Мсыр иҽеим аҳ дахагылоуп

АРҬ ахацәа мчыла ажәлар аус ддыруеит. Уахәаԥши, ари ахаҵа ҟамчыла аусуҩы дышисуа! Арҭ аусуҩцәа Иаков иҭаацәара иатәуп — урҭ израилаа ҳәа ирышьҭоуп. Аусура рыдызцало ахацәа мсыраа роуп. Израилаа мсыраа рҟны тәыс иҟалеит. Аха уи ҟалашьас иаиузеи?

Иаков иҭаацәара ду акыршықәса инеиԥынкыланы Мсыр аҭынчра рыманы инхон. Афараон иаамышьҭахь Мсыр мчы зманы иҟаз Иосиф дреиҷаҳауан урҭ. Аха нас Иосиф дыԥсит. Мсыр аҳас дҟалеит израилаа бзиа изымбоз, фараон ҿыцк.

Убри анахыс ари афараон бааԥс израилаа тәыс иҟаиҵеит. Уи, иара убас, ирхаиргылеит иҽеимыз, игәымбылџьбараз ахылаԥшцәа. Урҭ израилаа мчыла, џьабаала аус ддыруан, афараон изы ақалақь аргылараҿы. Уи ус шакәызгьы, израилаа еиҳа-еиҳа рхыԥхьаӡара иацлон. Ԥыҭраамҭак ашьҭахь мсыраа израилаа рацәахар, насгьы иӷәӷәахар ҳәа ишәеит.

Иудыруама, афараон иҟаиҵаз? Израилтәи анацәа ахшаараиураан ирыцхраауаз аҳәсақәа ирыдиҵеит уи: ‘Дарбанзаалак ҿыц ииуа аԥа дышәшьлароуп’. Аха урҭ ҳәса бзиақәан, иагьырҭахымызт асабицәа рышьра.

Убасҟан афараон ижәлар зегьы ирыдиҵеит: ‘Ирымшәхла израилаа ҿыц ииз рԥацәа, иагьышәшьла урҭ. Аӡӷабцәа заҵәык ааншәыжьла’. Ари дҵа бааԥсӡами? Уааи, еилаҳкаап, ҿыц ииз ҷкәынак дшеиқәырхаз.