Ижәдыруама шәара?

Ииашаҵәҟьаны ирзуҳәар ауазма иерусалимтәи аныҳәарҭаҿы аԥстәқәеи аԥсаатәқәеи зҭиуаз абрагьцәа ракәын ҳәа?

МАТФЕИ иҟынтә Аевангелие аҿы иануп: «Иисус Анцәа иныҳәарҭа дыҩналт, аныҳәарҭаҿ ак зҭиуази ак аазхәози ԥхаирст, иҭицеит, аԥара ԥыргаҩцәа реишәақәеи аҳәыҳәқәа зҭиуаз ррымӡқәеи хиршәҭит, иреиҳәоит: „иануп: Сара сыҩны аныҳәарҭа ҩны ахьӡхоит»,— шәара уи абрагь ҭыԥс иҟашәҵеит“» (Матф. 21:12, 13).

Аиудеиатәи аҭоурыхтә документқәа ишаадырԥшуа ала, аныҳәарҭаҿы аус зуаз ахәаахәҭцәа аахәаҩцәа жьаны аԥстәқәеи аԥсаатәқәеи рыхә цәгьаны иддыраахәон. Убас, Мишна аҿы иҳәоуп I ашәышықәсазы иҟан аамҭа, амҭанагаразы ҩ-ҳәыҳәк ахьтәы динари ианаԥсаз ҳәа (Керитот 1:7). Аԥышәа змамыз аусуҩ уи ахә ирҳарц азы 25 мшы ицәагон. Иӷарыз ауаа ракәын аҳәыҳәқәеи аҟәарасақәеи амҭас иназгар зылшоз, аха иӷарыз ауаҩы изы урҭгьы рыхә цәгьан (Алев. 1:14; 5:7; 12:6—8). Гамалиил иԥа раввин Симон ари зегь агәынамӡара изцәырнагон аҟынтә, ихымԥадатәииз амҭақәа рхыԥхьаӡара ирмаҷит, уи инадҳәаланы ҩ-ҳәыҳәк рыхә иаразнак шәынтә еиҵахеит.

Еилҳаргаз инақәыршәаны алкаа ҟаҳҵар ҟалоит: Иисус ииашаны зыԥсы цәгьаз, насгьы амц зҳәоз ахәаахәҭцәа абрагьцәа ҳәа рзиҳәеит.