова ажәларқәа ргәазҭеиҵоит «иҟаԥшьы уаркалеиуаз агыгшәыг», даҽакала иуҳәозар ООН, рхы иархәаны амцдинхаҵарақәа зегьы ықәырхырц (Аат. 18:21—24).

18. Иааҳарԥшыр шԥаҳалшо Вавилон ду ҳахәҭакзарц шаҳҭахым?

¹⁸ Иаа́нагозеи уи ҳара ҳзы? Даараӡа ихадоуп ҳамҵахырхәара Анцәа иҿаԥхьа ицқьазарц (Иак. 1:27). Вавилон ду арҵарақәа, Анцәа игәамԥхо аныҳәақәеи аҵасқәеи, ма иламысдароу ахымҩаԥгашьа ҳаҟьашьыртә алҳмыршароуп. Ҳара анаҩсгьы ауаа Вавилон ду ааныжьра ҳрыцхраалоит, Анцәа уи анықәиго даргьы ҭамхарц азы (Аат. 18:4).

АНЦӘА ИАӶАЦӘГЬА ДЫҚӘГАХОИТ

19. Иаанарԥшуада «иҟаԥшьы-уаркалеиуаз агәылшьап ду»?

¹⁹ Ашәҟәы Аатраҿы иара убас «иҟаԥшьы-уаркалеиуаз агәылшьап ду» аӡбахә ҳәоуп. Уи Иисуси имаалықьцәеи ирҿагыланы ирабашьуеит (Аат. 12:3, 7—9). Уи агәылшьап иааҟәымҵӡакәа Анцәа ижәлар ирықәлоит, насгьы аполитикатә мчрақәа аазырԥшуа агыгшәыгқәа амчра рнаҭоит (Аат. 12:17; 13:4). Уи «агәылшьап ду, ажәытә маҭ... аџьныш, аҩсҭаа» ҳәа азҳәоуп (Аат. 12:9; 20:2). Уи ииҳәо ауп Анцәа иаӷацәа иҟарҵо.

20. Иазыԥшузеи агәылшьап?

²⁰ Иазыԥшузеи агәылшьап? Аатра 20:1—3 излаҳәо ала, Аҩсҭаа 1 000 шықәса ҳәа атымитыша, даҽакала иуҳәозар абахҭа, дҭажьхоит. Уи аамҭа аҩныҵҟа иара ажәларқәа изжьалаӡом. Уи ашьҭахь Аҩсҭааи идемонцәеи «мцала — тыҩшала иеилабылуа... аӡиа» иалажьхоит, даҽакала иаҳҳәозар, наӡаӡа иқәгахоит (Аат. 20:10). Шәхаҿы ишәзаагома Аҩсҭааи адемонцәеи ахьыҟамло адунеи? Шаҟа ибзиахозеи усҟан аԥсҭазаара!

21. Избан ашәҟәы Аатра иану аԥааимбаражәақәа ахьеилышәкааз шәзаргәырӷьо?

²¹ Иегова ашәҟәы Аатра иану асимволқәа рҵакы ахьҳаилиркаауа ҳгәы ҟанаҵоит! Ҳара Иегова иаӷацәа зусҭцәоу, насгьы урҭ ирыхьуа еилаҳкааит. «Бзазара имоуп арҭ аԥааимбар ажәақәа ирыԥхьауа, ирзыӡырҩуа»! (Аат. 1:3). Аха ирзыԥшузеи Анцәа гәыкала имаҵ зуа ауаа, уи иаӷацәа анықәигалак ашьҭахь? Ари азҵаара аҭак анаҩстәи астатиаҿы иҳауеит.