Иаҳәозеи Абиблиа акремациа иазкны?
Абиблиа иану
Абиблиаҿы акремациа иазкны иаартны акгьы анӡам. Уа ишьақәырӷәӷәаӡам иԥсыз ауаҩы дыжтәу, мамзаргьы дбылтәу.
Абиблиаҿы иаагоуп Анцәа изиашаз имаҵзуҩцәа иԥсуаз ауаа аныржуаз атәы зҳәо хҭысқәак. Иаҳҳәап, Авраам иԥшәмаԥҳәыс Сарра лыжразы аԥсыжырҭа ҭыԥ дашьҭан (Аҟазаара 23:2—20; 49:29—32).
Иара убас Абиблиаҿы иаагоуп азиашара аазырԥшуаз ауаа иԥсыз рыԥсыбаҩқәа анырбылуаз иазку ахҭысқәа. Иаҳҳәап, аҳ Саул хҩык иԥацәеи иареи аибашьраҿы ианҭаха, дара рцәеижь аӷацәа рнапаҿы иаанхеит, анаҩс урҭ рцәеижь иҽеимкәа иазныҟәеит. Аха Анцәа изиашаз израильтәи аибашьцәа аԥсыбаҩқәа аӷацәа ирымхны ирблит, насгьы иаанхаз анышә иарҭеит (1 Самуил 31:8—13). Абиблиа иҳаилнаркаауеит абас еиԥш иҟаз аԥсыжра цәгьарас ҳәа акгьы шаҵамыз (2 Самуил 2:4—6).
Акремациа иазкны ииашамкәа ирыларҵәоу агәаанагарақәа
Ииашам агәаанагара. Акремациа иԥсыз ицәеижь ахь апатуқәымҵара аанарԥшуеит.
Афакт. Абиблиаҿы иануп иԥсуа зегь асабахь ихынҳәуеит ҳәа. Арҭ ажәақәа иаҳдырбоит ауаҩы данԥслак ашьҭахь ицәеижь шеилабаауа (Аҟазаара 3:19). Акремациа аан ари апроцесс аҽарласуеит, насгьы ацәеижь сабахоит.
Ииашам агәаанагара. Абиблиатә аамҭақәа раан Анцәа изымӡырҩуаз ауаа ракәын ирбылуаз.
Афакт. Ииашаҵәҟьаны Анцәа изымӡырҩуаз ауаа шьоукы, иаҳҳәап, Ахан иҭаацәареи иареи анԥсы ашьҭахь ирыблит (Иисус Навин 7:25). Аха уи ус иаԥӡамызт (Ҩынтәзакәан 21:22, 23). Хыхь ишҳәаз еиԥш, мцала иблын Анцәа изиашаз ауаа шьоукгьы, урҭ дреиуан аҳ Саул иԥа Ионафан.
Ииашам агәаанагара. Анцәа илшаӡом ирблыз ауаа рыԥсы аҭаҵара.
Афакт. Анцәа изы зегь акоуп иԥсыз ицәеижь амшын аҵаҟа иҟоу, адгьыл аҿы ижу, ирблу, мамзаргьы агыгшәыгқәа ирфоу (Аатра 20:13). Аԥсҭалара аан Зегьзымчу Анцәа ицәыцәгьахаӡом иԥсыз рыԥсы аҭаҵара (1 Коринфаа рахь 15:35, 38).