ORỌL GHAN ADỌL ONYỌ AKRISTẸN

Araraạr Dị Keloghonhaạn Ḍighaạgh Dị Edi Kelhọm Ghuḍum K’agee-pọ!

Nạ rakelhọm ghan ni oḍighinhom asividio r’asipuru dị kemiteom ḍiitughiạn oye phọ edi bọ siphẹ aḍinyạ phọ Kelhọm Ghuḍum K’agee-pọ! phọ, r’agạ phọ eḅẹm bọ mọ “Abuniin Awe Ootughiạn Mọ,” “Aḍiigbu,” r’agạ phọ “Waaghị Amhiịn”? Ighẹn inhọn araraạr kụ ketue eḅilhẹ elhoghonhaạn nyinhạ ḍighaạgh mem dị nạ ratughemhị oye Baibul?—Mat 28:19, 20.

Aḍinyạ phọ “Kelhọm Ghuḍum K’agee-pọ!” dị edi siphe “JW Library” app. Iyaạr dị eḍeenhaan esi dị ozụ kụ “Ilọ Omhiịn r’Ilọ Onhaghanhạm Arurụ Ekpịgh Phọ 1” kemite.

Idị Komiịn r’Ilọ Onhaghanhạm Arurụ: Eḍighi maạr dị eḅeraạn nyinhạ otughemhiọm oye ḍiphẹ ogẹ bọ omiteom, ika kụ idị nạ katue amiịn oomo asividio phọ r’ipheriphọ araraạr phọ eniin esi? Kiạ siphẹ opọ odi bọ intanẹt phọ aselẹ ekpịgh phọ nạ kaḍighinhom bọ. Epẹ eekunha edeọm ariisi ituughạ phọ, nạ katue ni aselẹ oomo asividio phọ r’ipheriphọ araraạr phọ edi bọ ekpịgh phọ epẹ phọ. (Miịn afoto phọ 1)

“Odọ Phọ Opọ Ogẹ Bọ Omiteom” obobọ “Printed Edition”: Eḍighi maạr dị nạ ratughemhiọm ghan oye opọ odi bọ siphẹ intanẹt phọ, eeni “Odọ Phọ Opọ Ogẹ Bọ Omiteom” katue ni alhoghonhaạn nyinhạ ḍighaạgh mem lọ nyinha retuughạ. Siphẹ esi ituughạ phọ nyinha edi bọ, pogh epẹ eekunha anyụ elhiom aḍinyạ phọ azụ iraạr phọ asidọt phọ edi bọ, kụ aselẹ “Printed Edition.” Idiphọ opọ ogẹ bọ omiteom, ophọn phọ kalhoghonhaạn nyinhạ ḍighaạgh onhuụn olhegheri ekpanhạ iyaạr phọ esi phọ rekaạph bọ. Oḅulhemhi opọ nạ anme bọ, ḅilhẹ azụ iraạr phọ asidọt phọ kụ aselẹ “Digital Edition.”

Aḍinyạ phọ “Kelhọm Ghuḍum K’agee-pọ!” dị edi siphe “JW Library” app. Iyaạr dị eḍeenhaan esi dị ozụ kụ igbe phọ “Mị Maakolhobian Ni?” r’agạ phọ “Igẹ Dị Opumhom” kemite.

“Mị Maakolhobian Ni?”: Agạ phọ ophọn phọ odi eekunha “Ekpịgh Phọ 4” siphẹ aḍinyạ phọ. Epamanhạm ikpanhạ araraạr dị nạ kaḍighi orue osianhaan odạph ookpomhoghan phọ omite epẹ erugh phọ r’oḍiiny amuụm. (Miịn afoto phọ 2.)

Igẹ Dị Opumhom: Agạ phọ ophọn phọ odi kẹn eekunha “Ekpịgh Phọ 4” siphẹ aḍinyạ phọ. Agạ phọ ophọn phọ ragbạ ghan kaagholhomi iniin araraạr dị oghaạph oghol siphẹ ariisi ituughạ phọ. Aḍinyạ phọ edi bọ siphẹ intanẹt phọ emoọgh ni esi siphẹ eekunha igẹ phọ opumhom bọ dị ozụ kesighẹ nyinhạ eḅulhemhi siphẹ esi ituughạ phọ nạ arọl bọ. (Miịn afoto phọ 2.)

Miịn ni mọ opọ r’anạ retuughạ bọ amadạn ni Kelhọm Ghuḍum K’agee-pọ! phọ, ghalhamọ aḍiiny ni muụm. Nạ atue ni agbi mem mọ r’oḅilhẹ oḅula phọ, aḅilhẹ agbi nyodị idiphọ oniin dị nạ ratughemhị ghan Baibul ghalhamọ maḍiiny ni muụm. Eḍighi maạr dị onhọn okaaphọm aphinhom aani bin ituughạ phọ, odị atue ni agbi aani mem mọ