Анцәа ипринципқәеи изакәанқәеи шәрызхәыцны шәыламыс шәааӡала

1. Ҳазлареиԥшымзеи ҳара аԥстәқәа?

ИЕГОВА ауаа иҷыдоу ҳамҭак риҭеит. Уи аламыс ауп. Аламыс аԥстәқәа ҳрылызкаауа аҳамҭақәа ируакуп. Иабантәиҳдыруеи Адами Евеи аламыс шрымаз? Анцәа ианизымӡырҩ ашьҭахь дара рҽырҵәахит. Урҭ рыламыс иаргәаҟуан.

2. Излеиԥшузеи ҳаламыс акомпас? (Шәахәаԥш астатиа алагамҭаҿы иаагоу асахьа.)

² Аламыс ари ацәгьеи абзиеи закәу ҳаҵазҳәо, насгьы аԥсҭазааратә мҩала ацара иҳацхраауа ҩныҵҟатәи цәанырроуп. Зыламыс иашаны измааӡо ауаҩы ибжьысны иҟоу акомпас змоу аӷба даҩызоуп. Аԥшеи аокеан аӷьыреи аӷба иахьахәҭам иагар алшоит. Аха ибзианы аус зуа акомпас ақаԥдан ицхраауеит аӷба амҩа иаша ақәҵара. Убас еиԥш ҳаргьы ҳаламыс иашаны иҳааӡозар, уи ииашоу амҩа ҳақәнаҵалоит.

3. Иҟалар алшози ҳаламыс иашаны иаҳмааӡозар?

³ Ҳара ҳаламыс иашаны иаҳмааӡозар, уи ииашам аусқәа рҟынтә ҳамыхьчар алшоит (1 Тимофеи иахь 4:1, 2). Иара убас «ацәгьара бзиараны» иаҳнарбар ҟалоит (Исаиа 5:20). Иисус иҵаҩцәа иреиҳәеит: «Иаашт аамҭа, шәара шәызшьуа дарбан уаҩԥсызаалакь убри ала Анцәа имаҵ иуашәа игәы ианаанагауа» (Иоанн 16:2). Убас ргәы иаанагон Стефан дызшьыз ауаагьы (Аусқәа 6:8, 12; 7:54—60). Аҭоурых аҩныҵҟа адинхаҵара ныҟәызгоз аӡәырҩы ауаа ацәгьоурақәа ҟарҵон, иаҳҳәап, ауаа ршьуан, насгьы уи зыҟарҵо Анцәа изы ауп ҳәа рҳәон. Аха урҭ иҟарҵоз Анцәа изакәан иаҿагылон (Ақәҵымҭа 20:13). Ишаҳбаз еиԥш урҭ рыламыс амҩа иаша иқәнаҵаӡомызт!

4. Ишԥаҳалшо ҳаламыс ииашаны аус шауа аилкаара?

⁴ Нас ишԥаҳалшо ҳаламыс ииашаны аус шауа аилкаара? Абиблиа иану азакәанқәеи апринципқәеи «хәарҭоуп аҵарашьҭкаараҿ, аҿаԥҽраҿы, агхақәа рырҽеираҿ, аиаша-ҵабырг ашҟа амҩа ақәҵараҿ» (2 Тимофеи иахь 3:16). Ҳара иааиԥмырҟьаӡакәа Абиблиа ҭаҳҵаалароуп, инарҵауланы ҳазхәыцлароуп, насгьы ҳаԥсҭазаараҿы ҳхы иаҳархәалар ауп. Убас ала ҳара Иегова ихәыцшьа еиҳа еиӷьны еилаҳкаауеит. Усҟан ҳаламыс амҩа иашала ҳшаго агәра ганы ҳаҟазар ҳалшоит. Шәааи еилҳаргап ҳаламыс ҳааӡарц азы Иегова изакәанқәеи ипринципқәеи ҳхы иаҳархәалар шҳалшо.

АНЦӘА ИЗАКӘАНҚӘА ШӘЫЦХРААЛААИТ

5, 6. Иарбан хәарҭоу Анцәа изакәанқәа иаҳзаарго?

⁵ Анцәа изакәанқәа ахәарҭа ҳзааргаларц азы урҭ баша рыԥхьара, мамзаргьы рдырра азхом. Ҳара урҭ бзиа иаҳбалароуп, насгьы рыхә ҳшьалароуп. Абиблиа иҳанаҳәоит: «Ишәцәымӷыз ацәгьара, бзиа ижәбала абзиара» (Амос 5:15). Аха ишԥаҳалшо уи аҟаҵара? Ҳара Иегова ихәаԥшышьа иҿаҳҵаалар ауп. Шәхаҿы иаажәг лассы-лассы шәыцәа ҟьалоушәа, убри аҟынтә аҳақьым ихырҳагоу афатә шәфаларц, еиҳаны абаҩрҵәыра ҟашәҵаларц, насгьы еиҭа даҽа ԥсахрақәак ҟашәҵарц шшәабжьеиго. Шәара аҳақьым ишәеиҳәаз зегь нашәыгӡоит, насгьы уи шшәыхәо жәбоит. Шәышԥарзыҟазаауеи нас аҳақьым иабжьгарақәа?

⁶ Убас еиԥш Ҳазшаз агәнаҳа алҵшәа бааԥсқәа ҳарцәихьчарц, насгьы ҳаԥсҭазаара еиӷьитәырц азы азакәанқәа ҳаиҭеит. Иаҳҳәап, Абиблиа ҳгәазҭанаҵоит абас еиԥш иҟоу аус цәгьақәа рҽырцәыхьчара: амцҳәара, мцҳәарала аӡәы ак имхра, аӷьычра, агәаԥхашәадара, ақәымчра. Уи адагьы, Абиблиа адемонцәа ирыдҳәалоу зегьы ҳҽацәаҳахьчаларц ҳанаҳәоит. (Шәаԥхьа Ажәамаанақәа 6:16—19; Аатра 21:8.) Иегова изыӡырҩра ахәарҭа шаҳзаанаго анаҳбо, изакәанқәеи иареи рахь ҳабзиабара еизҳауеит.

7. Ишԥаҳацхраауеи Абиблиа иану аҿырԥштәқәа?

⁷ Ацәгьеи абзиеи реилкааразы иаҭахӡам Анцәа изакәанқәа реилагара иаанаго ахьаа аԥышәара. Ҳара Абиблиа зыӡбахә аҳәо ажәытәан инхоз ауаа рыгхақәа ахәарҭа рылаҳхлар ҳалшоит. Ажәамаанақәа 1:5 иануп: «Ауаҩ ҟәыӷа дӡырҩуеит, насгьы амҩақәҵарақәа еиӷьны еиликаауеит». Арҭ амҩақәҵарақәа Анцәа иоуп иҳазҭо, убри аҟынтә урҭ зегьы иреиӷьуп! Шәазхәыц Давид Анцәа изакәан дахыԥаны Вирсавиа лҿы агәнаҳа ахьыҟаиҵаз азы шаҟа гәаҟра ихигаз (2 Самуил 12:7—14). Ари ацыԥҵәаха шәанаԥхьо шәхы шәазҵаа: «Ишԥаилшоз Давид арҭ ауадаҩрақәа рҽырцәыхьчара? Схы шԥамҩаԥызго сара абас еиԥш иҟоу аҭагылазаашьа сақәшәар? Акы сыхнахуазар, Давид сиеиԥшхома, мамзаргьы Иосиф сиеиԥшхоу?» (Аҟазаара 39:11—15). Агәнаҳа иаанаго алҵшәа бааԥсқәа инарҵауланы ҳрызхәыцуазар, ацәгьара еиҳагьы иаҳцәымыӷхоит.

8, 9. а) Хәарҭас иаҳзаанагозеи ҳаламыс? б) Ишԥаныруеи ҳаламыс Иегова ипринципқәа?

⁸ Ҳара Анцәа ицәымӷу аусқәа ҳҽырцәаҳахьчоит. Аха иҟаҳҵар акәзеи ҳзықәшәаз аҭагылазаашьа иазкны Абиблиаҿы иалкаау азакәан аагамзар? Излеилаҳкаарызеи Анцәа ҳара ҳҟынтә дыззыԥшу? Абиблиа ҳхы иархәаны ҳаламыс ҳааӡозҭгьы, иҟәыӷоу аӡбара адкылара ҳалшоит.

⁹ Иегова бзиа ҳаибоит, убри аҟынтә ҳаламыс ааӡара иҳацхраауа апринципқәа ҳаиҭеит. Иара иҳәоит: «Сара, Иегова, уара Унцәа соуп, ихәарҭоу узырҵо, узныланы уцаша амҩала узго» (Исаиа 48:17, 18). Абиблиа иану апринципқәа инарҵауланы ҳрызхәыцуазар, насгьы урҭ ҳгәаҵанӡа инеиртә алҳаршозар, усҟан ҳаламыс ҳааӡалоит. Уи абзоурала иҟәыӷоу аӡбарақәа ҳадаҳкылалоит.

АНЦӘА ИПРИНЦИПҚӘА ШӘЫЦХРААЛААИТ

10. Изакәызеи апринципқәа, насгьы ихы ишԥаирхәоз урҭ Иисус арҵаратә ус аҿы?

¹⁰ Апринципқәа ари ахаангьы зҽызымԥсахуа аҵабыргқәа роуп, урҭ амҩа иаша ҳақәырҵоит. Иегова ипринципқәа ихәыцшьа аилкаара иҳацхраауеит, насгьы еиуеиԥшым азакәанқәа зҳаиҭаз ҳдырбоит. Иисус апринципқәа ихы иархәаны иҵаҩцәа идирҵон ауаҩы игәазыҟашьеи иусқәеи алҵшәақәа шрымоу. Иаҳҳәап, иара иҳәон аԥсахеибакра ақәымчрахь унанагар шалшо, игәаԥхашәадоу ахәыцрақәа — ахатә ҩыза иԥсахрахь (Матфеи 5:21, 22, 27, 28). Ҳара Иегова ипринципқәа ҳрықәныҟәозар, ҳаламыс иашаны иҳааӡалоит, насгьы иҳадаҳкыло аӡбарақәа рыла Анцәа дҳараҳклоит (1 Коринфаа рахь 10:31).

11. Излеиԥшымзеи ақьырсианцәа рыламыс?

¹¹ Ақьырсианцәа Абиблиа рхы иархәаны рыламыс рааӡозаргьы, иалкаау зҵаарақәак рҿы еиуеиԥшым аӡбарақәа рыдыркылалар рылшоит. Иаҳҳәап, арыжәтә аганахь ала. Абиблиаҿы ианӡам арыжәтә ажәра ҟалом ҳәа, аха уи арыжәтә ҳҽаҳмыршьларц ҳгәаҳҽаннаҵоит (Ажәамаанақәа 20:1; 1 Тимофеи иахь 3:8). Нас иаҳҳәар ҳалшома ақьырсиан арыжәтә иҽаимыршьуазар, уи азҵаара аганахь ала уаҳа акгьы дазымхәыцлар илшоит ҳәа? Мап. Иара игәы рҭынчны арыжәтә адкылара илшозаргьы, егьырҭ рыламыс дазхәыцлар ауп.

12. Ишԥаҳацхраауеи Римаа рахь 14:21 иану егьырҭ рыламыс пату ақәҵара?

¹² Апостол Павел иҳәеит егьырҭ рыламыс пату ақәҵара шҳахәҭоу. Иара иҩуан: «Еиӷьуп акәац афарагьы, аҩыжәрагьы урҟәаҵыр — уашьа дҭазырхаша, дзырҩашьаша ак ҟаумҵаразы» (Римаа рахь 14:21). Убри аҟынтә ҳгәы рҭынчны арыжәтә ажәра азин шҳамоугьы, уи мап ацәаҳкыр ауеит, даҽаӡәы арыжәтә аганахь ала ауадаҩрақәа шимоу ҳдыруазар. Иҟалап аҵабырг еиликаанӡа аиашьа арыжәтә иҽаиршьуазҭгьы, аха уажәшьҭа уаҳа ахаан ҿамҩакгьы шимжәуа иӡбазар. Ҳара иҳахҟьаны уи аиашьа уаанӡа имаз ашьцылырақәа рахь дгежьыр ҳҭахӡам (1 Коринфаа рахь 6:9, 10). Уи аиашьа сасра даҳҭазар, идаҳцалалома иара арыжәтә ажәра, уи мап шацәикуагьы? Ҳәарада, мап!

13. Ишԥааирԥшуаз Тимофеи ауаа рыламыс пату шақәиҵоз, ажәабжь бзиа адкылара дрыцхраарц азы?

¹³ Тимофеи данқәыԥшыз аԥхьатәхсара дақәшаҳаҭхеит, уи ахьаа ачҳара шыцәгьазгьы. Иара идыруан ажәабжь бзиа ззеиҭеиҳәалар иҭахыз ауриацәа рзы уи акыр шаҵанакуаз. Тимофеи Павел иеиԥш егьырҭ зыхҟьашо хаҳәны дҟалар иҭахымызт (Аусқәа 16:3; 1 Коринфаа рахь 9:19—23). Шәазхиоума шәаргьы егьырҭ рыцхрааразы акы мап ацәкра?

АШӘРА ҲАХЫЦЦАКЫП

14, 15. а) Ишԥаҳалшо доуҳала аизҳара? б) Дышԥарзыҟоу доуҳала ишәу ақьырсиан егьырҭ ауаа?

¹⁴ Ҳара зегьы «Христос иеилкаара иаҭаху раԥхьатәи лагамҭақәак рҿы ҳаанымгылакәа, еиҳа ишәхьоу, ишьақәгылахьоу рыхшыҩ ззырышьҭышахь» ҳаихалар ауп (Ауриацәа рахь 6:1). Ҳара аҵабырг акыршықәса иахьаҳдыруа мацаразы доуҳала ҳашәӡом. Доуҳала ашәразы аџьабаа балатәуп. Иҳамоу адырреи аилкаареи еизҳарҳалароуп. Убри аҟынтә есыҽны Абиблиа ҳаԥхьалароуп (Аԥсалом 1:1—3). Ус ҟаҳҵалар Иегова изакәанқәеи ипринципқәеи еиҳа еиӷьны еилаҳкаалоит.

¹⁵ Иарбан закәану ақьырсианцәа рзы еиҳарак ихадоу? Абзиабара азакәан. Иисус иҵаҩцәа иреиҳәеит: «Шәара сҵаҩцәа шшәакәу злардыруа, шәара-шәара ишәыбжьоу абзиабарала ауп» (Иоанн 13:35). Абзиабара «аԥсҳаԥҟара», насгьы «азакәанԥҟара анагӡара акәны» иԥхьаӡоуп (Иаков 2:8; Римаа рахь 13:10). Ҳара иџьаҳшьаӡом абзиабара абри аҟара иахьхадоу, избанзар Абиблиаҿы иануп «Анцәа — дыбзиабароуп» ҳәа (1 Иоанн 4:8). Анцәа ибзиабара баша цәанырраӡам, иара уи аус аҿы иааирԥшуеит. Иоанн иҩуан: «Анцәа ҳара ҳахь имаз абзиабара ааирԥшит Иара Иԥа дызлаҳзааишьҭыз ала, убри ибзоураны, убри ила ԥсҭазаара ҳауразы» (1 Иоанн 4:9). Иеговеи, Иисуси, ҳашьцәеи, насгьы егьырҭ ауааи рахь абзиабара анааҳарԥшуа, доуҳала ҳашшәу шьақәҳарӷәӷәоит (Матфеи 22:37—39).

16. Избан доуҳала ҳашәхацыԥхьаӡа абиблиатә принципқәа ҳара ҳзы еиҳа изхадахо?

¹⁶ Доуҳала ҳашәхацыԥхьаӡа апринципқәа еиҳа-еиҳа рыхә ҳшьалоит. Азакәанқәа ҳхы иаҳархәар ахьҳалшо иалкаау ҭагылазаашьақәак рҿы мацара ауп, аха апринципқәа ҳаԥсҭазааратә ганқәа зегьы ирыҵанакуеит. Иаҳҳәап, ахәыҷы изеилкааӡом ауаа цәгьақәа рҩызахара ашәарҭара шаҵоу. Убри аҟынтә иҭаацәа дрыхьчарц азы аԥҟарақәа шьақәдыргылалар ауп (1 Коринфаа рахь 15:33). Аха ахәыҷы изҳацыԥхьаӡа абиблиатә принципқәа рызхәыцра далагоит, уи ибзиоу аҩызцәа ралхра ицхраауеит. (Шәаԥхьа 1 Коринфаа рахь 13:11; 14:20.) Абиблиатә принципқәа ҳрызхәыцуазар ҳаламыс амҩа иаша ҳақәнаҵалоит. Насгьы еиуеиԥшым аҭагылаазашьақәа рҿы Анцәа ҳара ҳҟынтә дыззыԥшу ҳдыруазаалоит.

17. Избан Иегова игәаԥхо аӡбарақәа рыдкыларазы иаҭаху зегь ҳамоуп ҳәа ҳҳәар зҳалшо?

¹⁷ Иегова игәаԥхо аӡбарақәа рыдкылара ҳалшарц азы ҳара иаҭаху зегь ҳамоуп. Абиблиаҿы ҳара иҳаԥшаауеит «аус бзиақәа, аус хирқәа» рынагӡара ҳазыҟазҵо азакәанқәеи апринципқәеи (2 Тимофеи иахь 3:16, 17). Абиблиатә принципқәа Иегова ихәыцшьа аилкаара иҳацхраауеит. Аха урҭ ҳаԥшаарц азы аџьабаа абара аҭахуп (Ефесаа рахь 5:17). Ҳара ҳхы иаҳархәалар ҳалшоит «Индекс публикаций Сторожевой Башни», «Путеводитель по публикациям», аелектронтә библиотека Watchtower Library, «Ахьчаратә бааш Онлаин-абиблиотека», насгьы апрограмма JW Library. Арҭ амыругақәа ҳхы иаҳархәалар, ҳхатә ҭҵаареи аҭаацәаратә мҵахырхәареи ахәарҭа ҳзааргалоит.

АБИБЛИА АЛА ИААӠО АЛАМЫС АЗЫЛԤХАРАҚӘА ААНАГОИТ

18. Иарбан лҵшәақәоу иҳауа Иегова изакәанқәеи ипринципқәеи ҳхы иаҳархәалар?

¹⁸ Анцәа изакәанқәеи ипринципқәеи ҳхы ианаҳархәо ҳаԥсҭазаара акырӡа еиӷьхоит! Аԥсалом 118:97—100 (119:97—100, АдҾ) аҿы иануп: «Бзиа ишԥазбо Уара узакәан! Иаахәлаанӡа иара ауп сзызхәыцуагьы. Уара уҿаҭахьа ала саӷацәа раасҭа сҟәыӷан сушеит; избанзар уи сара есымша исыцуп. Саргьы сырҵаҩцәа зегь раҵкьыс еилыскаауа сҟалеит; избанзар сара угәаартрақәа срызхәыцуеит. Сара абыргцәа реиҳа здыруеит, избанзар Уара удҵақәа сыхьчоит». Анцәа изакәанқәеи ипринципқәеи инарҵауланы ҳрызхәыцларц азы аамҭа алаҳхуазар, ҳусқәа аҟәыӷареи аилкаареи рныԥшлоит. Иара убас ҳаламыс ҳааӡаларц азы Анцәа изакәанқәеи ипринципқәеи ҳхы иаҳархәозар, Христос иеиԥш доуҳала ҳашәны ҳҟалоит (Ефесаа рахь 4:13).