Olhoghonhaạn Aḍighaạgh Mem Ekperenhom Iiḅaghamhị Lhạ Phọ 2021—U/ḅitonhaạn Bumor R’abumaranhi Phọ Ayira

Lhạ arukumuan phọ 2021,a ezẹgh aCOVID-19 phọ ikpophonhom ni aḅirinhi phọ. Idiphọ oghaạph bọ siphẹ emhuoghaạph phọ “Global Relief for a Global Pandemic,” yira molhiom ni irubal asidollarb olhoghonhaạn aḍighaạgh we loor ezẹgh aCOVID-19 phọ ḅilhẹ yira mophighi Ruukụ Abulọgh Ḍighaạgh Mem Ekperenhom Iiḅaghamhị dị ropel li 950.

Okạr oghaạph, iduọn ezẹgh phọ rekọm bọ ni iboom imhinhimhiịn, inhọn ekperenhom iiḅaghamhị r’idị awe kụ okọm imheelhom ni bumor r’abumaranhi ayira oomo isiẹn aḅirinhi phọ. Omegheron oghị esi iiḅaghamhị phọ iphẹn phọ epel bọ ni 200, Ekụ Abuukpomhoghiom mọ siphẹ Aloor Phọ Repogh Bọ umheera ni mọ osighẹ $8 erubal oḅaarị ipẹ ongọ bọ olhoghonhaạn aḍighaạgh loor ezẹgh aCOVID-19 phọ. Miịn idị oḍighinhom iisogh phọ anyinha olhoghonhaạn aḍighaạgh we dị ke/bia osoman iyạl odọ igbogh iiḅaghamhị.

Oruphaany Eeḅarạph ANyiragongo

May 22, 2021, Eeḅarạph ANyiragongo, epẹ Congo, imhiigh ni oruphaany. Araraạr dị ekilhogh epogh phọ emite iphueghị ni ruutu awe, ruutu askul r’ariisi dị rooko ghan muụm. Kuolọ araraạr phọ ekilhogh bọ emite bịn kụ i/kọm iiḅaghamhị. Esi ibadị asiḍughul otu mem mọ eeḅarạph phọ eruphaany bọ, ogholhoghọl ophugh phọ amhelheghom ghan ni emhạ phọ aGoma ḅilhẹ ephighemiyogh de phọ. Ungọ ni itọ mọ awe dị ropel li oolhemhi odi emhạ phọ aḍuaghụ emhạ phọ. Ariisi arukuron awe usumughu ni oḍuaghụ, buniin oḅeẹny okụ eelhe phọ oḍigh Rwanda.

5,000 Abugbaanhaạn aZihova uḍighom aani ni buẹn oḍuaghụ bọ. Eeḅarạph phọ eruphaany bọ iphueghị ruutu abuniin; kụ aruḅạ oghị oroolhogh raraạr ruutu abunhọn dị mosumughu. Abuọ olhoghonhaạn aḍighaạgh phọ epẹ Rwanda r’aCongo k’uuḅakị ipẹ kongọ bọ olhoghonhaạn aḍighaạgh phọ. Rokaạph bọ ilọ eniin ekụ phọ olhoghonhaạn bọ ḍighaạgh, olạ agadạ phọ aCongo (Kinshasa) uḅẹm mọ: “Etigheri iboom iiḅaghamhị phọ erọl bọ emhạ phọ, ḅilhẹ kẹn kụ egbi bọ oteẹny amem mọ ongọ bọ itọ phọ mọ oḍuaghụ emhạ phọ, abuọ olhoghonhaạn aḍighaạgh phọ umhiigh ni odiighi ariiḍien, muụm, raraạr omhinhanhạm, ḅilhẹ r’arusomạ.” Eniin emhạ dị abumor ayira dị ropel li 2,000 k’uukpomhoghan, abuọ olhoghonhaạn aḍighaạgh phọ uzuughi ni rogbogo, ongooghị we phọ face mask, ḅilhẹ kẹn oḅenhị we phọ ilọ ookoronhaan ezẹgh aCOVID-19 r’acholera.

Esi iraạr arunwanyụ bịn abumor phọ ayira odiemhi arusụ dị eemhọr phọ repel li odiiny oonịr aKG, odiiny oonịr aKG ibiakpạ dị ogbẹ, iraạr oonịr aKG amunụm osaạm eḍien, ḅilhẹ r’iraạr oonịr aKG amuụm. Oghome amaliom, olạ agadạ phọ uukolhobian idị koko ghan eboom eḍien mem epẹ ekool phọ abidị kparipẹ r’ogho ghan enụm enụm obobọ ogho enhọn eelhe kụ osighẹ oghị.

Oniin onyọ umaranhi dị eeḅarạph phọ eruphaany bọ eteẹny otu odị dị purukụ olhọgh aḅẹm mọ, “Yoor ukạr kụ oḅonyonhu ozuan oḅilhẹ okururu.” Kụ mem dị osighẹ raraạr orolhọm oghiọm oḅilhẹ okparamhị eghunotu phọ odị, odị aḅẹm mọ: “R’olhoghonhaạn aḍighaạgh aZihova yoor momhoọgh raraạr dị yoor omhoghi orolhọm. Yoor momhiịn mọ aZihova marool dool phọ ayoor aḅilhẹ aḍighi idị idughanhaan iyoor okparạm.”

Emheel Adọl Ikpoki Eelhe Phọ AVenezuela

Eelhe aVenezuela momhiinhọn ni dọl ikpoki esi ibadị asiạ. Abumor phọ ayira epẹ phọ osoman ni ḍigbagarạ adọl, ekuom eḍien, ḅilhẹ r’iigamaniạn. Ghalhamọ r’iduọn phọ ni, oḍighom mọ aZihova bidị u/ḅitonhaạn.

Lhạ arukumuan phọ eten bọ, ulheom ikpoki dị repel li $1.5 erubal oghoom eḍien r’asaḅạ ḅilhẹ r’okoọm eten osighẹ oghiọm arughunotu dị ekuom. Olạ agadạ aVenezuela uḅẹm mọ: “I/dugh osaạny eḍien dị eemọr phọ emhạn 130 oonịr aKG oghiomaạn ghan oomo arughulukụl eelhe phọ torobọ unwanyụ, r’omhiịn mọ eḍigh ni raghaạgh abumor phọ ekạr bọ ekuom.” Omhiịn mọ ariiḍien phọ i/puughị, abumor phọ ugho ghan riiḍien dị ke/nuụn epụ. Olạ agadạ phọ uḅẹm kẹn mọ: “Yoor roko ghan riiḍien phọ iboom, r’amem lọ eḍien phọ emite obọ aḍighi phọ esoor. Kụ owạ eten dị edugh ḍighi osaanyọgh.”

ALeonel, oniin siphẹ Ekụ Abulọgh Ḍighaạgh Mem Ekperenhom Iiḅaghamhị phọ epẹ Venezuela, apomhoghiạn oḍighi phọ odị. Odị aḅẹm mọ “Oḍighi olhoghonhaạn awe ḍighaạgh phọ aḍighi oḍighi dị agbatanhaạn. Eepoogh phọ ephẹn phọ mikparamhị imhị emiigh k’amem mọ ezẹgh aCOVID-19 phọ eghiigh bọ anhịr amhị. Okuọm aloor phọ maḍighi idị mị alhoghomha mọ mị amoọgh ni maạr oḍighinhom esi abumor phọ abuẹn ekuom bọ. Mị makạr amiịn idị aZihova ramuneni ghan oguan phọ odị mọ onọ ka/ḅitonaạn we phọ odị.”

Oniin onyọ umor dị olhoghonhaạn aani ḍighaạgh dị makumuan ghan r’abuọ olhoghonhaạn awe ḍighaạgh phọ epẹ omhạn, aḅẹm mọ: “Nyiidiphọ mị kụ umhoghi aani olhoghonhaạn aḍighaạgh. Abumor phọ iyoor u/ngọ raraạr orolhọm bịn, bidị uḅilhẹ kẹn ni ulhoghonhaạn imhị r’anhịr phọ amhị ḍighaạgh ophoomhị ekpom. Bidị ukạr kụ uphogh iyoor, uudereghị iyoor, oḅilhẹ ukparamhị iyoor.”

Iniin iiḅaghamhị remite ghan mem dị olhoghi u/seere. Ghalhamọ r’iduọn phọ ni, oḍighom mọ aZihova ibadị amem roogboronhom ghan ni kogho oḅilhẹ oḍiemhi raraạr, loor iisogh phọ nyinha resogh ghan bọ kengọ oḍighi oomo isiẹn aḅirinhi phọ. Okaạph ni ilọ areten osighẹ osoghom aani siphẹ donate.jw.org. Yoor osereghiạn ni eegharạ inmo phọ anyinha.