July

Ophorogh oye eḍighi aani pakirị iikolhobian phọ aZihova. Eḍighi ilọ asuọ ayira r’opọ aḍighi bọ ikarạph phọ. Abuniin siphẹ ookpomhoghan phọ eeni kokaạph ni mọ ipẹ olhiọm bọ oye phọ i/nighẹ. Kuolọ legheri mọ abudọ awe phọ abuẹn phọ ro/wạ ghan oghaạph opiomạn oḍighinhom ikarạph phọ. Iyaạr phọ rokaạph ghan bọ siẹn phọ pọ, yira u/legheri oomo ariphigh phọ. Kụ iḍighi kụ, eḍighi osụ olhoghi oḍuom olhoghi mọ ikumor awe phọ uḍighi ni oomo ipẹ bidị kotue bọ odạph asinhị iilhogh aBaibul phọ kụ osoph ooruẹn dị adaphạn “itooghị phọ aZihova.” (2 Chron. 19:6) Mem dị nạ abakị osopha phọ ikumor awe phọ osopha bọ ophorogh oye ephomhoghiạn anạ, pọ iduọn phọ eeni nạ raloghonhaạn ghan nyodị ḍighaạgh oḅula esi aZihova. Elizabeth aḅẹm mọ, “ikạr kụ ikparanhaạn iyoor owilhẹ ooḅughonhaan oọny phọ ayoor. Kuolọ mem mọ odị aḅula bọ esi aZihova odị aḅẹm mọ ikpeanhaạn ni ophorogh odị. Iduọn esighẹ bọ rekị, odị asereghiạn ni raraạr dị odị atuughạ esi ipẹ emitenhaan bọ nyodị.” w21.09 28-29 ¶11-12

Tuutughiạn ilọ ekpukele anhịr phọ. Irọl li olhoghi odị ongọ aZihova idị epu siphẹ. Kuolọ odị angọ aZihova oomo ipẹ odị amhoọgh bọ. Kụ aZizọs alhegheri ni mọ Odẹ ph’odị amaghamhị ni maạr ipẹ anhịr phọ asogh bọ. Iyaạr dị emhạn maạr dị yira otuughạ siẹn phọ pọ: Olhoghi aZihova raḅaạl ghan ni mem dị yira ongọ nyodị oomo ipẹ yira kotue bọ—iduọn phọ pọ rukumuan dị eḍuạ k’ekpom. (Mat. 22:37; Kọl. 3:23) Olhoghi aZihova akạr kụ raḅaạl ghan mem dị amhiịn dị yira roḍighi oomo ipẹ yira kotue bọ! Iphẹn phọ eḅaramaạm ni mem mọ r’inyaạm mọ yira rolọgh ghan bọ okumu odị siphẹ otu ituughạ phọ r’epẹ erugh phọ. Ika kụ idị nạ katue asighẹ aḍighinhom iphẹn oghaạph bọ ilọ ekpukele anhịr phọ? Tuutughiạn we dị emhoghi ootughianhạm mọ ikuph phọ abidị emạn ni maạr esi aZihova. Eeni onyọ umarani dị asiạ meghị anyụ, dị eeni raloghoma ghan mọ onọ o/mhoọgh mun maạr oḍighinhom loor iirurughiạn. w21.04 6 ¶17, 19-20

AZihova kụ alhegheri mem dị ekạr ekasiạn ophiemhi okarạph aḅirinhi phọ ophọn. Okparạm mọ odị mangọ eepoogh ookpomhoghi aḍigbogh aḍita phọ omhạn bọ ni irubal, kụ rooseeny bọ koḅilhẹ oboom nyodị. Oomo phọ abidị omoọgh ni oḅaạl olhoghi iduọn aZihova akparạm bọ tutụ omharaghị aani bidị, ḅilhẹ bidị momhoọgh bọ eepoogh otuughạ ilọ ophomhoghiạn odị r’oḅọgh aloor ongọ odị. Osụ olhoghi phọ odi bọ esi okparạm mọ aZihova kakuamhị aganana mem dị odị kaanmo bọ ruunmo irubal abuẹn okparạm bọ tutụ k’eekunha phọ! Yira motuughạ esi aZihova ilọ okparạm ghan r’ibo. Etigheri oomo ariiphinha r’imhinhimhiịn phọ aSetan makọm bọ, aZihova aḍighi ni “Enaạn [oḅaạl olhoghi].” (1 Tim. 1:11) Yira phọ kẹn kotue ni opamanhạm ibo iduọn yira rokori bọ mem dị aZihova kaḅaalhamhị ḍien phọ odị, ameremhị elhiom itooghị phọ odị, asiemhi eekunha ikarạph ḅilhẹ r’iiḅaghamhị aḅirinhi phọ. Esi iduọn phọ, osopha okparạm oḅilhẹ omhoọgh iidereghị esi olhegheri mọ Odẹ k’akẹ phọ ayira rakparạm aani ni. w21.07 13 ¶18-19

Ibadị siphẹ oḅẹl okuron asiạ phọ u/meeraam Zizọs. Bidị usighẹ mọ odị oopho oọny uwekulhom okaạm amakạ. Odị aḍuạ Nazerẹt kụ aru, emhạ dị awe u/kạr umaghamhị maạr. Ghalhamọ aNataniẹl phọ aḍighi aani bọ oniin otelhedom aZizọs bịn aphụr ri apuru mọ: “Igey keḍuạ ni Nazerẹt etu ḍughụm?” Eeni odị aatughiạn ghan imiịn phọ aMicah 5:2, eḅẹm bọ mọ komạr aMesaya phọ epẹ Betilihẹm, k/aNazarẹt. Oyil phọ Aizaya aḅẹm mọ amulọgh ḍien phọ aZizọs u/moọgh “ogbolhomaam ilọ” aMesaya phọ. (Isa. 53:8) Mọ bidị umhiigha ni loor ooḅeghiọn oomo ariphigh phọ, obọ bidị mulegheri ni mọ umhạr Zizọs Betilihẹm, ḅilhẹ mọ odị eemharạ Uw-emhạ phọ Devid. (Luk 2:4-7) Esi iduọn phọ, emhạ phọ omhạr bọ Zizọs eḍighi emhạ phọ oghaạph bọ oghol siphẹ Micah 5:2. Eeghe kụ okạr iiḅaghamhị phọ? Awe uugboronhom ghan osoph ooruẹn. Bidị u/legheri ghan oomo ariphigh phọ. Iduọn kụ iḍighi bọ iyaạr phọ bidị okpetaan bọ omheel loor aZizọs. w21.05 2-3 ¶4-6

ABaibul phọ apamhanhạm ni reḍeenhaan awe dị osẹph loor iduọn bidị osighẹ bọ oromha. Tuutughiạn Job. Ghalhamọ r’iduọn odị amhoọgh bọ ni oghiilhaan Enhaạn, odị o/mhunhughan. Eeḍiạn aḍigbagarạ adọl, odị aḅạ ni ikpo onhụ dị i/tu inẹ. Esi iduọn phọ, Elihu r’aZihova uḅaạm ni nyodị. AJob amhegheron ika? R’osooromhi aloor odị asighẹ ni oromha phọ. Odị aḅẹm mọ: “Mị ughaạph ghan ilọ araraạr dị mị u/naghanhạn . . . Mị aḅẹm bọ kụ ru/ḅẹm, mị magbula oorụ r’ophugh esi okiton.”. Iphẹn phọ iganana ni esi ipẹ odị asighẹ bọ ni oromha phọ Elihu angọ bọ nyodị, ghalhamọ r’iduọn Elihu aḍighi bọ ni ephurukpu obumoọny esi odị. (Job 42:3-6, 12-17) Osooromhi aloor kụ kaḍighi idị yira kosighẹ oromha ghalhamọ r’amem dị yira ootughiạn mọ yira u/piomạn obobọ eḍighi edị yira kụ oghupheri oye phọ rangọ bọ. Oghẹn onyọ ayira kụ edị ra/wạ oghiọm aghisigh omhuum ghan eemhumha uwaloor iigbia phọ, ḅilhẹ r’oghiọm aghisigh rukumuan aKristẹn phọ ayira? w22.02 11 ¶8; 12 ¶12

Oomo ayira omoọgh oḍighi ophamhanhạm ephomhoghiạn r’eephọ siẹn ookpomhoghan phọ, pidị oye ka/loghoma mọ onọ bịn odi. Iyaạr dị yira oḍighi obobọ oghaạph ketue ni ekparamhị bunhọn! Nạ kaḍighi ika kụ abuphẹ ogina abidị bịn kụ odi bọ siẹn igey phọ ologhoma aani mọ bunọ abuọ ookpomhoghan phọ ni? Nạ kụ kem agbatạn edạ osighẹ abidị righirị. Yira kotue ni omiighom esi omhạgh ghan abumhoom mọ r’eenyuụm mọ nyinha mesi. (Rom. 15:7) Toroboiperolbọ, ewạ mọ oḍighi idị epelhom omhạgh abidị r’eenyuụm bịn. Ewạ mọ yira okem ghan olhẹm omiteom righirị dị ekpạr. Esi iduọn phọ, moọgh ḍigey aḍiḅeraạn aghị esi abumhoom mọ. Lọgh ni eegu raraạr ibooghiạn abidị, kuolọ wạ ni alhegheri iiḅaghamhị dị bidị osoman. Kekparanhaạn ni buniin oghaạph ipẹ bidị olhoghoma bọ, esi iduọn phọ gona loor ka/kpaariọm bidị oghaạph iyaạr. Kparipẹ ghụn miigha loor aḍighinhom sipuru osụ-olhoghi, kụ akparạm akori ophagharanhaạn phọ. Esi omaạm, nạ atue ni apuru ipẹ bidị onhaghạn bọ igey phọ. w21.06 11 ¶13-14

Yira omaghamhị ni maạr eepoogh oḅophoghạn okumuan idiphọ aḍiniin “aḍita” eeḍiạn “oniin opoghom”! Aḍinyạ phọ Organized to Do Jehovah’s Will, ipoḍi phọ 165, eḅẹm mọ: “Omhooghọm aani asuọ muḅọph phọ amuẹn phọ, pọ nạ amoọgh aani ni oḍighi omhaạr ophạm.” Esi iduọn phọ, ewạ mọ “otuughạ idị yira komiịn ghan bumor r’abumarani phọ ayira idiphọ aZihova amhiịn bọ bidị.” Oomo ayira oḍighi “iphurukpu” ibạm anmụny dị omhạn maạr esi aZihova. Nạ amiịn aani ni idiphọ bumor r’abumarani phọ anạ ḍughụm? AZihova amiịn ni aḅilhẹ amaghamhị maạr torobọ ilọ nạ aḍighi olhoghonhaạn abidị ḍighaạgh r’omhaạr ophogh abidị. (Mat. 10:42) Yira opomhoghiạn ni bumor r’abumarani phọ ayira. Esi iduọn phọ, osopha owilẹ oḍighi idị onyọ asiya ayira “kakpeteghaan, ḅilẹ keḍighi dị odị kameel aḍighanaan ikarạph.” (Rom. 14:13) Osighenhọm ghan kepẹ ekpom mọ ayira mọ abumor r’abumarani phọ ayira kụ upu iyira. Ku/meera iyaạr ilher iyira. Kparipẹ ghụn, osaḅạr “oḅạm iloghi ayira esi araraạr phọ resighẹ ghan bọ eephọ kụ keru, eḅilẹ bọ reloghonaạn ghan ḍighaạgh okparamiọm awe.”—Rom. 14:19. w21.06 24 ¶16-17

Yira omhiigha loor otuughạ ghan oḅilhẹ osighẹ oḍighinhom oromha Ekpo Onhụ phọ Enhaạn r’oḍighom mọ odị, enụm enụm yira komoọgh aani ni idọ phọ araagharạ phọ aKraist. Kụ yira oḅilhẹ kẹn okuamhị olegheri Enhaạn. AZizọs asighẹ oghaạph omaaniọm kụ agbaạm mọ adom Omhạr phọ ekịgh ebạm ekpo eezuphạ dị emhiigha loor kụ reḍum siphẹ arokpom abuphẹ rowạ bọ olhegheri igey phọ. Odị aḅẹm mọ: “Iizuphạ phọ mesiighi repophogh,—kụ [oḅephom ozo phọ] o/legheri ipẹ eḍighi bọ. Ade phọ kụ iḍighi bọ idị iizuphạ phọ ephụr esi imhiịgh, kụ emiteom ipoola, kụ egbi omuum arughuuny.” (Mạk 4:27, 28) AZizọs aghaạph ghan mọ idiphọ eezuphạ remiigha ghan bọ loor kụ keḍum, kụ idị adom Omhạr phọ remiigha ghan loor kụ kenme oye lọ mamheeraam. Esi omaạm, mem dị abuphẹ yira rotughemhị ghan bọ Baibul phọ oḍuraan rotuman aZihova, yira romiigh ghan ni omhiịn imạ araagharạ dị romoọgh. (Efẹ. 4:22-24) Kuolọ ewạ mọ olhegheri mọ aZihova kụ aḍighi bọ idị ebạm ekpo eezuphạ phọ eḍum bọ. w21.08 8-9 ¶4-5

Yira kotue ni omoọgh ibo eḍighi maạr dị yira oghị esi phọ ekpeanhaạn bọ kụ owạ. Oye dị rakelhọm ghan ilọ odị “amhoọgh” ramoọgh ghan ogbaanyạn, odaphạn sidọl phọ odị. Ḍieriphọ aḍighaạgh phọ, oye dị raaḅaghamhiạn ghan loor owạ ghan inhọn araraạr dị odị ka/tue amoọgh ka/moọgh ogbaanyạn. Esi iduọn phọ, yira otuughạ eeghe siẹn phọ? Orue omhoọgh ibo, ogbon ipẹ yira omhoọgh bọ ḅilhẹ r’idị yira olhegheri ni mọ yira kotue ni omoọgh. Ketue ni ekạr edugh dị yira komoọgh ghan ogbaanyạn esi ipẹ yira moḍighi bọ obobọ omhoọgh bọ oḍighi ḍughụm? Ibadị awe ootughiạn mọ ke/tue edugh loor esi dị mọ riḅeraạn ghan iyira oghiọm aghisigh otuughạ ghan olhegheri imhoom araraạr ḅilhẹ r’ilọ oḍighi. Kuolọ ketue ni edugh. Yira kotue ni okelhọm raraạr phọ ipẹ yira omhoọgh bọ. Ika kụ idị yira kotue bọ oḍighi iphẹn phọ? Orue olhegheri, ooḅeghiọn ḍidogh ikpoki phọ aZizọs adogh bọ siphẹ Matiu 25:14-30 kụ ogbon iyaạr dị aḍidogh phọ kitughemhị iyira ilọ ipẹ yira kotue bọ omoọgh ibo ḅilhẹ obughẹ ibo aḍisẹph phọ yira omhoọgh bọ nyiidiphọ. w21.08 21 ¶5-6

AZihova amoọgh ni ogbolhomaam abuphẹ “oḅonyonhu bọ ozuan.” Ikumor awe phọ ḅilhẹ r’oomo phọ ayira, kotue ni ologhonhaạn ḍighaạgh okparamhị abuuḅi abumor r’abumarani phọ ayira abuẹn phọ. Eniin eten dị yira kotue oḍighi iduọn phọ pọ oḍeenhaan ghan abidị ogey ogbolhomaam. AZihova rawạ ghan mọ yira oḍeenhaan ghan iyool phọ odị mọ onọ apomhoghiạn ni bidị. (Prov. 19:17) Yira kotue kẹn ni ologhonhaạn ḍighaạgh bumor r’abumarani phọ esi oḍeenhaan ghan osooromhi aloor r’olhegheri okụ. Yira ro/wạ ghan oḍeenhaan idị yira omhạn obọ kekọm ghan bọ iipikian r’eḍịm. Kparipẹ ghụn, osighẹ emhaạr phọ r’olhegheri iyaạr phọ ayira okparamhiọm bunhọn. (1 Pit. 4:10, 11) Yira kotue ni otuughạ reten phọ ipẹ yira kozoọm ghan bọ bunhọn, esi okiririom ophogh eten phọ epẹ aZizọs azoọm ghan bọ bumatuạn phọ odị. Ghalhamọ r’iduọn odị kụ aḍighi bọ oye dị apelheghiom dị marọl ghan, odị aḍighi ni oye “oophọ ologhi r’osooromhi aloor.” (Mat. 11:28-30) Odị asighẹ ghan aḍighinhom ikpo onhụ r’oghaạph omaaniọm dị adughanhaan buphẹ odị ratughemhị bọ onhaghanhạn.—Luk 10:21. w21.07 23 ¶11-12

Kem agbatạn edạ oḅaanhaạn abidị. Ii, eeni bidị ro/kạr mun komhiịn eten, roo/gborion mun erelhe, obobọ ikpo onhụ abidị ii/gholhaan mun, kuolọ bidị roḍighi ni ipẹ bidị kotue bọ, ḅilhẹ bidị m’omhoọgh ni “ḍigey aḍien” r’aZihova. (Eccl. 7:1) Legheri mọ aZihova amaghamhị ni bidị maạr. Kiọm ghisigh alhọgh ghan bidị eghuan. Tuughaạny Ilaisa. Odị o/mheera owilhẹ Ilaija ḍio phọ bidị kogbaranhaạn bọ. Esi iraạr amem odị aḅẹm ghan mọ: “Mị nyinhạ ra/wilhẹ.” (2 Ki. 2:2, 4, 6) Ḍeenhaan ogbolhomaam buẹn asiạ meghị bọ anyụ esi opuru ghan abidị sipuru r’osooromhi aloor. (Prov. 1:5; 20:5; 1 Tim. 5:1, 2) Nạ atue ni apuru bidị mọ: “Mem mọ nạ aḍighi bọ onyọ iḍoọgh, eeghe kụ ikparamhị bọ omheeraam mọ anạ mọ iphẹn kụ igey phọ?” “Ika kụ idị araraạr phọ memitenhaan bọ nyinhạ melhoghonhaạn nyinhạ ḍighaạgh oḍuraan otuman aZihova?” “Eeghe kụ melhoghonhaạn nyinhạ ḍighaạgh okumu aZihova r’ibo?” (1 Tim. 6:6-8) Kụ alher rurụ angọ ipẹ bidị rokaạph bọ. w21.09 5 ¶14; 7 ¶15

Mem dị nạ aḍighi oomo ipẹ nạ katue bọ oḍighi awe bumatuạn, pọ nạ raḍeenhaan ghan ephomhoghiạn phọ nạ amhoọgh bọ aghị esi Enhaạn. (1 Jọn 5:3) Tuutughiạn ilọ iphẹn phọ: Ephomhoghiạn phọ anạ esi aZihova menyu nyinhạ omhiigh ogbạ ikpo onhụ phọ. Idugh ni odạph itọ phọ iphẹn phọ ḍughụm? Eeni i/dugh. Eḅẹl amem mọ nạ akar bọ eghuugh oye ogbạ ikpo onhụ phọ, oḅio anạ akaph ni? Iikia i/lo, oḅio anạ akaph ni! Kuolọ nạ ulhegheri ni mọ ophọn phọ kụ oḍighi phọ aZizọs atọ bọ mọ ḍighi, kụ nạ radạph bọ itọ phọ. Eeni kẹn omite epẹ erugh phọ i/kpạr mun esi anạ. Nyiidiphọ kokaạph aani ika ilọ otughemhị oye Baibul? Oḅio anạ rakaph ghan ni ilọ iphẹn phọ? Eeni rakaph ghan ni. Toroboiperolbọ, mem dị nạ alhọm aZihova olhoghonhaạn aḍighaạgh okpạr opu oghiilhaan, r’omhoọgh oḅio otughemhị aani oye Baibul, aZihova kalọgh ni ḍighaạgh okparamhị eephuạ phọ nạ amhoọgh bọ oḍighi awe bumatuạn. w21.07 3 ¶7

Iḍiodi phọ, ulhọgh ghan elhegh rebenhẹ pidị olegheriom oye phọ amhoọgh bọ bidị. Igina phọ kẹn, siẹn amem mọ ayira awe kowạ ghan ni dị torobọ oye kaḍighi aḍeenhaan opọ odị abakị bọ. Iitughiạn r’iḍighinhom araraạr phọ abidị keḍeenhaan ni mughumọ bidị oḍighom aani ḅilhẹ obakị itooghị aḅirinhi phọ. Yira kologhạ ni elhegh phọ ephẹn phọ bịn omiigh obakị itooghị aḅirinhi phọ ophọn phọ ḍughụm? Abuphẹ u/meera bọ uloghạ kosoman ni ooto r’osooromineen r’aḍikparamineẹn. Aḍinyạ Ogananami phọ eḅẹm mọ: “Oye iyaạr ku/ko, ḅilẹ ku/bool, emuton lọ odị aloghạ elegh phọ ephẹn phọ.” (Ogan. 13:17) Kuolọ awe phọ Enhaạn olegheri ni idị Enhaạn kaḍighi buphẹ olhoghạ bọ elhegh phọ oghaạph bọ oghol siphẹ Ogananami 14:9, 10. Kparipẹ r’olhoghạ elhegh phọ epẹ phọ, torobọ oye Enhaạn k’agẹ ghụn siphẹ aḍighaạgh phọ odị mọ onọ “oye aZihova.” (Isa. 44:5) Ophọn kụ amem dị ewạ mọ yira okparamhị dọl oḅạr phọ ayira r’aZihova. Yira oḍighi iduọn phọ, r’oḅaạl olhoghi aZihova kaḅẹm ni mọ yira abuọ odị! w21.09 18 ¶15-16

Orue omhunhenhi oḍighi iiḅi iinhaghạn phọ ayira, yira kotue ni omooghọm suọ olhoghonhaạn aḍighaạgh abunhọn. Otelhedom mọ aPọl atughemhị ni Timoti ilọ oghaạph r’otughemhị, kụ aroma nyodị mọ odị asighẹ reten phọ ipẹ motughemhị bọ nyodị alhoghonhaạn aani ḍighaạgh bumor r’abumarani phọ. (1 Kọr. 4:17) Idiphọ aTimoti, yira kotue ni otuughạ aani ḍighaạgh abuphẹ mobia bọ siẹn ookpomhoghan phọ. Ḅilhẹ kẹn, ooḅereghị ghan olhọm aZihova olhoghonhaạn aḍighaạgh. Wạ ghan iiḅakiọm aZihova torobọ amem dị nạ odi epẹ erugh phọ. Olhoghonhaạn aḍighaạgh iikpọ uwaloor iigbia phọ kụ o/lho, onyọ ayira o/lho dị katue aḍighi iyaạr epẹ erugh phọ. (Ps. 127:1; Luk 11:13) Mem lọ nạ raaḅereghị kalhọm aZihova ilọ olhoghonhaạn aḍighaạgh, gbon iyaạr phọ nạ rawạ bọ. Esi omaạm, lọm odị aḍighi idị nạ kateẹny buphẹ omhoọgh bọ ephuọm onhaghạn adom mọ. Omhoọgh ghan kẹn mem ilọ ituughạ aBaibul ogina ayira. Ekpo Onhụ phọ Enhaạn eḅẹm mọ: ‘Legheri iitughiạn phọ odị ipẹ enighẹ bọ, eḅeraạn bọ nyodị kụ eseIeman bọ.’ (Rom. 12:2) Mem dị yira olhegheri okuphom owol igey phọ ilọ Enhaạn, kụ edị kidughanhaan iyira oghaạph ghan oghaạph phọ r’okuphom owol epẹ erugh phọ. w21.05 18 ¶14-16

Kokaạph ika mem dị yira molhọgh oomo ikuph phọ ipẹ yira kotue bọ, oḅilhẹ kẹn ooḅereghinhaạn oye dị yira rotughemhị ghan Baibul kụ u/meera ni ukị ghisigh dị tutụ kemoghi mowilhẹ itughemhị phọ? Obobọ kokaạph ika eḍighi maạr dị nạ k/orue olhoghonhaạn aani ḍighaạgh oye oḍiiny amuụm? Olhoghi anạ kagurọgh ni nyinhạ m’eeni mọ aZihova o/sẹph aani rukumuan phọ anạ ḍughụm? Lọgh elhegh ipẹ aZihova rasighẹ ghan bọ kalhegheriom mọ yira omoọgh ni ekol. AZihova rapogh ghan ikuph phọ r’okparạm mọ ayira. Esi aZihova, oḍighi phọ ayira ramoọgh ghan ekol mem dị yira olhọgh inyaạm r’ephomhoghiạn etigheri ipẹ abunhọn omhegheron bọ. APọl agẹ mọ: “Enaạn k/oye dị kabula oḍighi phọ nyina eḍighi bọ, ḅilẹ r’ephomoghiạn phọ nyina emooghọm bọ nyodị siphẹ aḍighaạgh phọ nyina eloghonaạn ghan bọ kụ reloghonaạn bọ ni buọ asiya phọ anyina.” (Hib. 6:10) AZihova raatughiạn ghan ni ikuph phọ r’ephomhoghiạn phọ ayira, ghalhamọ i/kọm ni iyaạr imiteom. Esi iduọn phọ, nạ katue ni asighẹ aḍighinhom aani oroma phọ aPọl odi bọ esi aBaibul phọ arodon. w21.10 25 ¶4-6

Onmạ ighirigiir r’ephomhoghiạn phọ aZizọs, ikạr kụ eganana esi eten phọ epẹ odị azoọm ghan bọ bumatuạn phọ odị. Odị alhegheri ni mọ inyaạm mọ r’asidọl phọ abidị egbaranhaạn ni. Esi iduọn phọ, bidị ko/tue opạm iniin phọ arukumuan phọ obobọ okumuan eniin phọ eten phọ. Toroboiperolbọ, odị asereghiạn ni ipẹ torobọ onyọ abidị arue ghan bọ aḍighi r’oomo ekpom. Iphẹn phọ igananani siphẹ aḍidogh ikpoki phọ aZizọs adogh bọ. Siphẹ oghaạph omaaniọm mọ opọ phọ, odẹ-otu phọ angọ rebenhẹ phọ iiḍighi dị edaphạn “inyaạm ilọ oye r’oye.” Oniin siphẹ iyạl arebenhẹ phọ akpạr bọ ḍighaạgh kụ amhoọgh suọ apu nyoriphọ. Kuolọ odẹ-otu phọ asephọm iyạl phọ abidị iniin phọ ikpo onhụ phọ eḅẹm bọ mọ: “Maḍighi. Nạ ogey ebenẹ ni!” (Mat. 25:14-23) AZizọs azoọm ghan bunhọn eten ephomhoghiạn ḅilhẹ r’eyoghoyoghọ eten. Odị alegheri ni mọ inyaạm mọ ḅilhẹ r’asidọl phọ ayira egbaranhaạn ni, kụ odị rasereghiạn ghan ni mem dị yira oḍighi ipẹ yira kotue bọ. Yira otuughaạny aani Zizọs. w21.07 23 ¶12-14

K/oomo amem kụ edị Uw-emhạ phọ Devid aḍeenhaan ghan onmạ ighirigiir. Esi omaạm, mem mọ aNabal ogbagarạ oye phọ aḅaanhaạn bọ nyodị r’e/lọgh eegu ḅilhẹ u/meera bọ ungọ eḍien we phọ odị, ighạgh ni olhoghi aDevid kụ odị asopha oghị oghiigh aNabal r’ozẹ oomo alhephiri anmụny eghunotu phọ odị. Abigail anhịr phọ aNabal amhoọgh bọ okparạm kụ mu/lo bọ, obọ aDevid mazu iḅaạl. (1 Sam. 25:9-22, 32-35) Lọgh elhegh mọ r’oghạgh olhoghi aDevid asoph mọ aNabal r’oomo alhephiri eghunotu phọ odị okpẹ omhugh. Kụ enhọn pọ, aDevid anyạ ni osoph mọ oye phọ siphẹ aḍidogh phọ aNathan akpẹ omhugh. Siẹn omhunhenhiom iyạl phọ, yira otue ni opuru mọ eeghe kụ iḍighi kụ aDevid phọ amhaạr bọ ni onmạ ighirigiir kasoph bọ ogbagarạ ooruẹn dị arọl iduọn. Ooḅeghiọn sidọl phọ ekitonhom bọ. Mem mọ amuphẹ phọ, aDevid amhoọgh ooruẹn olhoghi dị ragurọgh nyodị. Eegharạ osophonhaan ghan awe ogbagarạ ooruẹn i/ḍighi eḍeenhaan oye dị amhoọgh igey asiya r’aZihova. w21.10 12 ¶17-18; 13 ¶20

Ikpo onhụ esi aBaibul phọ ephẹn arodon eḍeenhaan mọ yira kotue ni otuughaạny aZihova phọ aḍighi bọ emạ eḍeenhaan dị epeleghiom, ilọ orọl adọl aruukuan. Yira omoọgh ookuan ghan esi atorobọ iyaạr lọ yira roḍighi. Etue ni ekịgh mudị ke/dugh loor esi dị yira u/munughan. Otelhedom mọ aPita apiomạn ni ibadị amem, kuolọ eḍeenhaan phọ odị emạ emiteom mọ yira kotue ni otọl dọl aruukuan. Rokaạph ilọ oye aruukuan, ibadị awe kootughiạn mọ pọ oye dị ra/yịgh ghan kụ amhoọgh iinmenan ekụ iiḅereghị dị raanmenian ghan, ḅilhẹ eghịgh mudị oomo amem apạm ni iyaạr dị raḍighi. Kuolọ ki/diphọ. Okaạph ilọ aZihova phọ aḍighi bọ Enhaạn iigbia, mọ “Enhaạn oḅaạl olhoghi.” (1 Tim. 1:11 NWT.) Buphẹ rooseeny bọ nyodị romạgh ghan mọ awe “oḅaạl olhoghi.” (Ps. 144:15) AZizọs aghel li buphẹ okpologhiạn ghan bọ iinmenian dị egbatanhaạn oḅilhẹ oḍighi ghan iiḅi abidị egananaan. (Mat. 6:1; Mạk 12:38) Idiphọ aKristẹn, ipẹ yira ophogh bọ dọl aruukuan edaphạn ipẹ yira omhiịn bọ siphẹ aBaibul phọ. Yira okuphom ni owol mọ Enhaạn ephomhoghiạn phọ ayira, iyira ku/ngọ itọ dị kikparanhaạn iyira odaphạn. w21.12 2 ¶1, 3

Esi oomo araraạr phọ Enhaạn mungọ bọ iyira, ooḅereghị odị eḍighi aani ni igbogh inmo dị odị ungọ iyira. Yira roḍeenhaan ghan mọ yira opomhoghiạn ni aZihova esi ‘ooko ghan iilogh phọ odị.’ (1 Jọn 5:3) Iniin itọ dị aZihova ungọ iyira pọ ipẹ aZizọs uḅenhị bọ iyira mọ oḍighi we bumatuạn odị kụ oḍiinye bidị muụm. (Mat. 28:19) Odị aḅilhẹ kẹn atọ mọ oniin aphomhoghiạn nyoniin. (Jọn 13:35) AZihova kasighẹ buphẹ onhaghanhạn bọ nyodị alọgh siphẹ eghunotu abuseenyom mọ odị. (Ps. 15:1, 2) Ḍeenhaan ephomhoghiạn bunhọn. Ephomhoghiạn kụ egbogh eegharạ aZihova. (1 Jọn 4:8) AZihova kụ aphụr uḍeenhaan iyira ephomhoghiạn kụ yira ogbi bọ olhegheri odị. (1 Jọn 4:9, 10) Yira rotuughaạny ghan aZihova esi oḍeenhaan ephomhoghiạn bunhọn. (Efẹ. 5:1) Eniin emạ eten dị yira kotue oḍeenhaan ephomhoghiạn we pọ olhoghonhaạn aḍighaạgh bidị olhegheri aZihova, siẹn amem mọ edi bọ ni. (Matiu 9:36-38) Iphẹn phọ kengọ bidị eepoogh okạr oḍighi aani apakirị eghunotu phọ Enhaạn. w21.08 5-6 ¶13-14

Egbogh ephomhoghiạn phọ aZizọs amhoọgh bọ aghị esi aZihova inyu ni nyodị ophighironaạn ekiạ Odẹ phọ odị ḅilhẹ r’ayira. (Jọn 14:31) Adọl aghuḍum mọ aZizọs siẹn ade phọ iḍeenhaan ni mọ odị amhoọgh ephomhoghiạn awe. Torobọ amem odị aḍeenhaan ghan ephomhoghiạn r’igbiririph aghị esi awe, ghalhamọ r’abudị olhọgh nyodị ḍien. Kuolọ ekpanhạ eten dị odị aḍeenhaan ephomhoghiạn, pọ otughemhị awe ilọ Omhạr phọ k’Enhaạn. (Luk 4:43, 44) AZizọs aḍeenhaan egbogh ephomhoghiạn Odẹ phọ odị r’omhạr awe esi omheera omhiinhọm kụ omhugh aḍuụgh egbo ḍighaạgh abuḍighinhom ikarạph. Esi iduọn phọ, odị maḍighi idị edugh dị oomo ayira kotue omoọgh ghuḍu k’agee-pọ. Yira uḅọgh loor ayira ongọ aZihova oḍiiny muụm loor ephomhoghiạn phọ yira omhoọgh bọ oghị esi Odẹ k’akẹ phọ ayira. Esi iduọn phọ, idiphọ aZizọs oḍeenhaan ghan aZihova ephomhoghiạn esi ipẹ yira rozoọm ghan bọ bunhọn. Onyọ amatuạn phọ Jọn agẹ mọ: ‘Oye dị u/pomoghiạn onyọ asiya phọ odị mamhiịn ghan bọ, ika kụ edị odị kapomoghiạn bọ Enhaạn phọ odị ko/mhiin ghan bọ?’—1 Jọn 4:20. w22.03 10 ¶8-9

Ii, yira rokelhọm ghan ni omhoọgh amem r’aZihova, kuolọ ipaanhaạn retọl ghan ni. Eepoogh iyira r’i/rọl ghan, kụ ketue ni eḍighi idị yira ko/moọgh mem dị oseere ilọ araraạr aruwaloor. Owạ kụ olhe, adool eghunotu, ḅilhẹ r’inhọn ikpanhạ araraạr resighẹ ghan ni muboom amem ayira dị tutụ eeni yira kologhoma mọ eepoogh i/lo ooḅereghị, otuughạ, ḅilhẹ r’ogbirima. Enhọn iyaạr edi ni dị rele aani ghan mem mọ ayira. Yira u/gona loor, yira otue ni osighẹ mem dị yira muḍuraan otuman aZihova bịn oḍighinhom raraạr dị obọ i/beeph ni. Esi omaạm, oghaạph ilọ ozaamhiạn aloor. Oomo ayira rokelhọm ghan ni mem dị yira omhoọgh mem ozaamhiạn aloor. Kuolọ ozaamhiạn aloor dị amhoon ni katue ni ale muboom amem ayira, bịn amem osighẹ ooseenyom aZihova ke/bụgh mun. Ewa mọ areephegh ozaamhiạn aloor phọ ayira emhoọgh ghan ni okụ.—Prov. 25:27; 1 Tim. 4:8. w22.01 26 ¶2-3

Mem mọ aZihova atọ bọ aḅenhị buọ Izrạl mọ ophomhoghiạn bunhọn awe, odị o/ḅenhị bidị mọ ophomhoghiạn buọ Izrạl bịn. Odị aḅilhẹ ni aḅenhị bidị mọ ophomhoghiạn ruuruen phọ odi bọ siphẹ igbo phọ abidị. Itọ phọ iphẹn phọ eegholhaan ni siphẹ Leviticus 19:33, 34. AZihova awạ mọ bidị ozoọm ooruen idiphọ olọ Izrạl, ḅilhẹ mọ ophomhoghiạn ooruen idiphọ aloor phọ abidị. Esi omaạm, iwạ mọ awe phọ Izrạl omheera aruuruen phọ r’arukulom mọ oghị ghan ikenekụ siphẹ iizo phọ abidị. (Lev. 19:9, 10) Aḍinhị olhogh phọ eghaạph bọ ilọ ophomhoghiạn aruuruen egbolhomaam ni Kristẹn rodon. (Luk 10:30-37) Ika? Ariisi erubal awe odi ni siẹn aḅirinhi phọ dị moḅuạ reelhe abidị oghị inhọn arikpisi, kụ eeni abuniin abidị otuman ni nyinhạ. Emạn ni maạr dị yira kozoọm ghan r’eghuan lhephiri, nmariịr, ḅilhẹ r’ibạm anmụny. w21.12 12 ¶16

Yira obeḍenhọm aZihova ilọ iiḅakiọm nyiidiphọ, pọ oḍuom olhoghi phọ ayira esi iikpọ phọ odị ophẹl ayira epẹ ghisigh kakpạr ghan bịn. Ewạ mọ yira omhoọgh omheeraam r’eephuạ obeḍenhọm ghan aZihova mem dị yira r’owạ olhọm uw-oḍighi ayira mem oghị ookpomhoghan eghir obobọ eephugh, obobọ olhọm m’aaḅenhion edeọm oḍighi phọ pidị yira omhoọgh aani mem oghị ghan ituughạ, r’ophinhom aani abin epẹ erugh phọ. Kụ eru maạr dị uw-oḍighi phọ u/meera kụ yira oroph oḍighi phọ, yira omoọgh ni omheeraam mọ aZihova iyira ku/wilẹ obobọ u/ḅitonhaạn ḅilhẹ mọ odị kungọ ni iyira ilọ yira rowạ oomo amem ḍughụm? (Hib. 13:5) Ibadị abuẹn odi bọ rukumuan oomo amem mọ kotue ni ongọ riphigh dị eḍeenhaan idị aZihova alhoghonhaạn bidị ḍighaạgh okạr amem dị bidị owạ. AZihova ra/bi ghan. AZihova odi bọ ni r’ayira, yira u/moọgh iyaạr otuạn oghiilhaan ipẹ kemite bọ ghisigh. Enhaạn phọ ayira iyira ku/gunhọm mem dị yira osighẹ ni Omhạr phọ kụ oḍighi eḅẹl. w22.01 7 ¶16-17

Eeghe kụ ketue edẹgh epogh oḍuomolhoghi phọ ayira esi ikumor awe phọ? Oḅẹm mọ oye phọ ophorogh bọ utuman iyira agey, yira kooḅaghamhiạn ni loor mọ eeni ikumor awe phọ uu/ḅeghiọn riphigh phọ agey. Obobọ yira otue ni ookia mughumọ bidị osoph ni ooruẹn phọ eten phọ epẹ aZihova musoph bọ. Eeghe kụ kilhoghonhaạn iyira ḍighaạgh ophamhanhạm egey ephoghom osopha ikumor awe phọ? Ootughiạn ni mọ aZihova kụ amiteom iikolhobian ophorogh ghan oye, iphẹn phọ rengọ ghan ni suọ ookpomhoghan phọ r’eeni opọ aḍighi bọ ikarạph phọ. Eḍighi maạr dị u/porogh oḍighinhom ikarạph dị u/kiton, pọ odị atue ni apuẹ bunhọn. (Gal. 5:9) Oḅarạm isiphẹ, eeni odị ka/legheri idị ikarạph phọ odị ebụgh esi, ḅilhẹ ke/tir nyodị onme iitughiạn r’iḍighinhom araraạr phọ odị orue omhoọgh akuuḅi aghisigh aZihova. (Eccl. 8:11) Yira okuphom ni owol mọ ikumor awe phọ romaghamhị ghan ni maạr oḍighi phọ abidị, mem lọ ewạ osopha mughumọ oye dị aḍighi ikarạph akpẹ ni ophorogh. w22.02 5-6 ¶13-14

Kekạr kụ emoghi okparạm r’oseenyạn mem dị emhiighom mọ kụ opọ rotomha bọ u/wạ osighẹ oḍighinhom oromha aBaibul phọ. Okumor oye phọ ku/kạgh olhoghi mem dị opọ rotomha bọ raabinya onhaghanhạn r’osighẹ oḍighinhom. Esi iduọn phọ, okumor oye phọ alhọm aZihova esi iiḅereghị mọ aḍighi idị opọ rokị bọ oroma phọ kanaghanhạn emhụ oromha phọ aḅilhẹ asighẹ aḍighinhom. Onyọ umor phọ rotomha bọ kamoghi ni mem osighẹ ootughianhạm ipẹ oḅenhị bọ nyodị, esi iduọn phọ ekpaariọm ni mọ okumor oye phọ amhoọgh okparạm r’oseenyạn. Eḍighi iduọn phọ, opọ rotomha bọ ka/gbon eten phọ ongọ bọ nyodị oromha phọ, kagbon ghụn dom mọ. Ku/bulha mọ oromha phọ akpasị ghan siphẹ Ekpo Onhụ phọ Enhaạn. Ku/ngọ ghan oromha dị akuạ bịn, kuolọ oromha phọ angọ ni “ekpom mọ ibo.”—Prov. 27:9. w22.02 18 ¶17; 19 ¶19

Mem dị yira ooḅereghị olhọm inyaạm orue okaran odẹgh ophogh obobọ okpạr opu aḍidugh ayira, eeni yira kologhoma ni mọ ophagharanhaạn phọ ra/nuụn karu. Uḍighi ika kụ aZihova ra/pagharanhaạn ghan bọ iiḅereghị ayira mem mem mọ? Odị ramiịn ghan iiḅereghị phọ ayira idiphọ eḍeenhaan omheeraam. (Hib. 11:6) Eḅeraạn kẹn ni aZihova omhiịn idị yira kotọl r’idị eḅọph r’iiḅereghị phọ ayira ḅilhẹ r’oḍighi ogbi phọ odị. (1 Jọn 3:22) Esi iduọn phọ, mem dị yira ooḅereghị olhọm aZihova olhoghonhaạn ayira ḍighaạgh okpạr opu ekarạph eegharạ obobọ ḍidugh, eeni kewạ ni mọ oḍeenhaan okparạm oḅilhẹ orọl ghan idị eḅọph r’iiḅereghị phọ ayira. AZizọs ulhoghonhaạn ni iyira ḍighaạgh onhaghanhạn mọ iniin iiḅereghị ayira ko/pagharanhaạn ghan mem mem mọ. Odị aḅẹm mọ: “IIọm ghan, kingọ ni inyina. Iwạ ghan, nyina kemiịn ni. Ikar ghan, kighughoronaan ni inyina. Torobọ oye lọ alọm, kongọ ni. Oye lọ awạ kamiịn ni. Oye lọ akar, kokughuronaan ni nyodị.”—Mat. 7:7, 8. w21.08 8 ¶1; 10 ¶9-10

Ewạ ni mọ kiọm ghisigh atuughạ ghan Ekpo Onhụ phọ Enhaạn orue okparamhị omheeraam mọ anạ mọ Olemhiạ odi ni. (Josh. 1:8) Kiririom kẹn aphogh imiịn ḅilhẹ r’ipẹ oomo igẹ aBaibul phọ eḅọph bọ. Nạ aḍighi ghan iduọn phọ, kekparamhị omheeraam mọ anạ mọ Olemhiạ dị amhoọgh ni ephomhoghiạn, asụ olhoghi kụ ulhẹm ni iyira ḅilhẹ mọ aBaibul phọ Ekpo Onhụ odị. (2 Tim. 3:14; 2 Pit. 1:21) Mem dị nạ ratuughạ Ekpo Onhụ phọ Enhaạn, gbirima ghan ilọ asuọ phọ odi bọ. Esi omaạm, aBaibul phọ maphụr ri rurụ k’epẹ omhạn mọ ephomhoghiạn ikpoki rekọm ghan ibadị ariiphinha dị ragimian ghan “idiphọ iitoor.” (1 Tim. 6:9, 10; Prov. 28:20; Mat. 6:24) Okạr agey, iphụr arurụ aBaibul phọ eḅẹm bọ mọ yira ku/pomhoghiạn ikpoki ekạr kụ eḍighi ogey oromha! Nạ atue ni aatughiạn inhọn asinhị iilhogh aBaibul dị mengọ nyinhạ suọ? Mem dị yira ogbor ghan ootughiạn ilọ imạ oromha aBaibul phọ, yira komiịn ni mọ olemhiạ phọ ayira uphomhoghiạn ni iyira kụ rawạ ghan ilọ asuọ ayira, iphẹn phọ kinyu iyira odaphạn ghan atorobọ oromha dị odị angọ. (Jems. 1:5) Kụ yira kokelhọm agey ghuḍum.—Isa. 48:17, 18. w21.08 17-18 ¶12-13

Eḍighi maạr dị asiạ anạ rekị anyụ, legheri mọ aZihova alọgh ni elhegh raraạr phọ ipẹ nạ maḍighinhaan bọ nyodị igbaany. R’oophugh nạ mabakị ni oḍighi oghaạph iiḅi iinhaghạn phọ. Nạ makparạm ni odẹgh ophogh kirokirọ, ghalhamọ r’idị ekạr ekọm okururu engọ nyinhạ. Nạ maphamhanhạm ni siigbu elhiom eḍighinhom iyaạr aBaibul phọ, apạm roopoogh siẹn oḍighom mọ aZihova, aḅilhẹ atughemhị aani bunhọn. Nạ maḍighi ni oomo ipẹ nạ katue bọ odaphạn areten phọ ipẹ oḍighom mọ aZihova ronmeeghi bọ raraạr. Nạ mabakị ni aḅilhẹ akparamhị buẹn odi bọ rukumuan oomo amem mọ. AZihova aphomhoghiạn ni nyinhạ agey loor adọl oḅạr phọ anạ. Odị aguanhaan mọ “odị ka/kel we oḍuom-olhoghi phọ odị”! (Ps. 37:28) Odị aḅilhẹ kẹn aguanhaan mọ: “Tutụ nyinha ekpọ. Mị kamaạr ri iphạm inyinha.” (Isa. 46:4) Esi iduọn phọ, kaa/tughiạn mọ loor iduọn asiạ anạ m’eghị bọ anyụ, pọ oḍighom mọ aZihova u/moọgh mun iyaạr oḍighinhom anạ. Nạ akạr kụ amạn maạr! w21.09 3 ¶4

AZihova raḍeenhaan ghan onmạ ighirigiir loor osụ olhoghi phọ odị omaạm u/lo bọ. ABaibul phọ aḅẹm mọ “olegheri iyaạr phọ opọ aḍuạ bọ k’akẹ kụ aru . . . ranmạ ghan ghụn ighirigiir . . . kamuum iimuma igey iiḍighi.” (Jems. 3:17) Idiphọ odẹ r’onhiin dị omhoọgh ephomhoghiạn, aZihova alegheri ni mọ onmạ ighirigiir phọ odị rangọ ghan ni suọ nmụny phọ odị. (Isa. 49:15) Onmạ ighirigiir phọ k’Enhaạn rangọ ghan bidị oḍuomolhoghi etigheri e/munughan phọ abidị. Esi iduọn phọ, osụ olhoghi phọ aZihova eekunha i/lo ghan bọ ranyu ghan nyodị oḍeenhaan onmạ ighirigiir torobọ amem dị odị amhiịn ephigh oḍighi iduọn phọ. Eniin phọ amem mọ, onmạ ighirigiir phọ aZihova aaleeny aḅilhẹ amunughan. R’osụ olhoghi, odị ra/sighẹ ghan onmạ ighirigiir phọ odị bịn k’angoọm we eepoogh oḍighi yogh ilọ eḅeraạn. Oḅẹm mọ ebenhẹ Enhaạn kụ alegheri bịn asoor dọl aghuḍum oḍighi yogh ghan ikarạph. Yira koḍighi ika? “ke/ḅọph oghuugh” r’odị, ipẹ kụ idị aZihova aphum otelhedom mọ Pọl ogẹ. (1 Kọr. 5:11) Oḍighinhom ikarạph dị u/meera ukiton roporogh ghan ni siẹn ookpomhoghan phọ. Ekạr emạn maạr oḍighi iduọn phọ pidị eghoph bumor r’abumarani phọ okpẹ bọ oḍuomolhoghi phọ, ḅilhẹ r’ooghironhaan eten adọl iigbia phọ aZihova. w21.10 9-10 ¶7-8

Yira rooseeny ghan aZihova mem dị yira osogh iisogh obakị arukumuan Omhạr phọ. Awe phọ Izrạl u/kị ghan ghisigh aZihova oopho araghaạgh. (Deut. 16:16) Bidị uphạm ghan ni inmo kụ oghimọm idị edaphạn sidọl phọ abidị. Iphẹn phọ iḍeenhaan ghan mọ bidị osereghiạn ni oomo ipẹ aZihova maḍighinhaan bọ bidị. Ika kụ idị yira koḍeenhaan mọ yira opomhoghiạn ni aZihova ḅilhẹ mọ yira rosereghiạn ni oomo iikolobian phọ odị mamiteom bọ okparamhiọm omheeraam mọ ayira? Eniin eten pọ osogh aani ghan ikpoki olhoghonhaạn aḍighaạgh ookpomhoghan phọ ayira r’arukumhuan Omhạr phọ, odaphạn sidọl phọ ayira. Onyọ amatuạn phọ Pọl aḅẹm mọ: “Enaạn kepogh ni idiphọ aḍighaạgh phọ anyina emạn bọ, k/ilọ nyina i/moọgh, kụ esighẹ inmo phọ anyina.” (2 Kọr. 8:4, 12) AZihova ramaghamhị ghan ni iyaạr torobọ osogh dị ongoọm r’oomo olhoghi, torobọ ipẹ elheeny bọ.—Mạk 12:42-44. w22.03 24 ¶13

Ikumor awe phọ ko/tue osighẹ oomo iiḅaghamhị phọ awe phọ aZihova osoman bọ. Kuolọ, aZihova rawạ mọ ikumor awe phọ oḍighi oomo ipẹ bidị kotue bọ okparamhị r’oghoph iyool phọ odị. Ika kụ idị ikumor awe phọ abuẹn phọ omhoọgh bọ ni ibadị araraạr oḍighi kotue omiteom mem oḍighi iphẹn phọ? Daphạn eḍeenhaan otelhedom mọ Pọl. APọl awạ ghan ni eepoogh osẹph ḅilhẹ r’olhọgh ophophe abumor phọ odị. Ikumor awe phọ otue ni otuughaạny eḍeenhaan phọ odị esị oḍeenhaan ghan ephomhoghiạn bumor r’abumaranhi phọ. (1 Tẹs 2:7.) APọl aḅenhị ni bumor phọ odị mọ odị apomhoghiạn ni bidị ḅilhẹ mọ aZihova kẹn apomhoghiạn ni bidị. (2 Kọr. 2:4; Efẹ. 2:4, 5) APọl asighẹ ni buọ ookpomhoghan phọ idiphọ arighirị odị, kụ amiteom ghan mem angọ bidị. Odị aḍeenhaan mọ odị aḍuom ni bidị olhoghi esi oghaạph ghan ilọ oghiilhaan phọ bilhẹ r’aḍidugh phọ odị oḅenhị abidị. (2 Kọr. 7:5; 1 Tim. 1:15) Toroboiperolbọ, aPọl o/gbon iiḅaghamhị odị bịn. Kparipẹ ghụn, odị agbon olhoghonhaạn aḍighaạgh bumor phọ odị. w22.03 28 ¶9-10