Ишԥаҟало аӡәырҩы уаа иашақәаны?

1. Иарбан ҳгәы хыҭхыҭуа ҳаззыԥшу хҭысқәоу Зқьышықәсатәи анапхгара аан иҟало?

ИҞАЛАП шәара изныкымкәа шәхаҿы иаажәгахьазар Христос Зқьышықәсатәи инапхгара аан аԥсҭалара шыҟало. Ҳара зегьы уи амш ҳгәы хыҭхыҭуа ҳазыԥшуп! Зҭынхацәа ԥсыз даара ирҭахуп урҭ дырҩегь ирбар. Иеговагьы урҭ гәхьааигоит (Иов 14:15). Шаҟа игәырӷьалозеи адгьыл зегь аҿы ауаа, зыԥсы ҭало ианырԥылало! Ҳазхысыз астатиа аҟынтә ишеилаҳкааз еиԥш, аԥсҭазааратә шәҟәаҿы зыхьӡқәа ану «ауаа иашақәа» наӡаӡатәи аԥсҭазаара роурц азы рыԥсы ҭалоит (Аус. 24:15, АдҾ; Иоанн 5:29). Бзиа иаҳбоз аӡәырҩы раԥхьа зыԥсы ҭало иреиуахар ҟалапb. Уи адагьы, рыԥсы ҭалоит «ииашақәам» ауаа, иаҳҳәап, Иегова иеилкаареи имаҵ ауреи алшара змамыз. Урҭ аӡбарҭа аҿаԥхьа игыларц азы рыԥсы ҭаҵахоит.

2, 3. а) Иарбан идуу рҵаратә программоу Исаиа 11:9, 10 аҿы заа зыӡбахә ҳәаз? б) Еилҳаргозеи ари астатиаҿы?

² Зыԥсы ҭало зегьы аҵара дырҵатәхоит (Ис. 26:9; 61:11). Убри аҟынтә адгьыл зегь аҿы аҭоурых аҟны ахаан иҟамлац арҵаратә программа мҩаԥыслоит. (Шәаԥхьа Исаиа 11:9, 10.) Зыԥсы ҭало ииашақәам ауаа еилыркаар акәхоит Иисус Христос, Анцәа Иаҳра, аҿыхра, насгьы Иегова ихьӡи иреиҳаӡоу имчреи ирыдҳәалоу аимактә зҵаара аӡбахә. Ауаа иашақәагьы ирацәаны еилыркаар акәхоит, Иегова адгьыл иазкны игәҭакы хәыҷы-хәыҷла ишааиртуаз. Урҭ рҟынтә иҟоуп Абиблиа аҩра иалгаанӡа акыршықәса шыбжьаз иԥсызгьы. Убас ала ауаа иашақәагьы ииашақәамгьы еилыркаар акәхо рацәахоит.

³ Ари астатиаҿы ҳара абарҭ азҵаарақәа ҳрылацәажәоит: ишԥамҩаԥысло арҵаратә программа ду? Ишԥеидҳәалоу ауаа уи апрограмма ишазыҟазаауеи урҭ рыхьӡқәа наӡаӡа аԥсҭазааратә шәҟәаҿы ианҵахоу-ианҵамхоуи? Арҭ азҵаарақәа рҭак ҳдыруазар даара ихадоуп. Уи аҿы иҳацхраауеит абиблиатә шәҟәқәа, Даниил, насгьы Аатра, ирну иџьоушьаша аԥааимбаражәақәа. Урҭ рыцхыраарала аԥсҭалараан иҟало еиҳа еиӷьны еилаҳкаауеит. Шәааи раԥхьа Даниил 12:1, 2 иану иџьоушьаша ахҭысқәа ҳрылацәажәап.

«ИԤСХЬОУ РҞЫНТӘ АӠӘЫРҨЫ ГЫЛОИТ»

4, 5. Ианузеи Даниил 12:1 аҿы аҵыхәтәантәи аамҭа иазкны?

⁴ Шәаԥхьа Даниил 12:1. Даниил ишәҟәы иҳаилнаркаауеит аҵыхәтәантәи амшқәа рзы иҟало ахҭысқәа шеишьҭагылазаауа. Иаҳҳәап, Даниил 12:1 аҿы иануп, Михаил, даҽакала иуҳәозар, Иисус Христос, Анцәа ижәлар дышрыдгылазаауа. Даниил иԥааимбаражәа ари ахәҭа анаӡара иалагеит 1914 шықәсазы, Иисус Анцәа жәҩантәи Иаҳраҿы Аҳас даныҟала.

⁵ Иара убас Даниил иаҳәан, Иисус «дгылоит... ажәлар шьақәгылеижьҭеи иҟамлацыз, насгьы уи аҟынӡа иҟамло аамҭа цәгьа» аныҟало ҳәа. Уи «аамҭа цәгьа» Матфеи 24:21 аҿы «арыцҳара ду» ҳәа азҳәоуп. Иисус «дгылоит», даҽакала иуҳәозар, Анцәа имаҵзуҩцәа ихьчоит, «аамҭа цәгьа» аҵыхәтәаны — Армагеддон аан. Аатра аҿы урҭ ауаа арыцҳара ду зхызгаз «ҵҩа змамыз» ажәлар ҳәа рызҳәоуп (Аат. 7:9, 14).

6. Иҟалозеи «ҵҩа змамыз» ажәлар арыцҳара ду анырхыргалак ашьҭахь? Иҳаилшәыркаа. (Адгьыл аҿы иҟало аԥсҭалара атәы шәаԥхьар шәылшоит ари аҭыжьымҭаҿы иану «Аԥхьаҩцәа рызҵаарақәа» аҿы.)

⁶ Шәаԥхьа Даниил 12:2. Иҟалозеи «ҵҩа змамыз» ажәлар арыцҳара ду анырхыргалак ашьҭахь? Уаанӡа ҳара ҳгәы иаанагон, Даниил ари иԥааимбаражәа асимволтә ҵакы змоу аԥсҭалара аанарԥшуеит ҳәа — 1918 шықәсазы Анцәа имаҵзуҩцәа ӷәӷәала ианрышьҭашәарыцоз ашьҭахь ҿыц доуҳала ианышьақәгылаc. Аха уажәшьҭа ҳара еилаҳкаауеит, урҭ ажәақәа адунеи ҿыц аҿы иҟало аԥсҭалараҵәҟьа шаадырԥшуа. Уи алагоит аҵыхәтәантәи амшқәеи Армагеддони рышьҭахь.

7. а) Ишԥеилкаатәу шьоукы наӡаӡатәи аԥсҭазаара роурц азы рыԥсы ҭалоит ҳәа иану ажәақәа? б) Избан уи еиҳа еиӷьу ԥсҭалароуп ҳәа зҳәоу?

⁷ Даниил 12:2 аҿы иануп, шьоукы наӡаӡатәи аԥсҭазаара роурц азы рыԥсы шҭало. Иаанагозеи уи? Уи иаанагоит Зқьышықәсатәи анапхгара аан Иеговеи Иисуси ирызку адыррақәа еиззырҳало, насгьы урҭ ирзыӡырҩло зыԥсы ҭало ауаа наӡаӡатәи аԥсҭазаара шроуа (Иоанн 17:3). Урҭ еиҳа еиӷьу аԥсҭалара роуеит (Аур. 11:35). Избан уи еиҳа изеиӷьу? Избанзар уаанӡа зыԥсы ҭаҵаз инаӡамыз ауаа ԥыҭрак ашьҭахь иԥсит.

8. Ишԥеилкаатәу шьоукы наӡаӡа ахьымӡӷ ргаразы рыԥсы ҭаҵахоит ҳәа иану ажәақәа?

⁸ Аха зыԥсы ҭаҵахо рыбжьара Иегова иҿы аҵара аҵара зҭахымхогьы ҟалоит. Даниил иԥааимбаражәаҿы иануп, шьоукы наӡаӡа ахьымӡӷ ргаразы рыԥсы шҭаҵахо. Урҭ Анцәа иҿагылоит, убри аҟынтә рыхьӡқәа аԥсҭазааратә шәҟәы ианҵахаӡом, насгьы наӡаӡатәи аԥсҭазаара роуӡом. Дара наӡаӡатәи ахьымӡӷ, даҽакала иуҳәозар, ақәхра рзыԥшуп. Убас ала, Даниил 12:2 аҿы иануп, зыԥсы ҭаҵахо зегьы рыԥсы анҭалалак ашьҭахь иҟарҵало аусқәа рыԥсҭазаара ишаныруа (Аат. 20:12)d. Шьоукы наӡаӡатәи аԥсҭазаара роуеит, шьоукы — ироуӡом.

«АӠӘЫРҨЫ УАА ИАШАҚӘАНЫ АҞАЛАРА ИРЫЦХРААУА»

9, 10. а) Иҟалозеи иҵегьы арыцҳара ду ашьҭахь, Даниил 12:3 иану инақәыршәаны? б) Илашалода «ажәҩан шылашо еиԥш, улаԥш хыркуа»?

⁹ Шәаԥхьа Даниил 12:3. Иҟалозеи иҵегьы иҟалараны иҟоу «аамҭа цәгьа» ашьҭахь? Даниил 12:3 иану ажәақәа уи ҳаилдыркаауеит. Урҭ ажәақәа арыцҳара ду ашьҭахь иҟало иазкуп.

¹⁰ Илашалода «ажәҩан шылашо еиԥш, улаԥш хыркуа»? Матфеи 13:43 (АдҾ) аҿы иану Иисус иажәақәа уи аилкаара иҳацхраауеит: «Анцәа игәы иақәшәо ауаа Раб Иаҳраҿы амреиԥш илашалоит». Арҭ ажәақәа иҳәаанӡа Иисус рыӡбахә иҳәон «Аҳра аԥацәа» — ажәҩан аҿы аҳцәаны ицҟало доуҳала иалху иашьцәа (Матф. 13:38). Убри аҟынтә Даниил 12:3 аҿы доуҳала иалху ақьырсианцәа рыӡбахә, насгьы урҭ Зқьышықәсатәи анапхгара аан изҿызаало аӡбахә акәзар ҟалап иану.

11, 12. Иарбан усу инарыгӡало 144 000-ҩык 1 000 шықәса рыҩныҵҟа?

¹¹ Ишԥарыцхраало 144 000-ҩык «аӡәырҩы уаа иашақәаны аҟалара»? Иисус Христоси дареи 1 000 шықәса рыҩныҵҟа адгьыл аҿы имҩаԥгахало арҵаратә ус напхгара азырулоит. Доуҳала иалху ақьырсианцәа аҳцәаны адагьы, ԥшьаҩцәангьы иҟазаауеит (Аат. 1:6; 5:10; 20:6). Убри аҟынтә урҭ ауаа аҽыхәышәтәра ирыцхраауеит — хәыҷы-хәыҷла анаӡарахь инаргоит (Иез. 47:12; Аат. 22:1, 2). Шаҟа гәырӷьара рзаанагозеи доуҳала иалху ақьырсианцәа уи аус!

¹² Иазусҭцәада уаа иашақәаны аҟалара изыцхраауа «аӡәырҩы» ҳәа зыӡбахә ҳәоу? Урҭ иреиуахоит зыԥсы ҭало, иара убас Армагеддон зхызго, насгьы иҟалап адунеи ҿыц аҿы ииуа ахәыҷқәа. 1 000 шықәса анҵәамҭазы адгьыл аҿы ауаа зегь наӡахоит. Ицәырҵуеит азҵаара: ианбанҵахо урҭ рыхьӡқәа аԥсҭазааратә шәҟәаҿы, карандашьла акәымкәа, ҩыгала?

АҴЫХӘТӘАНТӘИ АԤЫШӘАРА

13, 14. Иҟарҵалар акәхозеи инаӡоу ауаа зегьы наӡаӡатәи аԥсҭазаара роурц азы?

¹³ Иаҳхаҳмыршҭлароуп ауаҩы дахьынаӡоу мацаразы наӡаӡатәи аԥсҭазаара шимоуа. Иаҳҳәап, Адами Евеи наӡан, аха наӡаӡа инхаларц азы есымша Иегова изыӡырҩлар акәын. Илахьеиқәҵагоуп, аха урҭ Анцәа изымӡырҩӡеит (Рим. 5:12).

¹⁴ Иаҳҳәар ҳалшозеи 1 000 шықәса рынҵәамҭазы адгьыл аҿы инхало ауаа рзы? Урҭ зегьы наӡазаауеит. Иадгылалома урҭ Иегова инапхгара наӡаӡа, мамзаргьы урҭ рҟынтә аӡәы дшынаӡазаауагьы, Адами Евеи реиԥш, Анцәа диҿагылоу? Арҭ азҵаарақәа рҭак ҟаҵатәхоит. Аха ишԥа?

15, 16. а) Ианбароуеи ауаа зегьы алшара Иегова гәыкала ишизыҟоу ашьақәырӷәӷәара? б) Излахыркәшахозеи аҵыхәтәантәи аԥышәара?

¹⁵ 1 000 шықәса рыҩныҵҟа Аҩсҭаа асимволтә ҵакы змоу абахҭа дҭакызаауеит, насгьы ауаа ржьара илшалаӡом. Аха 1 000 шықәса рынҵәамҭазы иара ихы дақәиҭхоит. Усҟан иара инаӡоу ауаа Иегова даанрыжьырц илшо зегь ҟаиҵоит. Уи аԥышәара аан ауаа Анцәа ихьӡ пату ақәырҵоу-иақәрымҵоу, насгьы иреиҳаӡоу имчра иадгылоу-иадымгылоу аадырԥшыртә еиԥш алшара роуеит (Аат. 20:7—10). Дасу ихы шааирԥшуа ала иӡбахоит, ихьӡ аԥсҭазааратә шәҟәы наӡаӡа ианҵахоу-ианҵамхоу.

¹⁶ Шьоукы, Адами Евеи реиԥш, Иегова имчра мап ацәыркуеит. Ҳара иҳаздырӡом урҭ шаҟаҩы ҟало. Ирзыԥшузеи дара? Аҭак Аатра 20:15 аҿы иануп: «Аԥсҭазааратә шәҟәы аҿы зыхьӡ арбамыз дарбанзаалакь днаганы абри амца зҭагьежьуаз аӡиа даларыжьуан». Даҽакала иуҳәозар, урҭ аҿагылаҩцәа наӡаӡа иқәгахоит. Аха инаӡоу ауаа реиҳараҩык уи аԥышәара рхыргоит, насгьы рыхьӡқәа наӡаӡа аԥсҭазааратә шәҟәы ианҵахоит.

АҴЫХӘТӘАНТӘИ АМШҚӘА РЗЫ

17. Иеиҳәазеи амаалықь Даниил ҳаамҭа иазкны? (Даниил 12:4, 8—10).

¹⁷ Шаҟа ҳгәы хыҭхыҭуазеи иаҳзыԥшу ахҭысқәа ҳанрызхәыцуа! Аха амаалықь Даниил иеиҳәеит ҳаамҭақәа — аҵыхәтәантәи амшқәа — ирызку ихадоу акы (шәаԥхьа Даниил 12:4, 8—10; 2 Тим. 3:1—5). Абар иара ииҳәаз: «Ииашоу адыррақәа еизҳауеит». Уи иаанагоит Анцәа ижәлар Даниил ишәҟәы иану аԥааимбаражәақәа еиҳа еиӷьны ишеилыркаало? Амаалықь иҳәеит уи аамҭазы еиҭах иҟало: «Ауаа цәгьақәа ацәгьа рулоит, насгьы урҭ рҟынтә аӡәгьы арҭ ажәақәа изеилкааӡом».

18. Ирзыԥшузеи ацәгьаҟаҵаҩцәа иаарласны?

¹⁸ Иахьа угәы иаанагар алшоит ацәгьа ҟазҵо ирулак ауеит ҳәа (Мал. 3:14, 15). Аха иаарласны Иисус ауаа цәгьақәа дрықәыӡбоит, насгьы ауаа иашақәеи дареи еилихуеит, «ахьча ауасақәеи аџьмақәеи шеилихуа еиԥш» (Матф. 25:31—33). Ацәгьа ҟазҵо арыцҳара ду аан еиқәхаӡом, адунеи ҿыц аҿгьы рыԥсы ҭалаӡом. Урҭ рыхьӡқәа Малахиа 3:16 аҿы зыӡбахә ҳәоу «агәаларшәаратә шәҟәы» ианҵахаӡом.

19. Иҟаҳҵалар акәзеи уажәы, насгьы избан? (Малахиа 3:16—18).

¹⁹ Иахьа ацәгьаҟаҵаҩцәеи ҳареи еицаҳзеиԥшу ҳәа акгьы шҳамам ҳусқәа рыла ашьақәырӷәӷәара иаамҭоуп (Шәаԥхьа Малахиа 3:16—18.) Иегова еизигоит иҷыдоу, иара иитәу, ма зыхә ҳараку мазараны ииԥхьаӡо ауаа. Ҳәарада, урҭ ауаа ҳархыԥхьаӡалазар ҳҭахуп.

20. Дызқәыргәыӷзи Даниил, насгьы избан урҭ ажәақәа анынаӡо аамҭа шәгәы хыҭхыҭуа шәзазыԥшу?

²⁰ Шәареи ҳареи аҭоурых аҿы зегь раасҭа угәы зырхыҭхыҭуа аамҭазы ҳанхоит! Аха уи ҳаԥхьаҟа иаҳзыԥшу аамҭа иагьузаҿырԥшӡом. Иаарласны ацәгьара ыҟаӡамызшәа иқәгахоит. Уи ашьҭахь Иегова Даниил иеиҳәаз ажәақәа шынаӡо ҳбоит: «Аамҭа анааилак угылоит, ухәҭаа уоурц азы» (Дан. 12:13). Ҳәара аҭахума, шәара даара шәазыԥшуп, Даниили бзиа ижәбоз ауааи рыԥсы анҭало аамҭа. Убри аҟынтә ишәылшо зегь ҟашәҵала Иегова гәыкала шәшизыҟоу шәаанхарц азы. Убасҟан иара шәыхьӡ ахаан аԥсҭазааратә шәҟәы ианихӡом.