July

Yira romoọgh ghan ni ooḅaghamhiạn aloor mem dị oye uḅaanhaạn iyira igbagarạ ikpo onhụ obobọ uzoọm iyira eten dị i/kpeanhaạn. Ekạr ekpaariọm mem dị oye phọ aḍighi onyọ asiya obobọ ogbogh oyaghirị ayira. Orue okaran ooḅaghamhiạn aloor, yira kotue ni otuughạ iyaạr ḍighaạgh eḍeenhaan aBaibul phọ Anạ, opọ oyobopha phọ odị akilhaạm bọ egey phọ edị. (1 Sam. 1:12) Idiphọ Anạ, yira kotue ni olọgh aani mem okaạph ooḅaghamhiạn aloor phọ ayira,r’oghiilhaan phọ ayira oḅenhị aZihova. I/moghi dị yira komaạr omakạ iiḅereghị phọ ayira. Eeni amem, yira romoghiom ghan ni mem dị yira oghaạph iiḅaghamhị ayira roḅenhị aZihova. Ghalhamọ r’iduọn phọ ni bịn re/pẹr ghan aZihova olher arurụ ongọ iiḅereghị phọ ayira. Etigheri ooḅereghị ghan ilọ iiḅaghamhị ayira, ewạ kẹn ni dị yira kootughiạn oroma phọ aPọl ogẹ bọ siphẹ Filipai 4:6, 7. Otelhedom mọ aPọl amạ amiteom mọ ewạ mọ yira ooḅereghiọm ghan olhoghi aḍisẹph obobọ osẹph ghan aZihova ghalhamọ r’ilọ inmo aghuḍum mọ, esi olhẹm mọ, esi ephomhoghiạn oḅạr phọ odị, ḅilhẹ r’esi ookiạ oḍuomolhoghi phọ dị ungọ bọ iyira. w20.02 21 ¶3; 22 ¶6

Aḍiaḅạ eḍighi inmo dị aZihova unmoom iyira. (Ex. 4:10, 11; Ogan. 4:11) Ekpo onhụ phọ odị ilhoghonhaạn iyira ḍighaạgh olhegheri ilọ osighẹ inmo phọ ipẹ phọ oḍighinhom eten dị ekpeanhaạn. Ookolhobian ghan oghaạph ilọ aZihova ḅilhẹ r’Omhạr phọ odị oomo amem. (Mat. 24:14; Rom 10:14.) Yira oḍighi ghan iduọn phọ, pọ yira rotuughaạny ghan Zizọs. Eniin ephigh phọ aZizọs atụ bọ kụ aru siẹn ade phọ pọ oḅenhị awe ilọ Odẹ phọ odị. (Jọn 18:37) Kuolọ ewạ ni dị yira kolegheri mọ eten phọ epẹ yira roḅạ ghan bọ emạn kẹn ni maạr. Kụ iḍighi kụ mem dị yira rokaạph ilọ aZihova koḅenhị we, oghaaphọm ghan “osooromi aloor r’eghuan,” kụ oḍeenhaan ghan ogbolhomaam oghị esi ipẹ oye phọ alhoghoma bọ ḅilhẹ r’omheeraam mọ odị. (1 Pit. 3:15) Bịn ke/ḍighi oopho araghaạph; kuolọ yira kotughemhị kụ etir ekpom oye phọ. Ikumor awe phọ ku/piemhi ghan mem oḅạ, mem dị bidị omhiịn mọ ewạ ongọ oroma onyọ umor obobọ umarani. Ii, bidị osaḅạr ri mem dị ekpeanhaạn kụ ongọ oroma phọ, obọ keefolhomhi ghan bọ oye phọ. w20.03 18-19 ¶2-4

Yira kooḅereghị ilọ eeghe? Yira kotue ni olọm aZihova mọ: “Bughẹ omeeraam mọ ayoor.” (Luk 17:5; Jọn 14:1) Yira omoghi omhoọgh omheeraam loor esi dị aSetan k’adẹgh ni apogh oomo abuphẹ rodạph bọ Zizọs. (Luk 22:31) Ika kụ idị omheeraam kulhoghonhaạn iyira ḍighaạgh? Mem dị yira moḍighi oomo phọ ipẹ inyaạm mọ ayira esi bọ okaran odẹgh ophogh, omheeraam kaḍighi idị yira kosighẹ ipẹ esugha bọ onyaariọm aZihova. Loor esi dị yira oḍuom ologhi mọ odị kụ alegheri ilọ ekpẹ oḍighi upu iyira, bịn yira m’omoọgh eephọ ologhi. (1 Pit. 5:6, 7) Iiḅereghị r’iloghonaạn ghan iyira ḍighaạgh ophamhanhạm eephọ olhoghi etigheri odọ ipaanaạn lọ yira osoman. Ooḅeghiọn eḍeenhaan umor phọ Robert, okumor oye ookpomoghan dị akpẹ oḍuom ologhi dị m’amhạn 80 asiạ. Odị aḅẹm mọ: “Oroma phọ ogẹ bọ siphẹ Filipai 4:6, 7 miloghonaạn imị ḍighaạgh okaran odẹgh ophogh kirokirọ siẹn adọl aghuḍum mọ amị. Mị umheel li ekulom. Esi ekula amem Mị uroph ni eepoogh arukumuan phọ amị idiphọ okumor oye.” Eeghe kụ ilhoghonhaạn ḍighaạgh Robert ophamhanhạm eephọ ologhi? Odị aḅẹm mọ: “mị uuḅereghị ghan torọ amem lọ mị amhiigh olhoghoma ooḅaghamiạn aloor. Mị ameeraam mọ mị agbor ghan aaḅereghị, mị k’akuamị ni amoọgh eephọ.” w19.04 9-10 ¶5-7

Ibiighi ibạm anmụny eḍighi ikarạph dị oḍighi oghị esi Enaạn. Mem dị oye aḍighi ikarạph oye, pọ raḍighi ghan kẹn aZihova. Ooḅeghiọn eḍeenhaan dị edi siphẹ olhogh phọ Enaạn angọ bọ we phọ Izrạl. Olhogh phọ aḅẹm mọ, oye lọ aagbegheḍiom matuman odị, pọ raḍighi ghan ikarạph kaghị esi aZihova. (Lev. 6:2-4) Kụ iḍighi kụ, mem dị oye dị aḍighi olọ isiphẹ ookpomoghan phọ abiighi obumoọny—bịn amhi asighẹ dọl eghuan obumoọny phọ—pọ odị aḍighi ikarạph akị esi aZihova. Opọ abiighi bọ obumoọny phọ rasighẹ ghan roofola k’aruom ḍien phọ aZihova. Esi iduọn phọ, ewạ dị yira kokel ibiighi ibạm anmụny—idị eḍighi bọ eḍighi igbogh ikarạph dị oḍighi oghị esi Enaạn. Arumhuoghaạph dị edi siphẹ aWatchtower r’Awake! phọ meghaạph ni idị abuphẹ mobiighi bọ koḍighi orue okpạr opu eephina phọ, idị abunhọn kotue ologhonaạn ḍighaạgh oḅilẹ okparamị, ḅilhẹ r’idị aburudẹ r’aburuniin kotue okoph ibạm anmụny phọ abidị. Mosighẹ ni Baibul phọ otughemiọm ikumor awe ookpomoghan phọ ilọ ophạm ghan araghaạph oye dị abiighi obumoọny. Oḍighom mọ akiọm ni ghisigh r’angọ ghan inhọn iiḅakiọm dị ewạ, ilọ ipẹ kopạm ghan bọ raghaạph oye dị abiighi obumoọny. w19.05 9 ¶8-9

Ekpo-onhụ phọ Enaạn ekịgh idiphọ elool eghạm dị eroph, dị ketue ni eyegherọn okpẹ kirokirọ phọ aSetan. (Efẹ. 6:17) Esi omaạm, Ekpo onhụ phọ Enaạn eyegherọn okpẹ phọ aḅẹm bọ mọ abuphẹ momuughu bọ kotue ni oḅaanaạn buẹn odi bọ. (Ps. 146:4) Eḅilẹ iitughianạm iyira mọ aZihova bịn kụ katue akaạph ilọ iḍue. (Isa. 45:21; 46:10) Yira ogbor ghan aạl Ekpo onhụ phọ Enaạn oḅilhẹ ogbirima, pọ k’inyaamị ni iyira oghel oḅilhẹ olhọgh aḍien okpẹ kirokirọ phọ, ikarạph aruwaloor phọ rewạ bọ mọ omheeraam. Kụ iḍighi kụ kel oḍighi atorobọ iyaạr dị egbolomaam iiḍighi ikarạph aruwaloor. Idiphọ abugey aKristẹn, i/wạ mọ ophinom aani bin r’eniin iiḍighi ikarạph aruwaloor phọ. Esi omaạm, yira ro/kị ghan k’ariil obobọ ro/kparaghạ ghan oḅaanaạn abuphẹ momuughu bọ. Yira rokel ghan ni iḍighinhom araraạr awe mem dị rokaạph ilọ amaḍi. Yira ro/teẹny ghan buphẹ otuughạ bọ ilọ araanaạn phọ obobọ rokaạph ghan bọ ilo aghisigh phọ, olhegheri idị kemite iḍue. Yira olegheri mọ iḍighinhom araraạr phọ iphẹn phọ eḍighi ni ootor’osooromineen loor esi dị reḍighi ghan iyaạr dị aSetan r’ayira koḅọph oghuugh. w19.04 21-22 ¶8-9

Awe dị osighẹ olhegheri iyaạr aḅirini phọ rogilaạm ghan siigbu aBaibul phọ, koḅẹm mọ i/moọgh maạr oḍighinom. Bidị ropuru ghan mọ, ‘eeghe kụ iḍighi kụ Enaạn ilhemọm bọ ni iyira ruuphuạ phọ kụ aḅilhẹ bọ raḅẹm ghan mọ ku/tolạn esi?’ Aḍipuru phọ aḍiphẹ phọ imite loor esi dị awe omeeraam mọ ekpẹ oḍighi ghan ongọ atorobọ iyaạr dị aloor phọ ewạ. Kuolọ aBaibul phọ o/ghaạph idiphọ. Ughueni iyira esi otughemị mọ yira kotue ni ooḅakị ruuphuạ phọ ayira. (Kọl. 3:5) Oḅarạm isiphẹ, aZihova aḅilhẹ kẹn ungọ iyira inmo apinien, dị iyạl phọ awe phọ kotue ni okelọm orolạn esi mem dị bidị m’aalhạn. (1 Kọr. 7:8, 9)Dị egbatanaạn r’ephoghom aḅirini phọ, aBaibul phọ akaạph ni ilọ orolạn esi dị asererẹ. Ekaạph ni egananmi mọ orolạn esi phọ aḍighi ni iyaạr oghelọm. (Prov. 5:18, 19) Toroboiperolbọ, aBaibul phọ aḅẹm kẹn mọ: “Ekpeanaạn dị torobọ olephiri oọny kaako loor odị kụ alegheri ilọ ophin anịr dị ikalaghiạn ke/tọI. Odị ku/pinom ephuọm.”—1 Tẹs. 4:4, 5. w19.05 22-23 ¶7-9

Enhaạn ka/meera mọ areelhe phọ ophiemhi we phọ odị. Loor esi dị awe phọ odị r’obaga ni omheera aḍien ph’odị, ḅilhẹ bidị monhaghạn ni itọ phọ odị okiil oḍuạ esi aBabilọn Ogbogh phọ. (Iiḍighi 15:16, 17; Ogan. 18:4) Bidị molhọgh ni kẹn iboom inyaạm olhoghonhaạn aḍighaạgh bunhọn oḍuạ esi aBabilọn Ogbogh phọ. Esi iduọn phọ, arebenhẹ phọ aZihova ko/pin aani “bin ipẹ koliọm bọ nyodị.” Ghalhamọ r’iduọn phọ ni, kodẹgh ni omheeraam mọ ayira opogh. (Ezek. 38:2, 8) Mem dị mophiemhi oomo aruukụ iiḅereghị okpẹ phọ, awe phọ Enhaạn komeerạ idiphọ oreeny dị ogina odị bịn kụ amheerạ mem dị oghim malhereghi oomo iphedị phọ. Kụ kepin ni olhoghi aSetan. Ophin olhoghi phọ odị kaḍighi idị odị katom—“ikarạph aruwaloor”—oḍighi idị areelhe phọ koḅophoghạn ozuoghom rebenhẹ phọ aZihova. (Ogan. 16:13, 14) Oḅophoghạn areelhe phọ abuẹn phọ kụ “aGọg opọ ade phọ aMagọg” phọ. Mem dị areelhe phọ kokị bọ ozuoghom arebenhẹ phọ Enhaạn, pọ iduọn phọ bidị mosi esi phọ oghol bọ mọ Amagedọn, osighẹ bọ otoomaạm.—Ogan. 16:16. w19.09 11 ¶12-13

Mem Izrạl iḍiodi phọ, aSetan aḍighinom ikarạph aruukụ iiḅereghị ophopheom aroozọ dị i/ḅaạl. Ḍio arodon, odị raḍighi aani ghan kẹn igini phọ. Ikarạph aruukụ iiḅereghị omeeraam ni oḅilẹ ropoghe ghan roozọ dị i/ḅaạl. Loor esi iduọn phọ, ibadị dị oghophora mọ bunọ rokumu Enaạn mowilẹ odạph asiigbu phọ Enaạn eegholaan bọ ni, idị egbolomaam roozọ dị i/ḅaạl. Otelhedom mọ aPọl aghaạph ni aageliọn siphẹ aḍinyạ phọ odị agẹ bọ aghiọm Kristẹn phọ aRom idị iphẹn phọ mekọm. (Rom. 1:28-31) Iniin “araraạr dị i/kpẹ” pọ odokirokirọ orolạn esi dị u/ḅaạl, idiphọ orolạn esi igbo iyạl alhephiri anmụny. (Rom. 1:24-27, 32; Ogan. 2:20) P’eeghe idị emạn maạr dị yira kodaphạn itughemị aBaibul phọ eegholaan bọ! Olegheri iyaạr awe rapogh ghan kagunọm siigbu elhiom eḍighinom iyaạr phọ aZihova. Re/lọgh ghan kephophe eemuma uwaloor iigbia phọ Enaạn, kparipẹ ghụn repophe ghan, “eḍighinom iyaạr iphulupul phọ.” (Gal. 5:19-23) Rekọm ghan ophoophe aloor r’iḅo igbogh, bịn meḍighi idị awe “kobeeph ikarạph.” (2 Tim. 3:2-4) Aroozọ phọ iphẹn phọ egbạgh ni oyoghoyoghọ phọ r’osooromi aloor phọ Enaạn rawạ ghan bọ mọ arebenẹ phọ odị omoọgh.—2 Sam. 22:28. w19.06 5-6 ¶12-14

Ilaizạ akumu aZihova mem dị ekpạr agey ḅilhẹ r’amem iboom ipaanhaạn. Mem mọ aZihova aḅenị bọ Ilaizạ mọ adi iniin iiḍighi phọ odị angọ Ilaisạ, pọ iduọn phọ Odị m’amiteom ogey oyaghirị dị kaloghonaạn ḍighaạgh oodereghị odị mem lọ odị aḅonyonu azuan. Igina phọ kẹn, mem dị yira oḅenị oyaghirị ayira ipẹ riḍighi bọ iyira, oyaghirị phọ ayira kuloghonaạn iyira ḍighaạgh okaran ooḅaghamiạn aloor phọ ayira. (2 Ki. 2:2) Kụ eḍighi maạr dị nạ u/moọgh oyaghirị oghaạph iiḅaghamị anạ oḅenị, pọ lọm aZihova aloghonaạn nyinạ ḍighaạgh omhoọgh onyọ umor dị asianaan dị kakparamị nyinạ. AZihova alhoghonhaạn ni ḍighaạgh Ilaizạ okaran ooḅaghamiạn aloor kụ okumuan idiphọ odị akpẹ oḍuomologhi esi ibadị asiạ. Ipẹ emitenaan bọ Ilaizạ ingọ iyira oḍuomologhi. Eeni amem yira rosoman ghan ni oboom ooḅaghamiạn aloor dị rakọm ghan oḅonyonu ozuan. Ghalamọ r’iduọn phọ ni, yira obeḍenhọm aZihova, odị k’ungọ ni iyira inyaạm mọ ewạ bọ orue okumu odị oghiọm aghisigh.—Isa. 40:28, 29. w19.06 15 ¶4; 16 ¶9-10

Yira kotue ni omoọgh akpọ oḅio nyiidiphọ esi oghaạph ghan iiḅi iinhaghạn ilọ Omhạr phọ k’Enaạn oḅenhị aani abunhọn, esi ogbo. Eeghe kụ iḍighi? Loor esi dị oghaạph iiḅi iinhaghạn phọ rutughemhị ghan iyira oḍuom aZihova olhoghi ḅilhẹ r’okpạr opu oghiilhaan oye. Idiphọ aloor ayira reekparạgh ghan bọ mem lọ yira rozaamiạn loor, idiphọ kụ idị akpọ oḅio phọ ayira kakpạr mem lọ yira oghaạph iiḅi iinhaghạn phọ otu atum otu, riisi ogbo, mem dị u/gu, r’arikpisi dị romuul ghan ḍighi. Eḍighi maạr dị yira omhoọgh akpọ oḅio oghaạph iiḅi iinhaghạn phọ nyiidiphọ, pọ kinyaamị ni iyira oghaạph ghan ghalhamọ r’amem dị abuọ itooghị phọ kụ oḅẹm mọ ku/kaạph mun iiḅi iinhaghạn phọ.—1 Tẹs. 2:1, 2 Yira kotue ni otuughạ ilọ okpọ oḅio esi eḍeenhaan umarani dị aḍeenhaan akpọ oḅio dị aḍighan elhegh. ANancy Yuen o/mhạn oogh ekulọm aḍighaạgh ḍiphoph, kuolọ iyaạr ke/tue eekperemhi nyodị. Odị o/mheera owilhẹ oghaạph ilọ Omhạr phọ k’Enaạn. Iphẹn phọ ikọm ni idị olhọgh nyodị ikoli dị epel li 20 asiạ epẹ China. Oye olọ itooghị phọ dị aapuru nyodị sipuru aḅẹm mọ odị “kụ amoọgh oḅom emhụ apu.” w19.07 5 ¶13-14

Abunhiin awe omoọgh ni ikpukpụ otuughạ igey aBaibul phọ, kuolọ eḅẹl amem mọ eeni ko/ḍeenhaan ḍiḅeraạn. Yira kụ koḍighi idị bidị komoọgh ḍiḅeraạn. Orue omhoọgh ekol epẹ erugh phọ, ewạ mọ yira olhegheri ikeḍi dị yira kosighẹ ghan oḍighinhom. Selẹ ghan rumhuoghaạph dị keḍạ ḍiḅeraạn abuphẹ nạ azuan bọ. Kụ amhaạr aakolhobian emạ eten oghaạph oghughuronhom.Esi omaạm, na atue ni apuru uwotu phọ mọ: “Mị rawạ olhegheri aani aḍiitughiạn anạ ilọ iphẹn phọ. Ibadị awe siẹn aḅirinhi phọ osoman ni iiḅaghamhị kirokirọ. Nạ ragbi mọ itooghị aḅirinhi phọ kụ ketue esiemhi eekuna iiḅaghamhị aḅirinhi phọ ḍughụm?” Kụ eeḅeghiọn Daniel 2:44. Obobọ nạ katue ni apuru onyọ amatuman anạ mọ: “Ika kụ idị yira kotue ookonhom ibạm anmụny dị komoọgh imạ araagharạ? Nạ aatughiạn aani ika? “Kụ eeḅeghiọn Deuteronomy 6:6, 7. Eten dị iikia i/lo, yira romoọgh ghan ni iboom ibo mem dị yira olhoghonhaạn we ḍighaạgh oḍighi abumatuạn aKraist. w19.07 15 ¶4, 6-7

Oniin onyọ umor dị masighẹ ni ibadị asiạ aghaaphọm oghaạph phọ aḅenhị we dị Enaạn u/meeraam, pakirị epẹ Erumhuḍio phọ remite ghan bọ, aḅẹm mọ: “Egbạ gbạ amem, oye lọ aḅẹm mọ, ‘Mị u/meeraam Enaạn,’ p’iduọn phọ raḅẹm ghan mọ onọ raa/ḅereghị ghan rumhụgh phọ, ibadị awe ekool phọ rooḅereghị ghan bọ. Mị rameeraam aani ghan bịn kaḅẹm mọ ibadị arumhụgh eḍighi oopho ikaaghinheẹn-arumhụgh. Mị ugbor ghan aạl Jeremiah 16:20 kụ apuru mọ: ‘Yira kolegheri bọ ika nyophọ aḍighi bọ egey Enaạn phọ ḅilhẹ r’opọ awe kụ okạ bọ rooḅereghị?’ kụ mị alher rurụ anaghạn ipẹ odị kapagharanhaạn bọ, kụ mị aḅilhẹ abạl Isaiah 41:23 eḅẹm bọ mọ: ‘Iḅenhị iyoor idị kemite ghisigh, obọ yoor olhegheri mọ nyinha ekạr ri eḍighi rumhụgh.’ Kụ mị aḍeenhaan nyodị ipẹ aZihova aguanhaan bọ oḍighi ghisigh.” Onhọn onyọ umor aḅẹm mọ: “Mị raḍeenhaan ghan bidị ikpo onhụ osụ olhoghi aBaibul phọ, imiịn aBaibul dị memunughan, ḅilhẹ r’iilhogh phọ reeḅakị bọ oomo aḅirinhi phọ. Ipẹ reten, kụ mị aḍeenhaan ipẹ oomo phọ iphẹn phọ eḍeenhaan bọ mọ Olhemiạ dị asụ olhoghi odi ghan ni. Kụ mem dị oye phọ mamhiigh raatughiạn mọ Enaạn edi ghan ni, bịn mị m’amiigh oḍeenhaan odị ipẹ aBaibul phọ aghaạph bọ ilọ aZihova.” w19.07 23-24 ¶14-15

Ipẹ esooran bọ eḅaramaạm, oḅaalhamhị aḍien phọ aZihova, omhunhenhi ogbi phọ odị, ḅilhẹ r’eephọ r’amuḅọph ookpomhoghan phọ. (Mat. 6:9, 10; Jọn 13:35) Mem dị yira osighẹ ipẹ esooran bọ kụ oḍighi eḅẹl, pọ yira roḍeenhaan ghan mọ yira opomhoghiạn ni aZihova. Otelhedom mọ aPọl aḅilhẹ kẹn aḅẹm mọ “iyaạr inyina ki/bịph.” Iphẹn phọ re/mạ ghan mọ yira koḍighi we dị omhunhughan. AZihova katue ni usighẹ iyira idiphọ awe dị iyaạr i/bịph, eḍighi maạr dị yira oḍighi oomo ipẹ yira kotue bọ, ophophe ephomhoghiạn phọ ayira ḅilhẹ r’osọn ipẹ esooran bọ. Eniin eten dị yira kotue oḍeenhaan ephomhoghiạn phọ ayira, pọ oḍighi oomo ipẹ yira kotue bọ omhiịn mọ yira u/ḍighi idị oye kakpetaan ameel. Iphẹn aPọl aḅẹm bọ mọ yira ku/ḍighi idị oye kakpetaan ameel ekạr kụ eḍighi iphụr arurụ. Ika kụ idị yira kotue oḍighi idị oye kakpetaan ameel? Odọ ozaamhiạn aloor phọ ayira, iinmenhian phọ ayira, obobọ odọ phọ oḍighi phọ yira roḍighi ghan bọ ketue ni eḍighi idị oye kameel. Eeni ipẹ nạ raḍighi bọ i/beeph ni. Kuolọ eḍighi maạr dị ipẹ yira osaḅạr bọ oḍighi phọ kụ etir ooruẹn olhoghi onhọn oye, kụ akpetaan amheel, pọ m’eeph.—Mat. 18:6. w19.08 10 ¶9-11

Emhiigh lhạ phọ eḍighi bọ 1935, Abugbaanhaạn AZihova molegheri mọ aḍigbogh aḍita phọ aZọn amhiịn bọ siphẹ uḍien phọ, eḅaramaạm egu aKristẹn dị okpẹ oḍuom olhoghi dị omhoọgh oḍuomolhoghi orọl isiẹn ade phọ k’agee-pọ. (Ogan. 7:9, 10) Orue okpetenhaan igbogh iiḅaghamhị phọ, kewạ dị aḍigbogh aḍita phọ kotuughạ ilọ areten phọ aZihova kụ egbi oteẹny amem Itooghị Oonịr Asiạ Phọ AKraist. Kewạ dị bidị koḍeenhaan omheeraam dị akpạr pidị bidị omhoọgh “inyaạm omerenyạn oomo araraạr phọ iphẹn” kemite bọ, kụ egbi oteẹny Itooghị Oonịr Asiạ Phọ AKraist. (Luk 21:34-36) Abuphẹ oḍighi bọ ḍigbogh aḍita phọ oḅaạl li olhoghi ilọ oḍuomolhoghi phọ abidị. Bidị olegheri mọ aZihova kụ k’amạ ekpisi lọ torobọ ebenhẹ odị dị akpẹ oḍuomolhoghi katọl akumu nyodị, mughumọ isiẹn ade phọ obobọ epẹ k’akẹ. Aḍibạm r’aḍigbogh aḍita phọ olọgh elhegh mọ aruunmo aghuḍum k’agee-pọ phọ eḍuạ esi onmạ ighirigiir phọ aZihova u/kpeanhaạn bọ kụ etu, dị eego esi ekiạ etagharạn phọ aZizọs Kraist.—Rom. 3:24. w19.09 28 ¶10; 29 ¶12-13

Nạ amoọgh ni omhoom oḍighi ḍughụm? Pọ ḍighi idị kemoọgh ekol. Kaa/tughiạn mọ nạ kụ edị u/ḍighi agey siphẹ ogbaany oḍighi phọ anạ obobọ mọ nạ o/mhoọgh mun maạr oḍighinhom. Tuutughiạn ipẹ aZihova malhoghonhaạn bọ nyinhạ ḍighaạgh, kụ aghiọm ghisigh agbeelhom ghan iiḅi iinhaghạn phọ. Tuughaạny Kristẹn oḅẹl okuron asiạ phọ okpẹ bọ oḍuom olhoghi phọ. Torobọ ekpisi lọ bidị orọl, bidị ‘ureIhe yogh ghan oghaạph oghaạph phọ [Enhaạn].’ (Iiḍighi 8:1, 4) Ikuph phọ nạ alhọgh bọ oghaạph iiḅi iinhaghạn phọ etue ni ekọm imạ emiteom. Esi omaạm, abukọy eten dị ophorogh eniin eelhe uḅuạ ni oghị eelhe dị etuman bidị, ekpisi dị ewaạm mọ ebụgh ni iboom onhụ emhạ phọ abidị. Esi iphurukpu arunwanyụ bịn omhoọgh ibạm arugu abumor dị roḅạ ghan onhụ phọ abidị. Ibo phọ ayira iḍuạ esi imạ asiya phọ ayira r’aZihova kụ eru. Esi iduọn phọ, kiọm ghisigh arelhean ghan r’aZihova kụ aphogh ghan nyodị ilọ osụ-olhoghi, iiḅakiọm, ḅilhẹ r’olhoghonhaạn aḍighaạgh. Legheri mọ nạ uphomhoghiạn ogbaany oḍighi phọ anạ loor esi dị nạ uḍighi oomo ipẹ nạ katue bọ olhoghonhaạn abunhọn ḍighaạgh. Eḍighi maạr dị nạ akuọm loor anạ siphẹ omhoom oḍighi phọ anạ, aZihova kalhoghonhaạn ni nyinhạ ḍighaạgh.—Eccl. 7:10. w19.08 24-25 ¶15-16

Ewẹ dị yira kosooromhi loor ongọ aZihova, idị eḍighi bọ odị kụ Olemiạ ayira. Esi iduọn phọ, odị amoọgh ni elhiom ophighinhaan ayira siigbu. (Ogạn. 4:11) Enhọn ephigh iyaạr dị yira kotuạn onaghanhạn Enhaạ—pọ aloor esi dị eten itooghị phọ odị kụ inhighẹ epelheghiom. K’amem dị mebia ni iboom, ibadị awe motooghị ghan ni ongọ bunhọn awe. Kụ osighẹ itooghị awe otoomaạm, yira omiịn mọ eten itooghị phọ aZihova kụ ikạr eḍighi elọ osụ-olhoghi r’ephomhoghiạn, onmạ ighirigiir, ḅilhẹ r’igbiririph epu elọ awe. (Ex. 34:6; Rom. 16:27; 1 Jọn 4:8) Yira rosooromhi ghan loor k’ongọ aZihova esi oḍighi ghan oomo ipẹ yira kotue bọ onhaghanhạn odị esi oomo araraạr, ḅilhẹ r’esi oghel ikpaarioghọm obeḍenhọm onhaghanhạn aḍughụm ayira. (Prov. 3:5) Ridughanhaan ghan iyira osooromhi aloor ongọ aZihova mem dị yira otuughạ olhegheri imạ araagharạ phọ odị. Eeghe kụ iḍighi? Loor esi dị araagharạ phọ iphẹn phọ eeghironhaan esi oomo ipẹ odị maḍighi bọ. (Ps. 145:9) Iduọn yira rokiọm bọ ghisigh kotuughạ ilọ aZihova, iduọn kụ idị ephomhoghiạn ayira esi odị kebụgh ghan bịn. Ḅilhẹ kẹn, mem dị yira okạr ophomoghiạn aZihova, ke/moghi dị kogoolạ iboom iilhogh uḅenhị iyira ilọ idị ekpẹ oḍighi r’idị i/kpẹ. w19.09 14 ¶1, 3

ASetan aleti yogh we sidool dị ko/tue otool. Esi omaạm, odị rawạ dị yira komeeraam mọ aZihova ka/tue asạr ikarạph ayira abilhenaạn ḅilhẹ mọ iyira u/phomoghiạn. Iphẹn phọ okpẹ dị ketue ni eḅonyon oye! (Jọn 8:44) Mem dị yira oghị oteẹny Kraist, kosạr ri ikarạph phọ ayira uwilhenhaạn iyira. (Mat. 11:28) Ogbạ agey, aZihova apomoghiạn ni oomo phọ ayira agey. (Rom. 8:32, 38, 39) Adool phọ aZizọs aḅẹm bọ mọ orool phọ egbatanhaạn ni r’inhọn asidool dị yira omhoọgh orool. Esi omaạm, mem dị ibadị oghị oḍighi epẹ aḅirinhi phọ origheel, asiloor abidị redugh ghan ni iboom ḅilhẹ ro/moọgh ghan kẹn oḅaạl olhoghi. Ḍierị phọ aḍighaạgh phọ, mem dị yira olhọgh mem siphẹ arukumuan phọ aZihova r’aKraist, yira rologhoma ghan ni ogbaanyạn r’oḅaạl olhoghi. Yira rokparaghạ ghan ni oghị ituughạ mem lọ aloor ayira medugh. Kuolọ egbạ gbạ amem, yira origheel ituughạ ilọ aḍio phọ, yira roomhanham ghan ni koḅilhẹ omhoọgh inyaạm. Mem kẹn lọ yira olhọgh ikuph ogbạ ikpo onhụ phọ, ḅilhẹ ophạm ituughạ aBaibul ilọ ogina ayira. Iikpiạ dị yira romhoọgh ghan repu ghan ni inyaạm mọ yira olhọgh bọ! w19.09 20 ¶1; 23-24 ¶15-16

Siẹn eẹny amem mọ esugha bọ kụ egbi eteẹny emhiighom “aḍio” phọ odị, aZihova rawạ mọ oghiọm ghisigh ogbeelhom oghaạph iiḅi iinhaghạn phọ. Ewạ ni dị yira kosighẹ ‘oomo inyaạm mọ ayira oḍighinhom ongọ Omoọgh-we phọ.’ (1 Kọr. 15:58) Mem mọ aZizọs aghaạph aghaạph bọ ilọ oomo araraạr phọ ipẹ kemite bọ siẹn asiḍio eekunha phọ, odị aḅarạm mọ: “ḄiIẹ ooḅi oghaạph omạr phọ k’Enaạn phọ ophọn kokaạph ni oleenye oomo aḅirini phọ.” (Mạk 13:4, 8, 10; Mat. 24:14) Iduọn phọ pọ: Torobọ amem dị nạ aghị epẹ erugh phọ, pọ nạ rapinhom aani ghan bịn omhunhenhi imiịn aBaibul phọ! Lhạ etum lhạ, oḍighi iphelhegbeel ilọ Omhạr phọ rakị ghan bịn ghisigh. Esi omaạm, tuutughiạn ipẹ onhụ abạl abukaaphọm mọ mabụgh bọ siẹn asiḍio eekunha phọ. Lhạ phọ 1914, onhụ abạl abukaaphọm dị omhạn 5,155 bịn kụ urọl, esi arere dị omhạn 43. Ḍio arodon, abukaaphọm dị omhạn ophaanyạ erubal r’oogh arukuron oonịr kụ odi, esi arere dị emhạn 240! Ghalhamọ r’iduọn phọ ni, oḍighi iphelhegbeel phọ ko/mhunheen. Yira oghiọm ghisigh ogbeelhom ilọ Omhạr phọ k’Enhaạn idiphọ ogina itooghị dị ketue esiemhi eekunha iiḅaghamhị oomo omhạr awe.—Ps. 145:11-13. w19.10 8 ¶3; 9-10 ¶7-8

AZihova asighẹ Bazilaị aḍighinhom olhoghonhaạn aḍighaạgh Uw-emhạ phọ Devid. “Okoọny rasiph, asiloor medughogh, ḅilhẹ amuụm rapụ” Devid r’awe phọ odị mem mọ bidị oghiilhaan bọ Absalom oọny phọ odị rosuma. ABazilaị, maḍighi bọ ni okumor oye ḅilhẹ r’abunhọn, alhọgh ni ghuḍum mọ odị esi ooto r’osooromineen ongọ aDevid r’awe phọ odị eḍien. ABazilaị o/ḅẹm mọ loor esi dị odị maḍighi bọ okumor oye, m’aZihova ka/sighẹ mun nyodị aḍighinhom. Kparipẹ ghụn ni, odị asighẹ ni ipẹ dị amhoọgh bọ alhoghonhaạn ḍighaạgh rebenhẹ phọ Enhaạn ekuom bọ. (2 Sam. 17:27-29) Iphẹn phọ itughemhị iyira eeghe? Etigheri siạ phọ ayira, aZihova katue ni usighẹ iyira aḍighinhom olhoghonhaạn aḍighaạgh bumor phọ ayira ekuom bọ, mughumọ utuman iyira obobọ odị enhọn ekpisi. (Prov. 3:27, 28; 19:17) Eeni yira ko/tue omiịn bidị ologhonhaạn ḍighaạgh, kuolọ yira kotue ni osogh aani osogh olọgh siphẹ igbe iisogh oomo aḅirinhi phọ, olhoghonhaạn aḍighaạgh bumor phọ ayira torọ amem lọ ewạ.—2 Kọr. 8:14, 15. w19.10 21 ¶6

Etue ni ikparanhaạn iyira oghaạph ipẹ yira olhoghoma bọ oḅenhị abunhọn, ekạr nuụn ekpaariọm mem dị erọl mudị oye maḍighi ghan iyaạr dị ephin esi ayira igbaany. (Prov. 18:19) Obobọ eeni yira ootughiạn mọ yira u/moọgh mem r’inyaạm osighẹ oye righirị. Toroboiperolbọ, iyira ki/phẹr. Eḍighi maạr dị yira rowạ mọ abumor phọ ayira ulhoghonhaạn iyira ḍighaạgh mem lọ iiḅaghamhị iteẹny iyira, pọ yira omoọgh oḍuom ghan abidị olhoghi nyiidiphọ, k’eepẹ ekpom mọ ayira. Epẹ phọ eniin ekpanhạ edạ dị emhạn maạr orue oḍighi ogey oyaghirị. (1 Pit. 1:22) AZizọs aḍeenhaan mọ onọ aḍuom ni olhoghi righirị phọ odị esi oghaạph ghan atorobọ iyaạr oḅenhị abidị. (Jọn 15:15) Yira kotue ni otuughaạny nyodị esi oghaạph ghan oḅenhị arighirị phọ ayira ilọ araraạr phọ ipẹ ringọ ghan bọ iyira ibo, ipẹ ringọ ghan bọ iyira iiḅaghamhị, ḅilhẹ r’ipẹ repin ghan bọ olhoghi ayira. Maạr ghan alher rurụ mem dị oye raghaaphạn nyinhạ, bịn nạ kamiịn ni mọ odị amoọgh aani ni iniin phọ iitughiạn phọ, olhoghoma phọ, ḅilhẹ r’iniin phọ igbiighi phọ r’anạ. Eḍighi maạr dị nạ agbatạn edạ kụ aghaaphạn ghan r’arighirị anạ, pọ arighirị phọ anyinha kekpạr ghan bịn.—Prov. 27:9. w19.11 4 ¶8-9

Mem igbogh iiḅaghamhị phọ, eeni adom mọ yira kogbeelhom bọ etue ni enmia. Nyiidiphọ, yira rogbeelhom ghan iiḅi iinhaghạn ilọ Omhạr phọ, ḅilhẹ roḍighi awe bumatuạn. Kuolọ mem mọ amuphẹ phọ, eeni yira kogbeelhom dom dị eghịgh iiḅoghoḍi ibikpo. (Ogan. 16:21) Eeni yira kogbeelhom mọ moọny amem kopiemhi aḅirinhi phọ aSetan. Iduọn amem mọ rekị bọ ni, yira kowạ ni olegheri ipẹ adom mọ ketọl bọ ḅilhẹ r’ipẹ yira kogbeelhom bọ. Yira kosighẹ ni eniin eten phọ obobọ yira kosighẹ inhọn odọ areten kụ oḍighinhom? Yira u/legheri. Etigheri ipẹ ketọl bọ, eeni yira komoọgh aani ni eepoogh ogbeelhom adom ooruẹn phọ aZihova! (Ezek. 2:3-5) Eeni, adom mọ yira kogbeelhom bọ kepin ni ilhoghi areelhe phọ, bịn eḍighi idị bidị konyạ osophoghom ayira. Iduọn yira obeḍenhọm bọ aZihova nyiidiphọ ilọ oḍighi iphelhegbeel phọ, kụ edị yira kobeḍenhọm nyodị mem mọ amuphẹ phọ. Yira okuphom ni owol mọ aZihova Enhaạn phọ ayira, kungọ ni iyira iikpọ dị emhanhạm omhunhenhi ogbi phọ odị.—Mic. 3:8. w19.10 16 ¶8-9

Ikpo onhụ phọ eḅẹm bọ mọ “[kope ni] eten” eḍeenhaan mọ olhọgh amem owaaghị iboom aruphua dị i/kạr iwạ, ketue ni egbaragbaramhị oye phọ. Bịn eyegherọn ekpom ayira engọ “ibadị aruuphuạ eIologhi r’ilọ aḍuugh aḍuugh.” (1 Tim. 6:9) Kparipẹ romheera aruuphuạ phọ ipẹ phọ eḍiku rokpom ayira, ewạ dị yira komiịn ekạr iyaạr phọ bidị eru bọ—areenemạ dị ketue ni iḍighi iyira iyaạr. Oḅẹm mọ yira omoọgh ni ikpoki oghooghiom ibadị araraạr. Kebeeph ni ḍughụm eḍighi maạr dị yira ogho torobọ iyaạr lọ iḅeeraạn iyira ghalhamọ i/kạr ri imoghi? Iyaạr lọ eeph i/lo. Kuolọ tuutughiạn ilọ asipuru phọ iphẹn phọ: Ghalhamọ yira kotue ni oko iyaạr phọ, yira okạr ri omoọgh mem r’inyaạm oḍighinhom oḅilhẹ omhaạr ophạm iyaạr phọ? Ke/ḍighi edị yira kokuọm loor iyaạr phọ ḍughụm? Okuọm aloor ruphua phọ yira omhoọgh bọ kekọm ni idị yira kozọ aani idiphọ oḍoọgh oye phọ aghel bọ ḍimhạgh phọ aZizọs oghị obughẹ arukumuan phọ Enhaạn ḍughụm? (Mạk 10:17-22) P’eeghe idị kinhighenhaạn iyira orọl adọl aghuḍum dị esooran, kụ olhọgh imạ amem r’inyaạm mọ ayira esi oḍighi ghan ogbi phọ Enhaạn! w19.11 17-18 ¶15-16

Enhaạn katue ni angọ nyinhạ iikpọ ‘oḍighi omiteom ipẹ’ nạ masopha bọ. (Fil. 2:13) Kụ iḍighi kụ ḅeeḅereghị alhọm inyaạm oḍighinhom iyaạr omiteom. Kụ alọm aZihova angọ nyinhạ uwaloor iigbia phọ odị, pidị nạ amhoọgh inyaạm mọ rewạ bọ. Kiọm ni ghisigh aaḅereghị ghan mem lọ eghịgh mudị ophagharanhaạn phọ raabinya. Idiphọ aZizọs aḅẹm bọ mọ: “Ilọm ghan, [Enhaạn] kingọ ni inyina Uwaloor Iigbia phọ.” (Luk 11:9, 13) Ḅilhẹ kẹn, Moọgh ghan igbiighi. Omhiịn mọ nạ aḍighi ni amadạn torọ iyaạr lọ nạ amhiighom, pọ ewạ ni omhaạr ogbiighi, kụ otuụgh odaphạn ipẹ nạ agbiighi bọ. Enighẹ kẹn dị mem lọ nạ asopha oḍighi iyaạr, nạ kageeghị ekpịgh etum ekpịgh ipẹ nạ kadaphạn bọ kụ aḍighi amiteom ipẹ nạ masopha bọ. Nạ aḍighi ghan enụm enụm iyaạr dị ebụgh iboom, keloghonhaạn ni nyinhạ ḍighaạgh olhegheri esi lọ nạ maḍighi asiemhi. Otelhedom mọ aPọl aromha we aKorịnt phọ, osighẹ ghan iyaạr dị ekasiạn oseere “torobọ aḍio aSondị” kparipẹ rokori amem dị odị masi kụ ogburugburu ilọ iisogh. (1 Kọr. 16:2) Oḍighi ghan enụm enụm mọ keḍighi idị nạ ka/loghoma mọ nạ ka/tue mun. w19.11 29 ¶13-14

Yira kotue ni oḅẹm mọ oye alegheri ilọ aZihova eḍighi maạr dị alhegheri ḍien phọ Enhaạn obobọ alhegheri iniin araraạr dị aghaạph obobọ aḍighi. Kuolọ olhegheri aZihova phọ epelhom ni siphẹ. Ewạ m’olhọgh ghan mem otuughạ ilọ aZihova r’imạ araagharạ phọ odị. Pọ bịn kụ amem dị yira kotue omiigh onhaghanhạn iyaạr phọ eḍighi bọ kụ nyodị rakaạph ghan bọ kaḅilhẹ atuụgh aḍighi. Ipẹ phọ kilhoghonhaạn iyira ḍighaạgh olhegheri mughumọ iitughiạn phọ ayira, osopha phọ ayira, ḅilhẹ r’iḍighinhom araraạr phọ ayira eḅeeraạn ni aZihova. Mem dị yira motuughạ olhegheri ipẹ eḅeeraạn bọ aZihova, okem ghan osighẹ oḍighinhom. Abuniin awe otue ni ugilaạm iyira loor iduọn yira rowạ bọ okumu aZihova, otue kẹn ni usophoghom iyira mem dị yira omhiigh oghị aani ituughạ. Ghalhamọ r’iduọn phọ ni, yira oḍuom olhoghi aZihova, pọ odị iyira ku/wilhẹ. Yira ropighi ghan siya arighirị r’Enhaạn dị ketọl oomo adọl aghuḍum ayira. Yira kotue ni okuamhị olegheri aZihova ḍughụm? Ii, yira kotue ni! w19.12 16-17 ¶3-4

Eeni amem aburudẹ r’aburunhiin otue ni oḅonyonhu ozuan loor ipaanhaạn ookonhom anmụny phọ, kuolọ anmụny oḍighi inmo aZihova. Oomo amem, Odị aakolhobian ni obakị aburudẹ r’aburunhiin. Odị ranaghạn ghan ni iiḅereghị aburudẹ r’aburunhiin. Kụ odị rapagharanhaạn ghan ni iiḅereghị phọ abidị dị eego esi aBaibul phọ, rinyạ phọ ayira, eḍeenhaan abunhọn ḅilhẹ dị eego esi oromha abunhọn dị mookonhom ni nmụny, siẹn ookpomhoghan phọ. Ibadị awe oḅẹm mọ ookonhom obumoọny eḍighi oḍighi 20 asiạ, kuolọ oḍighi odẹ r’onhiin ra/si ghan eekunha. Iniin araraạr dị emhạn maạr epelheghiom dị bidị kongọ nmụny phọ abidị pọ ephomhoghiạn, amem, bilhẹ r’itughemhị aBaibul phọ. Oomo ibạm anmụny kụ ro/megheron ghan eniin phọ eten phọ. Toroboiperolbọ, ibadị abudị aburudẹ r’aburunhiin dị ophomhoghiạn aZihova kụ ookonhom, rologhoma ghan ni iduọn umarani phọ Joanna Mae epẹ Asia, odị aḅẹm mọ: “Mị rasẹph ghan ni Enhaạn, iduọn odẹ r’onhiin amhị ulhiọm ghan bọ imhị oḅilhẹ utughemhị imhị ilọ ophomhoghiạn aZihova. Bidị imhị u/ngọ ghuḍum bịn, kuolọ ungọ imhị ghuḍum dị amhoọgh emhụ obobọ ekạl.” (Prov. 23:24, 25) Ariisi erubal abumor r’abumarani ologhoma aani eniin phọ eten phọ. w19.12 27 ¶21-22

I/kpạr omhiịn abumor r’abumarani dị omhoghi iidereghị. Toroboiperolbọ, ewạ dị yira koogboronom ghan ologhonhaạn ḍighaạgh bunhọn etegheri oghiilhaan phọ ayira. Esi omaạm, oḅio ayira atue ni akaph ilọ ipẹ yira kokaạph bọ obobọ oḍighi kụ oodereghị oye dị odi esi iiḅaghamhị. Ghalhamọ r’iduọn phọ ni, yira kotue omhaạr agey oodereghị abunhọn eḍighi maạr dị yira oḍeenhaan ghan ogbolhomhaam. Iduọn yira oḍuraan bọ rokị osi eekunha eghimoghọm araraạr aḅirinhi phọ ophọn phọ, adọl aḅirinhi phọ kelegheri ghan bịn eloghorị ḅilhẹ aḅirinhi phọ kakpạr ri orọl. (2 Tim. 3:13) Yira kokạr kụ omoghi iidereghị loor e/munughan phọ ayira rekọm ghan bọ idị yira kopiomạn. Iidereghị phọ otelhedom mọ aPọl amhoọgh bọ ḍighaạgh abuerị phọ aKristẹn phọ, kụ ilhoghonhaạn bọ nyodị ḍighaạgh okparạm imhinhimhiịn phọ odị. Esi otuughaạny eḍeenhaan phọ abidị, yira kotue ni ni ologhonhaạn ḍighaạgh bumor r’abumarani phọ ayira ophạm omheeraam mọ abidị okparamhị.—1 Tẹs. 3:2, 3. w20.01 12-13 ¶17-19

Buẹn osagharạn bọ uwaloor iigbia phọ ologhoma mọ eḍighi ni eghuan omhạgh aani abidị ogheelhom k’akẹ, kuolọ bidị ro/gon ghan mọ abunhọn ozoọm bidị eten dị egbatanhaạn. (Fil. 2:2, 3) Bidị olegheri mọ mem mọ aZihova asaḅạr bọ bidị, i/ḍighi edị oomo awe kụ olhegheri. Kụ iḍighi kụ, re/ḍighi ghan iikia esi oye dị osagharạn uwaloor iigbia phọ, eḍighi maạr dị awe u/meeraam mọ mosagharạn nyodị. Odị alegheri kẹn mọ aBaibul phọ aḅẹm ni mọ yira kuu/gboronhom ghan omheeraam oye dị aḅẹm mọ Enhaạn m’engọ nyinhọ eepoogh dị egbatanhaạn. (Ogan. 2:2) Onyọ aKristẹn dị mosagharạn ka/wạ oḍighi idị awe kolegheri odọ oye dị odị aru, ḅilhẹ ka/ḅenhị torobọ oye dị odị amhiịn mọ mosagharạn aani nyinhọ. Ḅilhẹ odị kaa/bagaam. (1 Kọr. 4:7, 8) AKristẹn phọ abuẹn osagharạn bọ uwaloor phọ ro/kị ghan owạ abuẹn osagharạn aani bọ uwaloor phọ, ilọ omhoọgh araghaạph dị egbolhomaam osagharạn phọ abidị obobọ omhoọgh ekụ ituughạ aBaibul elọ abidị. (Gal. 1:15-17) Amuuḅọph ka/tọl eḍighi maạr dị buẹn osagharạn bọ uwaloor phọ oḍighi raraạr phọ iphẹn phọ. Kebe ghụn elhebiri ekị esi uwaloor iigbia phọ rangọ ghan bọ we phọ Enhaạn eephọ r’amuuḅọph.—Rom. 16:17, 18. w20.01 28 ¶6-7

Kesi ni esi dị kepin ilhoghi abuphẹ mophiemhi bọ ruukụ iiḅereghị phọ abidị, loor iduọn u/piemhi aani bọ ookpomhoghan Abugbaanhaạn AZihova phọ. Gbiom olhoghi odọ igbaragbarạ dị iphẹn phọ kekọm, ghalhamọ r’isiphẹ iisoph intanẹt phọ. Areelhe phọ ḅilhẹ r’otooghiạ phọ abidị, aSetan, kulhọgh ni iyira ḍien loor esi dị u/piemhi aani bọ ookpomhoghan phọ ayira. Bidị ko/moọgh ekol ophiemhi oomo aruukụ iiḅereghị isiẹn ade phọ idiphọ bidị ootughiạn bọ. Loor esi iduọn phọ, yira kụ edị areelhe phọ kokiton osoman. Mem mọ amuphẹ phọ, bịn areelhe phọ moḍighi Gọg opọ aMegọg. Bidị koḅophoghạn kụ olọgh oomo inyaạm abidị oghị ozuom awe phọ aZihova. (Ezek. 38:2, 14-16) Yira otue ni ooḅaghamhiạn loor ilọ ipẹ kemite bọ mem igbogh iiḅaghamhị phọ, ekạr nuụn ekpaariọm iduọn yira u/kạr bọ u/legheri ipẹ kekạr bọ etọl. Toroboiperolbọ, yira okuphom ni owol eniin iyaạr, mọ: I/wạ dị yira kokiilhaan igbogh iiḅaghamhị phọ. AZihova k’ungọ ni iyira iiḅakiọm dị kiphẹl iyira.—Ps. 34:19. w19.10 16-17 ¶10-11

Oḍighi ghan idị epelhom olhoghoma mọ yira osereghiạn ni; oḍighi ghan oḍeenhaan mọ yira osereghiạn ni aZihova esi ikpo onhụ r’iiḍighi. Iphẹn phọ rigbatạn ghan iyira r’awe aḅirinhi phọ aḍio arodon. Yira odi aḅirinhi dị awe ro/sẹph ghan Enhaạn ilọ oomo araraạr phọ maḍighinhaan bọ bidị. Ogbạ agey, eniin iyaạr dị ekạr eḍeenhaan mọ yira odi mem “aruukuna phọ” pọ e”legheri iiḅi. (2 Tim. 3:1, 2) Yira ku/tọl aani idiphọ! AZihova rawạ mọ oomo anmụny ph’odị ophomhoghiạn kụ ooseeny ghan nyodị. Ogbạ agey, ephomhoghiạn phọ yira omhoọgh bọ oghị esi oniin atum nyoniin kụ imạ bọ iyira eḍeenhaan idiphọ abugey aKristẹn. (Jọn 13:35) Kụ iḍighi kụ yira omeeraam ni iphẹn omoọr suọr phọ agẹ bọ mọ: “Pogh! Idị enhighẹ bilhẹ kẹn edụgh dị abumor koḅophoghạn otọl eniin esi r’amuḅọph!” (Ps. 133:1) Mem dị yira ophomhoghiạn bumor r’abumarani phọ ayira, pọ yira roḍeenhaan ghan aZihova mọ yira opomhoghiạn ni nyodị. (1 Jọn 4:20) P’eeghe idị edụgh oḍighom aani apakirị eghunotu abumor r’abumarani dị omhoọgh ‘igbiririph r’onmạ ghan ighirigiir” oniin atum nyoniin!—Efẹ. 4:32. w20.02 9 ¶6-7

Iiḅaghamhị phọ Anạ i/ḍuạ bịn egina amem. Aḅilhẹ ni arọl oniin phọ otu phọ r’aPeninnah. Kụ esi i/lo siphẹ aBaibul phọ dị eḅẹm mọ eegharạ phọ aPeninnah inmia ni. Esi iduọn phọ, iwạ ni mọ Anạ aghiọm ghisigh akparaghạm ikpo onhụ arigilaạm mọ aPeninnah. Ghalhamọ r’iduọn phọ ni, Anạ aḅilhẹ ni amhoọgh eephọ olhoghi. Mem mọ Anạ aḅọgh bọ iiḅaghamhị phọ alhọgh ḍighaạgh aZihova, odị oo/ḅaghamhiạn mun loor. Odị amheera ni mọ aZihova aadereghị aḅilhẹ aabọ nyodị. Esighẹ rekị bịn, aZihova asephọm Anạ nmụny buọ odị! (1 Sam. 1:2, 6, 7, 17-20) Yira kotue ni oḅilhẹ omoọgh eephọ phọ ayira ghalhamọ ko/sighẹ ni iyaạr phọ rekọm ghan bọ ooḅaghamhiạn aloor phọ. Iniin iiḅaghamhị re/ḍuạ ghan ghalhamọ yira uuḅereghị ni obobọ ughị ni ituughạ. Kuolọ odaphạn eḍeenhaan phọ Anạ, iyaạr i/lo dị ketue esophoghom aZihova oobọ arokpom ayira. R’amem r’amem aZihova iyira ku/wulha, kụ moọny enụm amem odị kukpẹ ni iyira iikpiạ loor esi adọl akpọ oḅio phọ ayira.—Hib. 11:6. w20.02 22 ¶9-10

Ikumor awe phọ ro/bilhẹ ghan oḍeenhaan abunhọn sinị iilhogh aBaibul dị keloghonhaạn bidị ḍighaạgh ozọ eten osụ olhoghi. Uḍighi ika kụ emhạn bọ ni maạr dị bidị koḅạ ghan mem lọ ekpẹ? Ooḅeghiọn eḍeenhaan phọ Eli: Ogbogh Opinyọn Rikiạ phọ Eli amhoọgh iyạl anmụny dị odị aphomhoghiạn iboom. Toroboiperolbọ, anmụny phọ odị u/lọgh eegu aZihova. Bidị ukumuan ghan idiphọ abupinyọn rikiạ siphẹ otu iiḅereghị phọ. Kuolọ bidị uḍighinhom iikpọ ph’abidị eten dị i/nighẹ, esi oḍeenhaan egbogh e/lọgh eegu raraạr phọ ropinyonhọm ghan bọ ekiạ phọ kongọ aZihova, ḅilhẹ r’olheeghi emhạ. (1 Sam. 2:12-17, 22) Odaphạn Olhogh phọ aMozis, anmụny phọ Eli okpẹ ozẹ, kuolọ Eli aaboghoḍị nmụny phọ odị bịn amheera mọ oghiọm ghisigh okumuan siphẹ otu iiḅereghị phọ. (Deut. 21:18-21) AZihova alhoghoma ika ilọ eten phọ epẹ Eli aphogh bọ iiḅaghamhị phọ iphẹn phọ? Odị aḅenhị Eli mọ: “Eeghe kụ iḍighi kụ nạ alhọgh bọ eegu nmụny phọ anạ upuemhi imhị?” AZihova asopha ozẹ iyạl anmụny asipioghọm mọ abuẹn phọ.—1 Sam. 2:29, 34. w20.03 19 ¶4-5