Иегова имаҵзуҩцәа аиашара бзиа ирбоит

1. Иарбан ԥышәароу Иосиф дзықәшәаз, аха ихы шԥамҩаԥигеи иара?

ИАКОВ иԥа Иосиф аԥышәара ӷәӷәа дақәшәеит. Ԥҳәыс гьангьашк абас иалҳәеит: «Уааи, хәыҷык ҳаицаанхап». Уи Иосиф тәыс дызмаз Потифар иԥҳәыс лакәын. Аха Иосиф иаразнак мап лцәикит. Иахьа аӡәы иџьашьаны абас иҳәар ауеит: ишԥаилшеи Иосиф уи? Потифар аҩны дыҟаӡамызт. Уи адагьы, Иосиф уа тәыс дыҟан, насгьы уи аԥҳәыс Иосиф мап ахьылцәикыз азы, аџьамыӷәа цәгьа дҭалыргылар лылшон. Лара Иосиф ҭаха шилымҭозгьы, иара есымша мап лцәикуан. Избан? Иара иҳәеит: «Ишԥаҟасҵо сара абри аҩыза ацәгьара дуӡӡа, агәнаҳа Анцәа иҿаԥхьа?» (Аҟаз. 39:7—12).

2. Иабантәиидыруаз Иосиф ахатә ҩыза иԥсахра гәнаҳауп ҳәа Анцәа ишиԥхьаӡоз?

² Иабантәиидыруаз Иосиф ахатә ҩыза иԥсахра «ацәгьара дуӡӡа» ауп ҳәа Анцәа ишиԥхьаӡоз? Моисеи изакәан еилыкка иаҳәон: «Ухатә ҩыза думԥсахын» (Ақәҵ. 20:14). Аха уи азакәан 200 шықәса рышьҭахь ауп Анцәа ижәлар ианриҭа. Аха Иосиф Иегова ибзианы дидыруан, убри аҟынтә Анцәа иламысдароу ахымҩаԥгашьа дшазыҟоу еиликаауан. Иаҳҳәап, Иосиф идыруан Иегова аҭаацәалазаара хаҵаки ԥҳәыски рыбжьара ишаԥиҵаз. Насгьы иара иаҳахьан иабду иан Сарра егьырҭ ахацәа данлаԥшықәырҵаз Иегова ҩынтә лыпату шихьчахьаз. Убас еиԥш иҟаз аҭагылазаашьаҿы Анцәа Исаак иԥҳәыс Ревеккагьы дихьчахьан (Аҟаз. 2:24; 12:14—20; 20:2—7; 26:6—11). Урҭ рҩызцәа ахҭысқәа данрызхәыцуаз Иосиф еиликааит Иегова ииашоуп, насгьы ииашаӡам ҳәа ииԥхьаӡоз. Иосиф Иегова бзиа дибон, аиашара иазкыз инормақәагьы бзиа ибон. Убри аҟынтә лакҩакрада иԥсҭазаараҿы урҭ дрықәныҟәон.

3. Еилҳаргозеи ари астатиаҿы?

³ Бзиа ижәбома аиашара? Агәра ганы ҳаҟоуп, бзиа ишыжәбо. Аха ҳара зегьы анаӡара ҳацәыхароуп. Убри аҟынтә ҳгәыҳҽанымзар, ари адунеи аҿы ауаа ацәгьеи абзиеи ишазыҟоу рҿаҳҵаар ҳалшоит (Ис. 5:20; Рим. 12:2). Убри аҟынтә шәааи еилаҳкаап аиашара закәу, насгьы уи бзиа иаҳбалар зхадоу. Анаҩс еилҳаргоит Иегова инормақәа рахь абзиабара аизырҳара иҳацхраауа х-шьаҿак.

ИЗАКӘЫЗЕИ АИАШАРА?

4. Иарбан ииашам гәаанагароу аӡәырҩы ирымоу, ауаҩ иаша дызусҭоу иазкны?

⁴ Аӡәырҩы ауаа ажәеидҳәала «ауаҩ иаша» анраҳауа рхаҿы дааиуеит акгьы игымшәа зхы зыԥхьаӡо, егьырҭ ирықәыӡбо, насгьы зегь раасҭа иара деиӷьушәа зхы зыԥхьаӡо ауаҩы. Аха Анцәа урҭ рҩызцәа аҟазшьақәа бзиа ибаӡом. Иисус ихаан инхоз адиннапхгаҩцәа дрықәыӡбон, аиашара иазкны рхатә нормақәа ахьышьақәдыргылоз азы (Еккл. 7:16; Лука 16:15). Анцәа иҿаԥхьа ииашоу ауаҩы ахаангьы егьырҭ дреиӷьушәа ихы иԥхьаӡаӡом.

5. Изакәызеи аиашара, Абиблиа излаҳәо ала? Иаажәга аҿырԥштәқәа.

⁵ Аиашара ҟазшьа ԥшӡоуп. Иаармарианы иуҳәозар, ииашаны ахымҩаԥгара Иегова ииашоуп ҳәа ииԥхьаӡо аҟаҵара ауп иаанаго. Абиблиаҿы аиашара ҳәа еиҭагоу ажәақәа ауаҩы Анцәа иҳараку инормақәа рыла дшынхо аанарԥшуеит. Иаҳҳәап, Иегова ахәаахәҭыҩцәа амц рымҳәаларц реиҳәеит. Иара иҳәеит: «Шәгьырақәа... иашазааит, амц рымҳәалааит» (Ҩынтә. 25:15). Араҟа «амц рымҳәалааит» ҳәа еиҭагоу ажәытәуриатә ажәа «иашазааит» ҳәа еиҭоугаргьы алшоит. Ус анакәха, ақьырсиан Анцәа иҿаԥхьа диашазарц иҭахызар, аусура иадҳәалоу азҵаарақәа зегь рҿы амц имҳәалароуп. Уи адагьы, ииашоу ауаҩы аиашара бзиа ибоит. Иара аӡәы ииашамкәа ианизныҟәо изычҳаӡом. Ауаҩ иашаҵәҟьа иҟаиҵо зегь рҿы Иегова игәы дақәшәалар иҭахуп (Кәал. 1:10). Убри аҟынтә ӡбарак идикылаанӡа, уи Иегова игәаԥхо-игәамԥхо дазхәыцуеит.

6. Избан ацәгьеи абзиеи ирызку Иегова ишьақәиргылаз анормақәа рыла ҳанхалар зҳахәҭоу? (Исаиа 55:8, 9).

⁶ Иегова — аиашара дахыҵхырҭоуп. Убри азоуп Абиблиаҿы «аиашара анхарҭа» ҳәа зизҳәоу (Иер. 50:7). Иегова Зегьзшаз иоуп, убри аҟынтә иара заҵәык иоуп ацәгьеи абзиеи закәу ашьақәыргылара закәанла азин змоу. Ауаа ацәгьеи абзиеи закәу аилкаара анамӡареи агәнаҳаи лассы-лассы ирԥырхагоуп. Аха Иегова днаӡоуп, убри аҟынтә ацәгьеи абзиеи закәу ҳара ҳаасҭа еиӷьны идыруеит (Ажәам. 14:12; шәаԥхьа Исаиа 55:8, 9). Ус шакәугьы, ҳара Анцәа ҳиеиԥшны ҳшоуп, убри аҟынтә ииашоу инормақәа рыла анхара ҳалшоит (Аҟаз. 1:27). Уи аҩыза аԥсҭазаара агәахәара ҳзаанагоит! Ҳаб иахь иҳамоу абзиабара еиҳа еиӷьны иҿыԥшра ҳгәазҭанаҵоит (Еф. 5:1).

7. Избан еиуеиԥшым ҳаԥсҭазааратә ганқәа рҿы узықәгәыӷыртә иҟоу аԥҟарақәа заҳҭаху? Иаажәга аҿырԥштәқәа.

⁷ Ацәгьеи абзиеи ирызку Иегова инормақәа ҳрықәныҟәозар, уи ахәарҭа ҳзаанагоит. Избан ус ҳҳәар зҳалшо? Шәхаҿы иаажәг иҟалоз, абанкқәа авалиута акурс ишаарҭаххо ишьақәдыргылозҭгьы, ма аргыларатә компаниақәа рхатә нормақәеи рхатә ԥҟарақәеи ирықәныҟәозҭгьы. Уи зегьы хыла-гәыла еиланаҵон. Иаҳҳәар ҳалшозеи аҳақьымцәа ауаа рыхәышәтәра иазку аԥҟарақәа ирықәымныҟәозҭгьы? Уи ачымазцәа рыԥсҭазаара ашәарҭара иҭанаргылон. Ишаҳбаз еиԥш, узықәгәыӷыртә иҟоу аԥҟарақәа ҳрыхьчоит. Убас еиԥшҵәҟьа ацәгьеи абзиеи ирызку Анцәа инормақәагьы ҳаԥсҭазаара рыхьчоит.

8. Ирзыԥшузеи Анцәа инормақәа рыла анхара згәаԥхо ауаа?

⁸ Иегова инормақәа рыла анхара зҽазызшәо ауаа дырзылԥхоит. Иара ҳақәиргәыӷуеит: «Ауаа иашақәа адгьыл рҭынхоит, иагьынхалоит уа наӡаӡа» (Аԥсал. 37:29). Шәхаҿы иаажәг, ауаа зегьы Анцәа инормақәа рыла ианынхало, адгьыл аҿы аӡәкреи, аҭынчреи, агәырӷьареи шыҟало! Иегова иҭахуп шәара уи аҩыза аԥсҭазаара шәымазарц. Ҳара аиашара бзиа абаразы амзызқәа рацәаны иҳамоуп. Иҳацхраауазеи аиашарахь иҳамоу абзиабара аизырҳара? Шәааи х-шьаҿак еилҳаргап.

ИЕГОВА ИНОРМАҚӘА РАХЬ АБЗИАБАРА ЕИЗШӘЫРҲАЛА

9. Иҳацхраауазеи аиашара бзиа абара?

⁹ Актәи ашьаҿа. Ацәгьеи абзиеи ирызку анормақәа шьақәзыргылаз бзиа дыжәбала. Аиашара бзиа иаҳбаларц азы ацәгьеи абзиеи ирызку анормақәа шьақәзыргылаз иахь ҳабзиабара ҳарӷәӷәалароуп. Иегова еиҳаны бзиа даҳбацыԥхьаӡа ииашоу изакәанқәеи ипринципқәеи рыла анхара еиҳагьы иаҳҭаххалоит. Адами Евеи Иегова бзиа дырбозҭгьы, есымша изыӡырҩлон (Аҟаз. 3:1—6, 16—19).

10. Ицхраазеи Авраам Иегова еиҳа еиӷьны иеилкаара?

¹⁰ Иҟаҵатәузеи Адами Евеи ирыхьыз агха аҩыза ҳмыхьырц азы? Анаҩсгьы Иегова деилаҳкаалароуп, иҟазшьақәа рыхә ҳаракны иаҳшьалароуп, насгьы ихәыцшьа аилкаара ҳҽазаҳшәалароуп. Убасҟан Анцәа иахь ҳабзиабара еизҳалоит. Абар Авраам иҿырԥшы. Уи гәыкала Иегова бзиа дибон. Авраам Анцәа идикылаз аӡбара анизеилымкаауазгьы, уи дақәгәамҵӡомызт. Уи еиҳагьы Иегова иеилкаара дашьҭалон. Иаҳҳәап, Анцәа Содоми Гоморреи ықәигарц аниӡба, Авраам агәҭынчымра изцәырҵит: «адгьыл зегь Аӡбаҩ» ииашоу ауаа ацәгьаҟаҵаҩцәа ирылакны иқәигарыма? Авраам уи ихаҿгьы изаагомызт. Убри аҟынтә аԥагьара аамырԥшӡакәа, Иегова зҵаарақәак ииҭеит, Анцәагьы ачҳара аарԥшны Авраам аҭак ииҭон. Убасҟан Авраам еиликааит Иегова ауаа зегь рыгәқәа шибо, насгьы акгьы зхарам ацәгьара ҟазҵо ирылаҵаны ахаан ишықәимго (Аҟаз. 18:20—32).

11. Избан иаҳҳәар зҳалшо, Авраам Иегова бзиа дибон, насгьы игәра игон ҳәа?

¹¹ Содоми Гоморреи ирызкны Иеговеи Авраами реицәажәара Авраам иԥсы ахьынӡаҭаз игәалашәон. Уажәшьҭа Иаб еиҳагьы бзиа дибон, патугьы иқәиҵон. Шықәсқәак рышьҭахь Авраам Анцәа иахь имаз агәрагара ӷәӷәала иԥышәахеит. Иегова Авраам диҳәеит бзиа иибоз иԥа, Исаак, амҭас дизнеигарц. Аха Авраам Анцәа ибзианы деиликаахьан, убри аҟынтә зҵааракгьы иимҭаӡеит. Иара ҿымҭӡакәа Иегова ииҳәаз ҟаиҵеит. Авраам уи адҵа анагӡара иҽаназыҟаиҵоз игәы тҟәацны ицозҭгьы ҟаларын. Иҟалап иара дааҟәымҵӡакәа Иегова изкны еиликаахьаз дазхәыцуазҭгьы. Иара идыруан Анцәа ахаангьы ииашамкәа, ма рыцҳашьарада ихы шымҩаԥимго. Апостол Павел иажәақәа рыла, Авраам агәра ганы дыҟан, бзиа иибоз иԥа Иегова иԥсы ҭеиҵар шилшоз (Аур. 11:17—19). Анцәа Авраам ажәа ииҭахьан Исаак ажәлар ду шихылҵуа, аха усҟан Исаак ахшара имоуӡацызт. Авраам Иегова бзиа дибон, убри аҟынтә жәҩантәи Иаб есымша ииашаны ихы шымҩаԥиго агәра ганы дыҟан. Иара ишицәыцәгьазгьы, агәрахаҵара аарԥшны Иегова иеиҳәаз ҟаиҵеит (Аҟаз. 22:1—12).

12. Ишԥаҳалшо Авраам ҳаиҿыԥшлар? (Аԥсалом 73:28).

¹² Ишԥаҳалшо Авраам ҳаиҿыԥшлар? Ҳаргьы еиҳа-еиҳа еиӷьны Иегова деилаҳкаалароуп. Убасҟан еиҳа ҳаизааигәахоит, насгьы еиҳа иӷәӷәаны бзиа даҳбалоит. (Шәаԥхьа Аԥсалом 73:28.) Уи адагьы, Анцәа игәаԥхо аӡбарақәа ҳадаҳкылалартә еиԥш ҳаламыс ҳааӡоит (Аур. 5:14). Иарбан лҵшәоу уи иаанаго? Аӡәы иҽеим ак ҳирҟаҵарц далагар, уи ахаангьы ҳақәшаҳаҭхаӡом. Жәҩантәи Ҳаб игәы изырхьуа, насгьы ҳаиҩызара бжьызхуа ак аҟаҵара ҳхахьгьы иааҳгалаӡом. Иҟаҵалатәузеи иҵегьы аиашарахь ҳабзиабара еизҳарҳаларц азы?

13. Иҳацхраауазеи аиашара еиҳагьы бзиа абара? (Ажәамаанақәа 15:9).

¹³ Аҩбатәи ашьаҿа. Аиашарахь шәыбзиабара есыҽны еизшәырҳала. Иегова ииашоу инормақәа рахь абзиабара аизырҳара абаҩрҵәыра иаҿҳарԥшыр ҳалшоит. Уи есыҽны иҟаҳҵалар ауеит. Иегова ҳара ҳҟынтә иҳалымшо дазыԥшӡам (Аԥсал. 103:14). Иара агәра ҳиргоит аиашара иашьҭоу бзиа ишибо. (Шәаԥхьа Ажәамаанақәа 15:9.) Иегова имаҵзураҿы хықәкык ықәҳаргылазар, уи наҳагӡарц азы иҳалшо зегь ҟаҳҵалоит. Убас еиԥш ауп иашарала анхара ҳҽаназаҳшәогьы. Усҟан Иегова ачҳара аарԥшны аиашара еиҳагьы бзиа абара дҳацхраалоит (Аԥсал. 84:5, 7).

14. Изакәызеи «аиашара агәышԥыхьчага», насгьы изаҳҭахузеи уи?

¹⁴ Иегова ирхааны иаҳгәалаиршәоит аиашара ҳзырааԥсо ак шакәым (1 Иоанн 5:3). Уи ҳахьчоит, насгьы есыҽны уи ада ԥсыхәа ҳамаӡам. Ара иаҳгәалаҳаршәар ҳалшоит апостол Павел зыӡбахә иҳәоз адоуҳатә бџьармаҭәа (Еф. 6:14—18). Иарбан урҭ рҟынтә ақьырсиан игәы зыхьчо? Уи Иегова ииашоу инормақәа аазырԥшуа «аиашара агәышԥыхьчага» ауп. Агәышԥыхьчага аибашьҩы игәы шахьчо еиԥш, Иегова инормақәа шәзеиԥшра уаҩу аазырԥшуа асимволтә ҵакы змоу шәгәы рыхьчар рылшоит. Убри азы ауп адоуҳатә бџьармаҭәа анаҳшәаҳҵо аиашара агәышԥыхьчага ашәҵара убас изхадоу (Ажәам. 4:23).

15. Ишԥашәылшо аиашара агәышԥыхьчага шәшәышәҵар?

¹⁵ Ишԥашәылшо аиашара агәышԥыхьчага шәшәышәҵар? Есыҽны аӡбарақәа аншәыдышәкыло Анцәа инормақәа шәрызхәыцлар, уи агәышԥыхьчага шәара ишәыдкыланы ирӡахызшәа иҟалоит. Шәызлацәажәаша, шәыззыӡырҩыша амузыка, шәызхәаԥшыша, ма шәзыԥхьаша аналшәхуа, раԥхьа шәхы шәазҵаа: «Схы-сгәы иҭазгаларц исҭаху зеиԥшроузеи? Игәаԥхома уи Иегова? Мамзаргьы Иегова игәамԥхо цәгьарак аҵамшәа иаанарԥшуоу — иаҳҳәап, аламысдара, ақәымчра, аԥсыцәгьара, ухы мацара азхәыцра?» (Флп. 4:8). Ишәыдышәкыло аӡбарақәа Иегова игәаԥхозар, ииашоу анормақәа шәгәы рыхьчалоит.

16, 17. Агәра шԥаҳдырго Исаиа 48:18 иану ажәақәа, еснагь Иегова инормақәа рыла анхара шҳалшо?

¹⁶ Зныкыр шәгәы иаанагахьоума Иегова ииашоу инормақәа рыла есыҽны, шықәсыла анхара аӡәгьы илшаӡом ҳәа? Ус акәзар, Исаиа 48:18 аҿы Анцәа иааигаз аиҿырԥшра шәазхәыц (шәаԥхьа). Иегова ҳақәиргәыӷуеит ҳиашара «амшын ацәқәырԥақәа» ишреиԥшхо. Шәхаҿы иаажәг улаԥш зхьымӡо амшын шәхыԥшылошәа. Ацәқәырԥақәа иааҟәымҵӡакәа аԥшаҳәа иадсылоит. Шәгәы зырҭынчуа ари аԥшӡара шәанахәаԥшуа, шәгәы иаанагома ҽнак зны ацәқәырԥақәа аангылоит ҳәа? Ҳәарада, мап! Избанзар зқьышықәсақәа ҵуеит урҭ ааҟәымҵӡакәа амшын аԥшаҳәа иадсылоижьҭеи, убри аҟынтә агәра жәгоит, ус еснагь ишыҟазаауа.

¹⁷ Шәара шәиашара амшын ацәқәырԥақәа иреиԥшхар алшоит, даҽакала иуҳәозар, шәара ишәылшоит есымша, шәааҟәымҵӡакәа Анцәа ииашоу ипринципқәа рыла анхара. Ишәыцхраауазеи уи аҿы? Аӡбара шәыдышәкылар аншәыхәҭоу, Иегова шәара шәҟынтә дыззыԥшу шәазхәыцла, насгьы уи инақәыршәаны шәхы мҩаԥыжәгала. Ишәыдышәкылар акәу аӡбара мариамзаргьы, ишәхашәмыршҭлан, жәҩантәи Шәаб дышшәыцу. Иара ииашоу инормақәа рыла анхара дшәыцхраауеит (Ис. 40:29—31).

18. Избан ҳхатә гәаанагарала егьырҭ ҳармықәыӡбалар закәу?

¹⁸ Ахԥатәи ашьаҿа. Аӡбара Иегова инапы ианышәҵала. Ҳара Иегова ииашоу инормақәа рыла ҳанхаларц азы иҳалшо зегь ҟаҳҵоит. Аха егьырҭ ҳхы рҿырԥшны урҭ ҳреиӷьушәа ҳамхәыцлароуп. Аишьцәеи аиҳәшьцәеи Иегова ишигәаԥхо еиԥш инхо-инымхо аӡбара азин ҳамаӡам. Шәааи иаҳхаҳмыршҭлап, «адгьыл зегь Аӡбаҩ» Иегова шиакәу (Аҟаз. 18:25). Иара егьырҭ рықәыӡбара азин ҳаимҭаӡеит. Убри азоуп Иисус изиҳәаз: «Шәмыӡбалан, ӡбатәысгьы шәроурым» (Матф. 7:1)b.

19. Излоубарҭоузеи Иосиф аӡбара Иегова инапы ишаниҵоз?

¹⁹ Шәааи ииашаз ауаҩы Иосиф иҿырԥшы еиҭах иаҳгәалаҳаршәап. Иара аӡәгьы диқәыӡбаӡомызт, рыцҳашьарак аамырԥшӡакәа изныҟәозгьы уахь иналаҵаны. Иашьцәа маҵуҩык иаҳасабала дырҭиит, дыԥсызшәагьы раб иарҳәеит. Акыршықәса рышьҭахь Иосиф иашьцәеи иареи ҿыц еибабеит. Дара иҟарҵаз гәыкала ишахьхәызгьы, Иосиф ишьа иур ҳәа ишәон. Иара ус иагьыҟаиҵар илшон, избанзар амчра ду змаз напхгаҩны дҟалеит. Аха Иосиф иашьцәа ргәы ирҭынчит. Иара абас реиҳәеит: «Шәымшәан. Сынцәоума сара?» (Аҟаз. 37:18—20, 27, 28, 31—35; 50:15—21). Иосиф аԥагьара аамырԥшӡакәа аӡбара Иегова инапы ианиҵеит.

20, 21. Иҟаҵалатәузеи егьырҭ ҳреиӷьушәа ҳамԥхьаӡаларц азы?

²⁰ Иосиф иеиԥш ҳаргьы аӡбара Иегова инапы ианаҳҵоит. Иаҳҳәап, ҳашьцәеи ҳаҳәшьцәеи иҟарҵо дзырҟаҵо ҳдыруеит ҳәа ҳаԥхьаӡаӡом. Ҳара ауаҩы игәы иҭоу ҳаздырӡом. Иегова заҵәык иоуп ауаҩы игәы иҭоу здыруа (Ажәам. 16:2). Анцәа ауаа зегь бзиа ибоит, аҵара змоу реиԥш измамгьы, ибеиоу реиԥш иӷаругьы. Иара иҭахуп ауаа зегь рзы ҳгәы аартызарц (2 Кор. 6:13). Убри аҟынтә шәааи ҳашьцәеи ҳаҳәшьцәеи ҳармықәыӡбалап, урҭ бзиа иаҳбалап.

²¹ Иара убас ҳара Иегова имаҵ зымуа ауаа ҳрықәыӡбаӡом (1 Тим. 2:3, 4). Иаҳҳәап, шәыуак изы абас шәгәы иаанагарызма: «Уи ахаан аҵабырг идикылаӡом»? Ус ҳхәыцуазҭгьы, уи иаанарԥшуан ҳхы ҳшақәгәыӷцәо, насгьы егьырҭ ҳреиӷьушәа шыҳаԥхьаӡо. Иегова ауаа зегьы, урҭ ахьынхозаалакгьы, рыгәнаҳақәа ирыхьхәырц алшара риҭоит (Аус. 17:30). Ахаан ишәхашәмыршҭлан егьырҭ раасҭа еиӷьушәа зхы зыԥхьаӡо ауаа Иегова ииашам уааны ишиԥхьаӡо.

22. Бзиа изыжәбозеи аиашара?

²² Анцәа ииашоу инормақәа рахь иҳамоу абзиабара анаҩсгьы агәырӷьара ҳзаанагалааит, насгьы егьырҭ аҿырԥш бзиа дырбара иҳацхраалааит. Уи егьырҭ ргәазҭанаҵалааит ҳаргьы иаҳзааигәахаларц, Иеговагьы изааигәахаларц. Шәааи есымша аиашара бзиа иаҳбалап (Матф. 5:6). Агәра ганы шәыҟаз Иегова шәџьабаа шибо. Иара ииашаны шәхы шымҩаԥыжәго анибо, игәы гәырӷьарала иҭәуеит. Ари адунеи аҿы аиашамра еиҳа-еиҳа ирацәахоит, аха шәгәы кашәмыжьлан! Ишәхашәмыршҭлан: «Ҳазшаз ауаа иашақәа бзиа ибоит»! (Аԥсал. 146:8, АԤ).