АҾАР РЫЗҴААРАҚӘА
Ишԥасылшо ауаа рацәажәашьа аҵара?
Ари астатиаҿы
Лабҿаба аицәажәара заҭаху
Шьоукы ирҳәоит лабҿаба ауаа рацәажәара шырцәыцәгьоу, насгьы уи астресс шрызцәырнаго — еиҳа имариоуп СМС-аацҳарақәа рыҩра.
«СМС-аацҳарақәа рыла ауаҩы уаниацәажәо, иуҩыз ушьҭаанӡа ак ацуҵар ма иагурхар улшоит, мамзаргьы зынӡа ианухыр, лабҿаба уаниацәажәо уи аҩыза узыҟаҵаӡом. Убри аҟынтә лабҿаба аиҿцәажәара цәгьоуп» (Анна).
«СМС-аацҳарақәа рыла ауаҩы уаниацәажәо, уи заанаҵ иҭаҩу ашоу иеиԥшуп. Лабҿаба уаниацәажәо, уи ишиашо ицо аефир иеиԥшуп. Убри аҟынтә аӡәы саниацәажәо, иакәым ак сымҳәандаз ҳәа ауп сзызхәыцуа» (Џьин).
Знымзар-зны ауаа лабҿаба ишрацәажәалатәу уеизгьы иуҵароуп. Иаҳҳәап, уи ада ԥсыхәа умаӡам аӡәы уиҩызахарц уҭахызар, аусура уԥшаарц, насгьы иуцәымӡырц уҭахызар, ма аӡәи уареи еиҳа еиӷьны шәеибадырырц азы шәеиқәшәаларц уҭахызар (ҳәарада, уи уазхиазар).
Ауаа лабҿаба рацәажәара ацәшәара аҭахӡам. Уара даараӡа иԥхашьо уаҩызаргьы, ауаа рацәажәашьа уҵар улшоит.
«Ҳара зегьы зны-зынла иаҳҭахым ак ҳамхаҳәоит, нас иаҳҳәо-иаҳуа ҳақәымшәо ҳақәхоит, нас ҳаԥхашьоит. Уи зынӡаск акгьы амаӡам. Ак згым аӡәгьы дыҟаӡам, зегь алаф ахь ииагалатәуп» (Нил).
Аицәажәара ишалагатәу
Азҵаарақәа рыҭала. Уазхәыц ауаҩы зынтерес имоу, нас убри алацәажәара уалага. Иаҳҳәап, иҟалоит уҵаар:
«Ҵыԥх аԥхынра џьаракыр уҟазма?»
«Ааигәа приложениак ҭазгалеит, уамак ауп иара. Иубахьоума?»
«Иуаҳама...»
Иара убас уазхәыцыр улшоит узацәажәо ауаҩи уареи шәеидызкыло. Школк шәеицҭазар, ма шәусура еиԥшызар? Еицышәзеиԥшу узыԥшаар, усҟан акы иазҵаарагьы узымариахоит.
«Уазхәыц ауаҩы изкны еилукаарц иуҭаху, насгьы иарбан зҵаарақәоу зҭак уаҳар уҭаху» (Марица).
Агәҽанҵара. Ауаҩы азҵаарақәа рацәаны иқәумԥсан, иҿахәы иҿухуашәа. Иара убас дзырԥхашьар алшо азҵаарақәа иумҭалан, иаҳҳәап: «Узыцәшәозеи уара зегь реиҳа?» ма «Есымша аиқәаҵәа зушәуи?» Арҭ азҵаарақәа ауаҩы ихы ахьигара изымдыруа дҟарҵар рылшоит. Аҩбатәи азҵааразы иаҳҳәозар, уи зынӡа акритика изууашәа инарбар алшоит.
Даҽа лабжьарак. Ауаҩы иҿахәы иҿухуашәа иалымҵырц азы, аказы уиазҵаанӡа, (ма уи ашьҭахь) уаргьы угәаанагара изеиҭаҳәа. Шәеицәажәара аинтервиу акәымкәа, адиалог иеиԥшыз.
Аӡәы уаниацәажәо, иҿахәы иҿухуашәа ибома?
Абиблиатә принцип: «Ауаҩы игәҭахәыцрақәа иҵаулоу аҵеџь иҭоу аӡы иеиԥшуп, аха аилкаара змоу ауаҩы урҭ ҭигоит» (Ажәамаанақәа 20:5).
Узацәажәо уизыӡырҩла. Аицәажәара анагӡара улшоу-иулымшоу зыбзоуроу ацәажәашьа шаҟа ибзианы иудыруа акәӡам, уи зыбзоуроу шаҟа ибзианы аӡырҩышьа удыруа ауп.
«Сара ахықәкы ықәсыргылеит сзацәажәо ауаҩы изкны иҿыцу акы еилыскааларц. Сара сҽазысшәоит ауаҩы исеиҳәо агәынкылара, даҽазны исҭар сылшо азҵаара сазхәыцырц азы» (Тамара).
Агәҽанҵара. Анаҩс иуҳәо умоур ҳәа умшәалан. Ауаҩы улымҳа кыдҵаны уизыӡырҩуазар, иоуҳәашагьы уԥшаауеит.
Абиблиатә принцип: «Ауаҩы еснагь аӡырҩра дазхиазароуп, ак аҳәара дахымыццаклароуп» (Иаков 1:19).
Узацәажәо иахь азҿлымҳара аарԥшла. Ацәажәара узымариахоит, узацәажәо ауаҩы хьаас думазар.
«Узацәажәо ауаҩы ииҳәо аинтерес шумоу ибозар, усҟан иуҳәо узымдыруа уаанхаргьы, шәеицәажәара агәахәара ду унаҭалоит» (Мари).
Агәҽанҵара. Зҵаарақәак ауаҩы игәамԥхар ҟалоит. Иаҳҳәап, абас бҳәар: «Быҵкы шаҟа иԥшӡои! Шаҟа ҳәа иаабхәеи?» — ари аҩыза азҵаара ауаҩы дарԥхашьар алшоит.
Абиблиатә принцип: «Шәхы мацара акәымкәа, егьырҭгьы шәрызхәыцла» (Филиппаа 2:4).
Иҳәатәузеи аицәажәара ахыркәшамҭаз? «Ибзиоуп аицәажәара угәы ҟазҵо акала ихуркәшар, — иҳәоит Џьордан зыхьӡу ҷкәынак. — Иаҳҳәап: „Ҳаицәажәара сгәы иахәеит“, усҟан еиҳа имариахоит даҽазны уи ауаҩы иацәажәара».