September

Eten phọ aZihova r’aZizọs rokumuan ghan bọ reḍeenhaan ghan mọ yira ku/pooghian ghan ḍughụm? Eeye. Arukumuan re/pẹr ghan aZihova, esi iduọn phọ odị o/moghi ophooghian. ABaibul phọ aḅẹm mọ, mem mọ aZihova alhẹm bọ sikẹ phọ r’ade phọ, “odị aphooghian ni aamhanhamhi loor.” (Ex. 31:17) Toroboiperolbọ, ipẹ phọ remạ ghan mọ aZihova asophe ni olhẹm araraạr, kụ amhoọgh ogbaanyạn esi araraạr phọ dị malhẹm bọ. Ghalhamọ r’iduọn aZizọs akumuan bọ ni iboom mem mọ odị arọl bọ siẹn ade phọ, odị amiteom ghan ni mem aphooghian aḅilhẹ alhe eḍien r’arighirị odị. (Mat. 14:13; Luk 7:34) ABaibul phọ akpaariọm we phọ Enhaạn mọ okumuan ghan. Arebenhẹ phọ odị koḍighi we dị kokumuan ghan kparipẹ rogbogholeẹr ghan. (Prov. 15:19) Eeni nạ amoọgh ni oḍighi dị nạ raḍighi ghan omhoọgh iyaạr ophoghom eghunotu anạ. Oomo abumatuạn Enhaạn omoọgh kẹn oḍighi ogbeelhom iiḅi iinhaghạn phọ. Kụ anyụ isiẹn phọ, ewạ ni dị nạ kamiteom ghan mem dị ekasiạn ophooghian. w19.12 2 ¶2; 3 ¶4-5

Kel oghaạph ghan ilọ ikarạph aruwaloor. Idị egbolomaam iphẹn phọ, otuughaạny aani eḍeenhaan phọ aZizọs. Kụ aZizọs agbi bọ oru isiẹn ade phọ, odị alhegheri ni ilọ aSetan ḅilhẹ r’ikarạph aruwaloor phọ. Kuolọ odị o/rolonaạn esi oghaạph ghan ilọ ipẹ ikarạph aruwaloor phọ meḍighi bọ. AZizọs aru oḍighi ogbaanaạn ongọ aZihova, o/ru omheerạ oghaaphanaạn aSetan. Yira kotue ni otuughaạny aani Zizọs eten dị ko/kaaphọgh ghan raraạr dị egbolomaam ikarạph aruwaloor. Kparipẹ ghụn, oḍeenhaan esi ikpo-onhụ mọ “iyaạr dị enighẹ metir ekpom” ayira, ipẹ phọ pọ igey phọ. (Ps. 45:1) Ka/kiilaan ikarạph aruwaloor. Ḍio arodon, ikarạph araraạr rimitenaan ghan ni iyira. Ekperenom iiḅaghamị, e/moon, obobọ aḍuugh etue ni iteẹny iyira dị olhoghi u/seere. Kuolọ yira kuu/tughiạn mọ aruwaloor kụ rekọm ghan. ABaibul phọ aḅẹm mọ “amem ḅilhẹ r’araraạr dị ologhi u/seere” ketue ni eteẹny torobọ oye. (Eccl. 9:11) Idị egbolomaam ikarạph aruwaloor, aZihova maḍeenhaan ni mọ odị amoọgh ni iikpọ apu bidị. w19.04 23-24 ¶13-14

Ekpẹ ni dị ikumor awe phọ kokaạph ghan oḅenị buọ itooghị phọ, mem lọ ogbaanaạn oye mọ abiighi obumoọny? Ii. Rikpisi dị iilhogh phọ ipẹ phọ edi ni, ikumor awe phọ rokparaghạ ghan ni odaphạn, esi oghaạph ghan oḅenị abuọ itooghị phọ mem lọ ogbaanaạn oye mọ abiighi obumoọny. Iilhogh phọ ipẹ phọ i/gbạgh r’ipẹ Enaạn. (Iiḍighi 5:28, 29) Kụ iḍighi kụ mem dị oye aḅenhị ikumor awe phọ m’oye abiighi obumoọny, mem mem mọ ikumor awe phọ ropuru ghan ni iiḅakiọm olạ agadạ phọ, ilọ odaphạn iilhogh ekpisi phọ. Ikumor awe phọ roḅenị ghan buphẹ obiighi bọ ḅilhẹ r’aburudẹ r’aburunhiin abidị, r’awe lọ olhegheri aani ilọ ipẹ emite bọ mọ bidị otue ni omạgh buọ itooghị phọ oḅenị. Kụ kokaạph ika eḍighi maạr lọ oghaạph phọ agbolhomaam oye olọ ookpomoghan phọ, kụ emhạ phọ monaghạn aani? Ekpẹ ni dị onyọ umor obobọ onyọ umarani phọ aghaạph bọ kaloghoma mọ onọ masighẹ roofola atuomaan ḍien phọ Enaạn ḍughụm? Eeye. Opọ abiighi bọ ghụn kụ asighẹ roofola aruomaan ḍien phọ Enaạn. w19.05 10 ¶13-14

ABaibul phọ angọ itọ burulom r’anmariịr mọ oniin alhọgh ghan eghuan nyorị phọ, kụ ophamanhạm ipẹ bidị moghunya bọ. Kụ ekpaariọm budị m’aalhạn mọ okuọm oomo aloor siphẹ apinien phọ abidị, esi oḅẹm mọ: “Oye kagbatanaạn odẹ r’onhiin odị, kụ aḅophạn r’anhịr odị, kụ iyạI phọ abidị koḍighi iniin iphuIupuI.” (Gen. 2:24) Dị egbạgh r’iphẹn phọ, buphẹ osighẹ bọ olhegheri iyaạr aḅirini phọ kụ roḍighinhom roḅẹm ghan inhọn, mọ uw-emhụ agbạ emhụ. Aḍiniin aḍinyạ dị eghaạph ilọ oḅạm ikpoki eḅẹm mọ: “Mem dị roḍighi pinien iniin arikpisi, oghunya phọ opọ rokunya ghan bọ mọ ‘olom mọ r’anhịr phọ k’otolạn tutụ bidị omuughu,’ m’onme roḅẹm ghan mọ ‘bunọ koḍighi olom r’anhịr tutụ bunọ u/loghoma mun ephomoghiạn.’ ” Edọ ewelewelẹ ephoghom apinien phọ ephẹn phọ meḍighi idị arughun otu dị ko/tue ogbi mekaaghị yogh, bịn ekọm eephina ekpom engọ ibadị awe. Eten dị iikia i/lo, yira kotue ni oḅẹm mọ eten phọ epẹ aḅirini phọ osighẹ bọ pinien ekạr kụ eḍeenhaan elologhi. w19.05 23 ¶12

APọl angọ iphụr arurụ phọ iphẹn phọ loor esi dị abuniin aKristẹn phọ momiigh omoọgh iitughiạn dị i/kpeanaạn ḅilẹ omeeraam olegheri iyaạr aḅirini phọ aSetan. (Efẹ. 4:17-19) Ipẹ phọ etue ni imitenaan aani iyira ḍio arodon. R’ikpukpụ ni, aSetan otooghiạ aḅirini phọ ophọn phọ rasighẹ ghan ni ikeḍi kirokirọ kaḍighinom omhiịn mọ odị umhi ni iyira asighẹ ḍighaạgh aZihova. Esi omaạm, eḍighi maạr dị yira rowạ oolheghaan, aSetan katue ni asighẹ ipẹ phọ aḍighinom omhi ayira osighẹ aḍighaạgh aZihova. Odị atue ni asighẹ aḍighinom ekpisi phọ yira omite bọ, eḍighinom iyaạr ekpisi phọ ayira obobọ askul dị yira oghị, oḍighi idị yira komeeraam iitughiạn phọ odị. Ketue ni edugh dị yira kotuur osighẹ ‘igbagarạ’ iitughiạn dị edi ologhi ayira ḍughụm? (2 Kọr. 10:4) Omhiịn idị aPọl aphagharanaạn: “Yoor ronyu ghan ni koIer torobọ iyaạr lọ awe ogim osophoghom mọ kolegheri ghan bọ ilọ Enaạn. Yoor rokpaariọm ghan ni oomo iitughiạn awe kesooromi loor, enaghanạn Kraist.” (2 Kọr. 10:5) Okạr agey, r’ologhonaạn aḍighaạgh aZihova yira kotue ni otuura oḍuạ obobọ opamaghạn ikarạph iitughiạn. w19.06 8 ¶1-3

Ghalamọ r’iduọn bidị olhoghoma bọ ni oḅonyonhu ozuan, Anạ, Devid, r’oniin Omoọr Suọr phọ ubeḍenọm aZihova ilọ olhoghonaạn aḍighaạgh. Bidị ughaạph ni ilọ ooḅaghamiạn aloor phọ abidị oḅenị nyodị dị eego esi okuamị ghan ooḅereghị. Bidị ughaạph ni omiteom oḅenị nyodị ipẹ eḍighi bọ kụ bidị omhoọgh bọ ooḅaghamiạn aloor phọ. Kụ bidị ughiọm ni ghisigh oghị ghan pạ otu iiḅereghị phọ aZihova. (1 Sam. 1:9, 10; Ps. 55:22; 73:17; 122:1) R’igbiririph ni, aZihova aphagharanaạn ni torobọ onyọ abidị. Anạ amhoọgh ni eephọ olhoghi. (1 Sam. 1:18) ADevid agẹ mọ: “Ibadị ni kụ aḍikparamineẹn oye elhiom eḍighinhom iyaạr phọ, kuolọ aZihova ratagharạn ghan ni nyodị kasighẹ esi oomo phọ idị.” (Ps. 34:19) Kụ omoọr suọr phọ opọ phọ, alhoghoma ni mọ aZihova “maphạm ḍighaạgh elhiom mọ [odị],” dị raaḅakiọm nyodị r’oroma ephomoghiạn. (Ps. 73:23, 24) Areḍeenhaan phọ iphẹn phọ itughemị iyira eeghe? Eeni amem, yira romoọgh ghan ni iiḅaghamị dị rekọm ghan ooḅaghamiạn aloor . Kuolọ yira kotue ni okaran eḍighi maạr dị: yira ogbirima ipẹ aZihova maloghonaạn ghan bọ bunhọn ḍighaạgh, ooḅereghị ghan, ḅilẹ onaghanạn ghan nyodị esi oḍighi ghan ipẹ odị uḅenị bọ iyira.—Ps. 143:1, 4-8. w19.06 17 ¶14-15

Ka/meera iyaạr dị owe oghaạph obobọ oḍighi esiphe nyinhạ umugholoor omạ aloor omiteom idiphọ onyọ Ogbaanhaạn AZihova. (Mic. 4:5) Ooḅeghiọn eḍeenhaan abutelhedom mọ epẹ Zeruselem, mem mọ oghiigh bọ Zizọs. Bidị ulhegheri ni idị abuḍiemiom aruukụ iiḅereghị aJu phọ olhọgh bidị ḍien. (Iiḍighi 5:17, 18, 27, 28) Ghalhamọ r’iduọn phọ ni, bidị u/soph ghan ḍio oghị ghan isiphẹ otu iiḅereghị phọ r’ogbeelhom ghan esi ogbo m’abunọ abumatuạn aZizọs. (Iiḍighi 5:42) Bidị u/meel uḍighanhaan oghiilhaan awe. Yira kotue ni okpạr opu aani oghiilhaan awe esi ogbor ghan omạ aloor omiteom mọ yira Abugbaanhaạn AZihova—epẹ otu oḍighi phọ ayira, otu askul, ḅilhẹ r’isiphẹ ekool phọ ayira.—Iiḍighi 4:29; Rom. 1:16.Eeghe kụ iḍighi kụ olhoghi abutelhedom mọ aḅaạl bọ? Bidị ulegheri ni iyaạr phọ eḍighi bọ kụ olhọgh bọ bidị ḍien, kụ bidị osighẹ idiphọ eghuan dị otuạn oḍighi ogbi phọ aZihova kụ rogilaạm bidị. (Luk 6:23; Iiḍighi 5:41; 1 Pit. 2:19-21) Mem dị yira olegheri mọ otuạn oḍighi ipẹ eru bọ elhiom kụ ulhọgh iyira ḍien, r’amem r’amem yira ku/meera ipẹ phọ eḍighi iyaạr dị yira kobilẹ okumu aZihova. w19.07 7 ¶19-20

AZizọs r’abutelhedom mọ odị oḍighi bọ buọ aJu phọ, udaphạn ghan ni Ḍio Ophooghian phọ, loor esi dị bidị urọl aani ni eeḍiạn Olhogh phọ aMozis. Kuolọ, aZizọs aḍighi ni aḍeenhaan esi ikpo onhụ r’iiḍighi, mọ i/beeph oḍighi iiḅi Ḍio Ophooghian phọ. (Mat. 12:9-11) Odị o/mhiịn oḍighi iiḅi r’olhoghonhaạn awe ḍighaạgh idiphọ okạ olhogh Aḍio Ophooghian phọ. Iḍighinhom araraạr phọ aZizọs igananami ni ekpanhạ iyaạr phọ otụ bọ kụ olhọgh olhogh Aḍio Ophooghian phọ. Aḍio Ophooghian phọ ingọ ghan we phọ Enhaạn eepoogh osighẹ aḍio phọ ooseenyom aZihova. Uukonhom Zizọs eghunotu dị osighẹ ghan ḍio ophooghian phọ oosenyom aZihova. Yira umhiịn ipẹ phọ esi ipẹ yira aạl bọ ilọ aZizọs, mem mọ odị odi bọ ni siphẹ ekạr emhạ phọ odị Nazerẹt: “Esi eḍighinom iyaạr phọ [aZizọs], odị aghị ni aḍigh obughotu phọ, kụ ameerạ aạl aḍinyạ iigbia phọ.” (Luk 4:15-19) Ḅilhẹ kẹn, Abutelhedom mọ ulhọgh agey eegu Ḍio Ophooghian phọ, dị tutụ ḍio ophooghian phọ, bidị u/kị ugbul rolo eḍu ḍizu phọ aZizọs.—Luk 23:55, 56. w19.12 4 ¶10

Torobọ onyọ aKristẹn kapinom aani ni bin rukumuan owạ awe iiḅi arokpom mọ. Yira kotoomaạm oḍighi phọ ophọn phọ we dị rowạ ghan obumoọny dị aphe. Ika? Omhiịn idị ekạr ri emite, ilọ obumoọny iraạr-asiạ dị aphe. Awe dị romạn ni 500 kụ umite owạ obumoọny phọ. Ekureriom mọ, mem dị 20 awạ meten, oniin onyọ abidị amhiịn ni obumoọny phọ ozo ibiakpạ. Oye phọ amhiịn bọ obumoọny phọ o/meera mọ awe osẹph nyodị. Eeghe kụ iḍighi? Odị aḅẹm mọ: “Oomo awe phọ kụ uwạ ni obumoọny phọ omhiịn.”Ibadị awe okịgh aani obumoọny phọ aphe bọ. Bidị u/moọgh oḍuomolhoghi, kuolọ rowạ ni olhoghonhaạn aḍighaạgh. Dị repel li ophaanyạ erubal ayira kụ ulhọgh ikuph owạ omhiịn abuphẹ okpẹ bọ. Eeni nạ r’aloor kụ kaa/zuanaan oye dị rawạ otuughạ aBaibul phọ. Toroboiperolbọ, eeni abukaaphọm dị roḍighi aani ekool phọ epẹ phọ kotue ni oozuanaan oye dị rawạ otuughạ aani igey phọ edi bọ siphẹ Ekpo onhụ phọ Enaạn. Mem dị onyọ umor obobọ onyọ umarani amhiịn oye dị kaḍighi onyọ amatuạn aKraist, ewạ mọ oomo abuphẹ oḍighi bọ ekool phọ omhoọgh ni ephigh otuạn obo aani. w19.07 16-17 ¶9-10

Otelhedom mọ aPọl aPọl aghiọm olhoghi Kristẹn phọ orọl bọ Filipai mọ ewạ ni dị bidị kokiọm ghisigh okiil eghiil phọ r’okparạm. K’emhiighom mọ ophighi bọ ookpomhoghan phọ kụ edị awe omhiigh ni ogbiphoghọm abumor r’abumarani phọ. Imhiigh mem mọ aPọl r’aSailạs omhegheron bọ ḍimhạgh ‘oḅeẹny epẹ Masidonia,’ mem dị bidị osi bọ Filipai lhạ phọ 50 C.E. (Iiḍighi 16:9) Bidị uuzuanaan ni anhịr dị oghol mọ Lidia epẹ phọ, dị “Omoọgh-we phọ aghughuron oIoghi odị ozuumaam onaghạn ipẹ aPọI aghaạph bọ” ilọ iiḅi iinaghạn phọ. (Iiḍighi 16:14) I/bia bịn odị r’oomo eghun otu odị oḍiiny muụm. Kuolọ i/mạn mem bịn eru phọ amhiigh okomọgh iiḅaghamhị. Awe ekpisi phọ ughoghọgh ni Pọl r’aSailạs oghiomaạn butooghiạ phọ, mọ rokomọgh igbaragbarạ emhạ phọ. Esi iduọn phọ, bidị ugurọgh ni Pọl r’aSailạs, okasaghiọm, kụ oḅenhị bidị mọ oḍuạ emhạ phọ. (Iiḍighi 16:16-40) Olhoghi abidị adugh ni ḍughụm? Eeye! Kokaạph aani ika ilọ abumor r’abumarani phọ orọl bọ omhoom ookpomhoghan phọ? Bidị uphighi aani ni egey eḍeenhaan esi okparạm! Eten dị iikia i/lo, emạ eḍeenhaan phọ aPọl r’aSailạs ikạr kụ ekparamhị bidị. w19.08 2 ¶1-2

Okạr agey “iimuma aruukuan” phọ iphẹn phọ eḅaramaạm ephomhoghiạn aZihova r’awe phọ odị. Ipẹ phọ keḅaramaạm kẹn ni oghaạph oḅenhị abunhọn ilọ omheeraam mọ yira omhoọgh bọ oghị esi aZizọs r’ookiạ oḍuomolhoghi phọ ayira. Kụ iḍighi kụ yira romuum ghan “iimuma aruukuan” phọ mem dị yira okạr ophinhom aani bin oḍighi oḍighi awe bumatuạn phọ amhạn bọ idiphọ maạr. (Mat. 28:18-20) Etigheri torobọ asidọl dị yira osoman, yira kotue ni omụ idiphọ aḍiḅaạl. Ibadị amem, araraạr dị eghịgh mudị ketue ni isophoghom iyira ogbeelhom iiḅi iinhaghạn phọ, remitoem ghan ghụn eepoogh ogbạ ikpo onhụ phọ. Esi omaạm, eeni otelhedom mọ aPọl arọl ikoli ologhotu epẹ Rom, mem mọ odị agẹ bọ ḍinyạ phọ aghiọm Kristẹn aFilipai phọ. Kuolọ ghalhamọ r’iduọn aPọl arọl bọ ni ikoli phọ, odị o/wilhẹ ghan oghaạph oḅenhị abukoriom mọ r’abulọ oghị ophogh odị. APọl aghaaphọm ni ikpo onhụ phọ r’oophugh eeḍiạn asidọl phọ iphẹn phọ, kụ iphẹn phọ ingọ ni bumor phọ oḍuom olhoghi r’akpọ oḅio oghaaphọm “oghaạph phọ [Enhaạn], dị okaphian oḅio u/lo mun.”—Fil. 1:12-14; 4:22. w19.08 12 ¶15-16

Ephigh iyaạr phọ ewạ bọ mọ yira omhoọgh osooromhi aloor pọ aloor esi dị eḅeeraạn aZihova. Otelhedom mọ aPita aghaạph ni iphẹn phọ aagholhomhi mem mọ odị agẹ bọ ikpo onhụ ibạl arodon phọ. Idị egbolomaam ikpo onhụ phọ aPita iphẹn, aḍinyạ phọ “Come Be My Follower” emhuoghaạph phọ 3, ekpịgh phọ 23 eḅẹm mọ: “Ophoophe aloor ekịgh idiphọ ikạ dị ketue ni eḍighi oye iyaạr. Eegharạ phọ ephẹn phọ ketue ni eḍighi idị ghalhamọ oye dị amhoọgh ni imạ asighalhanyạ ka/moọgh maạr oḍighinhom esi Enhaạn. Ḍierị phọ aḍighaạgh phọ, osooromhi aloor katue ni aḍighi iyaạr dị oye dị asoorom k’amoọgh maạr oḍighinhom esi aZihova. . . . [Odị] k’aḅaạl . . . li olhoghi okpẹ anạ iikpiạ loor esi osooromhi aloor phọ anạ.” Okạr oghaạph, enhọn iyaạr edi ni dị ketue ingọ iyira ibo dị epeleghiom oḍighi idị olhoghi aZihova k’aḅaạl ḍughụm? (Prov. 23:15) Epel oḅẹm mọ reḍighi ghan idị olhoghi aZihova kaḅaạl, yira oḅilhẹ kẹn ni romooghọm ghan suọ kirokirọ esi osooromhi aloor. Osooromhi aloor raḍighi ghan iyaạr dị awe rutuman ghan iyira. Okuamhị onhaghanhạn iphẹn phọ, pọ sighẹ mọ nạ kụ abuerị phọ awe phọ.—Mat. 7:12. w19.09 4 ¶8-9

Ikumor awe phọ rokumuan ghan ni iboom olhoghonhaạn aḍighaạgh bumor r’abumarani phọ. Bidị ro/loghoma ghan mọ bidị kụ unhighẹ obobọ kụ umhạn maạr opu buerị phọ. Kparipẹ ghụn bidị rozoọm ghan bumor r’abumarani phọ eten ephomhoghiạn. (1 Tẹs. 2:7, 8) Loor esi ephomhoghiạn r’osooromhi aloor phọ abidị, bidị rokaaphạn ghan ni bumor phọ r’iyoghoyoghọ ikpo onhụ. Oniin okumor oye dị oghol mọ Andrew, dị makumuan ni idiphọ okumor oye esi ibadị asiạ, aḅẹm mọ: “Mị awaaghị amiịn mọ mem dị okumor oye ookpomhoghan kụ amhoọgh ephomhoghiạn ḅilhẹ aḍighi oye dị adugh osighẹ arighirị retir ghan ni rokpom abumor r’abumarani phọ. Araagharạ phọ ipẹ phọ renyu ghan ookpomhoghan phọ odaphạn ikumor awe phọ.” Onhọn okumor oye dị oghol mọ Tony dị makumuan ni esi ibadị asiạ, aḅẹm mọ: “Mị rakparaghạ ghan ni osighẹ oḍighinhom oromha phọ ogẹ bọ siphẹ Filipai 2:3, ḅilhẹ kẹn mị rasighenhọm ghan mọ ophorị phọ oye phọ kụ aḍighi ogey upu imhị. Iphẹn phọ miloghonhaạn imhị ḍighaạgh dị mị ka/kpaariọm ghan bunhọn oḍighi ilọ mị aḅẹm obobọ odoghoḍi iilhogh ilọ amhị.” Ikumor awe phọ osooromhi loor, idiphọ aZihova. Ghalhamọ r’iduọn aZihova kụ aḍighi bọ Uw-emhoọgh itooghị phọ, odị “asooromhi ni loor” kụ rapạm ghan kameremị buphẹ “osoorom bọ siphẹ iisaạr phọ.” (Ps. 18:35; 113:6, 7) Ogbạ agey, aZihova alọgh ni ḍien buphẹ ophoophe bọ loor. w19.09 16-17 ¶11-12

Oghiọm aghisigh owạ ghan ophooghian eeḍiạn ofegumạ phọ aZizọs pọ moọgh ghan egey ephoghom. Yira roḍighi ghan oḍighi aZihova, kụ iḍighi kụ, kosighẹ eten phọ epẹ aZihova rawạ bọ kụ oḍighinhom. Yira kụ awe arukumuan phọ, kụ aZihova kụ Uw-oḍighi phọ. (Luk 17:10) Eḍighi maạr dị yira osighẹ eten phọ epẹ iḅeeraạn bọ iyira kụ oḍighinhom, epẹ eekunha phọ kikparanhaạn ni iyira ogbanạ ofegumạ phọ aKraist. Ḍierị phọ aḍighaạgh phọ, yira kotue ni oḍighi raraạr dị yira ootughiạn mọ yira ko/tue oḍighi ḅilhẹ okpạr opu raraạr dị eḍighi ipaanhaạn siẹn arukumuan phọ ayira, eḍighi maạr dị yira osighẹ iiḅakiọm mọ aZihova kụ oḍighinhom. Legheri mọ oye o/lho dị katue asophoghom ogbi phọ aZihova! (Rom. 8:31; 1 Jọn 4:4) Aḍiigbu ayira pọ osighẹ arughuenhian oruom Odẹ ephomhoghiạn phọ ayira, Zihova. Awe phọ orọl bọ mem mọ aZizọs omhoọgh bọ ekpooko obobọ owạ ghan bọ ilọ asuọ abidị, uroph ni oḅaạl olhoghi phọ abidị bịn owilhẹ ogbanạ ofegumạ phọ aZizọs. (Jọn 6:25-27, 51, 60, 66; Fil. 3:18, 19) Ḍieriphọ aḍighaạgh phọ, buphẹ ophomhoghiạn bọ Enhaạn ḅilhẹ r’amatuman phọ abidị ugbanạ ni ofegumạ phọ r’oḅaạl olhoghi siphẹ oomo adọl aghuḍum mọ abidị, r’oḍuomolhoghi okumuan r’aKraist epẹ k’akẹ. Idiphọ abidị, yira kopamanhạm ni oḅaạl olhoghi phọ ayira esi ogbanạ ofegumạ phọ aZizọs r’aḍigey aḍiitughiạn. w19.09 20 ¶1; 24-25 ¶19-20

Tuutughiạn ḍisẹph kirokirọ phọ nạ rakelhọm bọ esi iduọn m’otagharạn bọ nyinhạ osighẹ esi itughemhị okpẹ. P’eeghe ibo omhoọgh etagharạn dị elheeny k’ipẹ k’ipẹ! Gon ni omhiịn egbogh etagharạn dị retu ghisigh. Moọny amem ghisigh, aZizọs kapiemhi ni ikarạph aruukụ iiḅereghị r’itooghị omhạr awe. Enhaạn k’akoph ni “siadạm awe” phọ abuẹn rokumu bọ nyodị, kụ angọ bidị eepoogh oghelhọm aḍisẹph kirokirọ de dị moḍighi paradais. (Ogan. 7:9, 14) Koḅerion ni ogbogh opol awe ongọ ghuḍum, kụ otagharạn bidị osighẹ esi e/moon, aḍikpọ r’aḍuugh. (Iiḍighi 24:15) Mem Itooghị Oonịr Asiạ phọ, aZizọs r’abuphẹ r’odị kotooghị bọ k’oḅọph ni kụ oḍighi idị awe komunughan ḅilhẹ omoọgh imạ asiya r’Enhaạn. Amem otagharạn oḅilhẹ ooḅulhemhi phọ ophọn phọ ketọl idiphọ aZubili Izrạl phọ. Esi iduọn phọ, oomo abuphẹ oḅạr bọ okumu aZihova, koḅilhẹ ni omunughan, ḅilhẹ otagharạn osighẹ esi ikarạph. w19.12 12-13 ¶14-16

Siphẹ oḅẹl okuron asiạ oghill aKristẹn phọ, oye inmo dị oghol mọ Josef dị ḍien odẹ phọ oghol mọ Banabạs amiteom ni loor odị dị aZihova kasighẹ nyodị aḍighinhom. (iiḍighi 4:36, 37) Mem mọ opọ aSọl aḍighi bọ onyọ aKristẹn, ibadị abumor phọ ughiilhaan ghan ni otuman odị loor esi iduọn odị agbiphoghọm ghan bọ rookpomhoghan phọ. Toroboiperolbọ, aBanabạs oye oseenyaạn phọ aghị ni alhoghonhaạn ḍighaạgh Sọl. (iiḍighi 9:21, 26-28) Onyebeel roten, ikumor awe phọ orọl bọ epẹ Jeruselem umhiịn ni mọ ewạ dị kokị otomoghiom bumor r’abumarani phọ odi bọ Antiọk epẹ Siria. Anhiạn kụ edị bidị orom bọ m’aghị? ABanabạs! Bidị usaḅạr ri igey. ABaibul phọ uḅenhị iyira mọ aBanabạs “abo ni kụ alọm oomo phọ abidị mọ osighẹ iloghi phọ abidị okpasaghiọm Omoọgh-we phọ.” (Iiḍighi 11:22-24) Iniin phọ kẹn ni ḍio arodon, aZihova katue ni ulhoghonhaạn iyira ḍighaạgh oḍighi “oọny dị raseenyaạn ghan” bumor r’abumarani phọ. Esi omaạm, odị katue ni usighẹ iyira aaḍereghiọm buphẹ oroph bọ buọ emphomhoghiạn abidị esi aḍuugh. Obobọ odị atue ni aḍighi idị yira kokị opogh obobọ omạgh fon oye dị u/moon obobọ oḅạ iyạl ikpo ikpo onhụ okparamhị oye dị aḅonyonhu azuan. Nạ kameera ni aZihova asighẹ nyinhạ aḍighinhom idiphọ aBanabạs ḍughụm?—1 Tẹs. 5:14. w19.10 22 ¶8

Ibadị amem dị yira rotelhean obobọ rokumuan r’arighirị ayira, yira ro/miịn ghan imạ araagharạ phọ abidị bịn, kuolọ yira romiịn ghan kẹn ni sipiomạn abidị. Eeghe kụ kilhoghonhaạn iyira ḍighaạgh oḅạr arighirị phọ ayira etigheri sipiomạn phọ abidị? Ogbạ agey, yira ko/gon omhiịn dị abumor r’abumarani phọ ayira komunughan. Loor esi iduọn phọ, torobọ amem lọ yira osighẹ oye righirị, ewạ dị yira kolọgh inyaạm mem mem mọ okparamhị asiya arighirị phọ ayira. Eḍighi maạr dị arighirị phọ ayira opiomạn, Kewạ ni dị yira kongọ imạ oroma dị ayoghoyoghọ dị akpasị siphẹ Ekpo Onhụ phọ Enhaạn. (Ps. 141:5) Eḍighi maạr dị bidị oḍighi iyaạr dị ephin esi ayira, ewạ dị yira kosạr obilhenhaạn bidị. Mem lọ yira osạr owilhenhaạn bidị, ewạ ni dị yira kogona loor obọ yira komeel ghan bọ ḍiphil oḅilhẹ ghan oghaạph oghol ikarạph phọ ghisigh. P’eeghe idị emhạn ghụn maạr ogbon ipẹ abumor r’abumarani phọ ayira kotue bọ oḍighi kparipẹ r’asidugh abidị! Yira oḍighi iduọn phọ, pọ kekparamhị ni siya arighirị phọ ayira, loor esi dị ewạ dị oomo phọ ayira komoọgh righirị dị asiya phọ ekpạr mem igbogh iiḅaghamhị phọ. w19.11 6 ¶13, 16

Iduọn yira rotughemhị bọ we Baibul phọ, oḍighi oomo ipẹ yira kotue bọ ‘oḍighi awe bumatuạn . . . , otughemị bidị ooko oomo araraạr phọ [aZizọs] atọ bọ.’ Ewạ mọ yira olhoghonhaạn ḍighaạgh we omhiịn iyaạr phọ emhạn bọ ni maạr okumu aZihova ḅilhẹ r’obakị aani Omhạr phọ odị. Iduọn phọ pọ remạ ghan mọ yira okparaghạ ghan olhoghonhaạn awe ḍighaạgh dị bidị kosighẹ oḍighinhom ipẹ bidị rotuughạ bọ, oḅọgh loor ongọ aZihova, kụ oḍiiny muụm. Ipẹ bịn kụ idị bidị kotue okpetenhaan ḍio phọ aZihova.(1 Pit. 3:21) Amem mọ esugha bọ dị aḅirinhi phọ kasi eekunha i/bụgh mun. Loor ephigh phọ ephẹn phọ, ku/piemhi mem ayira oghiọm aghisigh otughemhị ghan awe dị u/moọgh ḍiḅeeraạn oḍighi abumatuạn aKraist. (1 Kọr. 9:26) Oḍighi phọ awạ ni m’oogboronhom! Awe okpolhan ni dị remoghi mọ oghaạph dom Omhạr phọ oḅenhị kụ amem egbi oten. w19.10 11-12 ¶14-15

Torobọ alhạ, mem Ariiḍio Otuạn Iiḅereghị Orọl Okoọny phọ, eelhe phọ Izrạl uukpomoghan ghan ni kụ osighẹ inhạm ophinyonhọm rikiạ. Arikiạ phọ ipẹ phọ ilhoghonhaạn ghan ḍighaạgh ootughianhạm awe phọ Izrạl mọ ewạ ni dị kootol ikarạph phọ abidị! Eḅẹl phọ, opinyọn rikiạ phọ amhoọgh ghan oḍighi osighẹ insẹns phọ ookuom iiḅu aniạn phọ reda bọ, bịn oomo osoph phọ amiigh ophur imạ eḍu. Epẹ phọ itughemhị iyira eeghe? ABaibul phọ amạ ni amiteom mọ iiḅereghị phọ ipẹ aZihova ranaghạn ghan bọ ekịgh insẹns. (Ps. 141:2; Ogan. 5:8) R’olhọgh eegu kụ edị ogbogh opinyọn rikiạ phọ asuọm ghan bọ insẹns phọ ghisigh aZihova. Iniin phọ kẹn ni kụ edị ewạ dị yira kooḅereghiọm ghan r’olhọgh eegu, mem dị yira rooḅereghị aZihova. Yira olọgh ni nyodị eegu agey. Yira okạr kụ rosereghiạn iduọn Olemhiạ phọ ayira ungọ aani bọ iyira eepoogh oḅaanhaạn ghan oḅilhẹ oḍuraan otuman odị, idiphọ odẹ r’oọny. (Jems. 4:8) Odị usighẹ iyira idiphọ arighirị odị! (Ps. 25:14) Yira okạr kụ omaghamhị maạr eepoogh phọ ephẹn phọ, dị yira r’amem r’amem ko/wạ oḍighi iyaạr dị nyodị i/ḅeeraạn. w19.11 20-21 ¶3-5

Ibadị awe osighẹ ika rukumuan ekpisi anyinha? Ibadị areelhe, amem r’inyaạm dị rolọgh ghan esi arukumuan epel idị merọl ghan. Ibadị amem, awe dị rolọgh ghan muboom amem siphẹ arukumuan phọ abidị ro/moọgh ghan mem ophooghian, mem orọl r’eghunotu abidị, obobọ mem okuamhị otuughạ ilọ aZihova. (Eccl. 2:23) Ḍierị phọ aḍighaạgh phọ, abunhiin awe ro/wạ ghan okumuan, bidị rowaaghị ghan ghụn egbaạm. (Prov. 26:13, 14) Ooḅeghiọn ophogh eten dị aZihova r’aZizọs osighẹ rukumuan, dị egbạgh r’eten phọ epẹ aḅirinhi phọ. Yira olegheri ni mọ arukumuan eḅeeraạn iikiạ aZihova. AZizọs aghaạph ni ipẹ phọ aagholhomhi, mem dị aḅẹm mọ: “Odẹ phọ amị ra/pooghian ghan oḍighi, kụ mị raḍighi aani ghan bọ.” (Jọn 5:17) Tuutughiạn ilọ iboom arukumuan phọ aZihova akumuan bọ, mem mọ odị alhẹm bọ ruukpaạny phọ ko/tue bọ ogbi omunhenhi, raanhaạn phọ ḅilhẹ r’okuaḍio phọ. Yira oḅilhẹ kẹn ni omiịn eḍeenhaan oḍighi aḍighaạgh phọ Enhaạn esi imạ olhẹm mọ odị siẹn ade phọ. w19.12 2 ¶1-2

Ika kụ idị aDevid arue bọ atuman aZihova. ADevid asighẹ olhẹm mọ kụ atuughaạm ilọ aZihova. Mem dị aDevid aḍighi onyọ iḍoọgh, odị arọl ghan erugh kụ igbogh, ophogh iyool igạ odẹ phọ odị. Eeni opọ kụ amem mọ odị amhiigh bọ ogbirima ilọ araraạr phọ aZihova alhẹm bọ. Esi omaạm, mem dị odị aphogh anyụ okuaḍio phọ ḍughul, odị o/mhiịn ghan simuunịr araanhaạn bin, kuolọ aḅilhẹ ghan ni arọph amhiịn raagharạ Opọ alhẹm bọ. (Ps. 19:1, 2) Mem dị aDevid agbirima ilọ eten phọ epẹ olhẹm bọ oye, odị amhiịn ni ogbogh osụ-olhoghi phọ aZihova. (Ps. 139:14) Idiphọ aDevid akparaghạ bọ olhegheri ilọ olhẹm mọ aZihova, odị amhiịn ni mọ onọ o/si r’eraạph aZihova. (Ps. 139:6) Yira otuughạ eeghe? Torobọ aḍio siphẹ adọl aghuḍum mọ anạ, gbirima ghan raraạr dị olhẹm mọ aZihova ekitonhom bọ nyinhạ—idiphọ ireeny phọ, inhạm mọ, ḅilhẹ r’awe phọ etughemhị nyinhạ ilọ aZihova. Bịn torobọ aḍio nạ kamoọgh ghan ni iboom araraạr otuughạ ilọ Odẹ ephomhoghiạn phọ anạ. (Rom. 1:20) Kụ torobọ aḍio nạ kamiịn ghan dị ephomhoghiạn phọ nạ amhoọgh bọ aghị esi aZihova kebụgh ghan bịn. w19.12 19-20 ¶15-17

AMozis asighẹ aḍighinhom ipẹ odị atuughạ bọ. Mem dị odị ramạn 40 asiạ, odị asaḅạr ooḍikuan r’awe phọ Enhaạn, we aHibru phọ, kparipẹ dị kolegheriom nyodị idiphọ “oọny onyanị odaạm eelhe phọ.” AMozis awilhẹ ni orọl aḍigbogh adọl. Odị atuạn ni oḍighan abuọ aHibru phọ odi bọ dọl arebenhẹ epẹ Izipt, alhọgh ghuḍum odị esi ooto r’osooromineen, idị eḍighi bọ aFero odaạm emhạ dị amhoọgh iikpọ agey dị awe phọ Izipt osighẹ nyodị idiphọ emhụgh. P’eeghe ookiạ omheeraam dị aMozis amhoọgh! AMozis aḍuomolhoghi aZihova. Odọ phọ oḍuomolhoghi phọ ophọn phọ kụ azin igey asiya r’aZihova. (Prov. 3:5) Yira otuughạ eeghe? Idiphọ aMozis, nạ r’aloor kụ kasopha mughumọ, nạ kasaḅạr ri okumu Enhaạn r’ooḍikuan awe phọ odị. Eeni kewạ ni mọ yira ophinyọn rikiạ orue okumu Enhaạn, awe dị u/legheri aZihova otue ni usophoghom iyira. Kuolọ, eḍighi maạr dị yira oḍuomolhoghi Odẹ k’akẹ phọ ayira, yira kokuphom ni owol m’odị kubakị ni iyira! w19.12 17 ¶5-6

Ghalhamọ r’iduọn osighẹ bọ ni iisaạr isiẹn ade phọ kụ ulhemhọm iyira, yira omạn ni maạr opu eezuạ iisaạr. Uguạ omhiịn iniin ariphigh phọ eḍeenhaan bọ mọ yira omoọgh ni maạr oḍighinhom esi aZihova. Odị ulhemọm iyira inyaạm orue otuughaạny araagharạ phọ odị. (Gen. 1:27) Iduọn phọ pọ, odị uphophe iyira apuemhi oomo phọ olhẹm mọ odi bọ siẹn ade phọ, aḅọgh de phọ r’inhạm mọ alọgh ḍighaạgh ayira. (Ps. 8:4-8) Etigheri ikarạph phọ Adạm, aZihova akiọm ni ghisigh amaghamhị maạr we. Odị umaghamhị ni iyira maạr iboom dị tutụ angọ ogina oọny phọ odị Zizọs, omhugh otagharạn ayira esi ikarạph. (1 Jọn 4:9, 10) Dị eego esi etagharạn phọ, aZihova kaḅerion ni buphẹ ikarạph phọ Adạm mekọm bọ ḍuugh engọ, “[bugey r’abukarạph].” (Iiḍighi 24:15) Ekpo Onhụ phọ odị eḍeenhaan mọ yira omạn ni maạr esi odị etigheri e/moon, dọl ekulhom mọ ayira, obobọ aḍikpọ.—Iiḍighi 10:34, 35. w20.01 15 ¶5-6

Oye ra/le ghan erua oḍuomolhoghi ogheel k’akẹ phọ. Enhaạn kụ rangọ ghan. (1 Tẹs. 2:12) Yira kuu/puru yogh ghan kẹn sipuru dị ketue ni epin olhoghi abunhọn awe. Esi omaạm, yira ku/puru ghan anhịr onyọ umor dị osagharạn uwaloor phọ ipẹ odị kaloghoma bọ orọl isiẹn ade phọ k’agee-pọ dị olom odị u/lo aani. Loor esi dị yira olegheri ni mọ siphẹ omhoom aḅirinhi phọ, aZihova “kagbaanyamhị ni eephuạ atorobọ iyaạr lọ repooghu.” (Ps. 145:16) Yira rokoph aani ghan sighuḍum ayira, eḍighi maạr dị yira u/zoọm ghan buphẹ osagharạn bọ uwaloor phọ idiphọ awe dị omhạn maạr opelheghiom. Ika? Loor esi dị aBaibul phọ uḅenhị iyira mọ abuniin abidị otue ni omeel oḍuạ. (Mat. 25:10-12; 2 Pit. 2:20, 21) Eḍighi maạr dị yira “roophughemi ghan bunọn,” ghalhamọ r’abuẹn osagharạn bọ ni uwaloor phọ obobọ onyọ umor dị aaleghaan obobọ buphẹ mokumu bọ aZihova k’amem dị mebia, etue ni inyu iyira osighẹ abidị idiphọ emhụgh. (Jud 16.) Bịn eḍighi maạr dị bidị oḍighi igbogh ikarạph obobọ owilhẹ ookpomhoghan phọ, omheeraam mọ ayira esi aZihova atue ni aaphoọm obobọ yira otue ni obilhẹ okumu aZihova. w20.01 29 ¶9-10

Idiphọ “abuuḅi anmụny” aZihova, yira roḍighi ghan ni ipẹ yira kotue bọ, otuughaạny odị. Yira rotuughaạny ghan raagharạ ph’odị esi ophomhoghiạn ghan, oyoghoyoghọ, ḅilhẹ r’osạr ghan owilhenhaạn abunhọn. Eeni etue ni enyu buphẹ k”olhegheri bọ Enhaạn otuughạ ilọ Enhaạn mem dị omhiịn imạ aroozọ ph’ayira. (1 Pit. 2:12) Aburudẹ r’aburunhiin dị oḍighi Kristẹn omoọgh egey ephigh otuạn otuughaạny aZihova esi eten phọ epẹ bidị kozoọm ghan bọ nmụny phọ abidị. Idị eḍighi bọ, mem dị bidị otuughaạny aZihova kenyu ibạm anmụny phọ abidị oḍigh arighirị r’Odẹ ephomhoghiạn phọ ayira, Zihova. Yira robagaam ghan kẹn Odẹ k’akẹ phọ ayira, Zihova, koḅilhẹ oḍighi idị abunhọn awe kolegheri aani nyodị. Oomo phọ ayira rologhoma aani ghan ni idiphọ Uw-emhạ phọ Devid alhoghoma bọ kụ agẹ bọ mọ: “Mị kabagaam ni aZihova.” (Ps. 34:2) Kokaạph ika, eḍighi maạr dị yira rokiilhom umugholoor? Ika kụ idị yira kotue omoọgh akpọ olhoghi? Yira komoọgh ni akpọ olhoghi mem dị yira ootughiạn ibo phọ k’engọ bọ aZihova ḅilhẹ r’ipẹ abunhọn komooghọm bọ suọ mem dị bidị otuughạ aani ilọ aZihova. AZihova k’ungọ ni iyira akpọ oḅio phọ ewạ bọ. Odị angọ ni akpọ olhoghi Kristẹn oḅẹl okuron asiạ phọ, kụ k’ungọ aani ni iyira.—1 Tẹs. 2:2. w20.02 11 ¶12-13

Ibadị rotuughạ ghan ni Baibul phọ koḍiiny muụm. Kuolọ abuniin odi ni dị yira rotughemhị ghan Baibul phọ dị rokiilhaan ghan oḍighi abumatuạn. Bidị rokelọm ghan ni ituughạ aBaibul phọ, kuolọ u/meera uḍiiny muụm. Oomo phọ ayira omhoọgh bọ we dị rotughemhị ghan Baibul, rowạ ghan ni olhoghonhaạn abidị ḍighaạgh obọ oḍighi aani bumatuạn aKraist. AZihova rawạ mọ awe ooḅereghị nyodị loor ephomhoghiạn dị bidị omhoọgh oghị esi odị. Esi iduọn phọ, yira rowạ ghan olhoghonhaạn abidị ḍighaạgh dị bidị kolegheri mọ aZihova apomoghiạn ni bidị iboom aḅilhẹ amoọgh ogbolhomaam abidị. Yira rowạ oḍighi idị bidị komiịn aZihova idiphọ “odẹ abuphẹ aburudẹ u/lo bọ r’odị rakoph ghan rukpukele anmariịr.” (Ps. 68:5) Mem dị opọ nạ ratughemhị ghan bọ Baibul phọ amhiịn odọ idị Enhaạn aphomhoghiạn nyodị, kenyu ni nyodị ophomhoghiạn aani Enhaạn. Esi iduọn phọ, loghonhaạn ḍighaạgh buphẹ nạ ratughemhị ghan bọ Baibul phọ olhegheri mọ Enhaạn ephomhoghiạn phọ ayira rawạ mọ bidị omhoọgh ghuḍum k’agee-pọ, kụ esi iduọn phọ, raloghonhaạn ghan ni bidị ḍighaạgh omhoọgh aghuḍum mọ akuẹn phọ. w20.01 3 ¶7-8

Otelhedom mọ aPọl asooromhi loor, kụ iḍighi kụ odị awạ ni aḅilhẹ asighẹ iidereghị ḍighaạgh arighirị phọ odị. Odị oo/ḅaghamhiạn loor mọ komiịn nyodị idiphọ oye dị adugh eḍighi maạr dị abunhọn oodereghị nyodị simem iiḅaghamhị. (Kọl. 4:7-11) Yira osooromhi loor olhegheri mọ yira omoghi ni olhoghonhaạn aḍighaạgh, abumor r’abumarani phọ ayira koḅaạl li olhoghi obakị ayira. APọl alhegheri ni mọ aḍinyạ iigbia phọ keedereghị ni nyodị. (Rom. 15:4) Ḅilhẹ engọ nyodị osụ-olhoghi okaran atorobọ iiḅaghamhị. (2 Tim. 3:15, 16) Omhunhenhiom iyạl amem dị olhọgh Pọl ikoli epẹ Rom, odị alhoghoma ni mọ aḍuugh onọ meteẹny. Odị aḅenhị Timoti mọ aagboronhom aphạm “rinyạ phọ.” aghimọm (2 Tim. 4:6, 7, 9, 13) Eeghe kụ iḍighi? Loor esi dị eeni ikpooghinheen arinyạ phọ ipẹ phọ iḍighi siikpịgh arinyạ iigbia aHibru phọ, dị aPọl asighẹ atuughaạm ghan ituughạ ogina odị. Mem dị yira ogbor ghan otuughạ Ekpo Onhụ phọ Enhaạn idiphọ aPọl, aZihova kasighẹ ni rinyạ iigbia phọ kụ uuboọm iyira, etigheri odẹgh ophogh lọ yira osoman. w20.02 23-24 ¶14-15

Eliphaz, Bildad, r’aZophar u/lọgh mem uutughiạn ipẹ bidị kotue bọ ologhonhaạn ḍighaạgh Job. Kparipẹ ghụn, bidị uutughiạn idị bidị komạ omiteom mọ ikarạph aJob kụ rekpẹ nyodị. Bidị ughaạph ni raraạr dị eru inẹ, kuolọ ibadị ipẹ bidị oghaạph bọ ilọ aJob r’aZihova, i/kpeanhaạn obobọ i/tu inẹ. Bidị uḅẹm bịn m’aJob ko/gey oye. (Job 32:1-3) Iphẹn phọ itir ika aZihova? AZihova aghaghạm ni olhoghi iraạr ph’abidị. AZihova aḅẹm mọ bidị awe dị olhoghi u/sụ, kụ aḍighi idị bidị oghị oteẹny Job mọ aaḅereghinhaạn bidị. (Job 42:7-9) Yira otuughạ ni ibadị araraạr esi ikarạph areḍeenhaan phọ Eliphaz, Bildad, r’aZophar. Eḅẹl phọ, ku/soph ghan ooruẹn ungọ bumor phọ ayira. (Mat. 7:1-5) Kparipẹ ghụn, olher ghan rurụ onhaghanhạn bidị kụ ogbi oghaạph iyaạr. Pọ kụ amem dị yira kokạr otue onaghanhạn dọl phọ abidị. (1 Pit. 3:8) Omhunhenhiom iyạl, mem lọ yira koḅạ, omhiịn ni mọ ikpo onhụ phọ ayira eyoghoyoghọ ni ḅilhẹ ekpeanhaạn. (Efẹ. 4:25) Omhunhenhiom iraạr, aZihova amoọgh ni ḍiḅeraạn atorobọ iyaạr lọ yira roḅenhị onhọn oye. w20.03 22-23 ¶15-16

Amem dị yira rogbor kotughemhị bunhọn ilọ aZihova, kụ edị yira phọ rokuamhị ghan kolhegheri aZihova. Esi omaạm, yira romiịn ghan ni egaan eḍeenhaan igbiririph phọ aZihova mem dị uḍiemhiom iyira oghị oteẹny abuphẹ omhoọgh bọ iiḅi arokpom mọ. (Jọn 6:44; Iiḍighi 13:48) Yira romiịn ghan ni iikpọ dị Ekpo Onhụ phọ Enhaạn emhoọgh mem dị abuphẹ yira rotughemhị ghan bọ owilhẹ ikarạph aroozọ abidị, kụ omiigh okpolhoghiạn omhoom oye phọ. (Kọl. 3:9, 10) Yira romiịn ghan kẹn eḍeenhaan okparạm mọ Enhaạn amhoọgh bọ aghị esi awe, iduọn odị rurom ghan bọ iyira oghị kụ oḅilhẹ oghị oteẹny awe phọ odiighi bọ ephẹn ekool phọ ayira dị bidị kotuughạ ilọ odị kụ omoọgh pelieẹny. (Rom. 10:13-15) Toroboiperolbọ, etigheri onhụ asiạ dị yira mokumu aZihova, r’amem r’amem yira ku/peghom ephegh siya phọ ayira r’odị. Eniin eten dị yira koḍeenhaan mọ yira omaghamhị ni maạr siya phọ ayira r’aZihova pọ oghaaphạn ghan odị esi iiḅereghị. Ogey oghaaphạn kụ rakparamhị ghan siya awe. Kụ iḍighi kụ ḍuraan atuman Enhaạn esi ooḅereghị ghan egbạ gbạ amem, ka/kiilhaan oḅenhị ghan odị ipẹ nạ akạr bọ alhoghoma. w19.12 19 ¶11, 13-14

P’eeghe iidereghị dị iphẹn phọ ingọ iyira! Idiphọ Uw-emhạ Omhạr phọ k’Enaạn, aZizọs k’aakonom oomo iminimiịn phọ aSetan r’aḅirini phọ odị mokọm bọ. (Isa. 65:17; 1 Jọn 3:8; Ogan. 21:3, 4) P’eeghe oḍuom olhoghi dị ipẹ phọ ingọ iyira! Ghalamọ r’iduọn odị ungọ bọ ni iyira oḍighi dị aḅarạm ipaanaạn, odị odi ni r’ayira, obakị ayira siẹn asiḍio eekuna phọ. (Mat. 28:19, 20) P’eeghe idị ipẹ phọ ingọ iyira akpọ oḅio! Iidereghị, oḍuom olhoghi, r’akpọ oḅio—eḍighi iniin arokọ ophighiom eephọ olhoghi phọ ayira. Ika nuụn kụ edị nạ katue aḅilẹ amoọgh eephọ ologhi phọ anạ, mem dị iiḅaghamị kirokirọ reekpoḍị nyinạ? Esi oḍighi aani araraạr phọ ipẹ aZizọs aḍighi bọ. Eḅẹl phọ, ḅeeḅereghị, kụ arolonaạn ghan esi iiḅereghị. Edị emuneniom iyạl, naghanạn ghan aZihova kụ agbeelhom ghan r’oophugh ghalamọ r’amem dị ekpạr ri. Edị emuneniom iraạr, meera ghan arighirị anạ ologhonaạn nyinạ ḍighaạgh mem dị nạ asoman oḍẹgh ophogh. Pọ kụ amem dị eephọ phọ epẹ k’Enaạn keeḅakị ekpom mọ anạ. (Fil. 4:6, 7) Kụ, idiphọ aZizọs, nạ kakpạr ri apu torobọ ipaanaạn.—Jọn 16:33. w19.04 13 ¶16-17