Иосафат Иегова диқәгәыӷуеит

ИУДЫРУАМА, арҭ ауаа зусҭцәоу, насгьы уажәы иҟарҵо? Урҭ еибашьра ицоит, раԥхьа игылоу ахацәа ашәа рҳәоит. Аха уара уазҵаар улшоит: ‘Ашәаҳәаҩцәа изрымами аҳәақәеи аԥсақәеи аибашьразы?’ Уааи, еилаҳкаап.

Израилтәи ҩ-биԥарактәи аҳра дахагылоуп Иосафат. Уи аҳ Ахави иԥҳәыс Иезавели аҩадатәи жәабиԥарак рҟны аҳра аныруа аамҭазы дынхоит. Аха Иосафат даҳ бзиоуп, иаб Аса иеиԥшҵәҟьа. Убри азы, аладахьтәи ҩ-биԥарактәи ажәлар акыршықәса насыԥла инхоит.

Аха абар, ажәлар агәыҭҟьара иалазгылаз хҭыск ҟалеит. Ажәабжьаагаҩцәа Иосафат изаарыцҳауеит: ‘Уара уахь ижәылеит ар дуӡӡа Моав, Аммон, Сеир ашьха адгьылқәа рҟынтә’. Израилаа аӡәырҩы Иерусалимҟа иаауеит, Иегова ацхырааразы иҳәарц. Урҭ зегьы аныҳәарҭахьы идәықәлоит, уаҟагьы Иосафат Анцәа диҳәоит: ‘О, Иегова, ҳ-Анцәа, ҳара иҟаҳҵо ҳаздыруам. Ҳара ҳхы ҳзыхьчом ари ар дуӡӡа рҿаԥхьа. Ҳара уара уҟынтә ҳазԥшуп ацхыраара’.

Иегова рыбжьы иаҳауеит урҭ, ихырхәаҩцәа руаӡәкгьы абас ажәлар ирылаиҳәартә игәазыҟаиҵоит: ‘Ари шәара шәеибашьра акәым, аха Анцәа иеибашьра ауп. Шәара шәеибашьра аҭаххом. Шәара Иегова шәшеиқәирхо шәахәаԥшлоит ауп’.

Адырҩаҽны Иосафат ажәлар даарыԥхьоит: ‘Иегова шәиқәгәыӷ!’ Нас уи ар раԥхьа иргылоит ашәаҳәаҩцәа, урҭ еишьҭагыланы иахьцо, Иегова дзырҽхәо ашәақәа рҳәоит. Иудыруама иҟалаз, урҭ аибашьра ахьымҩаԥысуаз аҭыԥ ианазааигәаха? Иегова аӷацәа рыруаа дара-дара еиҿаиргылоит. Израилаагьы иахьеибашьуа аҭыԥ аҟны ианнеи, абар — аӷацәа зегьы ԥсны ишьҭоуп!

Ҟәышрала ихы мҩаԥимгаӡеи Иосафат, Иегова дахьиқәгәыӷыз? Ҳаргьы ҟәышрала ҳныҟәоит, Иара ҳаниқәгәыӷуа.