Уџьа алҵшәа бзиақәа агәахәара узааргалааит

1—3. а) Ишԥазнеиуеи еиҳараҩык ауаа русура? б) Ҳгәашԥазҭанаҵо Абиблиа ҳусура ишазнеилатәу, насгьы иарбан зҵаарақәоу иазгәаҳҭо ари ахаҿы?

ИАХЬАТӘИ ҳаамҭазы ирацәоуп ауаа зусура агәырӷьара ззаанамго. Дара уиаҟара иргәамԥхо русураҿы акраамҭа аџьабаа рбар акәхоит, аха есыҽны ишырҭахым уахь ицоит. Иҟарҵар ахәҭоузеи уи аҩыза агәазыҟашьа змоу ауаа, аусура агәырӷьара рзаанагаларц, агәахәара атәы мҳәакәа?

² Ҳара Абиблиа ҳгәазҭанаҵоит аџьаус ииашаны ҳазнеиларц. Уа иаҳәоит аџьауси уи алҵшәеи — зылԥхараҵәҟьоуп ҳәа. Соломон иҩуан: «Ауаҩы крифалароуп, крижәлароуп, иџьаус алҵшәа бзиақәа агәахәара дуӡӡа изааргалароуп. Уи Анцәа иҳамҭоуп» (Екклезиаст 3:13). Иегова ҳара бзиа ҳаибоит, насгьы бзиарас иҟоу зегь ҳзеиӷьишьоит; иара иҭахуп ҳара ҳусура агәахәара ҳзаанагаларц, ҳџьаус алҵшәа ҳаргәырӷьаларц. Убри аҟынтә Анцәа ибзиабараҿ ҳаанхаларц азы, иара ихәаԥшышьеи ипринципқәеи ҳрыдгылалароуп аусура аганахьала. (Уаԥхьа Екклезиаст 2:24; 5:18.)

³ Ари ахаҿы ҳара еилҳаргоит ԥшь-зҵаарак: ишԥаҳауеи агәахәара ҳџьаус алҵшәа бзиақәа рҟынтәи? Иарбан усура хкқәоу ииашоу ақьырсианцәа ирнымаало? Ишԥарызнеилатәу аусуреи адоуҳатә усқәеи иҭышәынтәаланы? Иарбан зегь раасҭа ихадоу усу ҳара инаҳагӡалар ҳалшо? Аха раԥхьа уааи ҳахәаԥшып адунеиаҿы ҩыџьа аџьабаабаҩцәа дуӡӡақәа рҿырԥшы: Анцәа Иеговеи Иисус Христоси.

АЏЬАБААБАҨ ДУӠӠА, НАСГЬЫ ЗУС БЗИАӠАНЫ ИЗДЫРУА АҞАЗА

4, 5. Ишԥаҳнарбо Абиблиа Иегова иџьабаа алҵшәа шамоу?

⁴ Иегова — џьабаабаҩ дуӡӡоуп. Аҟазаара 1:1 иаҳәоит: «Раԥхьаӡа Анцәа ишеит ажәҩани адгьыли». Анцәа адгьыл шаны даналга, иусура абас ахәшьара аиҭеит: «Даара ибзиоуп» (Аҟазаара 1:31). Даҽакала иуҳәозар, уи адгьылаҿ иишаз зегьы игәы иахәон. Иегова, «насыԥшара змоу Анцәа», ҳәарада, иџьабааҿы агәырӷьара ду иԥшааит (1 Тимофеи 1:11).

⁵ Ҳара ҳ-Анцәа ахаангьы аџьабаабара даҟәыҵӡом. Адгьылгьы, нас уа иқәу зегьы аниша ашьҭахь акрааҵхьан еиԥш, Иисус иҳәеит: «Сара Саб иахьа уажәраанӡагьы уи ҟаиҵоит» (Иоанн 5:17). Иҟаиҵозеи Аб уи аамҭазы? Иара ажәҩан аҟынтәи ауаа рыԥсҭазаара активла иҽалаирхәуан: напхгара риҭон, дреиҷаҳауан. Уи ишеит «ҿыцла иаԥҵахаз» — доуҳала ииз ақьырсианцәа, Иисус ажәҩанаҿы напхгара ицзуло (2 Коринфаа 5:17). Иара ауаа рганахьала игәҭакы анагӡаразы иахәҭаз зегь ҟаиҵон, бзиа дызбо зегьы адунеи ҿыц аҿы наӡаӡатәи аԥсҭазаара роурц (Римаа 6:23). Иегова, иҟалап, ихатә џьабаа алҵшәа даара игәаԥхозар. Иара миллионҩыла ауаа идиԥхьалеит: дара Аҳра иазку ажәабжь ақәҿырҭит, насгьы Анцәа ибзиабараҿы иаанхарц азы рыԥсҭазаара аԥсахра иалагеит (Иоанн 6:44).

6, 7. Дышԥаԥсахеи Иисус гәыкала аус зуа ауаҩы ирепутациа?

⁶ Иисус гәыкала аус зуа ауаҩы ирепутациа даԥсахеит. Адгьылахь даанӡа, уи Анцәа иҿы «зус бзиаӡаны издыруа аҟаза» иакәын, насгьы «жәҩани дгьыли рҿы иҟоу зегьы» ршара далахәын (Ажәамаанақәа 8:22—31; Кәаласаа 1:15—17). Иисус адгьылаҿ данынхоз, гәыкала аус иуан. Дшыхәыҷыз аахыс уи аргыларатә напҟазара идырҵон, нас дуасҭаны дҟалеит (Марк 6:3)a. Ари анапҟазара аус адулара ӷәӷәа, насгьы адыррақәа аҭахуп, усҟан еиҳагьы иаҭахын, избанзар иҟамызт аӷәхырҭақәа, аргыларатә маҭәахәқәеи афымцамыругақәеи рыдәқьанқәа. Ухаҿы иузаагома Иисус аҵламаҭәахә ширхио: аҵлақәа ԥҟаны аус ахьиуа ишнеиго? Ухаҿы иааг уи аҩнқәа ширгыло: ахыбазы ахаҳә-ҵәаҳә ширхио, ишеизиго, ашәқәеи аҩнымаҭәаҵәҟьеи шыҟаиҵо. Иисус хаҭала идыруан ҟазарала инагӡоу аус агәахәара шузаанаго.

⁷ Иисус даара игәақәкны имаҵура наигӡон. Хышықәсеи бжаки иара дмааԥсаӡакәа акрызҵазкуа ари аус аҿы аџьабаа ибон. Ауаа реиҳараҩык ажәабжь рзеиҭаҳәара дахьӡарц азы, иара заа дгылон, нас ҵхыбжьонынӡа ажәабжь рзеиҭеиҳәон, минуҭкгьы ус баша ирӡуамызт (Лука 21:37, 38; Иоанн 3:2). Иара «ақалақьқәеи ақыҭақәеи дрылсуан, Анцәа Иԥсҳаратәы уазла, гәырӷьажәала иҳәауа» (Лука 8:1). Ауаа ажәабжь бзиа рылаҳәо, Иисус шьапыла, асаба мҩала акилометрақәа акыр ирацәаны дырхысит.

8, 9. Ишԥеизаанаго Иисус агәахәара иџьа алҵшәа бзиақәа?

⁸ Ибозма Иисус гәыкала инаигӡоз имаҵзура алҵшәа? Ҳәарада! Иара аҵабырг ажәла леиҵеит, аҭагаларазы иҟалаз адәқәа ишьҭахь иааныжьуа. Анцәа игәаԥхара анагӡара Иисус убриаҟара амч инаҭон, насгьы дарӷәӷәон, афатә мап ацәкраҵәҟьагьы дазхиан (Иоанн 4:31—38). Уазхәыц, шаҟа агәахәара дуӡӡа иоуз адгьылаҿы имаҵзура анынаигӡа ашьҭахь, ииашаҵәҟьаны иаб иеиҳәартә даныҟала: «Сара адгьыл аҟны Уара ухьӡ ҳараскит — снапы иануҵаз аус анагӡарала» (Иоанн 17:4).

⁹ Меижьарада, Иеговеи Иисуси рџьа алҵшәа бзиақәа агәахәара рзаанагоит, убри ала ҳара инарылукааша аҿырԥшы ҳдырбоит. Ҳара Иегова иахь иҳамоу абзиабара ҳгәазҭанаҵоит иара иҿыԥшра (Ефесаа 5:1). Иисус иахь иҳамоу абзиабара ҳгәазҭанаҵоит «иара имҩала ҳцаларазы» (1 Пиотр 2:21). Уааи уажәы ҳахәаԥшып ҳаргьы ҳџьа алҵшәа бзиақәа агәахәара ҳзааргар шалшо.

УЏЬА АЛҴШӘА БЗИАҚӘА АГӘАХӘАРА ШУЗААРГО

10, 11. Иҳацхраауазеи ҳара аусурахь иҵоуроу агәазыҟашьа аизырҳара?

¹⁰ Ииашоу ақьырсианцәа рыԥсҭазаараҿ аусура иара ахатә ҭыԥ амоуп. Ҳара иаҳҭахуп ҳусура агәахәареи агәырӷьареи ҳзааргаларц, аха уи мариам, еиҳараӡак ҳусура анаҳгәамԥхо. Ишԥаҳалшо ари аҩыза аҭагылазаашьақәа рҿы ҳџьа алҵшәа бзиақәа агәахәара ҳзааргарц?

¹¹ Еизырҳала иҵоуроу агәазыҟашьа. Ҳара ҳҭагылазаашьақәа есымша иаҳзыԥсахуам, аха ҳгәазыҟашьа ҳаԥсахыр ҳалшоит. Анцәа ихәаԥшышьа ҳазхәыцлар, ҳусура иҵоураны азнеираҿы иҳацхраауеит. Иаҳҳәап, уара аҭаацәара уреиҳабызар, уазхәыц уусура — шаҟа угәы арҿыӷьуазаалакгьы — уҭаацәа рныҟәгара иуцхраауеит. Иегова згәакьацәа иреиҷаҳауа ауаа рыхә ҳаракны ишьоит. Иара Иажәаҿы иҳәоуп згәакьацәа ирмеиҷаҳауа ауаҩы ихаҵара мап ацәикит, «агәрахаҵара змам раҵкысгьы деицәоуп» ҳәа (1 Тимофеи 5:8). Убри уусура абзоурала, уара Анцәа иудиҵаз аҭакԥхықәра ахықәкы шынаугӡо анеилукаауа, уара агәахәара уоур улшоит, насгьы иугәалашәалоит аус зууа. Аус уцызуа рзы уи аҩыза узымҳәар ҟалап.

12. Ишԥарыҭахо аҳамҭа аусураҿы агәақәкреи аиаша-ҵабырги аазырԥшуа?

¹² Угәы ақәкны, иаша-ҵабыргла уҟаз. Угәы ақәкны аус ууазар, уусура ахаҭабзиара аманы анагӡашьа уҵозар, уи алҵшәа бзиа узаанагоит. Лассы-лассы аусура бзиа избо, иазыманшәалоу аусуҩцәа аусураҭаҩцәа рыхә ҳаракны иршьоит (Ажәамаанақәа 12:24; 22:29). Ҳара, ииашоу ақьырсианцәа реиԥш, аусураҿ аиаша-ҵабырг аарԥшуа аԥара, амаҭәахәқәа, ма аусура иазалху аамҭа ҳамӷьычлароуп (Ефесаа 4:28). Ҳазхысыз ахаҿы ишеилаҳкааз ала, аиаша-ҵабырг аазырԥшуа аҳамҭа рыҭахоит. Зыламыс цқьоу ҳәа ахьӡ змоу аусуҩы еиҳа игәра ргоит. Аусураҭаҩ ҳаламысцқьара гәеиҭоу, мамзаргьы игәеимҭоу хадарам, ҳара агәахәара ҳаур ҳалшоит «ҳарҭ ҳаламыс ацқьара» анамоу, насгьы бзиа иаҳбо Анцәа данҳаргәырӷьо (Ауриацәа 13:18; Кәаласаа 3:22—24).

13. Иарбан лҵшәақәоу иаанаго аусураҿы ҳара ҳхымҩаԥгашьа бзиа?

¹³ Ухымҩаԥгашьала Анцәа дҳаракла. Ҳара ҳусурҭаҭыԥ аҿы иҳараку ахымҩаԥгашьатә нормақәа ҳанрықәныҟәо, ҳәарада, уи егьырҭ ирызгәамҭар ҟалом. Иабананагар алшо уи? Ҳара иҳалшоит «Ҳанцәа-Ҳаиқәырхаҩ ҳазқәиҵо амҩа, иаҳирҵо аҵара» арԥшӡара (Тит 2:9, 10). Ааи, ҳара ҳхымҩаԥгашьа бзиа иабзоураны, егьырҭ еилыркаауеит ҳдинхаҵара шаҟа ибзиоу, иагьырҭаххоит уи еиҳаны аилкаара. Уазхәыц иарбан цәаныррақәоу уара иузцәырҵуаз, аус уцызуа ауаҩы аиашарахь аинтерес шьҭихызҭгьы, аусураҿы ухымҩаԥгашьа бзиа иабзоураны! Аха зегь реиҳа ихадоу: иҟоума еиҳау анасыԥ ухымҩаԥгашьала Иегова дшыҳараукуа, дышургәырӷьо анудыруа? (Урыԥхьа Ажәамаанақәа 27:11; 1 Пиотр 2:12.)

АУСУРА АЛХРАҾЫ АГӘЕИЛЫХ БЗИА АҬАХУП

14—16. Иарбан крызҵазкуа зҵаарақәоу ҳзызхәыцыр ахәҭоу аусура ҳаналаго?

¹⁴ Абиблиаҿы ианӡам инҭкааны амҩақәҵарақәа иарбан усуроу ақьырсианцәа ирнаало, мамзаргьы ирнымаало. Аха уи иаанагаӡом ҳара иарбанзаалак аусура ҳақәшаҳаҭхоит ҳәа, уи зыдҳәалазаалакгьы. Аҩыра ҳара Анцәа игәаԥхо, алҵшәа змоу, аиаша-ҵабыргра злоу аусура аԥшаараҿы иҳацхраауеит, убри аамҭазы, иара игәамԥхо аусура аламгара (Ажәамаанақәа 2:6). Ҳара аусура ҳахьалагаша аналҳхуа, ихадоу ҩ-зҵаарак ирызхәыцтәуп.

¹⁵ Иҟаҵатәхома ари аусураҿы Абиблиа зқәыӡбо уск? Анцәа Иажәа аӷьычра, амц, аныхаҟаҵара ирықәыӡбоит (Ақәҵымҭа 20:4; Аусқәа 15:29; Ефесаа 4:28; Аатра 21:8). Ҳара мап ацәаҳкуеит ус аҟаҵара ахьҳадырҵо аусура. Ҳара Иегова бзиа даҳбоит аҟынтә, Анцәа иԥҟарақәа ирҿагыло акы ахьыҟаҵалатәу аусура ҳалагаӡом. (Уаԥхьа 1 Иоанн 5:3.)

¹⁶ Ари аус анынаҳагӡо, ҳрылахәхома ҳара узқәыӡбо аусқәа, насгьы иалаҳгалома ҳара егьырҭ урҭ аусқәа? Ҳахәаԥшып аҿырԥшы. Маӡаныҟәгаҩс аусура цәгьара ҳәа акгьы аҵам. Аха иҟаҵатәузеи, аҽԥыргара хықәкыс измоу аклиникаҿы аусура ҳадыргалазҭгьы? Ҳәарада, амаӡаныҟәгаҩ иусураҿы аҽԥыргара ишиашоу аҽалархәра аҭахым. Аха ус шакәугьы, ҳацымхрааӡози ҳусурала аҽԥыргара — Анцәа Иажәа иаҿагыло аус, уи аклиникаҿы аус ҳуазҭгьы? (Ақәҵымҭа 21:22—24). Ҳара Иегова бзиа даҳбоит аҟынтә, иаҳҭахӡам Абиблиа зқәыӡбо аусқәа ӷәӷәала ҳрыдҳәалазарц.

17. а) Иарбан факторқәоу изызхәыцтәу, аусура аганахьала аӡбара анҳадаҳкыло? (Уахәаԥш арамка «Сақәшаҳаҭхарыма сара ари аусура?».) б) Ишԥаҳацхраауеи ҳаламыс Анцәа игәаԥхо аӡбарақәа рыдкылараҿ?

¹⁷ Ҭагылазаашьақәак рҿы аусура аганахьала ииашоу аӡбара адкылара иҳацхраауеит абзацқәа 15, 16 рҿы иаагоу ихадоу ҩ-зҵаарак рызхәыцра. Уи адагьы аусура алхраан егьырҭ афакторқәагьы ирызхәыцтәупb. Иазыԥштәым игәрагоу атәы аҭагылазаашьақәа зегьы рҿы ухы иаурхәаша аԥҟарақәа шьақәиргылоит ҳәа. Абраҟа ауп иахьаҭахугьы агәеилых бзиа. Ҳара 2-тәи ахы аҟынтә ишеилаҳкааз ала, ҳаламыс ҳааӡалароуп ҳаԥсҭазаараҿы Анцәа Иажәа ҳхы иархәаны. Ҳара хархәарала иааӡоу ҳадкылара иабзоураны, ҳаламыс ҳацхраауеит Анцәа игәаԥхо аӡбарақәа рыдкылара, насгьы ҳара ибзиабараҿы ҳаанхалоит (Ауриацәа 5:14).

ИҬЫШӘЫНТӘАЛАНЫ АУСУРА АЗНЕИРА

18. Избан изымариам адоуҳатә ҭышәынтәалара ахьчара?

¹⁸ Адоуҳатә ҭышәынтәалара ахьчара ус имариам, еиҳарак арҭ «аҵыхәтәантәи амшқәа» «ихьанҭоу аамҭақәахоит» азы (2 Тимофеи 3:1). Аусура аԥшаареи ахьчареи мариаӡам. Ииашаҵәҟьоу ақьырсианцәа реиԥш, ҳара еилаҳкаауеит шаҟа аџьабаа батәу аҭаацәа рныҟәгаразы. Аха ҳара агәҽанызаара ҳамамзар, аусураҿы ақәыӷәӷәара, мамзаргьы ари адунеиаҿы иҟоу аматериализм адоуҳа цәгьа ҳдоуҳатә ҽазышәарақәа ирԥырхагахар рылшоит (1 Тимофеи 6:9, 10). Уааи ҳахәаԥшып аҭышәынтәалара шыхьчатәу, «еиҳа ихадоу» еилкаауа (Филиппаа 1:10).

19. Избан Иегова дзаԥсоу инагӡаны игәра ҳгартә, насгьы иҟаҳамҵалозеи ҳара уи агәрагара абзоурала?

¹⁹ Инагӡаны Иегова уиқәгәыӷла. (Уаԥхьа Ажәамаанақәа 3:5, 6.) Даԥсаӡами иара уи аҩыза агәрагара? Иара ҳара гәҭыха-хьаас ҳимоуп (1 Пиотр 5:7). Уи ҳара ҳаҵкыс еиӷьны идыруеит иҳагу-иҳабзоу, иара уи изыҟаҵартә аҭагылазаашьа имоуп (Ԥсалом 37:25). Убри аҟынтә ҳара ииашаны ҳхы мҩаԥаҳгоит, иара Иажәа иаҳгәаланаршәо ҳанықәныҟәо: «Амазара арҳара-абеиахара хәыцырҭас-хьаас ишәымамыз, ишәымоу шәызшәырха, шәалаӡа. Избанзар... [Анцәа] иоуп изҳәаз: «Угәыгәҭасыжьуам, уаансыжьуам» (Ауриацәа 13:5). Заамҭа зегь амаҵзура иазызкуа ажәабжьҳәаҩцәа аӡәырҩы ишьақәдырӷәӷәар рылшоит Анцәа ириҭарц шилшо аԥсҭазааразы зда ԥсыхәа рымам зегьы. Ҳара Иегова дышҳаиҷаҳауа инагӡаны агәра ҳгозар, ҳҭаацәа зланыҟәаҳгаша мыцхәы ихьааҳгалаӡом (Матфеи 6:25—32). Ҳара ари адунеи иатәу аусура, ҳдоуҳатә усқәа, иаҳҳәап ажәабжь бзиа рылаҳәареи аизара аҭаареи, иаԥырхагахартә иалҳаршаӡом (Матфеи 24:14; Ауриацәа 10:24, 25).

20. Иаанагозеи абла цқьаны ахьчара, насгьы ишԥаулшо уара уи аҟаҵара?

²⁰ Убла цқьаны ихьчала (Матфеи 6:22, 23). Абла цқьаны ахьчара — иаанагоит аԥсҭазаара ирмарианы амҩаԥгара. Зыбла цқьаны изыхьчо ақьырсианцәа хықәкык ауп рыхшыҩ ззырышьҭуа — Анцәа игәаԥхара анагӡара. Ҳабла ииашоу ахәаԥшышьа иақәкызар, еиҳа ахьыршәо аусурҭа ҳашьҭалаӡом, еиӷьу аԥсҭазаарахь ҳаихалаӡом. Иара убас ҳара ҳҽазаҳшәалаӡом анасыԥ азы иаҳҭаху арҿыцрақәа зегьы рыхьӡара, аӡыргара агәра шаҳнарго еиԥш. Ишԥаулшо уара убла цқьаны ахьчара? Ауалқәа мыцхәы уқәумҵалан. Аамҭеи амчи рацәаны изго амаҭәарқәа ааумхәалан. Абиблиа алабжьара унаҭоит «цәашәҵатәыки фатәыки» узурхаларц (1 Тимофеи 6:8). Уҽазышәала уԥсҭазаара армариара уи ахьынӡазалшо.

21. Избан аҵак ду замоу априоритетқәа рышьақәыргылара, насгьы ихадоузеи ҳара ҳаԥсҭазаараҿы?

²¹ Адоуҳатә приоритетқәа шьақәыргыл, насгьы урҭ нагӡала. Зегь рыхьӡара залшом, убри аҟынтә априоритетқәа шьақәыргыл. Мамзар уиаҟара ихадарам аусқәа хәы змоу ҳаамҭа ҳцәыргар рылшоит, еиҳа ихадоу аусқәа ирнаханы. Изакәызеи зегь реиҳа ихадоу ҳаԥсҭазаараҿы? Ари адунеиаҿы аӡәырҩы иазгәарҭоит еиҳау аҵараиура шаҟа ихадоу, аулафахәы ду змоу аусура уоурц азы. Аха Иисус ишьҭанеицәа ааиԥхьон: «Зегь раԥхьаӡа акәны шәзышьҭалаша Анцәа Иԥсҳара» ауп (Матфеи 6:33). Ҳара, ииашоу ақьырсианцәа ҳзы, Анцәа Иаҳра ҳаԥсҭазаараҿы ихадоу аҭыԥ аанакылоит. Ҳара ҳаԥсҭазаашьаҿы — ҳаӡбарақәа, ҳхықәкқәа, ҳусқәа рҿы — иубарҭазароуп Аҳра аинтересқәеи, Анцәа игәаԥхара анагӡареи, ари адунеи аҿы иаԥу аматериалтә маншәаларақәеи, егьырҭ аҽазышәарақәеи раасҭа ишхадоу.

УГӘЫ АҚӘКЫЗ АМАҴЗУРА

22, 23. а) Иарбан усу ииашоу ақьырсианцәа рзы зегь раасҭа ихадоу, насгьы ишԥаҳалшо ҳара уи шхадоу аарԥшра? (Уахәаԥш арамка «Сыӡбара абзоурала, сара агәырӷьареи агәахәареи узаазго аԥсҭазаара мҩаԥызгоит».) б) Ушԥазыҟоу уара ари адунеи иатәу аусура?

²² Ҳара аҵыхәтәантәи амшқәа рзы ҳшынхо анаҳдыруа, ииашаҵәҟьоу ақьырсианцәа рзы ихадароу аус ҳахшыҩ азаҳашьҭуеит — ажәабжь рылаҳәареи аҵаҩцәа разыҟаҵареи (Матфеи 24:14; 28:19, 20). Иисус ҳаиҿыԥшуа, ҳара иаҳҭахуп аԥсҭазаараҿы аҵак ду змоу аус инагӡаны ҳалахәзарц. Излааҳарԥшуазеи ҳара ҳзы уи аус ииашаҵәҟьаны ишхадоу? Анцәа имаҵуҩцәа еиҳараҩык, аизара ажәабжьҳәаҩцәа реиԥш, активла рҽаладырхәуеит ажәабжьҳәара аус. Шьоукы русқәа убас еиҿыркааит, пионерс, ма миссионерс амаҵ руларц. Адоуҳатә хықәкқәа рықәыргылара шхадароу еилкаауа, аӡәырҩы аҭаацәа рыхшара ргәазҭарҵоит заамҭа зегь амаҵзура иазызкуа маҵзуҩцәаны аҟалара рҽазыршәаларц. Ирбома иҳаҵҳаҵо Аҳра ажәабжьҳәаҩцәа ргәақәкны зынагӡара иаҿу амаҵзураҿы алҵшәа бзиақәа? Ҳәарада! Анцәа Иегова гәык-ԥсыкалатәи имаҵзура мацара ауп ҳара ҳаԥсҭазаара агәырӷьара, агәахәара нагӡа, инымҵәаӡо азылԥхарақәа дуқәа азаазго. (Уаԥхьа Ажәамаанақәа 10:22.)

²³ Аӡәырҩы ҳара ҳҟынтә акраамҭа аус рулароуп, рҭаацәа ныҟәыргарц азы. Иухоумыршҭын Иегова ишиҭаху ҳара ҳџьа алҵшәа агәахәара ҳзаанагаларц. Ҳара ҳусуреи ҳусқәеи ҳашрызнеиуа иара ихәаԥшышьеи ипринципқәеи ирықәшәозар, ҳара уи агәахәара ду ҳнаҭалар алшоит. Шәааи ахаан иалҳмыршалап адунеи иатәу аусура ихадоу аус аҟынтә ҳахнамгаларц — Анцәа Иаҳра иазку ажәабжь рылаҳәара. Уи аус ҳаԥсҭазаараҿ зегь раԥхьа ианҳаргыло, ҳара иааҳарԥшуеит Иегова бзиа дшаҳбо, абасала иара ибзиабараҿы ҳаанхоит.