Аԥааимбарцәа рҟынтәи аҿырԥшы жәгала. Аввакум
1. Избан ҳара Аввакум ицәаныррақәа заҳзааигәоу?
1 Адунеизегь аҟны азакәандара шеизҳауа анаҳбо Аввакум ицәаныррақәа рҩызцәа ҳаргьы иҳазцәырҵуеит. Уи Иегова диазҵаауан: «Избан уара ацәгьара зысурбо, насгьы арыцҳарақәа узрыхәаԥшуа?» (Авв. [Авв.] 1:3; 2 Тим. 3:1, 13). Аввакум ииҳәоз ажәабжьи, иааирԥшуаз азиашареи рызхәыцра амч ҳнаҭоит Иегова иӡбара амш ҳазыԥшнаҵы (2 Пиотр 3:7).
2. Ишԥааҳарԥшуеи ҳара зиашарыла ҳшынхауа?
2 Азиашара аарԥшуа шәынхала. Аввакум ихы рыцҳашьаны усда дтәамызт, аха еснагь доуҳала длахҿыхын (Авв. [Авв.] 2:1). Иегова иԥааимбар дақәиргәыӷит иазалху аамҭазы иара иажәа шынаӡо, насгьы «ииашоу ииашара абзоурала» дшынхало (Авв. [Авв.] 2:2—4). Иаа́нагозеи уи аҵыхәтәантәи амшқәа рзы инхо ақьырсианцәа рзы? Аҵыхәтәа анааиуа ҳәа мыцхәы азхәыцра акәым ихадоу, аха уи хымԥада ишыҟалаҵәҟьо агәрагара ауп. Агәрахаҵара ҳацхраауеит еснагь ҳлахҿыхзарц, насгьы ҳаԥсҭазаараҿы Анцәа имаҵзура ихадоу аҭыԥ азалхра (Аур. 10:38, 39).
3. Избан ҳара Иегова имаҵзураҿы агәырӷьара ҳцәымӡлар зҳахәҭоу?
3 Иегова шәилагәырӷьала. Магог аҟынтә Гог Иегова ижәлар данрықәло, ҳара ҳагәрахаҵара ԥышәахоит (Иез. [Иез.] 38:2, 10—12). Аидысларақәа уадаҩрада изыҟалом иаиааиуа рзыҵәҟьагьы. Иҟалап афатә маҷхар. Иҳамоу амал ҳцәыӡыр алшоит, насгьы аԥсҭазаара иаразнак еицәахоит. Ҳхы шԥамҩаԥаҳгало уи аҭагылазаашьаҿы? Аввакум идыруан ауадаҩрақәа дышрықәшәоз, убри аҟынтә Иегова имаҵ аураҿы агәырӷьара ааирԥшларц игәазыҟаиҵеит (Авв. [Авв.] 3:16—19). «Иегова игәырӷьара» ҳаргьы иҳацхраауеит ԥхьаҟатәи аԥышәарақәа рыхгара (Неем. [Неем.] 8:10; Аур. 12:2).
4. Ҳзыргәырӷьалар алшозеи иахьа, насгьы аԥхьаҟа?
4 Иегова иӡбара амш зыхгара зылиршо ауаа анаҩсгьы ирҵалоит Анцәа имҩала анхашьа (Авв. [Авв.] 2:14). Уи адагьы Иегова иӡбахә зыԥсы ҭало ауаагьы еилыркаалоит. Шәааи иахьагьы алшарақәа зегь ҳхы иаҳархәалап Иеговеи иџьашьахәу иусқәеи рыӡбахә ауаа рзеиҭаҳәаразы! (Аԥсал. 33:1, 2 [34:1]; 70:17 [71:17]).