Алакҩакра ҳаиааир шҳалшо

1, 2. а) Иарбан лакҩакрақәоу Иегова имаҵзуҩцәа ирызцәырҵлар алшо? б) Еилҳаргозеи ари астатиаҿы?

ҲАРА зегьы, шаҟа ҳхыҵуазаалакгьы, зны-зынла алакҩакрақәа ҳазцәырҵуеитa. Шәхаҿы даажәг Иегова хьаас симоума ҳәа ихәыцуа иқәыԥшу Иегова ишаҳаҭ. Уи иахҟьаны аҽӡаахра иаԥсоума ҳәагьы длакҩакуазар алшоит. Мамзаргьы шәхаҿы даажәг Иегова имаҵ аураҿы еиҳаны иҟаиҵаларц азы данқәыԥшыз акариера мап ацәызкыз зықәрабжахь инеихьоу аиашьа. Уажәшьҭа, иҭаацәа аԥара рзымхо ианалага, уаанӡа идикылаз аӡбара иашазма ҳәа дхәыцуеит. Зықәрахь инеихьоугьы рхатә уадаҩрақәа рымоуп. Шәхаҿы даажәг зымчқәа каԥсаз аиаҳәшьа. Лара уаанӡа џьабаада иҟалҵоз уажәы иахьылзыҟамҵо лгәы канажьуеит. Ишәызцәырҵхьоума абарҭ реиԥш иҟоу азҵаарақәа: «Хьаас симоума Иегова хаҭала сара? Иаҭахыҵәҟьазма имаҵ ауразы ак мап ацәкра? Хәарҭа изаазгома Иегова иахьа уажәраанӡа?»

² Ус еиԥш иҟоу ахәыцрақәа ҳрызхьамԥшӡакәа иаанҳмыжьроуп. Урҭ ирыхҟьаны Иегова иахь ҳхаҵара ҳцәыӡыр алшоит, имаҵ аурагьы ҳаҟәыҵыр ауеит. Ари астатиаҿы еилҳаргоит Абиблиа ҳацхраар шалшо лакҩакрақәак ҳамазар, иаҳҳәап 1) Иегова хьаас ҳашимоу, 2) иҳадаҳкылахьоу аӡбарақәа шиашаз, насгьы 3) иахьа уажәраанӡагьы Иегова ахәарҭа шизааҳго.

АЛАКҨАКРАҚӘА РИААИРА ИҲАЦХРААУА

3. Иҟаҵатәузеи алакҩакрақәа анҳазцәырҵуа?

³ Алакҩакрақәа анҳазцәырҵуа Анцәа Иажәаҿы алабжьарақәа ҳаԥшаалар ауп. Убас Иеговеи ҳареи ҳаиҩызара ҳарӷәӷәоит, доуҳала еиҳагьы ҳаӷәӷәахоит, насгьы ҳхаҵара акы иарԥсыҽыртә алҳаршаӡом (1 Кор. 16:13).

4. Иаанагозеи алабжьара «Зегь гәашәҭала»? (1 Фессалоникаа 5:21).

⁴ Шәаԥхьа 1 Фессалоникаа 5:21. Абиблиа ҳгәазҭанаҵоит: «Зегь гәашәҭала». Ишԥаҳалшо уи аҟаҵара? Акы агәра жәгаанӡа, уи Абиблиа иаҿагылоу-иаҿамгылоу гәашәҭ. Иаҳҳәап, иқәыԥшу аӡәы Анцәа хьаас дышимоу ала длакҩакуеит. Аха уи аҩыза ахәыцра изцәырҵзар, уи иашоуп ҳәа аанагаӡом. Убри аҟынтә уи ауаҩ Абиблиа аартны еиликаар ауп Иегова иара дшизыҟаҵәҟьоу.

5. «Иҳаҳар» шԥаҳалшо ҳазҵаара иазкны Иегова иҳаиҭо аҭак?

⁵ Абиблиа ҳанаԥхьо, Иегова ибжьы ҳаҳауазар иаҩызоуп. Аха зҵаарак аганахь ала игәаанагара еилышәкаар шәҭахызар, аџьабаа жәбар ауп. Зинтерес шәымоу атема иадҳәалоу абиблиатә жәеинраалақәа шәыԥшаала. Уи азы ҳпубликациақәа рыла аҭҵаара мҩаԥыжәга (Ажәам. 2:3—6). Иегова шәиҳәала иҭышәҵаауа азҵаара иазкны игәаанагара аилкаара дшәыцхраарц. Анаҩс шәҭагылазаашьа иақәшәо, шәхы иашәырхәар шәылшо абиблиатә принципқәа шәыԥшаар ауеит. Уи адагьы, ибзиахоит абиблиатә аамҭақәа раан инхоз ҳҭагылазаашьа аҩыза змаз Анцәа имаҵзуҩцәа рыхҭысқәа ҭаҳҵаар.

6. Ишԥаҳацхраауеи аизарақәа алакҩакрақәа риааира?

⁶ Уи адагьы, Иегова аизарақәа рыла дҳацәажәоит. Урҭ бжьамыжьӡакәа ҳарҭаалар, ҳазҵаара аҭак ажәахә аҿы ма ҳашьцәеи ҳаҳәшьцәеи иҟарҵо аҭакқәа рҿы иҳаур алшоит (Ажәам. 27:17). Шәааи уажәшьҭа ҳалацәажәап Анцәа имаҵзуҩцәа зны-зынла ирызцәырҵуа алакҩакрақәа.

ХЬААС СИМОУМА ИЕГОВА ХАҬАЛА САРА?

7. Иарбан зҵаароу зны-зынла ауаа ирызцәырҵуа?

⁷ Зныкыр иузцәырҵхьоума абри аҩыза азҵаара: «Хьаас симоума Иегова?» Акгьы уаԥсамшәа ухы убозар, Зегьзшаз иҩызахара залшом ҳәа угәы иаанагалар ауеит. Урҭ рҩызцәа ацәаныррақәа иҟалап аҳ Давидгьы имазҭгьы. Иара иџьеишьон Иегова ауаа дахьрызхьаԥшуаз, зны абасгьы дҵааит: «Иегова дызусҭада ауаҩы, уара уизхьаԥшыртә еиԥш, ԥсра зқәу иԥа, уара уизхәыцыртә еиԥш?» (Аԥсал. 144:3). Еилукаар шԥаулшо Иегова хаҭала дышуеиҷаҳауа?

8. Игәеиҭозеи Иегова ауаа данрыхәаԥшуа? (1 Самуил 16:6, 7, 10—12).

⁸ Абиблиа иаҳнарҵоит Иегова ауаа зегь хьаас ишимоу, егьырҭ иатәарымбогьы. Иаҳҳәап, ҽнак Иегова ааҩык аԥацәа змаз Иессеи иахь Самуил дишьҭит. Анцәа Самуил иеиҳәеит урҭ руаӡәк Израиль аҳас далихырц. Иессеи иԥацәа зегьы ааиԥхьеит, зегь иреиҵбыз, Давид, идаb. Аха иара иоуп Иегова иалихыз. (Шәаԥхьа 1 Самуил 16:6, 7, 10—12.) Иегова Давид иҿы егьырҭ ирымбоз ибон, — уи аҷкәын Анцәа даара бзиа дибон.

9. Излоубарҭоузеи Иегова ибзианы ушидыруа? (Шәахәаԥш иара убас асахьа.)

⁹ Уазхәыц Иегова хьаас ушимоу шааирԥшуа. Иара уҭагылазаашьа ианаалаҵәҟьо алабжьара уиҭоит (Аԥсал. 32:8). Иаанамырԥшӡои уи ибзианы ушидыруа? (Аԥсал. 139:1). Иегова иуиҭо алабжьара ухы ианаурхәо, насгьы хәарҭа шузаанаго анубо, уи Иегова уԥсҭазаара дшалахәу агәра унаргоит (1 Аш. 28:9; Аус. 17:26, 27). Иегова имаҵ ауразы, насгьы уизыӡырҩларц азы иҟауҵо ибоит. Уҟазшьа ԥшӡақәа рыхә ҳаракны ишьоит, дуҩызахарцгьы иҭахуп (Иер. 17:10). Иааԥхьара удкыланы иҩызахара уақәшаҳаҭхар, уи насыԥ инаҭоит (1 Иоанн 4:19).

ИИАШОУМА ИСЫДЫСКЫЛАЗ АӠБАРАҚӘА?

10. Иарбан лакҩакрақәоу аамҭа анцалак иҳазцәырҵыр алшо?

¹⁰ Аамҭа анцалак ақьырсианцәа шьоукы ирыдыркылаз аӡбарақәа иашазма ҳәа илакҩакуа иалагоит. Иҟалап дара еиҳаны Иегова имаҵ руларц азы аԥара бзианы иахьырзыршәоз аусура ма абизнес аанрыжьзар. Ицеит ашықәсқәа, иҟалап ажәашықәсақәагьы ҵызар, дара ирбоит акариера алызхыз ауаа рхазы акы иамеигӡакәа хьаада-баада инхошәа. Убри аҟынтә абас алакҩакра иалагар ауеит: «Ииашан иҟасҵама Иегова изы ари зегьы мап ахьацәыскыз? Мамзаргьы уи иахҟьаны лшарақәак саҩсыжьу?»

11. Игәы казыжьуази 73-тәи Аԥсалом автор?

¹¹ Шәара урҭ рҩызцәа ахәыцрақәа шәызцәырҵуазар, 73-тәи Аԥсалом ҭышәҵаар бзиоуп. Уи автор уи аҩыза аҭагылазаашьаҿы дыҟан. Иара ибон егьырҭ ауаа Анцәа имаҵ шырымуазгьы, агәабзиареи амали шрымаз, насгьы уадаҩрак рымамкәа ишынхоз (Аԥсал. 73:3—5, 12). Урҭ ихы анырҿирԥшуаз, иԥсҭазаара ҵакыдазшәа, насгьы акы иаԥсамызшәа ибон. Ус еиԥш иҟаз угәы казыжьуаз ахәыцрақәа ирыхҟьаны данымгәаҟуаз «мшык ыҟамызт» (Аԥсал. 73:13, 14). Дышԥариааи урҭ иҽеимыз ацәаныррақәа?

12. Ицхрааи аԥсаломшәаҳәаҩ игәы казыжьуаз ацәаныррақәа риааира? (Аԥсалом 73:16—18).

¹² Шәаԥхьа Аԥсалом 73:16—18. Аԥсаломшәаҳәаҩ Иегова иныҳәарҭа дыҩналеит. Уа, Анцәа имаҵзуҩцәа ахьыҟаз иахьҭынчраз аҭыԥаҿы, иара зегь еиликааит. Иара еиликааит қьафла инхоз ауаа аԥеиԥш ҳәа акгьы шрымамыз. Иара агәра игеит Иегова имаҵ аура иԥсҭазаараҿы раԥхьатәи аҭыԥ аҿы иахьиргылаз ииашаны ишыҟаиҵаз. Уи игәы арҭынчит. Убасала анаҩсгьы гәыкала Иегова имаҵ ауразы амч иоуит (Аԥсал. 73:23—28).

13. Иҟашәҵар шәылшозеи, ишәыдышәкылаз ӡбарақәак шәрыхьхәуазар? (Шәахәаԥш иара убас асахьа.)

¹³ Ишәыцхраар алшои агәҭынчра аиура, шәаргьы ишәыдышәкылахьоу аӡбарақәа шәрыхьхәуазар? Ишәымоу шәазхәыц. Шәазхәыц шаҟа шәбеиоу, Иегова ихаҭа дышәзыразуп! Уи еиҳау амал ыҟаӡам. Аха ирзыԥшузеи Анцәа имаҵ зымуа? Урҭ ргәаҳәарақәеи, ргәыӷрақәеи, реихьӡарақәеи ари адунеи мацара ауп издырҳәало. Дара зышьҭо аусура бзиеи иманшәалоу аԥсҭазаареи роуп, избанзар уаҳа изықәгәыӷуа ҳәа акгьы рымаӡам. Ҳара ҳакәзар, Иегова иҟынтә ԥхьаӡашьа змам ҳзыргәырӷьо аҳамҭақәа ҳзыԥшуп (Аԥсал. 145:16). Уи адагьы, иаҳдыруама даҽакала ҳхы мҩаԥаҳгазгьы ҳаԥсҭазаара зеиԥшрахоз? Иаҳдыруа акоуп: иҳадаҳкыло аӡбарақәа Анцәеи ауааи рахь абзиабара шьаҭас иамазар, уи хымԥада ақәҿиареи ииашаҵәҟьоу анасыԥи ҳзаанагоит.

ХӘАРҬА ИЗААЗГОМА ИЕГОВА ИАХЬА УАЖӘРААНӠА?

14. Иарбан уадаҩрақәоу ақьырсианцәа шьоукы ирымоу, насгьы иарбан зҵаароу ирызцәырҵлар алшо?

¹⁴ Иегова имаҵзуҩцәа шьоукы ақәра ахьрымоу, ргәабзиара ахьуашәшәыроу, ма иахьинвалидцәоу иахҟьаны уаанӡа иҟарҵоз рзыҟаҵаӡом. Уи иахҟьаны Анцәа изы акгьы иаԥсамшәа рбозар ауеит, насгьы абас рхы иазҵаауеит: «Хәарҭа изаазгалар сылшома Иегова уажәгьы?»

15. Зыгәра ганы дыҟази 71-тәи Аԥсалом автор?

¹⁵ 71-тәи Аԥсалом автор урҭ рҩызцәа агәҭынчымрақәа иман. Иара абас Анцәа диҳәон: «Саанумыжьын сымчқәа анкаԥсалакгьы» (Аԥсал. 71:9, 18). Аԥсаломшәаҳәаҩ имчқәа илӡаазшәа шибозгьы, агәра ганы дыҟан Анцәа дизиашанаҵы, дышицхраало. Иахьагьы Иегова иҽимԥсахӡеит: иара изы ихадоу шаҟа амч ҳамоу акәӡам, урҭ ҳхы ишаҳархәо ауп (Аԥсал. 37:23—25).

16. Иҟарҵар рылшозеи зықәрахь инеихьоу Иеговеи ҳашьцәеи ҳаҳәшьцәеи рзы? (Аԥсалом 92:12—15).

¹⁶ Акыр иаҳзаԥсоу зықәрахь инеихьоу аишьцәеи аиҳәшьцәеи! Иегова дышшәыхәаԥшуа еиԥш шәхы ахәаԥшра шәҽазышәшәала. Ишәхашәмыршҭлан, шәара акгьы шәылымшошәа жәбозаргьы, уи Иегова доуҳала аизҳара шәыцхраара иԥырхагахаӡом. (Шәаԥхьа Аԥсалом 92:12—15.) Уажәы ишәылымшо азхәыцра аҭыԥан, ишәылшо шәхы азышәышьҭла. Анцәа гәыкала имаҵ аура шәахьаҿу аишьцәеи аиҳәшьцәеи даара ргәы шьҭнахуеит. Уи адагьы, шәара ишәылшоит хаҭала дара рахь аинтерес аарԥшуа ргәы шьҭышәхлар. Шәыԥсҭазаараҿы Иегова дышшәыцхраауаз, насгьы адунеи ҿыц аҿы еиҳараӡак шәыззыԥшу рзеиҭашәҳәала. Шәара шәхаҿгьы ишәзаагаӡом шаҟа ргәы ҟанаҵо урҭ рзы Анцәа шәиҳәалар! (1 Пиотр 3:12). Ҳҭагылазаашьа зеиԥшразаалакгьы, доусы иҳалшоит Иеговеи ҳашьцәеи ҳаҳәшьцәеи рзы ак аҟаҵара.

17. Избан егьырҭ ҳхы рыҿҳарԥшлар захәҭам?

¹⁷ Шәара Иегова ишәҭо маҷӡоуп ҳәа шәгәы иаанагозар, шәгәы кашәмыжьлан. Иара иҟашәҵо зегьы ахә ҳаракны ишьоит. Иҟалап шәара егьырҭ шәхы рыҿшәырԥшуазар. Ус ҟашәымҵалан, избанзар Иегова аӡәгьы шәиҿирԥшӡом (Гал. 6:4). Шәазхәыц: Мариа Иисус зыфҩы хааз, зыхә цәгьаз ахәша ҳамҭас илҭеит (Иоанн 12:3—5). Иӷарыз аԥҳәысеиба лакәзар, ҩ-лепта заҵәык роуп аныҳәарҭахь инаганы иҭалыԥсаз (Лука 21:1—4). Аха Иисус урҭ ҩыџьа аҳәса еиҿимырԥшӡеит. Иара изы ихадаз рҳамҭа зыԥсаз акәӡамызт, иаадырԥшыз ахаҵара акәын. Иеговагьы имаҵзуҩцәа убасҵәҟьа ауп дшырзыҟоу. Иара имаҷишьаӡом абзиабареи ахаҵареи аарԥшны иҟашәҵо зегьы. Уи ахә ҳаракны ишьоит!

18. Иҳацхраауеи алакҩакрақәа рҿагылара? (Шәахәаԥш иара убас арамка «Иегова иажәақәа алакҩакрақәа рҿагылара иуцхраауеит».)

¹⁸ Ҳара зегьы аамҭа-аамҭала алакҩакрақәа ҳазцәырҵуеит. Ишаҳбаз еиԥш, Абиблиа ацхыраарала урҭ ҳариааилар ҳалшоит. Анцәа Иажәаҿы шәызҵаарақәа рҭакқәа шәыԥшаалар, алакҩакра шәаҟәыҵуеит, шәыгәгьы ӷәӷәахоит. Иегова хаҭала шәара хьаас шәышимоу агәра жәгалоит. Шәхы мап ацәкны иара изы иҟашәҵо зегьы ахә ҳаракны ишишьо, насгьы хымԥада дшышәзылԥхо агәра ганы шәыҟазаауеит. Ишәхашәмыршҭлан Иегова изиашоу имаҵзуҩцәа зегьы гәыкала бзиа ишибо, дагьшреиҷаҳауа.