Ажәабжьҳәаҩцәа рызҵаарақәа

◼ Иарбан дыррақәоу ироулар акәу ахәыҷқәа, доуҳала ишәхьоу, ишьақәгылахьоу ракәны иҟаларц?

Иқьырсиану аҭаацәа иҟарҵо рацәоуп рыхшара рааӡарц азы, урҭ ирабжьоит Иегова «игәаҳәара деилыркаауа» (Ефес. 6:4). Аҭаацәа игәарҭеит ахәарҭа шамоу, иаҳҳәап, есышьыжь есыҽнытәи абиблиатә жәеинраала рхәыҷқәа ианрыцеилдырго. Аҭаацәаратә мҵахырхәараан, мамзаргьы даҽа аамҭак азы дара ирылшоит ҭаацәашәала афильм иахәаԥшыр, насгьы иахцәажәар, арубрика «Аҿар рызҵаарақәа» аҟынтәи астатиақәа еилдыргар, Абиблиа аҟынтәи ацыԥҵәахақәа, мамзаргьы еиуеиԥшым аҭагылазаашьақәа ықәдыргылар. Аха ахәыҷқәа доуҳала ишәхьоу ракәны иҟаларц азы, абиблиатә ҵабыргқәа инарҵауланы идырҵатәуп (Аур. 6:1).

Шәазхәыц ажәабжьҳәараҿы иҳақәшәо ауаа идҳарҵо. Раԥхьа ма аҩынтәраан ҳаннеиуа, ҳара ашәҟәы «Иаҳнарҵаҵәҟьозеи Абиблиа?» ала Абиблиа аҵара алагара ҳҽазаҳшәоит. Анаҩс ҳара ҳаиасуеит ашәҟәы «Анцәа ибзиабараҿ шәыҟаз» захьӡу ахь. Избан? Ашәҟәы «Иаҳнарҵозеи Абиблиа?» аҭҵаара иалагаз ауаҩы ихадоу абиблиатә ҵарақәа иеилнаркаауеит. Ашәҟәы «Анцәа ибзиабара» абиблиатә принципқәа иԥсҭазаараҿы рықәныҟәашьа инарҵоит. Арҭ аҩ-публикациак рыҭҵаара ҿыц иааиуа рдац-рԥашә Христос ила идырӷәӷәарц, насгьы рхаҵара амч аманы иҟазарц ирыцхраауеит (Кәал. 2:6, 7). Иаҳҳәар ҳалшозеи ҳхәыҷқәа ирызкны? Даргьы ирдырырц рыхәҭоуп аҿыхреи, Аҳреи, иԥсхьоу рҭагылазаашьеи, Анцәа ацәгьарақәа зиаҩижьуеи ирызку аиаша, насгьы аҵыхәтәантәи амшқәа раан ҳшынхо узырбо адыргақәа ртәы. Дара агәра ганы иҟазар ауп аиаша Иегова ишаҳаҭцәа рҿы ишыҟоу. Иара убри адагьы, аҿар абиблиатә принципқәа еилыркаауазар ауп, насгьы «ацәгьеи-абзиеи реиҩдыраашьа» рҵалароуп (Аур. 5:14). Ҳәарада, аҭаацәа рхәыҷқәа рықәреи рылшареи ирызхәыцлар ауп. Аха уеизгьы ирацәоуп иҵаулоу абиблиатә ҵарақәа здызкылар зылшо ахәыҷқәа (Лука 2:42, 46, 47).