July

Ewạ dị yira koḍighi righirị aZizọs pidị Enhaạn epagharanhaạn ghan iiḅereghị phọ ayira. Iphẹn phọ epelhom oḅẹm ghan mọ “esi aḍien phọ aZizọs” siphẹ iiḅereghị phọ ayira bịn. Ewạ dị yira kolegheri ipẹ aZihova rasighẹ ghan bọ Zizọs kaphagharanhaạn iiḅereghị phọ ayira. AZizọs aḅenhị butelhedom mọ odị mọ: “Torobọ iyaạr dị nyina eghoI ḍien amị kụ epuru Odẹ phọ, mị kaḍighi ni.” (Jọn 14:13) Ghalhamọ r’iduọn aZihova kụ ranaghạn ghan bọ kaḅilhẹ aphagharanhaạn iiḅereghị ayira, odị mangọ Zizọs iikpọ oḍighi ghan ipẹ Odị maghaạph bọ. Esi iduọn phọ, tutụ Enhaạn kenaghạn iiḅereghị ayira, odị rapụr ghan kaphogh mughumọ yira modaphạn ni oroma phọ aZizọs. Esi omaạm, aZizọs aḅẹm mọ: “Eḍighi iyaạr dị nyina rebilenaạn ghan bunọn awe lọ iḍighi inyina ikarạph, pọ Odẹ phọ anyina odi bọ k’akẹ phọ kasạr ikarạph iwiIenaạn inyina; Kụ nyina i/bilenaạn ghan bunọn awe lọ iḍighi inyina ikarạph, pọ Odẹ phọ anyina ka/sạr ikarạph iwilenaạn inyina.” (Mat. 6:14, 15) P’eeghe idị emhạn maạr dị yira kozoọm ghan bunhọn eten phọ epẹ aZihova r’aZizọs ruzoọm ghan bọ iyira! w20.04 22 ¶6

Otelhedom mọ aPọl awaaghị ghan ni alhegheri raraạr dị eḅeraạn buphẹ odị rakaạph bọ kaḅenhị, kụ adạph ghan pạ amhiighom oghaạph iiḅi iinhaghạn phọ. Esi omaạm, egu awe dị odị aghaaphạn epẹ Listrạ u/kạr ulegheri ilọ Igẹ Iigbia phọ. Kụ agbiran ghan r’abidị eten dị bidị kotue ni onaghanạn. Odị aghaạph ilọ ibugha dị enhighẹ ḅilhẹ r’ilọ oghelhọm aghuḍum. Odị asighẹ ikpo onhụ r’areḍeenhaan kụ aghaaphọm ghan p’idị awe phọ onaghanạn. Tọph ghan anaghanạn raraạr phọ ipẹ eḅeraạn bọ we ekool phọ anyinha, kụ adaphạn amhiighom oghaạph phọ anạ. Ika kụ idị nạ katue alegheri raraạr dị eḅeraạn uwotu phọ mem dị nạ rakpụl k’odị? Maạr ghan aphogh. Eeni odị razụph ghan iizuphạ, rabạl ghan ḍinyạ, raselemi ghan moto, obobọ raḍighi ghan enhọn iyaạr. Lọ edugh ni pọ nạ atue ni asighẹ iyaạr phọ odị raḍighi bọ amiighom oghaạph phọ. (Jọn 4:7) Galhamọ r’iinmenian oye bịn ketue ni ekaạph ilọ oye phọ—idiphọ eelhe odị, oḍighi odị, obobọ idọ areephegh ozaamiạn aloor dị eḅeraạn nyodị. w20.04 11 ¶11-12

Loor esi oboom ooḅaghamhiạn aloor, abuniin abumor r’abumarani romoọgh ghan ni oboom oghiilhaan r’omhiigha aloor mem dị bidị odi esi ogbo. Rekparanhaạn ghan ni bidị iboom orọl esi ogbo, kuolọ bidị rokị ghan ni ituughạ, rookpomhoghan eghir ḅilhẹ r’arookpomhoghan eephugh. Rekparanhaạn ghan ni bidị oghaaphạn aruuruen, ghalhamọ r’iduonphonị, bidị roḅaanhaạn ghan ni we mem dị omite epẹ erugh phọ. Eḍighi maạr dị nạ raloghoma aani ghan eten phọ ephẹn phọ, pọ legheri mọ aZihova odi ni r’anạ. Ibadị rosoman aani ghan ni iniin phọ iiḅaghamhị phọ nạ asoman bọ. Legheri mọ aZihova asereghiạn ni inyaạm mọ nạ alhọgh bọ. Inyaạm mọ odị angọ bọ nyinhạ kụ iḍighi bọ iyaạr phọ nạ k”owilhẹ bọ okumu odị. (Fil. 4:6, 7) Eḍighi maạr dị nạ aghiọm ni ghisigh rakumu aZihova etigheri e/moon obobọ ooḅaghamhiạn aloor, pọ kuphom owol mọ nạ raḍighi ni idị eḅeraạn aZihova. Ibadị ayira u/kạr umoonhogh. Ghalhamọ r’iduọn phọ ni, yira okparạm ni rokiil. (2 Kọr. 4:16) R’olhoghonhaạn aḍighaạgh aZihova, oomo ayira kokiil li osi epẹ eekunha phọ! w20.04 31 ¶20-21

Osụ olhoghi phọ Enhaạn akạr ri aganana esi eten phọ epẹ odị amakạ bọ de phọ yira orugh bọ. (Hib. 3:4) Ade phọ egbatanhaạn ni loor esi dị emoọgh oomo araraạr phọ ketue bọ epạm ghuḍum oye. Kotue ni oḅẹm mọ ade phọ ekịgh idiphọ oghuugh dị rapooph anyụ abasị. Kuolọ oboom ogbaranhaạn odi ni esi oghuugh dị awe oḍiku omuza, r’ade phọ ayira. Esi omaạm, awe dị oḍigh oghuugh dị oye kụ alhẹm kotọl ika aḍughul otu, eḍighi maạr dị bidị kụ romiteom ghan ookuugh dị bidị kopooghu, eḍien dị bidị kole r’amuụm ophughọl, ḅilhẹ kẹn eḍighi maạr dị esi oroḅologhi araraạr kụ i/lo? Ke/bia kụ awe phọ odi bọ olhoghi oghuugh phọ omuughu. Dị egbạgh r’iphẹn phọ, ade phọ epamanạm ni riisi eelạ araraạr dị edi ni repooghu. Kuolọ ghalhamọ r’iduọn phọ ni, ade phọ emiteom ni oomo ookuugh phọ, riiḍien phọ, r’amuụm mọ rewạ bọ obọ yira orọl r’ighuḍum, kụ amem ke/rọl ghan dị araraạr phọ iphẹn phọ ikuom iyira. Ghalhamọ r’iduọn oomo araraạr phọ yira u/moọgh mun bọ maạr oḍighinhom edi bọ ni siẹn ade phọ; ade phọ ekiọm ni ghisigh emaạr enighẹ orọl. Ika kụ idị iphẹn phọ erue bọ edugh? AZihova amakạ de phọ eten dị reḅilhẹ ghan kenme raraạr dị i/moọgh mun maạr oḍighinhom etene idị yira koḅilhẹ osighẹ oḍighinhom. w20.05 20 ¶3-4

ASetan aḅenhị Iv mọ aZihova ogbaạm okpẹ. Bịn aSetan aḍighi eru obobọ oye iḅoroghom. Ukạr kụ ookelheghi Iv, odị amheeraam ni Setan. (1 Tim. 2:14) Odị aḍuom ghụn olhoghi Setan kparipẹ r’aZihova. Bịn eḍighi idị Iv asopha osopha dị eeph iboom. Iv asopha oḅaạr emhụ oghị esi aZihova, bịn amhiigh olhe eemuma phọ aZihova agbiemhi bọ nyodị. Ipẹ reten bịn odị asighẹ iniin angọ aani Adạm. (Gen. 3:6) Legheri mọ Iv mutue ni aḅenhị Setan mọ: “Mị nyinhạ u/legheri, mị alegheri aZihova Odẹ phọ amhị, kụ mị apomoghiạn ni aḅilhẹ aḍuom nyodị olhoghi. Odị kụ ungọ iyoor torobọ iyaạr, uḍighi ika kụ nạ ragbaaghiọm bọ nyodị iduọn phọ? Ḍuạ siẹn!” P’eeghe idị olhoghi aZihova muḅaạl, onhaghạn ikpo onhụ phọ iphẹn phọ dị eḍuạ onhụ ooḅi onyanhị odị emite! (Prov. 27:11) Kuolọ Adạm r’Iv u/moọgh ephomhoghiạn oḅạr ukị esi aZihova. E/moọgh ephomhoghiạn oghị esi Odẹ phọ abidị, ikọm idị Adạm r’Iv opiọm ogbạ omheremhị aḍien odẹ phọ abidị. w20.06 4 ¶10-11

Ekpẹ ni dị yira kosẹph ghan bumarani phọ odi bọ siẹn ookpomhoghan phọ esi ipẹ bidị roḍighi bọ siẹn arukumuan phọ aZihova. Eḅaramaạm bọ olhoghoḍị r’omhaạr ophạm aruutu iiseeny phọ, obakị aani arugu dị roḅạ inhọn arunhụ, ḅilhẹ r’oḅọgh aloor ongọ okumuan epẹ aḄetẹl phọ. Bidị rologhonhaạn aani ghan ni ḍighaạgh we lọ ekperenhom iiḅaghamhị emitenhaan, bidị rologhonhaạn aani ni ḍighaạgh ogbạ arinyạ phọ ayira otenheghi inhọn arunhụ, kokumuan aani idiphọ abukọy eten ḅilhẹ r’asimisonarị. Opumom isiẹn, anmariịr phọ rologhonhaạn ghan ni kẹn ḍighaạgh burulom mọ abidị orue oḍighi iiḍighi phọ abidị siẹn ookpomhoghan phọ. Ikpolhọm abumor phọ abuẹn phọ oḍighi “inmo” dị Enhaạn kụ engọ ookpomhoghan phọ, kụ olhoghonhaạn aḍighaạgh anmariịr phọ abidị kụ raloghonhaạn bọ bidị ḍighaạgh orue oḍighi oḍighi phọ abidị. (Efẹ. 4:8) Ikumor awe dị osụ olhoghi olegheri mọ abumarani phọ oḍighi ni ‘ḍiboom aḍita’ dị rokumuan r’ophooph olhoghi, ḅilhẹ mọ bidị kụ ogbogh opol abukaaphọm iiḅi iinhaghạn dị osilor. Oḅarạm isiẹn, ikumor awe phọ olegheri ni mọ abumarani dị mokpokolo ni oḅilhẹ okpẹ oḍuomolhoghi kụ ukạr osilor olhoghonhaạn aḍighaạgh risina phọ orue okaran ipaanhaạn. (Taitọs 2:3-5) Okạr agey, ekạr kụ ekpẹ osereghiạn abumarani phọ ayira! w20.09 23-24 ¶13-14

AZihova ra/bula ghan buphẹ okumu ghan bọ nyodị mem dị eten kụ mowilhẹ bọ ooḍikuan awe phọ odị esi ekulha amem, ḅilhẹ ra/bula ghan iiḍighi phọ abidị. (Hib. 6:10) Oyil phọ Aizaya agẹ ni imạ oghaạph omaaniọm dị aḍeenhaan ipẹ aZihova rapogh ghan bọ we phọ odị. Odị agẹ mọ “Idiphọ opoghom, odị kapogh ni iyool phọ odị, kụ aaḅakị iyool phọ akuraam, ḅilhẹ odị kaḅerion ni bidị.” (Isa. 40:11) Ika kụ idị Ogbogh Opoghom mọ raloghoma ghan mem dị oniin oyool odị aphe? AZizọs agananami ni ipẹ aZihova raloghoma ghan bọ mem mọ odị apuru bọ bumatuạn phọ odị mọ: “Eru maạr dị oye amoọgh [oniin okuron] iyooI igạ kụ oniin aphe, nyina regbi mọ odị kaḍighi ika? Odị kabilẹ [esugha-dị r’esugha phọ] epẹ araaḅarạph phọ, akị awạ nyopọ aphe bọ. Odị amiịn, mị akạr riḅenị ghan inyina mọ odị kabo ni ibo ogạ phọ opọ apuemi [esugha-dị r’esugha phọ] epẹ i/pe aani bọ.”—Mat. 18:12, 13. w20.06 19-20 ¶8-9

Yira romiịn ghan idiphọ eepoogh okumu aZihova torobọ eten phọ epẹ yira kotue bọ. (Ps. 27:4; 84:10) Eḍighi maạr dị onyọ umor amiteom loor odị okumu aZihova eten dị egbatanhaạn pọ eḍighi emạ iyaạr. Toroboiperolbọ, eḍighi maạr dị ongọ nyodị oḍighi siẹn ookpomhoghan phọ, odị kuu/tughiạn idị epel nyodị loor. (Luk 17:7-10) Aḍiigbu odị eḍighi okumu abunhọn r’osooromhi aloor. (2 Cor. 12:15) ABaibul phọ apamanhạm eḍeenhaan iphụr arurụ ilọ awe dị ootughiạn ghan idị epel bidị loor. ADiotrifis aaka ghan “oḍighi uw-emụ” siphẹ ookpomhoghan phọ. (3 Jọn 9) R’ophoophe aloor Uzziah aghị oḍighi oḍighi aZihova dị nyodị i/si. (2 Chron. 26:16-21) Absalom akparaghạ ghan osighẹ ikeḍi oghoom arokpom awe phọ omhoọgh pidị odị aḍighi uw-emhạ. (2 Sam. 15:2-6) Areḍeenhaan awe phọ abuphẹ phọ emạ emiteom mọ aZihova ra/moọgh ghan ḍiḅeraạn k’aghị esi awe dị rowạ ghan rughuenian ilọ aloor abidị. (Prov. 25:27) Kparipẹ ghụn, ibaga, r’oghị oḍighi araraạr dị oye phọ i/si retorori ghan kengọ iiḅaghamhị.—Prov. 16:18. w20.07 4 ¶7-8

Abuniin arughunotu aKristẹn phọ moḍuạ okị enhọn eelhe owạ oghoph obobọ oḍighi. Mem dị eḍighi iduọn phọ, eeni ibạm anmụny phọ kokị ghan askul dị kotughemhiọm ghan onhụ emhoom ekpisi phọ. Eeni kewạ ni kẹn mọ aburudẹ r’aburunhiin otuughạ aani onhụ emhoom ekpisi phọ obọ bidị omhiịn oḍighi. Kokaạph ika eḍighi maạr dị ookpomhoghan obobọ egu dị roḅạ ghan onhụ emhạ abidị odi? Oghẹn ookpomhoghan kụ edị eghunotu phọ kokị? Bidị kokị ookpomhoghan dị roḅạ ghan onhụ ekpisi phọ obobọ kokị opọ roḅạ ghan bọ onhụ emhạ phọ abidị ḍughụm? Uw-emhụ eghunotu phọ kụ kasopha ookpomhoghan phọ opọ eghunotu phọ odị kokị bọ, loor esi iduọn ophọn phọ aḍighi bọ osopha odị, ewạ mọ odị aphụr aaḅeghiọn aphogh ipẹ kengọ bọ suọ eghunotu phọ odị. Ewạ mọ yira olhọgh eegu osopha uw-emhụ eghunotu phọ. Ewạ mọ yira osighẹ aani torobọ ipẹ odị asopha bọ kụ oghuraam eghunotu phọ siphẹ ookpomhoghan phọ ayira.—Rom. 15:7. w20.08 30 ¶17-18

Eḍighi maạr dị yira rowạ omhoọgh iikpọ ḍighaạgh aZihova, pọ yira kuu/tughiạn mọ inyaạm ayira, askul dị yira oghị, ekpisi phọ yira oḍuạ bọ kụ omite, obobọ eelạ dị yira omhoọgh kụ keḍighi iyaạr dị yira komạn maạr. Araraạr phọ iphẹn kụ ka/raraạr dị aZihova katuạn usighẹ iyira aḍighinhom. Okạr oghaạph, ibadị awe phọ Enhaạn ‘u/legheri iyaạr, u/moọgh iikpọ r’adọl eghuan.’ (1 Kọr. 1:26, 27) Kụ iḍighi kụ, eḍighi maạr dị nạ u/moọgh aani raraạr phọ iphẹn phọ, pọ kaa/tughiạn mọ kekikima nyinhạ okumu aZihova. Kparipẹ ghụn, miịn idiphọ eepoogh omhiịn dị iikpọ phọ Enhaạn keḍighi oḍighi siphẹ aloor phọ anạ. Esi omaạm, eḍighi maạr dị awe rokparaghạ ghan oḍighi idị nạ kamoọgh iikia esi omheeraam mọ anạ, pọ ḅeeḅereghị aZihova angọ nyinhạ oḅom emhụ dị nạ kagbaạm omheeraam mọ anạ ameremhị. (Efẹ. 6:19, 20) Eḍighi maạr dị nạ asoman egbagarạ e/moon, pọ ḅeeḅereghị aZihova angọ nyinhạ inyaạm pidị nạ arue alhọgh ghan mem mọ amuphẹ nạ katue bọ siphẹ arukumuan phọ odị. Torobọ amem lọ nạ amhiịn olhoghonhaạn aḍighaạgh phọ aZihova siphẹ aghuḍum mọ anạ, omheeraam mọ anạ kapoph ni ḅilhẹ kẹn nạ akpạr. w20.07 16 ¶9

Orue osighẹ Omhạr phọ oḍighi eḅẹl siẹn asighuḍum mọ ayira, pọ ewạ m’orọl idiphọ Ebraham aphinyọn bọ rikiạ dị u/kpaariọn oḍighi idị keḅeraạn Enhaạn. (Mạk 10:28-30; Hib. 11:8-10) Kaa/tughiạn mọ nạ ka/moọgh r’omhoọgh iiḅaghamhị dọl aghuḍum mọ. Ghalhamọ r’abuphẹ okuọm bọ ghuḍum mọ abidị okumu aZihova bịn rosoman ghan ni iiḅaghamhị. (Jems. 1:2; 1 Pit. 5:9) Ḍio arodon, ariphigh dị yira omhoọgh otuạn ogbon aghisigh phọ m’epu idị merọl ghan. Araraạr dị remite siẹn aḅirinhi phọ eḍeenhaan mọ yira odi siḍio eekunha aḅirinhi phọ. Iniin esi ibadị aḍisẹph kirokirọ phọ yira kokelhọm bọ eeḍiạn itooghị Omhạr phọ pọ omhiịn amem dị koḅerion buọ ephomhoghiạn phọ ayira m’omhuughu bọ. Mem mọ amuphẹ phọ, aZihova kakpẹ ni Ebraham iikpiạ omheeraam r’okparạm okori phọ odị, esi oḅeton odị r’abuọ eghunotu phọ odị siẹn ade phọ. Nạ aḍuom ni olhoghi orọl isiphẹ oghuraam aani abidị ḍughụm? Nạ katọl li, eḍighi maạr dị idiphọ Ebraham, nạ amheeraam ni ophinyọn arikiạ loor emhụ Omhạr phọ k’Enhaạn, aphạm omheeraam mọ anạ akparamhị etigheri iiḅaghamhị lọ nạ asoman, ḅilhẹ akparạm akori aZihova.—Mic. 7:7. w20.08 5-6 ¶13-14; 7 ¶17

Yira olegheri ni mọ ghalhamọ amulhọgh ḍien phọ ayira uzẹ ni iyira, aZihova kuḅeton ni iyira angọ ghuḍum. Yira omeeraam ni mọ iyaạr i/lo dị ketue egbariọn siya phọ ayira r’aZihova. (Rom. 8:35-39) P’eeghe idị aZihova maḍeenhaan osụ-olhoghi, esi ongọ ayira oḍuomolhoghi oḅetenhu esi aḍuugh phọ! Dị eego esi oḍuomolhoghi oḅetenhu esi aḍuugh phọ, odị mawunughi elhom ekpinhạ phọ aSetan, eniin phọ amem mọ aḅilhẹ kẹn unyaamhị iyira r’ogbagarạ akpọ oḅio. Nạ kaḍighi ika kụ alegheri mọ nạ katue ni amerenyạn mem dị amulhọgh ḍien phọ aZihova opaạr oghiigh anạ? Eniin eten pọ opuruan aloor mọ, ‘Eḍighi ni idị osopha kirokirọ phọ mị rasopha ghan bọ ḍio ḍio ḍio eḍeenhaan mọ mị aḍuom ni olhoghi aZihova ḍughụm?’ (Luk 16:10) Aḍinhọn pọ, adọl aghuḍum mọ amhị eḍeenhaan ni mọ mị aḍuom ni olhoghi ruguanhaan phọ aZihova, ongọ amhị ipẹ ikuom bọ imhị eḍighi maạr dị mị asighẹ Omhạr phọ kụ aḍighi eḅẹl ḍughụm?’ (Mat. 6:31-33) Eḍighi maạr dị ophanyanhaạn phọ anạ aḍighi ii, pọ nạ aakolhobian ni okaran atorobọ odẹgh ophogh dị nạ asoman.—Prov. 3:5, 6. w20.08 17-18 ¶15-16

Ewạ ni dị yira kokạr osilor ilọ osighẹ oḍighinhom Ekpo Onhụ phọ Enhaạn. Yira kotue ni otuughạ sighalhanyạ osighẹ oḍighinhom epẹ otu ituughạ phọ. Kuolọ orue olhoghonhaạn aḍighaạgh bunhọn dị komeeraam mọ igey aBaibul phọ emạn ni maạr, pọ ewạ ni dị yira kopamanhạm edeọm ituughạ aBaibul ogina ayira dị emhoon. Ewạ ni dị yira kosighẹ Ekpo Onhụ phọ Enhaạn okparamhiọm omheeraam mọ ayira. Iphẹn phọ epelhom ni oḅẹm m’aạl ghan aBaibul phọ bịn. Ewạ mọ yira ogbirima ghan ipẹ yira aạl bọ, owaaghị ghan raraạr siphẹ arinyạ phọ ayira, pidị yira otue onaghanhạn igey aBaibul phọ ḅilhẹ osighẹ oḍighinhom. (1 Tim. 4:13-15) Bịn yira morue osighẹ Ekpo Onhụ phọ Enhaạn otughemhiọm aani bunhọn. Oḅilhẹ oghaạph, iphẹn phọ epelhom oḅẹm m’aạl esi aBaibul bịn oḅenhị oye. Ewạ dị yira kologhonhaạn ḍighaạgh we phọ onhaghanhạn esi aBaibul phọ, ḅilhẹ r’ilọ oḍighinhom. Yira ophamhanhạm edeọm ituughạ aBaibul dị emhoon, yira kotue ni obughẹ sighalhanyạ phọ ayira ilọ osighẹ Ekpo Onhụ phọ Enhaạn otughemhiọm aani bunhọn.—2 Tim. 3:16, 17. w20.09 28 ¶12

Yira kotue ni ogbon oḍighi iphelhegbeel phọ eḍighi maạr dị yira ootughiạn ghan ipẹ aZihova raḍighi bọ olhoghonhaạn ayira ḍighaạgh. Esi omaạm, aZihova mamiteom rinyạ kirokirọ ḅilhẹ r’idị edi siphẹ intanẹt phọ, ilọ onhaghanhạm arurụ, asividio, ḅilhẹ r’aJW Brokastịn. Tuutughiạn kẹn ilọ osoph intanẹt phọ ayira, ogbạ ni oteneghi osoph intanẹt phọ ayira runhụ aḍiaḅạ dị epel li 1,000! (Mat. 24:45-47) Enhọn eten dị ketue ilhoghonhaạn iyira ḍighaạgh ogbon oḍighi iphelhegbeel phọ pọ odaphạn aani eḍeenhaan phọ aZizọs. Odị o/mheera mọ iyaạr egbaragbaramhị nyodị oḍighi ogbaanhaạn ilọ igey phọ. (Jọn 18:37) Odị o/mheel oḍighanhaan mem mọ aSetan aḍeenhaan bọ nyodị “oomo areelhe aḅirini phọ, r’igbogh phọ abidị,” obobọ odị o/mheel oḍighanhaan mem mọ owạ ghan bọ osighẹ odị oḍighi uw-emhạ. (Mat. 4:8, 9; Jọn 6:15) Odị o/mheera ikạ eephuạ ophorogh eelạ eḍigh siphẹ aloor phọ odị; odị o/mheera ikpuuroghọm edughe nyodị. (Luk 9:58; Jọn 8:59) Mem lọ yira osoman odẹgh ophogh omheeraam mọ ayira, yira kotue ni ogbon oḍighi iphelhegbeel phọ eḍighi maạr lọ yira ootughiạn ghan oromha phọ aPọl odi bọ siẹn esi aBaibul phọ arodon. w20.09 9-10 ¶6-7.

P’eeghe idị olhoghi ayira aḅaạl omhoọgh ibadị anmariịr dị rokumuan ni agey siẹn ookpomhoghan phọ! Bidị ropinom aani ghan ni bin ituughạ phọ, komite epẹ erugh phọ. Buniin ropinom aani ghan ni bin omhaạr ophogh aKindom Họl phọ, ḅilhẹ abuniin roḍeenhaan ghan ogbolhomaam k’oghị esi abumor r’abumarani phọ. Ii, ogbạ agey, bidị osoman ni ipaanhaạn. Abuniin anmariịr phọ omoọgh burudẹ r’aburunhiin dị mokpọ dị bidị ropogh. Abunhọn osoman ikpuuroghọm abuọ eghunotu abidị. Ḅilhẹ abuniin ogina abidị kụ rookonhom ibạm anmụny phọ, kụ rokumuan ghan ḍughul r’otaany ongọ abidị eḍien. Eeghe kụ iḍighi kụ ekpẹ bọ ni dị yira kogbon obakị aani ghan abumarani phọ? Loor esi dị aḅirinhi phọ ro/ngọ ghan eghuan phọ epẹ esi bọ nmariịr. Oḅarạm isiẹn, aBaibul phọ uromha iyira mọ yira obakị ghan nmariịr phọ. Esi omaạm, otelhedom mọ aPọl aḅenhị ni ookpomhoghan phọ arọl bọ epẹ Rom mọ bidị oghuraam ni umarani phọ Fiibi kụ oIhoghonhaạn nyodị ḍighaạgh “torobọ iyaạr Iọ ekuom nyodị.” (Rom. 16:1, 2) APọl olọ ekpisi dị oḅẹm ghan bọ mọ anmariịr u/mạn maạr ḅilhẹ m’u/kpẹ oghuenhi ghan. Kuolọ idiphọ onyọ aKristẹn, odị atuughaạny ni Zizọs, esi olhọgh ghan eegu r’onmạ ghan ighirigiir nmariịr. w20.09 20 ¶1-2

Olhoghonhaạn aḍighaạgh buphẹ yira rotughemhị ghan bọ Baibul phọ, omhoọgh eephuạ oghị oghaạph aani iiḅi iinhaghạn phọ yira otue ni opuru bidị mọ: “Ika kụ idị osighẹ oḍighinhom itughemhị aBaibul phọ, menhighemhị dọl aghuḍum mọ anạ? Nạ ragbi mọ enighẹ ni dị abunhọn konaghạn aani dom mọ aḍiẹn phọ ḍughụm? Nạ kaḍighi ika kụ aloghonhaạn aani bidị ḍighaạgh?” (Prov. 3:27; Mat. 9:37, 38) Legheri mọ aZizọs uḅenhị iyira otughemhị aani abunhọn ilọ “ooko oomo araraạr phọ” odị atọ bọ uḅenhị iyira. Kụ iphẹn phọ eḅaramaạm iyạl phọ ikaraghị igbogh iilhogh phọ—ephomhoghiạn Enhaạn ḅilhẹ r’amatuman. Ephomhoghiạn Enhaạn ḅilhẹ r’amatuman emoọgh muḅọph r’oghaạph iiḅi iinhaghạn phọ ḅilhẹ r’oḍighi awe bumatuạn. (Mat. 22:37-39) Okạr oghaạph, ephomhoghiạn kụ ekpanhạ iyaạr phọ renyu ghan bọ oye ophinhom aani abin oḍighi iphelhegbeel phọ. Ii, ibadị abuphẹ yira rotughemhị ghan bọ Baibul phọ otue ni okiilhaan oghị oghaạph aani iiḅi iinhaghạn phọ. Kuolọ, yira kotue ni ongọ bidị okuphom owol mọ r’olhoghonhaạn aḍighaạgh aZihova mọ enụm enụm bidị kotue ni okpạr opu oghiilhaan awe.—Ps. 18:1-3; Prov. 29:25. w20.11 3 ¶6-8

Mem dị nạ raakolobian ilọ otughemhị oye Baibul, ḅarạm ni ooḅereghinhaạn opọ nạ ratughemhị bọ ḅilhẹ r’araraạr phọ reeḅaghamhị bọ nyodị. Ḅeeḅereghị alhọm aZihova alhoghonhaạn nyinhạ ḍighaạgh dị nạ katughemhị nyodị eten dị ketir ekpom mọ. Erọl ghan siphẹ olhoghi phọ anạ mọ aḍiigbu phọ anạ pọ oḍighi idị opọ nạ ratughemhị bọ kapoph akị ghisigh aḍiiny aani muụm. Emoghi ni kẹn dị opọ rotughemhị ghan kaḅaanhaạn ghan aZihova. Ika? Esi onhaghanhạn ghan r’oghaaphạn ghan aZihova. Odị kanaghanhạn ghan aZihova esi aạl ghan aBaibul phọ ḍio ḍio ḍio. (Josh. 1:8; Ps. 1:1-3) Odị katue niaḅaanhaạn ghan aZihova esi iiḅereghị torobọ aḍio. Orue olhoghonhaạn odị ḍighaạgh, pọ miighom ghan ituughạ phọ r’iiḅereghị aḅilhẹ akureriom ghan r’iiḅereghị, agholhom aani ghan ḍien odị siphẹ iiḅereghị phọ. Loor esi dị mem dị odị anhaghạn iiḅereghị phọ anạ, odị katuughạ ni siphẹ phọ ilọ ooḅereghị ghan k’ekpom ḅilhẹ aaḅereghị ghan angọ aZihova dị eego esi aḍien phọ aZizọs Kraist. (Mat. 6:9; Jọn 15:16) P’eeghe idị aạl ghan aBaibul phọ ḍio ḍio ḍio (Onhaghanhạn ghan aZihova) r’ooḅereghị ghan (oḅaanhaạn ghan aZihova) keloghonhaạn ḍighaạgh opọ nạ ratughemhị ghan bọ oḍuraan ogbị Enhaạn!—Jems. 4:8. w20.10 8 ¶8; 9 ¶10-11

Aḍiḅeraạn ophamhanhạm eephọ r’omhaạr oḅoonhomhị araraạr phọ olhegheriom bọ buḅẹl aKristẹn phọ, kụ edi aani siẹn ookpomhoghan phọ aZihova rodon. (Iiḍighi 16:4, 5) Esi omaạm, eḍighi maạr dị nạ aghị Ituughạ Otu Okoriom onhọn ookpomhoghan—ghalhamọ enhọn eelhe—nạ kalegheri ni ipẹ kopạm bọ ituughạ phọ ḅilhẹ r’emhuoghaạph phọ kotuughạ bọ. Nạ ka/loghoma mudị nạ ooruen! Iyaạr edi ni dị ketue emiteom muḅọph phọ amuẹn, emuton uwaloor iigbia phọ Enhaạn ḍughụm? (Zeph. 3:9, igẹ dị edi ude) Nạ kaḍigh ika? Puruan loor mọ: ‘Mị ralọgh ghan ni kaphophe muḅọph r’eephọ siẹn ookpomhoghan phọ ḍughụm? Mị asooromhi ni loor ranaghanhạn ghan buphẹ oḍiemhiom bọ ḍughụm? Abunhọn awe kotue ni ubeḍenhọm imhị eḍighi maạr dị mị amhoọgh roopoogh arukumuan siẹn ookpomhoghan phọ ḍughụm? Mị aḍighi ni oye dị raḅon ghan, ḅilhẹ mị aakolhobian ni olhoghonhaạn ghan aḍighaạgh r’okumu ongọ abunhọn ḍughụm?’ (Jems. 3:17) Eḍighi maạr dị nạ amhiịn riisi dị nạ asughanham, pọ ḅeeḅereghị alhọm uwaloor iigbia phọ aZihova. Nạ amheera mọ uwaloor iigbia phọ aḅọl raagharạ phọ anạ aḅilhẹ amhoogh roozọ phọ anạ, abumor r’abumarani phọ kophomhoghiạn ni nyinhạ oḅilhẹ omhaghamhị nyinhạ maạr. w20.10 23 ¶12-13

Ekpo Onhụ phọ Enhaạn ketue ni eḍighi atamaḍiki ingọ iyira. (Jems. 1:23-25) Ogbogh opol ayira ropogha ghan ni atamaḍiki torobọ aḍiroọr kụ ogbi oḅuạ olhoghotu. Omhaạr ophogha mughumọ esi edi ni siphẹ aloor phọ dị emhoghi oolemhi kụ abunhọn awe ogbi omhiịn. Igina phọ kẹn, mem dị yira aạl ghan Baibul phọ torobọ aḍio, yira komiịn ni reten dị yira kotue oolemhi iitughiạn r’aroozọ phọ ayira. Ibadị romooghọm ghan ni suọ aạl ghan ibạl aḍiroọr phọ torobọ aḍiroọr kụ bidị ogbi oḅuạ olhoghotu. Bidị rongọ ghan eepoogh dị ipẹ bidị aạl bọ ketir iitughiạn phọ abidị. Kụ iduọn aḍio phọ rekị bọ, bidị opogh rokiọm ghan ghisigh omhiịn areten dị bidị kosighẹ oḍighinhom Ekpo Onhụ phọ Enhaạn. Oḅarạm isiẹn, yira omoọgh otuughạ kụ oḅilhẹ ogbirima ghan Ekpo Onhụ phọ Enhaạn ḍio ḍio ḍio. Etue ni edugh oḍighi iphẹn phọ, kuolọ ephẹn phọ kụ ekạr ekpanhạ iyaạr dị ketue ilhoghonhaạn iyira ḍighaạgh orelhe ekololhoọny eten aghuḍum mọ. Kotue ni omaaniọm Ekpo Onhụ phọ Enhaạn idiphọ amasịn X-ray phọ ropoghom ghan bọ komhiịn olhoghi aloor oye. Kuolọ yira omoọgh osooromhi aloor orue omhooghọm asuọ oroma lọ aBaibul phọ obobọ buphẹ omheerạ bọ enye Enhaạn ongọ. w20.11 18 ¶3; 20 ¶8

Ii ghalhamọ r’iduọn aKristẹn oḅẹl okuron asiạ phọ ogbor ghan bọ ni osoman igbiphoghọm, bidị ughelhọm ghan ni kẹn simem eephọ. Abumatuạn phọ uḍighinhom ghan ika roopoogh phọ ipẹ phọ? Alhephiri r’anmariịr phọ abuphẹ phọ okpẹ bọ oḍuomolhoghi phọ ughiọm ni ghisigh oghaạph iiḅi iinhaghạn phọ dị uu/sophion. Siphẹ aḍinyạ Iiḍighi phọ, igẹ phọ iḅenhị iyira mọ bidị ‘uIọgh eegu [aZihova],’ kụ oghiọm ghisigh oghaạph ghan iiḅi iinhaghạn phọ, bịn eḍighi idị bidị “omiigh omoọgh asinị r’aḍiphoph.” Dị eegholhaan ni, aZihova asẹph ni ikuph phọ bidị olhọgh bọ oghaạph iiḅi iinhaghạn phọ mem mọ bidị omhoọgh bọ eephọ phọ. (Iiḍighi 9:26-31) Abumatuạn oḅẹl okuron asiạ phọ usighẹ ni torobọ eepoogh dị bidị omhoọgh oḍighinhom oraramhị iiḅi iinhaghạn phọ. Esi omaạm, mem dị otelhedom mọ aPọl alhọgh elhegh mọ eboom eghuugh arukumuan meghughuronhu epẹ Efesọs, odị asighẹ ni aḍighinhom eepoogh phọ epẹ phọ oghaạph iiḅi iinhaghạn phọ, r’oḍighi awe bumatuạn epẹ phọ. (1 Kọr. 16:8, 9) Abutelhedom mọ ulhọgh ni iboom ikuph “oghaạph ghan otughemiọm iIọ [aZihova].” (Iiḍighi 15:30-35) Kụ ikọm eeghe kụ emiteom? Ikọm emiteom ipẹ edi bọ siẹn esi aBaibul phọ arodon. w20.09 16 ¶6-8

Mem mọ Adam aḍighi bọ ikarạph, odị asighẹ ḍuugh kụ aruom eemharạ eemharạ phọ odị ḅilhẹ r’aloor odị. Kụ yira romiinhọm ni iikpiạ ikarạph phọ odị. Kuolọ loor esi iduọn Enhaạn aḅeton bọ Oọny phọ odị, yira kotue ni omoọgh imạ phọ ipẹ edi bọ ghisigh phọ! “Oḅerenu esi aḍuugh phọ atuạn kẹn ni oye kụ aru,” ophọn phọ aZizọs. Otelhedom mọ aPọl aḅẹm mọ, “idiphọ oomo awe phọ oḅophoghạn bọ Adạm kụ otuạn bọ omuughu kụ idị kotuạn Kraist oḅerion oomo awe phọ oḅophoghạn bọ nyodị.” (1 Kọr. 15:22) Eeghe kụ emhụ iphẹn aPọl aḅẹm bọ mọ “oomo awe phọ oḅophoghạn bọ Adạm kụ otuạn bọ omuughu”? APọl aghaạph ghan ilọ oomo omhạr awe olhe bọ erua ikarạph re/munughan ḍighaạgh Adạm, mekọm bọ iyaạr phọ awe romugh ghan bọ. (Rom. 5:12) Adạm o/lho aani igbo “oomo awe phọ” koḅerion bọ. Ekiạ etagharạn phọ aKraist ii/kpereghi aani ikarạph phọ Adạm, odị amhunhughan ni aḅilhẹ alhegheri kụ agbagharạn itọ phọ Enhaạn. Ipẹ emitenhaan bọ Adạm kụ idị kemitenhaan aani “rutụ” igạ phọ “Oọny phọ oye” kaagbonhaan bọ iiruẹn, buẹn phọ “ko/ḍuạ esi iminimiịn dị eekuna i/lo.”—Mat. 25:31-33, 46; Hib. 5:9. w20.12 5 ¶13-14

Eḍighi maạr dị yira u/tue umoọgh eepoogh arukumuan dị yira ophorogh ghan, pọ ootughiạn eḍeenhaan aruukpaạny phọ okpẹ bọ oḍuom olhoghi phọ. Esi omaạm, mem itooghị Uw-emhạ phọ Ahab, aZihova amhạgh ni ruukpaạny odị aakpomhoghi dị bidị kosogh aani ḍiitughiạn ilọ ookelheghi Uw-emhạ phọ Ahab. Kụ ibadị aruukpaạny usogh ni. Kuolọ Enhaạn asighẹ ḍiitughiạn oniin ookpaạny kụ aḅẹm mọ aḍiitughiạn phọ opọ phọ kụ kemoọgh ekol. (1 Ki. 22:19-22) Abueriphọ aruukpaạny phọ uḅonyonhu ni ozuan esi ootughiạn ghan mọ, ‘abidị u/moọgh maạr oḍighinhom ḍughụm?’ Eeye, bidị u/ḍighi idiphọ. Aruukpaạny phọ osooromhi ni loor okiọm ghisigh rongọ ghan aZihova eghuan phọ ewạ bọ. (Judg. 13:16-18; Ogan. 19:10) Legheri mọ eepoogh i/lo dị eeleeny omheera ghan adiẹn phọ Enhaạn roghaạph ilọ Omhạr phọ Odị. Aroopoogh arukumuan kụ i/ḍighi bọ iyaạr phọ yirạ omhạn bọ maạr risigh aZihova. Kuolọ amem dị yira oḍeenhaan osooromhi aloor ḅilhẹ olhegheri okụ ayira, ku amem dị yira koḍigh eghuan risigh Enhaạn ḅilhẹ r’abumor phọ ayira. Esi iduọn phọ, lọm aZihova olhoghonhaạn aḍighaạgh orue omhoọgh eegharạ osooromhi aloor r’olhegheri okụ. Tuutughiạn imạ areḍeenhaan awe dị osooromhi loor oḅilhẹ olhegheri okụ abidị, ogẹ bọ oseere siphẹ aBaibul phọ. Kumuan angọ bumor r’abumarani phọ anạ r’ophooph olhoghi torobọ eten dị nạ katue.—1 Pit. 5:5. w20.12 26 ¶16-17

Eghoony apelieẹny phọ pọ oḍuomolhoghi phọ aZihova ungọ bọ iyira—oḍuomolhoghi phọ yira omhoọgh bọ mọ odị kuphẹl li iyira esi aḍuugh ḅilhẹ akpẹ iikpiạ oomo abuphẹ roḍighi bọ ogbi phọ odị. (1 Tẹs. 5:8; 1 Tim. 4:10; Taitọs 1:1, 2) Oḍuomolhoghi apelieẹny phọ rakoph ghan iitughiạn r’olhegheri iyaạr phọ ayira. Raḍighi ghan idị yira rogbon ghan ruguanhaan phọ Enhaạn ḅilhẹ r’idị yira koo/ḅaghamhiạn ghan loor iboom ilọ iiḅaghamhị dị yira osoman. Yira rozua ghan eghoony apelieẹny phọ esi oḍighi ghan idị iitughiạn phọ ayira keḅọph r’iitughiạn phọ Enhaạn. Esi omaạm, yira okpasaghị oḍuomolhoghi phọ ayira esi Enhaạn, ke/si eelạ. (Ps. 26:2; 104:34; 1 Tim. 6:17) Elhool eghạm mọ uwaloor iigbia phọ rangọ ghan bọ pọ Ekpo Onhụ phọ Enhaạn, aBaibul phọ. Elhool eghạm mọ emoọgh iikpọ dị ketue ni esoph etoph okpẹ, ḅilhẹ etagharạn we oḍighi ebenhẹ ongọ itughemhị okpẹ r’ikarạph araagharạ. (2 Kọr. 10:4, 5; 2 Tim. 3:16, 17; Hib. 4:12) Yira rotuughạ ghan ilọ omhaạr oḍighinhom elhool eghạm mọ ephẹn phọ dị eego esi ituughạ aBaibul ogina ayira ḅilhẹ r’esi itughemhị phọ ookpomhoghan phọ Enhaạn rutughemhị ghan bọ iyira.—2 Tim. 2:15. w21.03 27 ¶4; 29 ¶10-11

Ghalhamọ r’iduọn olhọgh bọ nyodị ikoli loor emhụ ogbeelhom ilọ aZizọs, otelhedom mọ aJọn amạ ni amiteom mọ odị raatughiạn ghan ni ilọ abunhọn. Esi omaạm, odị agẹ ni ipẹ ogananami bọ oḍeenhaan nyodị aghiomaạn ookpomhoghan phọ, pidị bidị olegheri aani ilọ araraạr dị “kenuụn ni emiteghu.” (Ogan. 1:1) Kụ eeni siẹn amem mọ omiteom bọ nyodị ikoli phọ epẹ Patmọs, kụ edị aJọn agẹ bọ ḍinyạ phọ odị ilọ adọl aghuḍum mọ r’arukumuan phọ aZizọs. Odị aḅilhẹ kẹn agẹ iraạr arinyạ olhọgh ophophe oḅilhẹ okparamhiọm abumor r’abumarani phọ. Nạ katue atuughaạny aani eegharạ osighẹ aloor ophighironhọm ekiạ phọ aJọn, aḅilhẹ aḍeenhaan mọ nạ apomoghiạn we esi ipẹ nạ asaḅạr bọ oḍighinhom aghuḍum mọ anạ. Aḅirinhi phọ aSetan rawạ ghan dị nạ kaatughiạn ghan ilọ aloor anạ bịn, esi ogbo ikpoki obobọ omiteom aḍien. Kparipẹ r’adọl aghuḍum dị erọl idiphọ, aKristẹn oomo isiẹn aḅirinhi phọ rolọgh ghan mem mọ amuphẹ bidị kotue bọ, ogbeelhom adom Omhạr phọ, ḅilhẹ r’olhoghonhaạn aḍighaạgh we oḍuraan ogbị aZihova. w21.01 10 ¶9-10

AJonatan mutue ni amhoọgh eḍịm aghị esi aDevid. Idiphọ oọny Uw-emhạ phọ Sọl, aJonatan mutue kẹn ni aḅẹm mọ onọ kụ amhoọgh elhiom odạ idiphọ okpanhạ oọny. (1 Sam. 20:31) Kuolọ, aJonatan o/ḍighi idiphọ, asooromhi loor kụ aḅạr aZihova. Esi iduọn phọ, odị abakị ni eten dị emhunhughan opọ aZihova masaḅạr bọ oḍighi uw-emhạ, Devid. Odị aḅạr Devid agey, ghalhamọ r’iduọn ekọm bọ ni ophin olhoghi engọ Sọl odẹ phọ odị. (1 Sam. 20:32-34) AJonatan amhoọgh ephomhoghiạn phọ epẹ edi ghan bọ igbo anmụny onhiin kụ aghị esi aDevid, esi iduọn phọ odị o/mhiịn Devid idiphọ oye dị r’odị rookonoghiạn odạ. AJonatan ophelhegbe oye dị asilor orạph akumhụgh ḅilhẹ r’oye eghạm dị akpọ oḅio. Olegheriom nyodị r’odẹ phọ odị Sọl, idiphọ awe dị “okem ghan opu uga” ḅilhẹ “okpạr opu anamdikạ.” (2 Sam. 1:22, 23) Esi iduọn phọ, aJonatan mutue ni aghol emhụ iduọn phọ abaga. Odị oo/pikian obobọ o/ghaghạm Devid olhoghi. Kparipẹ ghụn, aJonatan aphomhoghiạn Devid loor akpọ oḅio phọ r’obeḍenhọm aZihova phọ aDevid. Okạr oghaạph, amem mọ aDevid aghiigh bọ Golayạt kụ edị aJonatan amhiigh bọ ophomhoghiạn odị idiphọ aloor phọ odị. w21.01 21 ¶6; 22 ¶8-9

All AZizọs Kraist kụ uw-emhụ oomo aKristẹn, kụ odị aḍighi oḍiemhiom dị amhunhughan. Toroboiperolbọ, mem dị anhịr dị aḍighi onyọ aKristẹn aạl ilhom, pọ odị maḍigh eeḍiạn oye dị u/munughan. Kụ ipẹ phọ ketue ni eḍighi ipaanhaạn. Kụ iḍighi kụ, mem dị anhịr ephoph rawạ aạl ilhom, ewạ ni dị odị kapuruan loor mọ: ‘Eeghe kụ iḍeenhaan bọ mọ onyọ umor phọ ophọn phọ kaḍighi ni ogey uw-emhụ eghunotu? Odị asighẹ ni rukumuan aZihova kụ aḍighi eḅẹl siphẹ adọl aghuḍum mọ odị ḍughụm? Idiphọ kụ i/lo, pọ eeghe kụ iḍighi kụ mị aatughiạn bọ mọ odị katue ni ulhoghonhaạn imhị ḍighaạgh ophamhanhạm igey asiya r’aZihova?’ Ewạ kẹn ni dị onyọ umarani kapuruan loor mọ: Mị amoọgh ni raagharạ dị ketue eloghonhaạn ḍighaạgh pinien phọ ḍughụm? Mị amoọgh ni eegharạ okparạm r’onmo ghan inmo ḍughụm? Mị amoọgh ni siya dị ekpạr r’aZihova ḍughụm?’ (Eccl. 4:9, 12) Oḅaạl olhoghi phọ anhịr ilhom kamoọgh bọ siphẹ apinien phọ, odianhaan esi osopha kirokirọ phọ odị asopha bọ kụ agbi bọ aạl ilhom mọ. Ariisi eelạ abumarani ayira oḍighi ni emạ eḍeenhaan osooromhi aloor ongọ burulom abidị. Ekpẹ ni osẹph abidị! w21.02 8 ¶1-2

Iduọn asiạ phọ rekị bọ, ibadị abukaaphọm m’oghonyị siigbu otuughạ onhọn onhụ, pidị bidị otue obughẹ rukumuan phọ abidị epẹ erugh phọ, ḅilhẹ otueokị rokumuan rookpomhoghan dị emhoghi ibadị abukaaphọm ilọ Omhạr phọ. Ophọn phọ aḍighi osopha dị aKristẹn phọ abuẹn phọ kụ osopha, omhiịn mọ bidị obughẹ iiḍighi Omhạr phọ. Ii olegheri mọ resighẹ ghan ni ibadị asiạ kụ bidị ogbi okạr omhaạr oḅạ onhụ phọ, ghalhamọ r’iduọn phọ ni bidị rologhonhaạn ghan ni ḍighaạgh ookpomhoghan phọ ibadị areten. Imạ areḍeenhaan phọ r’olhegheri iyaạr phọ abidị rekparamhị ghan ni keḅilhẹ emhiighemhi ookpomhoghan phọ. Yira omaghamhị ni maạr bumor r’abumarani phọ abuẹn osighẹ bọ siloor ropinyonhọm rikiạ! Aḍita ikumor awe ku/tuạn mọ onyọ umor o/kạr omhaạr o/ḅạ onhụ ekpisi phọ bịn owilhẹ omạ odị idiphọ okumor oye obobọ idiphọ odị raloghonhaạn ghan ḍighaạgh ikumor awe. Ewạ dị ikumor awe phọ kosighẹ ipẹ aBaibul phọ aghaạph bọ kụ opoghom mughumọ onyọ umor asianhaan ni oḍighi okumor oye obobọ odị raloghonhaạn ghan ḍighaạgh ikumor awe kparipẹ r’onhụ phọ ookpomhoghan phọ roḅạ ghan bọ.—1 Tim. 3:1-10, 12, 13; Taitọs 1:5-9. w20.08 30 ¶15-16

Awe rootughiạn ghan mọ amem dị bidị omhoọgh ogey omhoon aloor, iboom ikpoki, ḅilhẹ r’eephọ siphẹ eghunotu phọ bịn kụ edị bidị kotue omoọgh ibo. Kuolọ odọ phọ ibo phọ aJems agẹ bọ eḍighi pakirị eemuma uwaloor phọ Enhaạn, kụ re/daphạn ghan dọl oye phọ. (Gal. 5:22) Onyọ aKristẹn kamoọgh ibo phọ iphẹn phọ, obobọ aloghoma oḅaạl olhoghi mem dị alhegheri mọ odị raḍighi ni ipẹ eḅeraạn bọ aZihova ḅilhẹ radaphạn ni eḍeenhaan phọ aZizọs. (Luk 6:22, 23; Kọl. 1:10, 11) Idiphọ anem aniạn otozị reemor ghan bọ olhoghi otozị eghelhe, kụ edị odọ phọ ibo phọ iphẹn phọ reemor ghan olhoghi ekpom onyọ aKristẹn. Ra/kparakpara ghan mem dị asoman e/moon obobọ ekulhom. Ḅilhẹ ra/ḍim ghan mem dị oye siphẹ eghunotu phọ obobọ epẹ erugh phọ ragilaạm kaḅilhẹ asophoghom. Kparipẹ r’oḍim, ibo phọ ayira rekuamhị ghan ghụn keemor mem dị abuọ isophoghom okparaghạ oḍime ibo phọ ayira. Iiḅaghamhị phọ yira rosoman ghan bọ loor omheeraam mọ ayira eḍeenhaan mọ yira abugey abumatuạn aKraist phọ ni. (Mat. 10:22; 24:9; Jọn 15:20) Pọ kụ iyaạr phọ aJems agẹ bọ iphẹn edi bọ siẹn esi aBaibul phọ arodon. w21.02 28 ¶6

Mem dị nạ amhiịn riisi aBaibul dị eḍeenhaan mọ emạn ni maạr ophoomhị ghan aloor bịn oḍuom olhoghi aZihova, kparaghạ ghan okpạph ophạm. Omhiịn mọ nạ atue aatughiạn, pọ bạl ghan amiteom, agẹ alhọgh esi, kụ atọ ghan mem aḅilhẹ aphogh. Utọ oḅenhị Joshua mọ agbor ghan aạl Olhogh phọ r’eḍọgh ude pidị odị azọ ghan r’osụ-olhoghi. Igẹ Olhogh phọ keloghonhaạn nyodị ḍighaạgh okpạr opu oghiilhaan phọ odị mumoọgh bọ mem mọ odị aḍiemhiom bọ we phọ Enhaạn. (Josh. 1:8, 9) Ibadị asiikpịgh Ekpo Onhụ phọ Enhaạn ketue ni epoomhị ekpom anạ ḅilhẹ engọ nyinhạ eephọ esi asidọl dị ketue ni ekọm ooḅaghamhiạn aloor obobọ oghiilhaan. (Ps. 27:1-3; Prov. 3:25, 26) Siphẹ otu ituughạ phọ, yira romooghọm ghan ni suọ raghaạph phọ rongọ ghan bọ siphẹ eegbolhom mọ, ophanyanhaạn abumor phọ, r’oghaaphạn abumor r’abumarani phọ ayira. (Hib. 10:24, 25) Yira komoọgh kẹn ni iidereghị mem dị yira oghaạph ipẹ yira olhoghoma bọ oḅenhị righirị dị yira oḍuom olhoghi siẹn ookpomhoghan phọ. w21.01 6 ¶15-16

Nạ uḍeenhaan ni oboom omheeraam aḅilhẹ aḍuom olhoghi aZihova mem mọ nạ aḍiiny bọ muụm. Kụ r’oḅaạl olhoghi, aZihova asighẹ ni nyinhạ alhoghọm aani siphẹ eghunotu phọ odị. Iyaạr dị ewạ dị nạ kaḍighi nyiidiphọ pọ oghiọm aghisigh obeḍenhọm ghan aZihova. Etue ni edugh esi anạ obeḍenhọm aZihova mem dị nạ rawạ osopha osopha dị kanme ni ghuḍum anạ. Kuolọ kokaạph aani ika ilọ inhọn asimem? P’eeghe idị emhạn maạr obeḍenhọm aZihova mem dị nạ rawạ osopha ilọ odọ umoore, oḍighi, ḅilhẹ r’asiigbu dị nạ raporogh oteẹny! Ka/beḍenhọm osụ olhoghi anạ bịn. Kparipẹ ghụn, wạ sinhị iilhogh aBaibul dị emhoọgh muḅọph r’asidọl phọ anạ, kụ adaphạn iiḅakiọm mọ. (Prov. 3:5, 6) Nạ aḍighi iduọn phọ, olhoghi aZihova kaḅaạl li ḅilhẹ ookpomhoghan phọ koḍuom ni nyinhạ olhoghi oḅilhẹ olhọgh nyinhạ eegu. Idiphọ oomo ayoor u/munughan bọ, nyinha iḍoọgh phọ i/munughan aani, kụ eeni amem nyinha kepiomạn ghan ni. Toroboiperolbọ, iphẹn phọ ki/kikima inyinha oḍighi oomo ipẹ nyinha ketue bọ siẹn arukumuan phọ aZihova. w21.03 6 ¶14-15

Nạ asoman ni isophoghom ḍighaạgh abuọ eghunotu anyinha ḍughụm? Obobọ nạ odi eelhe dị osophoghom iiḍighi awe phọ aZihova? Eḍighi idiphọ, pọ nạ katue ni amoọgh okparamhị esi iphẹn ogẹ bọ siẹn 2 Timoti 1:12-16 r’4:6-11, 17-22. Otelhedom mọ aPọl agẹ siikpịgh phọ iphẹn phọ mem dị odi ikoli. Kụ nạ agbi aạl asiikpịgh phọ ipẹ phọ, ḅeeḅereghị aḅenhị aZihova iiḅaghamhị phọ anạ ḅilhẹ r’ipẹ nạ alhoghoma bọ. Kaạph okạr ipẹ nạ alhoghoma bọ. Lọm aZihova alhoghonhaạn nyinhạ ḍighaạgh omhiịn asinhị iilhogh siẹn oghaạph phọ aPọl, dị ketue elhoghonhaạn nyinhạ ḍighaạgh olhegheri ipẹ nạ katue ghan bọ aḍighi mem lọ nạ asoman iiḅaghamhị. AZihova aghiọm ni olhoghi Pọl mọ odị kasoman ni igbiphoghọm loor iduọn odị aḍighi bọ onyọ aKristẹn. (Iiḍighi 21:11-13) Ika kụ idị aZihova alhoghonhaạn ḍighaạgh Pọl? Odị aphagharanhaạn iiḅereghị aPọl kụ angọ inyaạm nyodị. AZihova angọ ni okuphom owol Pọl mọ odị kamoọgh ni iikpiạ phọ odị. AZihova aḅilhẹ kẹn aḍighinhom righirị phọ abuphẹ oḅạr bọ Pọl, ongọ odị olhoghonhaạn aḍighaạgh dị akasiạn. w21.03 17-18 ¶14-15, 19