April

Nạ ramiinhọm ni igbagarạ iiḅaghamhị ḍughụm? Eeni oye siphẹ ookpomhoghan phọ maḍighi iyaạr dị repin esi anạ. (Jems. 3:2) Obobọ eeni awe dị r’anạ reḍighi ghan oḍighi obobọ rekị ghan askul rogilaạm ghan nyinhạ loor iduọn nạ rakumu bọ aZihova. (1 Pit. 4:3, 4) Obobọ abuọ eghunotu anyinha eeni rokparaghạ ghan okikima anạ oghị ghan ituughạ obobọ oḅaanhaạn abuphẹ r’anạ oḅọph bọ omheeraam mọ. (Mat. 10:35, 36) Iiḅaghamhị phọ kụ ephughạn, eeni nạ kaloghoma mọ kenighẹ ghụn owilhẹ okumu aZihova. Kuolọ kuphom ni owol mọ etigheri torobọ ipaanhaạn dị nạ asoman, aZihova kangọ ni nyinhạ osụ olhoghi r’inyaạm okparạm. AZihova aḅarạm ni reḍeenhaan idị awe dị u/munughan orue okaran ipaanhaạn dị bidị osoman, siphẹ Ekpo Onhụ phọ odị. Eeghe kụ iḍighi? Pidị yira otuughaạny bidị. Ipẹ kụ idị aZihova anyu otelhedom mọ Pọl ogẹ. Aạl ghan igẹ areḍeenhaan awe aBaibul phọ ketue ni iidereghị iyira ḅilhẹ ingọ iyira oḍuomolhoghi. Toroboiperolbọ, orue omhooghọm asuọ igẹ aBaibul phọ epelhom ni oḅẹm mọ aạl ghan aBaibul phọ bịn. Ewạ mọ yira omheera Aḍinyạ Iigbia phọ eḅọl iitughiạn ayira ḅilhẹ etir rokpom ayira. w21.03 14 ¶1-2

Nạ amiịn ni buphẹ yira rokaạph ghan bọ iiḅi iinhaghạn phọ koḅenhị idiphọ iizuphạ dị meteẹny obugha ḍughụm? Kosighẹ iraạr araraạr kụ olegheriom mughumọ iduọn phọ ni. Eḅẹl phọ, Nạ kakaạph ghan iiḅi iinhaghạn phọ r’oogboronhom. Ibugha phọ re/bia ghan; kụ ka/piemhi mem. Omhunhenhiom iyạl, nạ kamoọgh ni ibo mem dị awe omhegheron agey oru esi oghaạph iiḅi iinhaghạn phọ. ABaibul phọ aḅẹm mọ: “Awe romoọgh ghan oḅaạl olhoghi mem ibugha.” (Isa. 9:3) Omhunhenhiom iraạr, nạ kamiịn torobọ oye idiphọ odị katue ni aḍighi aani onyọ amatuạn aKraist, kụ nạ alhegheri idị nạ kakaạph kụ keḅeraạn nyodị. AZizọs o/phogh ghan buọ aSameria phọ idiphọ abutelhedom mọ odị ophogh ghan bọ. Kparipẹ ghụn, odị amhiịn bidị idiphọ awe dị kotue ni oḍighi bumatuạn odị. Ewạ ni dị yira komiịn aani we ekool phọ ayira idiphọ awe dị kotue ni oḍighi aani bumatuạn aKraist. Otelhedom mọ aPọl aphighi ni imạ eḍeenhaan dị yira kotuughaạny aani. Odị alhegheri omheeraam abuphẹ odị aghaạph bọ r’aḅenhị, arọph ghan anhaghanhạn raraạr dị eḅeraạn we phọ, aḅilhẹ amhiịn we phọ odiphọ abudị kotue ni oḍighi aani bumatuạn aZizọs. w20.04 8-9 ¶3-4

Kparipẹ r’osophonhaan oye ooruẹn, ḍighi oomo ipẹ nạ katue bọ, onhaghanhạn ipẹ oye phọ alhoghoma bọ. AZihova kụ oye dị akạr unhaghanhạn iyira amadạn. Kụ iḍighi kụ, ḅenhị odị alhoghonhaạn nyinhạ ḍighaạgh omhiịn aani abunhọn eten phọ epẹ odị ramiịn ghan bọ ḅilhẹ r’olhegheri idị nạ kaḍeenhaan ghan bidị igbiririph. Nạ ka/tue alegheri obobọ aḅẹm mọ opeẹr onyọ umor obobọ onyọ umarani kụ akpẹ dị nạ kaḍeenhaan igbiririph. Oomo abidị rosoman ghan ni ipaanhaạn, ibadị ekighimaạm aani idiphọipẹ aJona, Ilaija, Hega, ḅilhẹ r’aLọt—eeni osoman iiḅaghamhị dị bidị r’aloor kụ ukọm ni. Ogbạ agey, oomo phọ ayira rokọm ghan ni iiḅaghamhị kongọ loor ayira. Kụ iḍighi kụ, eḍighi ni osụ olhoghi dị aZihova kuḅenhị iyira mọ ipẹ etir bọ ophoriphọ oye phọ itir aani ghan iyira. (1 Pit. 3:8) Mem dị yira onhaghanhạn aZihova, yira rokparamhị ghan ookiạ amuḅọph eghunotu abumor r’abumarani kirokirọ phọ. Kụ iḍighi kụ, olher ghan rurụ ongọ, olhegheri, kụ oḍeenhaan ghan igbiririph bumor r’abumarani phọ ayira. w20.04 18-19 ¶15-17

AZizọs aphighi ni emạ eḍeenhaan esi onhaghanhạn ghan aZihova. Kụ iḍighi kụ, eten dị emhạn maạr dị yira konaghanhạn ghan aZihova pọ okuamhị odaphạn igbaranhuọm aruwol phọ aZizọs. (Jọn 8:29) Orue osighẹ igey phọ kụ orolhọm, pọ yira omoọgh okuphom owol mọ aZihova kụ Enhaạn igey phọ, kụ mọ torobọ iyaạr dị odị uḅenhị iyira siphẹ Ekpo Onhụ phọ odị Baibul phọ, igey phọ ni. Ḅilhẹ kẹn, yira omoọgh okuphom owol mọ aZizọs kụ aMesaya phọ oguanhaan bọ ni. Ibadị ḍio arodon rookia ni mughumọ mosagharạn ni Zizọs idiphọ Uw-emhạ Itooghị Omhạr phọ k’Enhaạn. AJọn aphụr ri rurụ mọ “ibadị awe dị rookeleghi we” momite, dị kotue ni ookelheghi buphẹ uu/kolhobian bọ ogbạ omheremhị igey phọ ilọ aZihova r’aZizọs. (2 Jọn 7-11) AJọn agẹ mọ: “Anhiạn kụ ogbaạm okpẹ phọ? Oye phọ opọ raḅẹm ghan bọ mọ [aZizọs] kụ k/aKraist pho?” (1 Jọn 2:22) Mamạn eten dị yira kotue okpetenhaan iikelheghian pọ otuughạ ghan Ekpo Onhụ phọ Enhaạn. Amem dị yira oḍighi iduọn phọ kụ edị yira kotue olegheri aZihova r’aZizọs. (Jọn 17:3) Kụ kẹn, opọ kụ amem dị yira kokạr otue oḅẹm mọ yira opạm ni igey phọ. w20.07 21 ¶4-5

Eniin eten dị yira ko/ḍighi ḍighiigh ‘okpeteghaan’ okị esi abuẹn r’ayira rokiil bọ, pọ omheera ghan dị bidị koḍighi raraạr eten phọ epẹ abidị, kparipẹ reten phọ ephẹn ayira. (Rom. 14:19-21; 1 Kor. 8:9, 13) Ekpeanhaạn ni oḍighi iduọn phọ, loor esi dị yira u/tọl aani idiphọ oye dị rakiil eghiil owol ade, odị rakparaghạ ghan dị ogina odị bịn kụ kamoọgh iikpiạ phọ. Torobọ okiilom rawạ ghan ilọ asuọ odị bịn. Esi iduọn phọ, oniin rakul ghan ni nyoniin, obọ odị kụ aḍia ghisigh. Kuolọ pakirị phọ ophọn ayira, yira r/oopikian ghan siloor. (Gal. 5:26; 6:4) Aḍiigbu ayira pọ olhoghonhaạn aḍighaạgh ibadị awe dị kokiil aani osi epẹ eekunha phọ r’ayira, kụ omhoọgh aani iikpiạ phọ. Esi iduọn phọ, yira rokparaghạ ghan osighẹ oḍighinhom oroma phọ aḅẹm bọ mọ “Oniin awạ ghan ilọ kengọ suọ nyoorị phọ, k/ilọ odị bịn!” (Fil. 2:4) Siẹn eghiil phọ yira rokiil bọ, aZihova aguanhaan ni mọ onọ ka/bilhẹ onmo aruunmo we ph’odị oghiil bọ osi eekunha phọ—aruunmo phọ pọ aghuḍum k’agee-pọ epẹ k’akẹ obobọ siẹn ade phọ. w20.04 28 ¶10; 29 ¶12

Irubal aKristẹn, lhephiri r’anmariịr, kokpetenhaan ni oḍigh siphẹ omhoom aḅirinhi phọ. Buphẹ kokpetenhaan bọ siẹn ade phọ, komiịn ni onhọn okpạr opu aḍuugh—mem mọ koḅerion bọ riisi eelạ awe dị omhuughu iḍiodi phọ. Gbiom olhoghi ibo phọ ketọl bọ mem dị iikiạ phọ iphẹn phọ emiteghu! (Iiḍighi 24:15) Oomo abuphẹ oḅạr bọ aZihova k’epẹ eekunha phọ kokpạr ri opu ghalhamọ r’aḍuugh phọ bidị olhe bọ erua ḍighaạgh Adạm. Bidị kotọl bịn k’agee-pọ. Esi iduọn phọ, oomo aKristẹn phọ odi bọ ḍio arodon osereghiạn ni ikpo onhụ iidereghị oḅetenhu esi aḍuugh phọ aPọl agẹ bọ aghiọm buọ aKorịnt phọ. Yira omoọgh ni riphigh otuạn odaphạn aani oroma phọ aPọl aḅẹm bọ mọ, isighẹ “oomo inyaạm mọ anyina eḍighinom engọ Omoọgh-we phọ.” (1 Kọr. 15:58) Eḍighi maạr dị yira oḍighi aani oomo ipẹ yira kotue bọ siẹn oḍighi Omoọgh-we phọ, pọ yira kopogh ni okiọm ghisigh phọ r’ibo. Amem mọ amuphẹ keḍighi mem oghelhọm dị yira ko/mhiịn ghan. Kekạr kụ eḍeenhaan mọ arukumuan phọ yira oghol bọ Omoọgh-we phọ okumuan, i/pe oopho. w20.12 13 ¶16-17

Eḍighi maạr dị imiịn phọ Ezekiel 38:10-23; Daniel 2:43-45; 11:44–12:1; ḅilhẹ r’Ogananami 16:13-16, 21 rekaạph ni ilọ eniin phọ iyaạr phọ, r’amem mọ, pọ iphẹn kụ araraạr dị yira rogon omhiịn. Igbogh iiḅaghamhị phọ remhiigh, “abudaạm aḅirini phọ” kookpomoghi ni reelhe. (Ogan. 16:13, 14) Ookpomoghan areelhe phọ kụ edị aḍinyạ iigbia phọ eghol bọ mọ “aGọg opọ ade phọ aMegọg.” (Ezek. 38:2) Ookpomoghan areelhe phọ k’onyạ ni ozuom we phọ Enhaạn ilọ ophiemhi abidị. Rakaạph bọ ilọ amem mọ amuphẹ phọ, otelhedom mọ aJọn amhiịn oghim iboom iiḅoghoḍi ibikpo dị eemorọgh dị eḍuạ k’akẹ rekaraghuọm mulhọgh ḍien phọ Enhaạn. Iiḅoghoḍi ibikpo phọ omaaniọm bọ eeni keḍighi ḍigbagarạ adom ooruẹn dị awe phọ aZihova kogbeelhom, kụ kepin olhoghi aGọg opọ aMegọg, kụ anyạ bọ azuom we phọ Enhaạn ilọ oḅeer abidị osighẹ isiẹn ade phọ.—Ogan. 16:21. w20.05 15 ¶13-14

Iikpọ phọ Enhaạn reḍighinhom ghan bọ oḍighi phọ eḍighi ni inmo dị yira kosereghiạn. Osereghiạn phọ ayira ilọ uwaloor iigbia phọ katue ni abụgh esi ootughiạn ghan araraạr dị uwaloor iigbia phọ maḍighi siẹn amem mọ ayira. Kụ aZizọs agbi bọ ogheel k’akẹ, odị aḅenhị ni butelhedom mọ odị mọ: “Kingọ ni inyina iikpọ mem dị Uwaloor ligbia phọ misoorom inyina, kụ nyina igbaanaạn imị . . . esiemi eekuna aḅirini phọ.” (Iiḍighi 1:8) R’olhoghonhaạn aḍighaạgh uwaloor iigbia phọ Enhaạn, mookpomhoghi ni ophaanyạ r’egbem ariisi erubal awe dị rooḅereghi aZihova siẹn oomo arughulukụl aḅirinhi phọ. Ḅilhẹ kẹn yira rokelọm ni dọl amuḅọph r’eephọ idiphọ eghun otu, loor esi dị uwaloor iigbia phọ Enhaạn rulhoghonhaạn ghan iyira ḍighaạgh omhoọgh imạ araagharạ idiphọ; ephomhoghiạn, ibo, eephọ, okparạm, onmạ ighirigiir, onmo inmo, omheeraam, oyoghoyoghọ ḅilhẹ r’ophamhaghạn aloor. Iphẹn phọ kụ “iimuma uwaloor igbia phọ.” (Gal. 5:22, 23) P’eeghe idị uwaloor iigbia phọ aḍighi ephigh inmo! w20.05 28 ¶10; 29 ¶13

Ibadị ariphigh edi ni otuạn omheeraam mọ abuẹn kokị bọ omhaaghạgh abuphẹ oḅerion bọ kolọgh ni elhegh buọ ephomhoghiạn phọ abidị. Esi omaạm, odaphạn oḅerion esi aḍuugh dị mamite ghan ni epẹ omhạn, ekịgh mudị aZihova kaḅilhẹ ni alẹm we phọ dị kootughiạn ghan, oḅạ ghan eniin phọ eten phọ oḅilhẹ otọl ipẹ bidị orọl ghan bọ kụ ogbi bọ omhugh phọ. Tuutughiạn mọ aZizọs atomaạm ḍuugh ralhạ kụ atomaạm oḅetenhu esi aḍuugh phọ idiphọ rosumeẹny ghan bọ oye ralhạ. (Mat. 9:18, 24; Jọn 11:11-13) Mem dị awe oḅetenhu esi aralhạ oomhanham, bidị roḅạ ghan iniin phọ koḅilhẹ orọl eten phọ epẹ bidị orọl ghan bọ kụ ogbi bọ omhinạ phọ. Ooḅeghiọn eḍeenhaan phọ aLazarọs. Odị mamhugh ni esi inya aḍughul otu, kụ iḍighi kụ eḍeenhaan mọ aloor phọ odị reḅọr. Ghalhamọ r’iduọn phọ ni, mem mọ aZizọs aḅeton bọ nyodị, mem mem mọ bịn abumarani phọ odị ulhọgh ni nyodị elhegh, ḅilhẹ, iigholhaan ni mọ aLazarọs aatughiạn ni bidị.—Jọn 11:38-44; 12:1, 2. w20.08 14 ¶3; 16 ¶8

Enhaạn i/sighẹ buphẹ osagharạn bọ idiphọ abudị omhạn maạr opu iphediphọ iyool phọ. Odị amaghamhị ni maạr iyạl phọ arugu phọ. Yira ulhegheri iphẹn phọ loor esi dị oniin phọ aghuḍum ooḅi Oọny phọ odị kụ edị odị asighẹ bọ ni aghoom iyạl phọ arugu phọ. Oḍuomolhoghi phọ bidị omhoọgh bọ bịn kụ agbaranhaạn. Kuolọ iyạl phọ arugu phọ omoọgh oḅạr Enhaạn ḅilhẹ r’aKraist. (Ps. 31:23) Legheri mọ Enhaạn rangọ ghan uwaloor iigbia phọ torobọ oye odaphạn ipẹ rewạ bọ. Mughumọ odị aḍighi oniin opọ osagharạn bọ obobọ iphediphọ iyool phọ. AZihova mangọ torobọ ebenhẹ odị dị maḅọgh loor odị angọ nyodị ookiạ oḍuomolhoghi ilọ aghisigh phọ. (Jer. 29:11) Eḍighieeny ootughianhạm aḍuugh phọ aKraist rengọ ghan ni torobọ onyọ ayira eboom eepoogh oboom Enhaạn r’aKraist esi ipẹ bidị muḍighinhaan bọ iyira, pidị yira okelhọm ghuḍum k’agee-pọ. Dị iikia i/lo, aMemorial phọ kụ eḍighieeny dị emhạn maạr iboom dị abugey aKristẹn kotuạn ghan ookpomhoghan. w21.01 18 ¶16; 19 ¶19

Ogbogh opol abuẹn rokị aani ghan bọ aMemorial phọ omoọgh oḍuomolhoghi orọl isiẹn ade phọ. Kụ bidị utụ eeghe kụ rokị aani ghan bọ? Iyaạr phọ eḍighi bọ kụ awe rokị aani ghan bọ pinien oyaghirị abidị kụ edị bidị rotuạn ghan bọ koghị aani. Arighirị phọ rokị ghan oḍeenhaan mọ bidị opomhoghiạn ni oḅilhẹ obakị olom mọ r’anhịr phọ robalạn bọ. Igina phọ kẹn, iphediphọ iyool phọ rokị aani ghan aMemorial phọ loor esi dị bidị opomhoghiạn oḅilhẹ obakị Kraist r’abuphẹ osagharạn bọ. Ḅilhẹ bidị oḅilhẹ kẹn rokị ghan aMemorial phọ oḍeenhaan mọ bidị osereghiạn ni ekiạ etagharạn phọ aZizọs, ekiạ phọ eḍighi bọ idị kedughanhaan bidị orọl isiẹn ade phọ k’agee-pọ. Enhọn ekpanhạ ephigh phọ eḍighi bọ kụ iphediphọ iyool phọ rokị aani ghan bọ aMemorial phọ, pọ utuạn odạph itọ phọ aZizọs. Mem mọ aZizọs alhe bọ eḍien adulhe phọ r’abumatuạn phọ odị okpẹ bọ oḍuomolhoghi phọ, odị aḅenhị bidị mọ: “lḍighi ghan iphẹn phọ iitughianạm imị.” (1 Kọr. 11:23-26) Kụ iḍighi kụ, eḍighi bọ edị abuniin abuphẹ osagharạn bọ uwaloor phọ odi bọ ni siẹn ade phọ, iphediphọ iyool phọ okiọm ni ghisigh rokị aani ghan Eḍien Adulhe Uw-emhoọgh phọ. w21.01 17-18 ¶13-14

Eḍighi maạr dị yira okạr ri ophomhoghiạn we, pọ ewạ mọ oḍeenhaan ephomhoghiạn phọ ayira esi imạ iiḍighi. (Poghom Jems 2:17, 26.) Esi omaạm, aZihova uphomhoghiạn iyira. (1 Jọn 4:19) Kụ odị raḍeenhaan ghan ephomhoghiạn phọ odị dị eego esi imạ ikpo onhụ phọ ogẹ bọ siphẹ aBaibul phọ. (Ps. 25:10; Rom. 8:38, 39) Toroboiperolbọ, yira omeeraam mọ Enhaạn uphomhoghiạn ni iyira loor esi ipẹ odị raḍighi ghan bọ, ki/pẹ odị rakaạph ghan bọ bịn. AZihova amheera ni mọ ooḅi oọny phọ odị amhiinhọm aḅilhẹ umhughanhaan iyira. (Jọn 3:16) Iikia edi niiniin mọ aZihova akạr ri uphomhoghiạn iyira ḍughụm? Yira roḍeenhaan ghan mọ yira opomhoghiạn ni aZihova r’aZizọs esi onhaghanhạn ghan abidị. (Jọn 14:15; 1 Jọn 5:3) AZizọs akạr kụ uḅenhị iyira mọ oniin aphomhoghiạn ghan nyoniin. (Jọn 13:34, 35) Yira koḅenhị ghan bumor r’abumarani phọ ayira mọ yira opomhoghiạn ni bidị kụ oḅilhẹ ghan oḍighi oḍeenhaan ipẹ phọ.—1 Jọn 3:18. w21.01 9 ¶6; 10 ¶8

Buphẹ osagharạn bọ uwaloor iigbia phọ omoọgh oḍuomolhoghi orọl r’aZizọs bịn k’agee-pọ, kụ otooghị r’odị siphẹ Omhạr phọ k’Enhaạn. Bidị kokạr otọl r’aKraist—omiịn nyodị, okaaphạn nyodị, otọl ghan r’odị oomo amem. (Jọn 14:2, 3) Buẹn omhoọgh bọ oḍuomolhoghi orọl isiẹn ade phọ kokạr kụ olhoghoma ephomhoghiạn phọ aZizọs ḅilhẹ r’ozuumaam mọ odị. Ghalhamọ r’iduọn bidị ko/miịn bọ ni Zizọs, arighirị phọ abidị r’aKraist kekpạr agey, kụ bidị okelọm ghan ghuḍum mọ aZihova r’aZizọs konmoom bọ bidị. (Isa. 9:6, 7) Mem dị yira omheera oḍigh arighirị r’aZizọs, yira komoọgh ni ḍisẹph kirokirọ. Esi omaạm, yira rokelọm ni ephomhoghiạn phọ r’olhoghonhaạn aḍighaạgh phọ odị nyiidiphọ. Yira oḅilhẹ omoọgh eepoogh orọl k’agee-pọ. Edị emhạn maạr epelhom, pọ arighirị phọ ayira r’aZizọs kingọ iyira ephua dị enhighẹ epelhom—omhoọgh asiya dị ekpạr r’Odẹ phọ aZizọs, Zihova. P’eeghe eepoogh dị yira omhoọgh dị kumhạgh aani iyira mọ arighirị aZizọs! w20.04 25 ¶15-16

Otelhedom mọ aPọl agẹ ḍinyạ phọ aḍiẹn phọ aghiọm Kristẹn phọ abuphẹ osagharạn bọ uwaloor phọ epẹ Korịnt, buphẹ koḅerion bọ ongọ ghuḍum epẹ k’akẹ. Kristẹn phọ abuphẹ Enhaạn “mewoph bọ eḍighi buọ odị,” esi aḍien phọ aKraist. APọl aḅilhẹ aghaạph aghol ‘butelhedom mọ aKraist abuphẹ ronaanị bọ ralhạ aḍuugh phọ.’ (1 Kọr. 1:2; 15:18; 2 Kọr. 5:17) Esi aḍinhọn aḍinyạ, uwaloor iigbia phọ aphum Pọl ogẹ mọ buphẹ “moḅophoghạn bọ nyodị omugh aani ḍuugh dị eghịgh ḍiphẹ odị, koḅophoghạn kẹn ni r’odị oḅerenu aani eḅetenuom dị eghịgh nyepẹ odị.” (Rom. 6:3-5) Uḅeton Zizọs idiphọ uwaloor, osighẹ oghị k’akẹ. Kụ iḍighi kụ, ipẹ kụ idị kemitenhaan aani oomo abutelhedom mọ aKraist abuphẹ osagharạn bọ uwaloor iigbia phọ. APọl agẹ mọ uḅeton Kraist idiphọ “iḅẹl iimuma abuphẹ koḅerion bọ siphẹ aralhạ aḍuugh phọ.” (1 Kọr. 15:20) AZizọs kụ oḅẹl dị oḅeton esi aḍuugh idiphọ uwaloor, oḅilhẹ ongọ ghuḍum k’agee-pọ. w20.12 5-6 ¶15-16

Onyọ abuẹn osagharạn bọ uwaloor iigbia phọ dị amhugh nyiidiphọ, roḅeton mem mem mọ bịn konme osighẹ oghị epẹ k’akẹ. Iphẹn kụ emhụ ikpo onhụ phọ otelhedom mọ aPọl ogẹ bọ siphẹ 1 Korịnt 15:51, 52. Abumor phọ aKraist abuẹn phọ, komoọgh ni iboom ibo mem dị oḅerion bidị, loor esi dị bidị “kotolạn Omoọgh-we phọ k’agee-pọ.” ABaibul phọ uḅenhị ni iyira oḍighi dị buphẹ onmia bọ esi “onyam-oḅatạn” phọ koḍighi epẹ k’akẹ phọ. AZizọs aḅenhị bidị mọ: “Buphẹ kokpạr bọ opu kụ oḍighi ghan ipẹ mị rawạ bọ osi eekuna phọ, mị kangọ ni igina phọ iikpọ phọ mị aạr bọ Odẹ phọ amị. Mị kangọ ni ḅidị iikpọ ophoghom areelhe phọ, osighẹ ikparạ okuron kụ odaạm abidị, ḅilẹ r’ogurọgh abidị oḅomoghi idiphọ inyokị.”—Ogan. 2:26, 27. w20.12 12 ¶14-15

Esi omhạgh aZizọs mọ “iḅẹl iimuma,” Otelhedom mọ aPọl raḅẹm ghan mọ koḅilhẹ ni oḅerion aani bunhọn awe osighẹ okeelhom aani k’akẹ. Abumatuạn phọ r’abunhọn abutelhedom aKraist dị osagharạn aani uwaloor phọ kodạph aani ni nyodị. (1 Kọr. 15:18) Eteẹny mem mọ, koḅerion aani ni bidị eten phọ epẹ oḅeton bọ ZizọsMem mọ aPọl agẹ bọ ḍinyạ phọ aghiọm we aKorịnt phọ, ko/mhiigh oḅerion osighẹ oghị k’akẹ butelhedom mọ aKraist osagharạn bọ uwaloor phọ. Kụ iḍighi kụ, aPọl amạ ghan mem dị retu ghisigh mọ: “amem muọ oye r’oye: aKraist kụ iḅẹl iimuma phọ kụ egbi oteẹny abuphẹ oru bọ buọ odị mem mọ dị katu bọ.” (1 Kọr. 15:23; 1 Tẹs. 4:15, 16) Nyiidiphọ, yira kụ odi “mem mọ [aKraist]” aPọl aghaạph bọ aghol. Ii, abutelhedom mọ r’abueriphọ aKristẹn phọ abuphẹ osagharạn bọ uwaloor phọ kụ momhuughu bọ ukori ni tutụ eteẹny mem mọ bidị komoọgh bọ iikpiạ phọ abidị, ‘oḅophoghạn [aKraist] oḅerenu aani eḅetenuom dị eghịgh nyepẹ odị.’—Rom. 6:5. w20.12 5 ¶12; 6 ¶16-17

Otelhedom mọ aPọl aghaạph ghan ilọ awe dị oḅerion r’aḍizu orolhọm k’akẹ, aḍiphẹ phọ pọ, “aḍizu aruwaloor.” (1 Kọr. 15:43, 44) Mem mọ aZizọs arọl bọ siẹn ade phọ, odị amhoọgh ḍizu iphulhupul, kuolọ mem mọ oḅeton bọ nyodị, bịn odị aḍighi “uwaloor dị rangọ ghan ghuḍum,” bịn aḅulha epẹ k’akẹ phọ. Iniin phọ kẹn kụ edị koḅerion aani Kristẹn phọ abuphẹ osagharạn bọ uwaloor phọ r’aruzu aruwaloor. APọl aḅẹm mọ: “Idiphọ oghighemị bọ ḍizu phọ ayira nyopọ osighẹ bọ oposọ phọ kụ oIẹm kụ idị kughighemị ni iyira nyopọ aḍuạ bọ k’akẹ phọ kụ aru.” (1 Kọr. 15:45-49) Lọgh elhegh mọ u/ḅeton Zizọs r’aḍizu iphulhupul. APọl agbạ ni emhụ ikpo onhụ phọ odị iphẹn odị aḅẹm bọ mọ: “Iphulupul r’iḅaạl ke/tue epin aani bin omạr phọ k’Enaạn” epẹ k’akẹ phọ. (1 Kọr. 15:50) Ko/ḅerion butelhedom mọ r’abueriphọ abuphẹ osagharạn aani bọ uwaloor iigbia phọ osighẹ okị epẹ k’akẹ phọ r’aruzu iphulhupul r’ibaạl dị remugh ghan. w20.12 10-11 ¶10-12

Enhaạn iphum ni buniin abutelhedom aZizọs siphẹ oḅẹl okuron asiạ phọ ogẹ ilọ oḍuomolhoghi abuphẹ kokeel bọ k’akẹ phọ. Otelhedom mọ aJọn agẹ mọ: “Nyiidiphọ yira anmụny Enaạn, kụ olọ k”emite eganana odọ awe lọ yira kotu. Iphẹn kụ idị yira molegheri mọ mem mọ aKraist kamite bọ aganana yira komoọgh aani ni roozọ phọ odị.” (1 Jọn 3:2) Kụ iḍighi kụ, aKristẹn phọ abuphẹ osagharạn bọ uwaloor phọ u/legheri okạr ipẹ bidị kotọl bọ mem dị oḅerion bidị osighẹ oghị epe k’akẹ phọ. Toroboiperolbọ, bidị komiịn ni aZihova mem dị oonmo bidị ruunmo phọ abidị. ABaibul phọ akaạph ni akaram ilọ ipẹ phọ. Abuphẹ osagharạn bọ uwaloor phọ kotọl li r’aKraist mem dị odị kapiemhi bọ “oomo abulọ omoọgh iikpọ odaaghiọm aruwaloor r’awe.” Iphẹn phọ eḅaramaạm ni ‘ḍuugh, onyọ amulhọgh ḍien phọ asughanham bọ omhạn.’ Eekunha phọ, aZizọs—r’abuẹn r’odị kotooghị bọ—kosooromhi ni siloor abidị ongọ aZihova. (1 Kọr. 15:24-28) P’eeghe imạ amem! w20.12 8 ¶2

AKristẹn phọ abuphẹ oḅạr bọ ni Kraist kụ u/moọgh aani bọ oḍuomolhoghi ogheel k’akẹ omoọgh aani ni kẹn oḍuomolhoghi oḅetenhu esi aḍuugh phọ. ABaibul phọ aḅẹm mọ aPọl r’abueriphọ abuphẹ kokeel bọ k’akẹ phọ odi aani siphẹ oḅẹl oḅetenhu “esi aḍuugh phọ.” (Fil. 3:11) Ipẹ phọ i/ḍeenhaan mọ onhọn oḅetenhu esi aḍuugh odi ni ḍughụm? Iphẹn phọ emoọgh muḅọph r’ipẹ aJob aghaạph bọ ilọ aghisigh phọ odị. (Job 14:15) “Abuphẹ oru bọ buọ [aKraist] mem mọ dị katu bọ,” kotọl k’akẹ r’odị, mem mọ odị kapiemhi bọ oomo iikpọ, ghalhamọ ‘r’aḍuugh phọ eḍighi bọ onyọ amulọgh ḍien oye dị asughanham omạn.’ Okạr agey, erua aḍuugh phọ ke/teẹny ghan mun buphẹ koḅerion bọ osighẹ okị k’akẹ phọ. (1 Kọr. 15:23-26) Abuẹn omhoọgh bọ oḍuomolhoghi orọl isiẹn ade phọ okpasị oḍuomolhoghi phọ abidị esi oghaạph phọ aPọl odi bọ siẹn esi aBaibul phọ arodon. Iikia i/lo, okarạph oye ka/tue akị k’akẹ, esi iduọn phọ oghaạph phọ aPọl aḍeenhaan mọ koḅilhẹ ni oḅerion we dị kotọl siẹn ade phọ. w20.12 6-7 ¶18-19

Eeni yira otue ni ookia mọ, ‘Ika kụ idị mị katue bọ alegheri akuphom owol mọ aZihova masạr ri uwilhenhaạn imhị?’ Aḍipuru phọ aḍiẹn phọ bịn eḍeenhaan ni mọ aZihova masạr ri awilhenhaạn nyinhạ. AWatchtower dị omiteom siạ dị meten aḅẹm mọ: “[Eeni] yira otue ni obilhẹ oḅula oḍighi ikarạph dị yira mokpạr ri opu k’asiạ phọ. . . . Ka/kureri mọ nạ maḍighi ikarạph dị nyinhạ ko/tue mun osạr owilhenhaạn. ASetan rawạ mọ tuutughiạn ghan idiphọ. E/ḅaạl olhoghi phọ r’okururu phọ nạ akururu bọ eḍeenhaan mọ nạ ogey oye ni. Nyinhạ ki/phẹr osooromhi ghan aloor owạ Enhaạn, olhọm ghan osạr owilhenhaạn r’olhoghonhaạn aḍighaạgh phọ odị.” Otelhedom mọ aPọl aḍighi ni ibadị ikarạph kụ agbi bọ oḍighi onyọ aKristẹn. APọl aatughiạn ni ipẹ odị maḍighi ghan bọ. (1 Tim. 1:12-15) Kuolọ odị asighẹ ekiạ etagharạn phọ idiphọ inmo dị ongọ nyodị r’aloor. Esi iduọn phọ aPọl akpetenhaan ni olhoghoma oboom apum, kụ agbon ongọ aZihova ipẹ inyaạm mọ odị esi bọ, emhiigh k’amem mọ amuphẹ phọ kụ eghiọm ghisigh. w20.11 27 ¶14; 29 ¶17

ASetan rudẹgh ghan ni iyira oḍighi ikarạph reten kirokirọ. Yira komegheron ika? Edugh ni oḅẹm mọ i/beeph. Esi omaạm, yira otue ni ootughiạn mọ: ‘Ọ, ko/tue otuạn iduọn phọ bịn uphorogh imhị, i/ḍighi igbogh ikarạph.’ Ootughiạn ghan eten phọ epẹ phọ eḍighi ni ḍidugh. Kụ iḍighi kụ, enighẹ ni dị yira kopuruan ghan siloor ayira sipuru phọ iphẹn phọ: ‘ASetan rakparaghạ ghan osighẹ odẹgh ophogh phọ ophọn phọ odiom ekpom mọ amhị ḍughụm? Eḍighi maạr dị mị amheel aḍighanhaan ekarạph eephuạ, ke/sighẹ itonyonhaan etuomnaan ḍien phọ aZihova ḍughụm? Eegharạ phọ ephẹn phọ kiḍur ri imhị egbiemhị aZihova obobọ kikelhẹ imhị esi odị ḍughụm?’ Ḅeeḅereghị alhọm osụ olhoghi ophanyanhaạn asipuru phọ iphẹn phọ dị nạ u/ḅarạm ookeleghian aloor. Oḍighi ghan iduọn phọ keḍighi oghoph kụ engọ nyinhạ. Kelhoghonhaạn nyinhạ ḍighaạgh orue oghel odẹgh ophogh, idiphọ aZizọs aḍighi bọ mem mọ odị aḅẹm bọ mọ: “Setan, ḍuạ siẹn!” (Mat. 4:10) Legheri mọ, ekpom dị edia i/nighẹ. w20.06 12-13 ¶16-17

Yira osooromhi ni loor rodaphạn ghan siigbu phọ aZihova, loor esi dị yira olegheri ni mọ aZihova kụ alhegheri ipẹ ekạr bọ inhighenhaạn iyira. (Efẹ. 4:22-24) Osooromhi aloor raḍighi ghan idị yira kosighẹ ogbi phọ aZihova kụ oḍighi eḅẹl, ḅilhẹ kẹn omhiịn mọ abueriphọ awe phọ kụ upu iyira. Esi iduọn phọ, reḍighi ghan idị yira komoọgh igey asiya r’aZihova ḅilhẹ r’abumor r’abumarani phọ ayira. (Fil. 2:3) Eḍighi maạr dị yira u/gona loor, ikạ awe phọ aSetan ketue ni imhoogh iyira bịn yira opoophe loor oḅilhẹ ghan owạ imạ ilọ aloor. Ekịgh mudị iphẹn phọ iḍighi ni ootor’osooromineen engọ Kristẹn oḅẹl okuron asiạ phọ, idị eḍighi bọ otelhedom mọ aPọl agẹ ni aghiomnaạn buọ aRom mọ, kụ aḅẹm mọ: ‘Mị raḅenị ni oomo phọ anyina mọ kee/tughiạn ghan iitughiạn dị ipeI inyina Ioor. Torobọ onyọ anyina atuụgh ghan ghụn iitughiạn dị ekasiạn kụ aatughiạn ghan!’ APọl amạ ni amiteom mọ ewạ ni dị yira kootughiạn ghan ilọ aloor ayira, toroboiperolbọ osooromhi aloor kulhoghonhaạn iyira ḍighaạgh dị yira koo/tughiạn ghan idị ipel iyira loor. w20.07 2 ¶1-2.

Siḍio phọ Uw-emhạ phọ Asa, amem eephọ phọ isi ni eekunha. Aḍita awe eghạm dị ropel li—oniin erubal—uḍuạ ni Etiopiạ bịn oru. Oḍiemhiom mọ abidị, Zerah, amhịn ni ighọr mọ onọ k’azuoghom ni Judah. Toroboiperolbọ, Asa o/phogh onhụ awe eghạm mọ, kuolọ aḍuom olhoghi aZihova. Asa aaḅereghị mọ: “Ulhoghonhaạn iyoor ḍighaạgh, Sey Zihova Enhaạn ayoor, yoor obeḍenhọm nyinhạ, kụ esi aḍien phọ anạ kụ edị yoor oru bọ eenan aḍigbogh aḍita phọ aḍiẹn phọ.” (2 Chron. 14:11) Ghalhamọ r’iduọn awe eghạm Etiopiạ phọ opu bọ ni buẹn Asa iyạl amem, Asa alhọgh ni elhegh mọ aZihova amoọgh ni iikpọ ophẹl awe phọ Odị. Kụ aZihova o/bi nyodị; bidị ukpạr ri opu buọ Etiopiạ phọ. (2 Chron. 14:8-13) Ii obọ yira u/legheri ni kanhị kalhe ipẹ kemitenhaan bọ torobọ onyọ ayira epẹ ghisigh, kuolọ yira olegheri ni mọ eephọ phọ awe phọ Enhaạn rokelhọm bọ eḍighi ni elọ ekulha amem bịn. Okạr oghaạph, aZizọs aḅenhị ni bumatuạn phọ odị mọ, “awe oomo areeIhe kiIọgh ni inyina ḍien.”—Mat. 24:9. w20.09 17-18 ¶14-16

Onyọ ayira o/lho dị aroofolha eḅeraạn. Toroboiperolbọ, yira kotue ni oḅonyonhu ozuan eḍighi maạr dị yira ootughiạn ghan iboom ilọ araraạr aroofolha dị amulhọgh ḍien phọ ayira oghaạph. (Prov. 24:10) Ewạ mọ yira osighẹ ghan ika roofolha phọ abuọ isophoghom mọ ayira ruufolhomhi ghan bọ iyira? Idiphọ otelhedom mọ aPọl, ewạ mọ yira ‘omiloghọm ghan . . . roofola’ phọ. Eeghe kụ iḍighi? Loor esi dị aroofolha ḅilhẹ r’isophoghom remạ ghan keḍeenhaan mọ yira kụ abumatuạn phọ aZizọs ni. (1 Pit. 4:14) AZizọs aḅẹm ni mọ kogbiphoghọm ni bumatuạn phọ odị. (Jọn 15:18-20) Iphẹn phọ ikạr ri emite siphẹ oḅẹl okuron asiạ phọ. Mem mọ amuphẹ phọ, abuphẹ odaphạn ghan bọ iḍighinhom araraạr abuọ aGrik phọ umhiịn Kristẹn idiphọ awe dị u/maạr ḍinyạ ḅilhẹ odugh. Awe aJu phọ umhiịn Kristẹn idiphọ “iḅar awe . . . dị ḍinyạ u/maạr” idiphọ abutelhedom mọ Pita r’aJọn. (Iiḍighi 4:13) Oḅiilha ophogh ekịgh mudị aKristẹn phọ odugh ni, loor esi dị bidị u/loom aani siphẹ iikpọ itooghị phọ obobọ u/moọgh weye eghạm, ḅilhẹ kẹn awe omiịn bidị idiphọ awe dị oroph ogbeph siphẹ emhạ phọ. Abuḅẹl aKristẹn phọ umheera ni mọ ekarạph ephoghom abuọ isophoghom mọ abidị esophoghom bidị ḍughụm? Eeye. w20.07 14-15 ¶3-4

Otelhedom mọ aJọn aaḅaghamhiạn ni loor iboom ilọ adọl aruwaloor abumor phọ odị, ipẹ phọ ekạr ri eegholhaan esi oroma phọ odị agẹ bọ aghiọm bidị siphẹ iraạr arinyạ phọ aZihova aphum bọ nyodị ogẹ. P’eeghe idị eḍighi iyaạr iidereghị olhegheri mọ osaḅạr aani ni lhephiri r’anmariịr, dị orọl idiphọ aJọn, oghị otooghị r’aKraist epẹ k’akẹ! (1 Jọn 2:27) Eḍighi edị yira kosighẹ oroma phọ odị ungọ bọ iyira olọgh siẹn arokpom mọ ayira. Oghiọm ghisigh osopha orolhọm igey phọ, esi onhaghanhạn ghan aZihova siẹn oomo adọl aghuḍum mọ ayira. Tuughạ kụ aḅilhẹ aḍuomolhoghi Ekpo Onhụ phọ odị. Amhoọgh omheeraam dị akpạr aghị esi aZizọs. Kel olhegheri iyaạr awe aḅirinhi phọ ḅilhẹ r’itughemhị abuẹn momheel bọ oḍuạ siẹn igey phọ. Aghel inyuughiom orọl adọl ughelhe omheel oḍighanhaan ikarạph. Daphạn iserereẹny asiigbu phọ aZihova. Olhoghonhaạn ḍighaạgh bumor r’abumarani phọ ayira omhoọgh omheeraam dị akpạr, esi osạr ghan owilhenhaạn abidị mem lọ uḍighi iyira ikarạph, kụ olhoghonhaạn ghan aḍighaạgh buphẹ ekuom bọ. Yira oḍighi ghan iduọn phọ, etigheri ipaanhaạn phọ yira osoman bọ, yira kokiọm ni ghisigh otolhọm igey phọ. w20.07 24-25 ¶15-17

R’eten ephomhoghiạn, aZihova angọ ni torobọ ebenhẹ phọ odị akpẹ bọ oḍuomolhoghi esi siẹn ookpomhoghan phọ. Ghalhamọ r’iduọn iiḍighi phọ ayira egbaranhaạn bọ ni, oomo phọ ayira omạn ni maạr ḅilhẹ kẹn oniin awạ ni olhoghonhaạn aḍighaạgh ophoriphọ. Otelhedom mọ aPọl aghaạph ni akparamhị mọ onyọ ayira o/lho dị kamiịn onhọn ebenhẹ aZihova kụ aḅẹm mọ “Mị u/moọgh iyaạr oḍighinom ana.” (1 Kọr. 12:21) Eḍighi maạr dị yira rowạ mọ eephọ erọl siẹn ookpomhoghan phọ, pọ oomo ayira omoọgh omhaghamhị amaạr ophoriphọ oye phọ kụ oḅophoghạn okumuan. (Efẹ. 4:16) Mem dị yira okumuan ghan r’amuḅọph, ookpomhoghan phọ kapoph ni, ḅilhẹ kẹn ephomhoghiạn etọl. Uwaloor iigbia phọ aZihova kụ amạ oomo phọ abuphẹ oḍighi bọ ikumor awe siẹn ookpomhoghan phọ. Ghalhamọ r’iduọn phọ ni, torobọ onyọ abidị amoọgh ni inmo ḅilhẹ r’asighalhanyạ dị egbatanhaạn. (1 Kọr. 12:17) Buniin eeni purukụ omạ aani idiphọ okumor oye, kụ esi iduọn phọ ko/karaghị omhiịn raraạr. Buniin ikumor awe phọ eeni ro/tue ghan kokumuan iboom loor esi aḍikpọ obobọ e/moon. Ghalhamọ r’iduọn phọ ni, okumor oye ookpomhoghan ku/kiton upogh nyoniin kụ aḅẹm mọ “Mị u/moọgh iyaạr oḍighinom ana.” Kparipẹ ghụn, torobọ okumor oye adaphạn ghan oroma phọ aPọl odi bọ siphẹ Rom 12:10. w20.08 26 ¶1-2; 27 ¶4

AZihova ruuḅakị ghan iyira siẹn eten aghuḍum mọ dị eego esi apakirị ookpomhoghan phọ odị odi bọ siẹn ade phọ. Iikia i/lo, yira rodaphạn ghan ni mem dị ookpomhoghan phọ ogbạ oogholhomhi omhoom onhaghạn aḍughụm itughemhị aBaibul obobọ ilọ aroozọ dị ekpẹ ghan ozọ. Kuolọ yira romegheron ghan ika mem dị ookpomhoghan phọ Enhaạn onme iyaạr dị etir pakirị aghuḍum mọ ayira, idiphọ aal aKindom Họl yira ropamhạm ghan bọ ituughạ phọ? Yira kotue ni opamanhạm ibo phọ ayira eḍighi maạr dị yira ootughiạn ghan mọ yira rokumuan ghan kongọ aZihova, kụ mọ odị kụ raaḅakị ni ookpomhoghan phọ odị. (Kọl. 3:23, 24) Uw-emhạ phọ Devid aphighi ni emạ eḍeenhaan mem mọ odị asogh aani bọ ikpoki olhoghọm otu iiḅereghị phọ. Odị aḅẹm mọ: “Mị anhiạn ḅilhẹ awe phọ amhị eeghe awe dị kokạr otue okaraghị ongọ nyinhạ iyaạr? Loor esi dị oomo araraạr aruunmo anạ, yoor moḅulhemhi ipẹ eḍighi bọ ni ilọ anạ.” (1 Chron. 29:14) Mem dị yira osogh aani iyaạr siphẹ igbe phọ, pọ yira roḅulhemhi ghan kongọ ipẹ eḍighi bọ ilọ aZihova. Ghalhamọ r’iduọn phọ ni, aZihova rasereghiạn ghan ni mem mọ, inyaạm mọ, r’araraạr emhoọgh phọ yira rosogh ghan bọ oḅakị aani oḍighi phọ odị rawạ bọ moḍighi.—2 Kọr. 9:7. w20.11 22-23 ¶14-16

Idiphọ Abugbaanhaạn AZihova, yira ro/pogh ghan onhụ awe dị yira okiton olhọgh siẹn ookpomhoghan phọ aZihova kụ ogbi olhegheri mughumọ yira omoọgh ni ekol. (Luk 8:11-15) Eḍighi maạr dị yira oghiọm ni ghisigh orolhonhaạn esi oḍighi iphelhegbeel phọ r’otughemhị abunhọn, aZihova kumhiịn ni iyira idiphọ awe dị omhoọgh ekol siẹn arukumuan phọ odị. Eeghe kụ iḍighi? Loor esi dị yira osooromhi loor ronaghanhạn ghan nyodị r’Oọny phọ odị. (Mạk 13:10; Iiḍighi 5:28, 29) Iphẹn phọ ingọ iyira ibuọm olhọgh inyaạm siẹn oḍighi iphelhegbeel phọ nyiidiphọ phọ. Eekunha aḅirinhi phọ mekạr bịn etuman siẹn! Amem mọ esugha bọ ophinom aani abin oghaạph aani adom apelieẹny phọ ophọn phọ mekper. Kụ iḍighi kụ, kaa/binya obobọ ka/ḅẹm mọ nạ kakori sidọl dị ekạr enhighẹ kụ aḍighi aani ephigh oḍighi phọ ophọn phọ. Ḍighi iyaạr amiteom nyiidiphọ obughẹ oophugh phọ anạ, olhegheri iyaạr aBaibul phọ anạ, akpọ oḅio phọ anạ, ḅilhẹ r’olhiọm aloor phọ anạ. Ḍighom aani bukoniọm awe phọ abuẹn opel bọ ni ophaanyạ irubal, bịn nạ kamoọgh ni ibo phọ aZihova. (Neh. 8:10; Luk 5:10) Sopha ophinom aani abin dị amhunhughan siẹn oḍighi phọ ophọn phọ tutụ eteẹny mem dị aZihova kaḅẹm mọ mekasiạn ni. w20.09 7 ¶18-20

Ku/meera aḍiḅeraạn omheel eelạ eru igbaragbaramhị iyira. “Ogbiriḅa ilọ aḅirini phọ, r’aḍidụgh eeIạ” ketue ni eponhomaam ephomhoghiạn phọ yira omhoọgh bọ oghị esi aZihova, r’eten phọ epẹ yira osereghiạn bọ Ekpo Onhụ phọ Enhaạn, ḅilhẹ r’aḍiḅeraạn phọ ayira otughemhị abunhọn. (Mat. 13:22) Eḍighi maạr dị yira rowạ ni omhaạr ophạm araraạr phọ aZihova aḅọgh bọ alhọgh ḍighaạgh ayira, pọ ewạ dị yira konuụn ghan oḍighi iyaạr omiteom mem dị yira omhiịn iiḅaghamhị. Yira kotue ni ookolhobian ilọ oḍighi mem dị yira ozuan iyaạr dị i/ḅaạl siphẹ intanẹt phọ, idiphọ asifoto iigamaniạn, obobọ iyaạr dị egbolhomaam buẹn momheel bọ oḍuạ siẹn igey phọ, mem lọ yira ropogh TV obobọ afim. Eḍighi maạr dị yira ookolhobian ni ilọ ipẹ ketue bọ ni emite, yira kotue ni oogboronhom okiil oḍuạ esi iyaạr dị ketue engọ iiḅaghamhị siya phọ ayira r’aZihova, bịn yira oḅaạl ghisigh aZihova. (Ps. 101:3; 1 Tim. 4:12) Yira omoọgh omhaạr oseere ikpanhạ araraạr phọ ipẹ aZihova mungọ bọ iyira—igey aBaibul phọ emhạn bọ maạr, ḅilhẹ r’eepoogh otughemhị aani abunhọn Baibul phọ. Yira oḍighi iduọn phọ, yira komoọgh ooruẹn olhoghi dị asererẹ, ghuḍum dị amhoọgh emhụ, oḅilhẹ okelhọm ibo olhoghonhaạn aani aḍighaạgh bunhọn oru olhegheri aZihova. w20.09 30 ¶16-19

Nạ maḍiiny ni muụm? Eḍighi iduọn phọ, pọ nạ maḍeenhaan ni esi ogbo mọ nạ ameeraam ni aZihova, ḅilhẹ kẹn mọ nạ aakolhobian ni oḅọph r’ookpomhoghan phọ okumu odị. Ḍio arodon, eten phọ aZihova raaḅakị bọ ookpomhoghan phọ odị eeghironhaan raagharạ phọ odị, ogbi phọ odị, ḅilhẹ r’asinhị iilhogh phọ odị. Lọgh elhegh iraạr araagharạ aZihova dị eeghironhaan siẹn ookpomhoghan phọ odị. Eḅẹl phọ, “Enaạn re/Iọgh ghan oye iiseẹny.” (Iiḍighi 10:34) Ephomhoghiạn inyu ni aZihova osighẹ Oọny phọ odị ‘otagharanạm oomo awe.’ (1 Tim. 2:6; Jọn 3:16) AZihova asighẹ we phọ odị kụ rakaaphọm ghan iiḅi iinhaghạn phọ kaḅenhị oomo abuphẹ rowạ bọ omhooghọm aani asuọ ekiạ etagharạn phọ. Omhunhenhiom iyạl, aZihova aḍighi Enhaạn eephọ dị ramaạr ghan kaḅoonhomhị raraạr. (1 Kọr. 14:33, 40) Loor esi iduọn phọ, yira oḍuom ni olhoghi mọ arebenhẹ phọ odị komoọgh eephọ oḅilhẹ omaạr oḅoonhomhị araraạr. Omhunhenhiom iraạr, aZihova kụ “Ogbogh Otomoghiom.” (Isa. 30:21) Pọ kụ iyaạr phọ ookpomhoghan phọ odị ogbon bọ otughemhị ghan awe Ekpo Onhụ phọ odị, Baibul phọ, emhiigh siẹn ookpomhoghan phọ kụ esi epẹ erugh phọ. w20.10 20 ¶1-3