Арыцҳашьара злоу «адгьыл зегь Ӡбаҩыс иамоу» игәра жәгала!

1. Зыгәра ииргазеи Иегова Авраам?

УИ АИЦӘАЖӘАРА Авраам иԥсы ахьынӡаҭаз ихашҭӡомызт. Анцәа амаалықь ила Авраам иеиҳәеит, ақалақьқәа Содоми Гоморреи рықәгара игәы ишҭоу. Уи ажәабжь Авраам агәҭынчымра изцәырнагеит. Иара дҵааит: «Ауаҩ иаша агәнаҳа ҟазҵо ауаҩы дидкыланы дықәугома? [...] Илшома адгьыл зегь Ӡбаҩыс иамоу ииашамкәа ихы мҩаԥигар?» Иегова ачҳара аарԥшны бзиа иибоз иҩыза дизыӡырҩит, насгьы агәра ииргеит ауаа иашақәа ахаан ишықәимго (Аҟаз. 18:23—33). Урҭ ажәақәа ҳаргьы ҳгәы дырҭынчуеит.

2. Избан агәра ганы ҳаҟазар зҳалшо Иегова ак аниӡбо, есымша аиашареи арыцҳашьареи шааирԥшуа?

² Зны-зынла ҳаргьы иаҳзеилкааӡом Анцәа абас зиӡбаз. Апостол Павел Иегова изкны абас аниҵеит: «Иӡбарақәа... еилкаашьак рымам!» (Рим. 11:33). Аха ҳара агәра ганы ҳаҟазар ҳалшоит Иегова ак аниӡбо, есымша аиашареи арыцҳашьареи шааирԥшуа. Избан? Избанзар иара ҳара дҳаиԥшӡам, иара ауаа зегьы рыгәқәа ибоит (1 Аҳ. 8:39; 1 Сам. 16:7; 1 Аш. 28:9). Нас, уи иаҳнамырбаӡои Иегова игәра агара ишаԥсоу?

3, 4. Иарбан зҵаарақәоу иҳазцәырҵыр алшо, насгьы еилҳаргозеи ари астатиаҿы? (Иоанн 5:28, 29).

³ Аха уеизгьы Авраам изцәырҵуаз азҵаарақәа рҩызцәа ҳазцәырҵлар ҳалшоит. Абас ҳхәыцуазар ауеит: «Иегова иқәихыз ауаа уаҳа гәыӷрак рымамкәа иҟоума? Иегова ииашақәам ауаа рыԥсы анҭеиҵо Содоми Гоморреи инхоз ауаа рҟынтә аӡәыр иԥсы ҭеиҵар илшома?» (Аус. 24:15).

⁴ Шәааи ҳалацәажәап аԥсҭалара иазкны иаҳдыруа. Уажәы ааигәа ҳара еиҳа еиӷьны еилаҳкааит Иоанн иҟынтә Аевангелиеҿы зыӡбахә ҳәоу зыԥсы ҭалараны иҟоу ҩ-гәыԥк рыԥсҭалара ҵакыс иамоу. Гәыԥк рыԥсы ҭалоит наӡаӡа инхаларц азы, егьырҭ — рус ӡбахарц азыa. (Шәаԥхьа Иоанн 5:28, 29.) Аԥсҭалара иазку иҿыцу ари аилкаара егьырҭ азҵаарақәагьы еиҳа еиӷьны иҳаилнаркааит. Урҭ ииашоу Иегова иӡбарақәа ирызкуп. Урҭ азҵаарақәа ҳрылацәажәоит ари, насгьы анаҩстәи астатиақәа рҿы. Зны ҳара ҳалацәажәоит уи иазкны иаҳзымдыруа атәы, нас — иаҳдыруа атәы.

ИАҲЗЫМДЫРУА

5. Ианызи уаанӡа ҳпубликациақәа рҿы Содоми Гоморреи инхоз Иегова иқәихыз ауаа ирызкны?

⁵ Уаанӡа ҳпубликациақәа рҿы ианын, Иегова иқәихыз ииашақәам ауаа — иаҳҳәап, Содоми Гоморреи инхоз — рыԥсы ҭалаӡом ҳәа. Аха уи азҵаара бзианы ианҭаҳҵаа, зныкымкәа Анцәа ҳаниҳәа, еилаҳкааит уи ус шакәу шьақәырӷәӷәаны аҳәара шҳалымшо. Избан уи аҩыза алкаа зыҟаҳҵаз?

6. а) Иаажәга Иегова ииашақәам ауаа шықәихыз узырбо егьырҭ аҿырԥштәқәа. б) Ишьақәырӷәӷәаны иаҳҳәар ҳалшома Иегова урҭ наӡаӡа иқәихит ҳәа?

⁶ Абиблиаҿы иануп Иегова ииашақәам ауаа анықәигоз иазку егьырҭ ахҭысқәагьы. Иаҳҳәап, иара аӡхыҵраан Нои иҭаацәеи иареи рыда зегь ықәихит. Иара убас Иегова израильаа иреиҳәеит Изқәыргәыӷыз адгьыл аҿы инхоз быжь-жәларык ықәыргарц. Ԥыҭрак ашьҭахь Анцәа амаалықь ддәықәиҵеит уахык ала 185 000 ассириатәи аруаа ишьырц (Аҟаз. 7:23; Ҩынтә. 7:1—3; Ис. 37:36, 37). Ишьақәнарӷәӷәома Абиблиа, арҭ ауаа зегьы аԥсҭаларазы гәыӷрак рымамкәа наӡаӡа иқәган ҳәа? Мап. Избан ус ҳҳәар зҳалшо?

7. Иаҳзымдыруазеи ҳара аӡхыҵраан иқәхыз ауааи Ханаан инхоз ауааи ирызкны? (Шәахәаԥш асахьа.)

⁷ Ҳара иҳаздырӡом иқәхыз урҭ ауаа Анцәа хаҭа-хаҭала рус шиӡбаз. Иара убас иҳаздырӡом Иегова иеилкаареи рыгәнаҳақәа рыхьхәреи рзы алшара рымазу-ирымамзу. Абиблиаҿы иануп Нои «аиаша рылазҳәоз» иакәын ҳәа (2 Пиотр 2:5). Аха уа иаҳәаӡом иара аковчег ду аниргылоз аамҭазы аӡхыҵра ҟалараны ишыҟоу зегьы хаҭала дцаны иреиҳәон ҳәа. Иара убас уа ианӡам Ханаан инхоз зегьы Иегова иеилкааразы, насгьы аҽыԥсахразы алшара рыман ҳәа.

8. Иаҳзымдыруазеи Содоми Гоморреи рҿы инхоз ауаа ирызкны?

⁸ Иаҳҳәар ҳалшозеи Содоми Гоморреи рҟны инхоз ауаа ирызкны? Ауаҩ иаша Лот урҭ ауаа дрыланхон. Аха ирзеиҭеиҳәозма Лот урҭ ауаа зегьы Анцәа иӡбахә? Ҳара иҳаздырӡом. Ииашаҵәҟьаны, урҭ ақалақьқәа рҿы инхоз ауаа аус хәымгақәа ҟарҵон. Аха еилыркаауазма дара иҟарҵоз шҽеимыз? Дара ус зхы мҩаԥызгоз ауаа рыбжьара ирызҳауан, убри аҟынтә иҟалап ирзеилымкаауазҭгьы. Иаҳгәалаҳаршәап Содом инхоз ахацәа Лот исасцәа ламысдарала ирызныҟәарц шырҭахыз. Абиблиаҿы иануп Содом инхоз ахацәа зегьы, ахәыҷы инаиркны аду иҟынӡа, Лот иҩны ишакәшаз (Аҟаз. 19:4; 2 Пиотр 2:7). Иеговеи Авраами реицәажәара аҟынтә иубарҭоуп уа инхоз реиҳараҩык ииашақәам ауаа шракәыз (Аҟаз. 18:32). Ус анакәха, дара рыгәнаҳақәа рзы Иегова ирыхәҭаз иақәиршәеит. Аха иаанагома уи ииашақәам ауаа рыԥсы анҭало, Содоми Гоморреи инхоз рҟынтә аӡәгьы иԥсы ҭалаӡом ҳәа? Ҳанцәа арыцҳашьара шилоу дырны ус ишьақәырӷәӷәаны иҳазҳәаӡом.

9. Иаҳзымдыруазеи Соломон изкны?

⁹ Абиблиаҿы иануп зны ииашаз, аха нас ииашақәам уааны иҟалаз рыӡбахә. Иаҳҳәап, аҳ Соломон. Иара Иегова ибзианы дидыруан, насгьы игәы дақәшәо имаҵ иуан, Анцәагьы дизылԥхон. Аха ԥыҭрак ашьҭахь Соломон амцнцәахәқәа дрымҵахырхәо далагеит. Иара игәнаҳақәа Иегова игәы ԥыржәеит, насгьы уи иусқәа ирылҵшәахаз израильаа ашәышықәсақәа рыҩныҵҟа ирныруан (1 Аҳ. 11:5—9; 2 Аҳ. 23:13). Анцәа Иажәаҿы иануп Соломон «дыԥсын... дыржит» ҳәа (1 Аҳ. 11:43). Ажәа «дыԥсит» ажәытә уриатә бызшәа аҟынтә еиҭоугозар, иаанагоит «иабацәа рганаҿы диеит». Абиблиаҿы Анцәа изиашоу имаҵзуҩцәа рзгьы убас ҳәоуп, иаҳҳәап, аҳ Давид изы. (Иаҿшәырԥш 1 Аҳ. 2:10, албаага.) Аха иаанагома уи, Соломон иԥсы ҭалоит ҳәа? Абиблиаҿы уи анӡам. Нас иаанагозеи «иԥсыз ауаҩы игәнаҳақәа ианажьуп» ҳәа иану ажәақәа? (Рим. 6:7). Уи иаанагаӡом иԥсыз зегьы рыԥсы ҭалоит ҳәа, аԥсра ауаҩы ҿыц анхаразы азин инаҭошәа. Аԥсҭалара — ари бзиа ҳазбо Анцәа иҳамҭа ауп. Иегова уи аҳамҭа риҭоит наӡаӡа имаҵ ауразы алшара зиҭарц иҭаху ауаа (Иов 14:13, 14; Иоанн 6:44). Иоуама уи аҳамҭа Соломон? Уи здыруа Иегова иоуп, ҳара иҳаздырӡом. Аха ҳара иаҳдыруеит Иегова иӡбарақәа зегь шиашоу.

ИАҲДЫРУА

10. Иарбан цәаныррақәоу Иегова ак аниӡбо изцәырҵуа? (Иезекииль 33:11). (Шәахәаԥш иара убас асахьа.)

¹⁰ Шәаԥхьа Иезекииль 33:11. Ари ажәеинраалаҿы Иегова ак аниӡбо изцәырҵуа ацәаныррақәа рыӡбахә иҳәоит. Аԥааимбар Иезекииль ииҳәахьаз ажәақәа рҩызцәа апостол Пиотргьы иԥшьоу адоуҳа инарҳәеит. Иара иҳәеит Иегова «аӡә дҭахар [шиҭахым]» (2 Пиотр 3:9). Арҭ ажәақәа ҳаргьы ҳгәы дырҭынчуеит. Ҳара иаҳдыруеит Иегова аӡәгьы наӡаӡа дшықәимхуа, уи азы амзыз ӷәӷәа имамзар. Иара иахьалшо есымша арыцҳашьара ааирԥшуеит.

11. Зыԥсы ҭамлода, насгьы иабантәиҳдыруеи уи?

¹¹ Иаҳдыруама ҳара зыԥсы ҭамло зусҭцәоу? Абиблиаҿы аӡәык-ҩыџьак рыӡбахә ауп иануb. Иисус иҳәеит, Иуда Искариот иԥсы шҭамло (Марк 14:21; шәахәаԥш иара убас Иоанн 17:12c). Иуда идырны Иеговеи Иԥеи дырҿагылеит. (Шәахәаԥш Марк 3:29, насгьы «Учебная Библия» аҿы ари ажәеинраалахь иану акомментарии.) Уи адагьы, Иисус иҳәеит иара иҿагылоз адиннапхгаҩцәа аԥсҭаларазы агәыӷра рымамкәа ишыԥсуа (Матф. 23:33). Апостол Павел иҩит аҵабырг иацәхьаҵыз, аха иахьымхәыз рыԥсы шҭамло (Аур. 6:4—8; 10:29).

12. Иаҳдыруазеи Иегова илоу арыцҳашьара иазкны? Иаажәга аҿырԥштәқәа.

¹² Иаҳдыруазеи Иегова илоу арыцҳашьара иазкны? Ишԥаҳирбеи иара «аӡә дҭахар [шиҭахым]»? Ҳахәаԥшып Анцәа шьоук рахь арыцҳашьара шааирԥшыз. Урҭ руаӡәк аҳ Давид иоуп. Иара агәнаҳа ӷәӷәақәа ҟаиҵеит, ахатә ҩыза иԥсахреи ауаҩшьреи уахь иналаҵаны. Аха Давид игәнаҳақәа дрыхьхәит, убри аҟынтә Иегова дрыцҳашьаны ианаижьит (2 Сам. 12:1—13). Аҳ Манассиа иԥсҭазаара аиҳарак аус ҿаасҭақәа ҟаиҵон. Аха Иегова ус еиԥш иҟаз ауаҩгьы дшахьхәыз гәаҭаны ианаижьит (2 Аш. 33:9—16). Арҭ аҿырԥштәқәа иаҳгәаладыршәоит Иегова, уи аҩыза алшара ыҟазар, еснагь арыцҳашьара шааирԥшуа. Иара урҭ ауаа рыԥсы ҭеиҵоит, избанзар дара рыгәнаҳақәа шаҟа иӷәӷәаз еилкааны, урҭ ирыхьхәит.

13. а) Избан Иегова Ниневиа инхоз ауаа зрыцҳаишьаз? б) Ииҳәазеи Иисус ԥыҭрак ашьҭахь Ниневиа инхоз ауаа рзы?

¹³ Иара убас Иегова Ниневиа инхоз ауаагьы рыцҳаишьеит. Анцәа Иона иеиҳәеит уи ақалақь аҿы инхоз ауаа рус цәгьақәа иара иҟынӡа ишнеиз. Аха дара анахьхәы, Иегова ақьиара аарԥшны, рыгәнаҳақәа ранаижьит. Анцәа Иона иаасҭа акырӡа арыцҳашьара илан. Иара згәы ԥжәаз аԥааимбар игәалаиршәар акәхеит Ниневиа инхоз ауаа ацәгьеи-абзиеи шырзеиҩымдыраауаз (Иона 1:1, 2; 3:10; 4:9—11). Ԥыҭрак ашьҭахь Иисус уи ахҭыс аӡбахә иҳәеит, Иегова аиашареи арыцҳашьареи шилоу ауаа идеилиркаарц азы. Иисус иҳәеит Ниневиа инхоз зыгәнаҳақәа ирыхьхәыз ауаа «аӡбара аныҟало аамҭазы» рыԥсы шҭало (Матф. 12:41).

14. Ирзыԥшузеи Ниневиа иатәыз зыԥсы ҭало ауаа «рус [аныӡбахо]»?

¹⁴ Аӡбараан Ниневиа иатәыз ауаа рыԥсы ҭалоит. Иарбан аамҭоу уи? Иисус иҳәон аԥхьаҟа зус ӡбахо ауаа ҟалоит ҳәа (Иоанн 5:29). Иара зыӡбахә имаз «ауаа иашақәагьы, ииашақәамгьы» рыԥсы анҭало Зқьышықәсатәи анапхгара аамҭа акәын (Аус. 24:15). Ииашақәам ауаа «рус ӡбахоит». Уи иаанагоит дара еилыркаауа рхы иадырхәалоу-иадмырхәалоу рбарц азы Иеговеи Иисуси урҭ ишрыцклаԥшло. Ниневиа иатәыз зыԥсы ҭалаз аӡәы Иегова имҵахырхәара мап ацәикыр, Иегова уи диқәыӡбоит, наӡаӡа анхарагьы алшара ииҭаӡом (Ис. 65:20). Аха ицқьоу амҵахырхәараҿы ҳара иҳавагыло зегьы наӡаӡа анхара алшара роуеит! (Дан. 12:2).

15. а) Избан Содоми Гоморреи иқәхыз ауаа рҟынтә аӡәгьы иԥсы ҭалаӡом ҳәа ишьақәырӷәӷәаны аҳәара зҳахәҭам? б) Ишԥеилаҳкаалар акәу Иуда 7 иану ажәақәа? (Шәахәаԥш иара убас арамка «Ииҳәарц ииҭахызи Иуда?».)

¹⁵ Иисус иҳәеит «Аӡбара амш аҽны» Содоми Гоморреи инхоз ауаа еиҳа ишырзымариахо, иҵарақәеи иареи мап рцәызкыз ауаа раасҭа (Матф. 10:14, 15; 11:23, 24; Лука 10:12). Ииҳәарц ииҭахызи Иисус? Иара ихаан инхоз ауаа Содоми Гоморреи инхоз ауаа раасҭа еиҳа еицәаны рхы шымҩаԥыргоз аҵишьырц азы агипербола ихы иаирхәазар? Излаҳбо ала, ус акәымзар ҟалап. Избанзар Иисус аӡбара аныҟало аамҭа аан Ниневиа инхоз ауаа рыԥсы шҭало атәы аниҳәоз, иҟалаҵәҟьо ауп зыӡбахә иҳәоз. Убри аҟынтә, Содоми Гоморреи инхоз ауаа аԥхьаҟа ирзыԥшу атәы даналацәажәозгьы иҟалаҵәҟьо акәзар ҟалап зыӡбахә имаз. «Аӡбара амши» «аӡбара аныҟало аамҭеи» рыӡбахә Иисус ианиҳәоз, периодк ауп зыӡбахә имаз. Ниневиа инхоз ауаа реиԥш Содоми Гоморреи инхоз ауаагьы иҽеимкәа рхы мҩаԥыргон. Аха Ниневиа инхоз ауаа ахьхәразы алшара рыман, егьырҭ уи аҩыза алшара рымаӡамызт. Иара убас, иаҳгәалаҳаршәап Иисус зыԥсы ҭало, насгьы зус ӡбахо ауаагьы рыӡбахә шиҳәаз. Иазусҭцәада урҭ ауаа? Урҭ «ацәгьара ҟазҵоз» роуп (Иоанн 5:29). Убри аҟынтә Содоми Гоморреи инхоз ауаа рҟынтә шьоукы рыԥсы ҭалар алшоит. Ҳара урҭ Иеговеи Иисус Христоси ирызку аҵабырг дҳарҵалартә алшара ҳауеит.

16. Иаҳдыруазеи Иегова зыԥсы ҭеиҵо шиӡбало иазкны? (Иеремиа 17:10).

¹⁶ Шәаԥхьа Иеремиа 17:10. Ари ажәеинраалаҿы Иегова аӡбара шидикыло иазкны ибзианы иаҳдыруа атәы ануп: Иегова еснагь ҳгәы дҭаԥшуеит, насгьы ҳгәаҵаҿы иҵәаху ахәыцрақәа ҭиҵаауеит. Зыԥсы ҭеиҵаша аниӡбало «доусу иқәнагоу [дақәиршәоит]». Иегова ииӡбаз иԥсахӡом, аха ианалшо еснагь арыцҳашьара ааирԥшлоит. Убри аҟынтә аӡәы изы иԥсы ҭалаӡом ҳәа аҳәара иаԥсаӡам, Абиблиаҿы уи иаартны ианымзар.

«АДГЬЫЛ ЗЕГЬ ӠБАҨЫС ИАМОУ» ИҞАИҴО ЕСНАГЬ ИИАШОУП

17. Ирзыԥшузеи иԥсхьоу ауаа?

¹⁷ Аҩсҭааи, Адами, Евеи Иегова ианиҿагыла аахыс миллиардҩыла ауаа ԥсхьеит. Ҳаӷа цәгьа — аԥсра — ԥхьаӡашьа змам ауаа агахьеит (1 Кор. 15:26). Ирзыԥшузеи урҭ зегьы аԥхьаҟа? Зхыԥхьаӡара рацәам Христос ишьҭанеицәа — 144 000-ҩык — ԥсра рықәымкәа жәҩантәи аԥсҭазааразы рыԥсы ҭаҵахоит (Аат. 14:1). Зхыԥхьаӡара рацәоу Иегова изиашаз ахацәеи аҳәсеи адгьыл аҿы рыԥсы ҭалоит. Уи ҟалоит ауаа иашақәа рыԥсы анҭало Христос Зқьышықәсатәи инапхгара аан. Урҭ аҵыхәтәантәи аԥышәара рыхганы уаа иашақәаны иаанхар, наӡаӡа адгьыл аҿы инхалоит (Дан. 12:13; Аур. 12:1). Иара убас Зқьышықәсатәи анапхгара аан рыԥсы ҭалоит «ииашақәамгьы» — ахаан Иегова имаҵ зымуаз, аус бааԥсқәа ҟазҵозҵәҟьагьы. Дара рҽырыԥсахыртә, насгьы Иегова имаҵзуҩцәа ракәны иҟалартә алшара роуеит (Лука 23:42, 43). Аха иҟан идырны, насгьы дара ртәы иарганы Иегова иҿагылоз. Иара иӡбеит урҭ рыԥсы ҭалаӡом ҳәа (Лука 12:4, 5).

18, 19. а) Избан агәра ганы ҳаҟазар зҳалшо Иегова иԥсхьоу рганахь ала ииашоу аӡбара шидикыло? (Исаиа 55:8, 9). б) Еилҳаргозеи анаҩстәи астатиаҿы?

¹⁸ Агәра ганы ҳаҟазар ҳалшома Иегова ауаа рус аниӡбо еснагь ииашоу аӡбара шидикыло? Ааи! Иегова инаӡоу, аҟәыӷара ду змоу, арыцҳашьара злоу, «адгьыл зегь Ӡбаҩыс иамоу» иоуп. Авраам уи бзианы идыруан. Иегова Иԥа аӡбара аус дазыҟаиҵеит, насгьы уи инапы ианиҵеит (Иоанн 5:22). Абгьы Аԥагьы ауаа рыгәқәа рбоит (Матф. 9:4). Убри аҟынтә Иеговагьы Иисусгьы ак анырыӡбо, еснагь ииашаны рхы мҩаԥыргоит.

¹⁹ Шәааи еснагь Иегова игәра ҳгалап, насгьы иӡбарақәа шиашоу аганахь ала ахаан ҳамлакҩаклап! Ҳара еилаҳкаауеит аӡбаҩ ироль анагӡара шҳалымшо. (Шәаԥхьа Исаиа 55:8, 9.) Убри аҟынтә аӡбара зегь иареи Аҳас иҟоу Иԥеи рнапы ианаҳҵоит, Иисус Иаб иеиԥшҵәҟьа аиашареи арыцҳашьареи ааирԥшуеит (Ис. 11:3, 4). Аха иаҳҳәар ҳалшозеи Иеговеи Иԥеи арыцҳара ду аан ауаа рус шырыӡбало иазкны? Иаҳдыруазеи, насгьы иаҳзымдыруазеи уи аганахь ала? Арҭ азҵаарақәа рҭак анаҩстәи астатиаҿы иҳауеит.