Аимак-аиҿакқәа шәыӡбала, насгьы аҭынчра ахьчара шәҽазышәшәала
АНЦӘА ИЕГОВА ақьырсианцәа ргәазҭеиҵоит ирыбжьоу иҭынчу аизыҟазаашьақәа рыхә ршьаларц, насгьы урҭ рыхьчаразы ирылшо зегь ҟарҵаларц. Ус аныҟаҳҵо, ақьырсиантә еизараҿы акзаареи аҭынчреи ыҟоуп. Уи аҭынчра аимак-аиҿакқәеи аилибамкаарақәеи иарааԥсахьоу ауаа аизарахь инанагоит.
Абар Мадагаскар иҟалаз. Еицырдыруаз аԥшҩы Иегова ишаҳаҭцәа рыбжьара иҟоу акзаара даара иџьеишьеит. Иара дхәыцуан: «Ҽнак зны динхаҵарак сыдыскыларц сыӡбар, хымԥада абри адинхаҵара ауп иалысхуа». Ԥыҭрак ашьҭахь иара аԥшра даҟәыҵит. Анаҩс мызқәак рыҩныҵҟа иҭаацәалазаара Анцәа инормақәа ирықәшәаларц азы аԥсахрақәа ҟаиҵон. Аҵыхәтәаны Иегова, аҭынчра Анцәа, имаҵ аура далагеит.
Ари ахаҵа иеиԥш, есышықәса зықьҩыла ауаа ақьырсиантә еизарахь иаауеит, уа дара изызгәаҟуаз аҭынчра рыԥшаауеит. Аха Абиблиа еилыкка иаҳнарбоит «ашьыцра шҳам», насгьы аҭыӡшәаҟаҵара аизараҿы аиҩызара шыбжьырхуа, насгьы ауадаҩра ӷәӷәақәа шцәырырго (Иак. 3:14—16). Аха Абиблиаҿы иара убас иануп ус еиԥш иҟоу ауадаҩрақәа рҽырцәыхьчареи аҭынчра ахьчареи иҳацхраауа алабжьарақәа. Урҭ рықәныҟәара еиҳа иаҳзымариахарц азы, шәааи еилҳаргап аԥсҭазаара аҟынтә иаагоу ҿырԥштәқәак.
АУАДАҨРАҚӘЕИ УРҬ РЫӠБАШЬЕИ
«Аус сыцызуаз аиашьеи сареи ахаан ҳҳәатәы еиқәшәомызт. Зны иареи сареи ҳшеибарҳәҳәоз ҩыџьа ауаа ҩналеит. Дара иҟаз рбеит» (КРИС).
«Лассы-лассы ажәабжьҳәара исыццалоз аиаҳәшьа иаалырҟьаны ажәабжьҳәара сыццара мап ацәылкит. Нас зынӡа сацәажәара даҟәыҵит. Иҟалаз ҳәа ак сзеилымкааит» (ЏЬАНЕТ).
«Сара ҩыџьа ақьырсианцәа ҭелла срацәажәон. Руаӡәк абзиараз иҳәеит, сара сгәы иаанагеит уи аҭел ирцәеит ҳәа. Усҟан иара иҽеим жәақәак ихысҳәааит. Аха ишеилкаахаз ала, иара зегь иаҳауан» (МАИКЛ).
«Ҳаизараҿы ҩыџьа апионерцәа аилибамкаарақәа рызцәырҵит. Руаӡәк егьи дааҟәымҵӡакәа длырџьон. Урҭ реимак-реиҿакқәа ҳара зегьы ҳгәы карыжьуан» (ГЕРИ).
Угәы иаанагар алшоит арҭ аҭагылазаашьақәа уиаҟара иӷәӷәам ҳәа. Аха уеизгьы, урҭ ахьаа ӷәӷәа узааргар, насгьы доуҳала аԥырхага урҭар алшоит. Шаҟа ҳгәы иахәозеи урҭ аишьцәеи аиаҳәшьцәеи абиблиатә лабжьарақәа рхы иархәаны аҭынчра ахьырыхьчаз! Иарбан принципқәоу дара ирыхәаз?
«Амҩан шәмеислан» (Аҟаз. 45:24). Ари алабжьара Иосиф иашьцәа аҩныҟа раб иахь ианцоз ириҭеит. Шаҟа аҟәыӷара аҵази ари алабжьара! Ауаҩы иаразнак иԥсахы еибакуазар, егьырҭ реисра далагар ауеит. Хыхь зыӡбахә ҳәаз Крис еиликааит аграқәа шимаз: иара аԥагьара ааирԥшуан, насгьы алабжьара дықәныҟәомызт. Уи иҽиԥсахыр иҭахын аҟынтә, лассы-лассы дзеисуаз аиашьа иҿаԥхьа аҭамзаара шьҭеиҵеит, насгьы иԥсахы еибамкларц азы ихы аус адулара далагеит. Крис иҽшиԥсахуаз аниба, иҩызагьы уи аҟаҵара иҽазишәеит. Уажәы дара Иегова имаҵ ахьеицыруа даара еигәырӷьоит.
«Гәаартылатәи аицәажәара ахьыҟам, апланқәа хыбгалоит» (Ажәам. 15:22). Џьанет еилылкааит лара ари алабжьара дықәныҟәар шакәу. Лара илыӡбеит уи аиаҳәшьа длацәажәарц. Ианеицәажәоз Џьанет аиаҳәшьа дзыргәааз лзеиҭалҳәарц длыҳәеит. Раԥхьа аҩыџьагьы ирҳәо иақәшәомызт. Аха дара ҭынч рцәаныррақәа еибырҳәеит, анаҩс аҭагылазаашьагьы ҭышәынтәалеит. Аиаҳәшьа илбеит лара ииашамкәа ак шеилылкааз, насгьы Џьанет акгьы шылхарам. Лара Џьанет лҿаԥхьа аҭамзаара шьҭалҵеит, уажәы дара Иегова имаҵ еицыруеит.
«Амҭанагарҭаҿ умҭа уманы уаннеиуа аамҭазы, убраҟа уашьа уара уахь агәынхара шимоу анугәалашәалакь, инаугаз амҭа иара амҭанагарҭаҿ иааныжьны, уҿынаханы уашьа иҿы унеи, заа иара уинышәа, нас унеины умҭатә нагӡа» (Матф. 5:23, 24). Иҟалап шәара Иисус ашьхаҿы ииҳәаз ажәахә аҿы иааигаз ари алабжьара шәгәалашәозар. Маикл шаҟа ииашамкәа ихы мҩаԥигаз анеиликаа, даара ицәымыӷхеит. Иара уи аиашьа динышәарц азы илшоз зегь ҟаиҵеит. Урҭ еибабеит, насгьы Маикл ахынраалара аарԥшны аҭамзаара шьҭеиҵеит. Иалҵшәахазеи уи? Маикл иҳәоит: «Сашьа гәыкала исанаижьит». Дара иахьагьы еиҩызцәоуп.
«Аӡәи-аӡәи шәеибашаҭа, шәгәеизынхарақәа, шәгәалақәа шәыбжьышәх, ишәанеибажь» (Кәал. 3:12—14). Ишԥарылшеи хыхь зыӡбахә ҳҳәоз ҩыџьа аиаҳәшьцәа реилибамкаарақәа рыӡбара? Аизара аиҳабы ақьиара аарԥшны абарҭ азҵаарақәа ирызхәыцырц дрыцхрааит: «Иҳамоума ҳара азин ҳаимак-аиҿакқәа рыла егьырҭ ргәы акажьра? Иҳамоума ҳара мзызк ҳзыргәаази ҳареи ҳмеинышәакәа анаҩсгьы Иегова имаҵ аура?» Апионерцәа ари алабжьара рыдыркылеит, уажәы реизыҟазаашьақәа бзиоуп, насгьы игәырӷьаҵәа ажәабжь бзиа ауаа ирыларҳәоит.
Аӡәы шәиргәаазар, шәҽазышәшәа Кәаласаа рахь 3:12—14 аҿы иаагоу апринцип ақәныҟәара. Аӡәырҩы еилыркааит иаҭаху — ари ахынраалара аарԥшны баша узыргәааз ианажьра, насгьы зегь ахашҭра шакәу. Аха иҟалалоит уи аназымхо. Усҟан Матфеи 18:15 аҿы иаагоу апринцип ҳацхраар ауеит. Ҳәарада, ари Иисус илабжьара иаанарԥшуеит ауаҩы даҽаӡәы иганахь ала агәнаҳа ӷәӷәа аныҟаиҵо ихы шымҩаԥигаша. Аха шәара уи шәҭагылазаашьаҿгьы шәхы иашәырхәар шәылшоит. Шәзыргәааз шәнаидгыланы, ахынраалара аарԥшны шәиацәажәа, насгьы шәеилибамкаара шәыӡба.
Ҳәарада, Абиблиаҿы иара убас иаагоуп аҭынчра ахьчара иҳацхраауа еиҭа алабжьарақәа. Қәҿиарала урҭ рықәныҟәаразы адоуҳа иалҵшәоу аҟазшьақәа аарԥшлатәуп, — «абзиабара, агәырӷьара, амшхәыбзазара, азҩыдара, нарха змоу ачҳара, аразра, агәыҳалалра, агәрагара, ахаара-ҟәымшәышәра, аҽынкылара» (Гал. 5:22, 23). Анцәа игәаԥхо арҭ аҟазшьақәа амеханизмқәа ирхьыршьуа ахәша иаҩызоуп. Урҭ ҳацхраауеит иҭынчу аизыҟазаашьақәа рыхьчара.
АУАА РЕИԤШЫМРА АИЗАРА АРБЕИОИТ
Ҳара зегьы досу ҳхатә ҟазшьақәа ҳамоуп, уи егьырҭи ҳареи ҳаиҩызара арбеиоит. Аха ҳҟазшьақәа реиԥшымра аимак-аиҿакқәа цәырыргалар ауеит. Аԥышәа змоу аизара аиҳабы абри аҩыза аҿырԥштәы ааигеит: «Иԥхашьоу ауаҩы ацәажәара бзиа избо, насгьы уи ззымариоу ауаҩы иҿаԥхьа уамашәа ихы ибозар алшоит. Ари аиԥшымра уиаҟара аҵакы амамшәа угәы иаанагар ҟалоит, аха уи ауадаҩра ӷәӷәақәа аанагар алшоит». Аха еснагь ауадаҩрақәа рызцәырҵуама зҟазшьақәа еиԥшым ҩыџьа ауаа? Шәааи апостолцәа Пиотри Иоанни ҳгәалаҳаршәап. Дзеиԥшрауаҩызи Пиотр? Иҟалап шәара ишәҳәар уи ирласны еилашәоз, насгьы зхы иҭаз зегь зҳәоз уаҩын ҳәа. Иаҳҳәар ҳалшозеи Иоанн изы? Иара егьырҭ бзиабарала дырзыҟан, ак аҳәара, ма аҟаҵара дахыццакуамызт. Пиотри Иоанни рҟазшьақәа еиԥшымызт, аха дара еинааланы Иегова имаҵ еицыруан (Аус. 8:14; Гал. 2:9). Ишаҳбо ала, ақьырсианцәа рҟазшьақәа еиԥшымзаргьы, аусеицура рылшоит.
Иҟалап шәеизараҿы иашьак ииҳәо, мамзаргьы иҟаиҵо шәаргәамҵуазар. Аха ишәхашәмыршҭлан Христос иара изгьы дшыԥсыз, убри аҟынтә бзиа дыжәбалар ауп (Иоанн 13:34, 35; Рим. 5:6—8). Ииашаӡам уи ауаҩы иҽицәыԥхьакра, мамзаргьы ахаангьы шәзеиҩызцәахом ҳәа ахәыцра. Еиӷьуп шәхы шәазҵаар: «Ари аиашьа Абиблиа иаҿагыло кыр ҟаиҵома? Иара цасҳәа сгәы ԥижәарц дашьҭоума? Мамзаргьы баша ҳҟазшьақәа еиԥшыму?» Еиҳа ихадоу азҵаара: «Иарбан ҟазшьақәоу сара уи иҿысҵаар сылшо?»
Иаҳҳәап, ауаҩы ацәажәара бзиа ибозар, шәара еиҳарак ҿышәымҭуазар, шәазхәыц иара ажәабжьҳәараҿы ацәажәара алагара шаҟа изымариоу. Шәара ишәылшоит ажәабжьҳәара шәеиццарц идыжәгалар, ак иҿышәҵаарц азы. Мамзаргьы иҟалап иара лассы-лассы агәыҳалалра ааирԥшуазар, аха шәара уи шәцәыцәгьазар. Шәазхәыц шаҟа агәырӷьара иоуа зықәрахь инеихьоу, ичмазаҩу, мамзаргьы ак иаргәаҟуа данрыцхраауа. Ҩыџьа ауаа зынӡа еиԥшымзаргьы, урҭ еиҩызцәахар рылшоит. Даара ихадоуп ауаҩы иҟазшьа бзиақәа рызхәыцра. Иҟалап шәара шәеиҩызцәа гәакьамхаргьы, аха аҭынчра шәыбжьазаауеит. Уи шәара шәеиԥш, аизарагьы ахәарҭа азаанагоит.
Иҟалап Еводиеи Синтихиеи рҟазшьақәа зынӡа еиԥшымызҭгьы. Аха апостол Павел урҭ ааиԥхьон «еизыразрала Иҳақәиҭу иҿы» иҟазарц (Флп. 4:2). Шәҽазышәшәома шәара ус еиԥш иҟоу акзаареи аҭынчреи рыхьчара?
АИМАК-АИҾАКҚӘА ИРЛАСНЫ ИШӘЫӠБАЛА
Иҽеим ацәаныррақәа ашәҭқәа ирылиаауа аҳаскьын бааԥс иеиԥшуп. Урҭ ацәаныррақәа шьаҭанкыла иҵҳамхыр, еиҳагьы ирызҳалоит. Мыцхәы агәаара ааҳарԥшуазар, уи аизара зегьы ианыруеит. Иеговеи ҳашьцәеи рахь иҳамоу абзиабара ҳгәазҭанаҵоит ауаа рҟазшьақәа реиԥшымра Анцәа ижәлар рыбжьара иҟоу аҭынчра еиланамгарц азы иҳалшо зегь аҟаҵара.
Ахынраалара аашәырԥшыр, насгьы иҭынчу аизыҟазаашьақәа рыхьчара шәҽазышәшәар, уи иаанаго алҵшәа џьашәшьар ауеит
Аҭынчра шьақәҳаргыларц азы аимак-аиҿакқәеи аилибамкаарақәеи рыӡбара ҳҽазаҳшәозар, уи иаанаго алҵшәа џьаҳшьар ауеит. Абар қьырсианк лҿырԥштәы. Лара илҳәоит: «Сгәы иаанагон иаҳәшьак ахәыҷқәа реиԥш дсызныҟәоит ҳәа. Уи сара даара саргәамҵуан. Убри аҟынтә ихжәаны лацәажәара салагеит. Сара схәыцуан: „Уи исықәнаго апатуқәҵара аалырԥшуам. Убри аҟынтә саргьы апатуқәҵара аасырԥшлаӡом“».
Анаҩс аиаҳәшьа лхаҭа лхы шымҩаԥылгоз дазхәыцуа далагеит. Лара илҳәоит: «Сара игәасҭеит схаҭа аграқәа шсымоу, уи сгәы канажьит. Еилыскааит сҽысыԥсахыр шакәу. Иегова зегь изеиҭасҳәан, аиаҳәшьа ҳамҭа хәыҷык лзаасхәеит, насгьы ақьаад аҿы схымҩаԥгашьазы аҭамзаара шышьҭасҵо анысҵеит. Ҳара ҳаигәыдибаҳәҳәалан, зегь ҳхашҭырц ҳаӡбеит. Уаҳа ҳара ауадаҩрақәа ҳамамызт».
Ауаа даара аҭынчра рҭахуп. Аха аӡәырҩы иааныркыло аҭыԥ рцәыӡуашәа анырбо, мамзаргьы аԥагьара анаадырԥшуа, гәымбылџьбарала рхы мҩаԥыргоит. Лассы-лассы убас ҟазҵо Иегова имаҵ зымуа роуп, аха Иегова имаҵзуҩцәа рыбжьара еснагь аҭынчреи акзаареи ыҟазар ауп. Павел Анцәа идоуҳа ацхыраарала иҩит: «Сара... сшәыҳәоит ишәымоу аԥсҭазаара ааԥхьара ишаҭәоу ала имҩаԥыжәгаларазы, аӡәи-аӡәи шәеизгәыкла, шәеибашаҭала, хачҳарала шәеизыҟаз, бзиа шәеибабала, шәашьҭаз доуҳала аҟазаареи аҭынчреи ракзаара» (Еф. 4:1—3). Акзаареи аҭынчреи даара рыхә ҳаракуп. Шәааи урҭ ҳарӷәӷәалап, насгьы ҳабжьара ицәырҵыр алшо аилибамкаарақәа зегьы ҳаӡбалап.