Хыхьтәи ауадаҿы

ҨЫМШ ҵхьеит уажәшьҭа, иахьа ԥшьашоуп, хәылбыҽхоуп. Иисус 12-ҩык иапостолцәеи иареи хыхьтәи ауадахь иааит, мшаԥы иатәу уаххьа рфарц азы. Идәылҵны ицо ауаҩы Иуда Искариот иоуп. Уи аԥшьаҩцәа рахь дцоит, Иисус икраҿы дрыцхрааразы.

Ҽнак шыбжьаз Иуда дааны урҭ дразҵаауеит: ‘Исышәҭарызеи, Иисус икраҿы сшәыцхраар?’ — ‘Ҩажәижәаба раӡны’,— ажәа ирҭоит уи. Абар уажәшьҭа Иуда дара рахь дцоит, Иисус дахьыҟоу дирбарц. Ари иус бааԥсӡами?

Мшаԥтәи уаххьа иалгеит. Аха уажәшьҭа Иисус иҷыдоу даҽа уаххьак напы аиркуеит. Уи апостолцәа рахь ача наирхоит, иагьиҳәоит: ‘Ишәфа, избанзар ари шәара ишәыхҭнысҵараны иҟоу сцәеижь ауп иаанаго’. Нас уи аҩы зҭаз аҵәца риҭоит, иагьиҳәоит: ‘Ижәжәы ари, избанзар уи шәара шәзы икаҭәараны иҟоу сшьа ауп иаанаго’. Абиблиа аҟны ари уаххьа «Иҳақәиҭу ихәылԥаз», мамзаргьы «Иҳақәиҭу иуаххьа» ҳәа иашьҭоуп.

Израилаа Мшаԥы рфон, урҭ Мсыр Анцәа имаалықь рыҩнқәа «данрывсыз», мсыраа рыҩнаҭақәа рҟны раԥхьахшаақәа анишьыз ргәаладыршәаларц азы. Уажәы Иисус иҭахыуп, ишьҭанеицәа иара дырхадмыршҭларц, насгьы ихы шрықәиҵаз атәы ргәаладыршәаларц. Убри аҟнытә дрыҳәоит, урҭ есышықәса ари иҷыдоу уаххьа азгәарҭаларазы.

Иҳақәиҭу ихәылԥаз ашьҭахь Иисус апостолцәа ааԥхьара риҭоит ахаҵараҿы агәымшәареи аӷәӷәареи аадырԥшларц. Аҵыхәтәан урҭ Иегова дзырҽхәо ашәақәа рҳәоит, иагьцоит. Уажәы аҵх акыр инеихьеит, иҟалап, аҵх агәы еиҩнашахьазаргьы. Уааи, игәаҳҭап, урҭ рхы ахьдырхо.