Iinhaghạn Dị Ekpẹ Obeḍenhọm Ḅilhẹ Rekparamhị Ghan Omheeraam

Abugbaanhaạn aZihova omoọgh agey ogbolhomhaam okị esi abuẹn r’abidị oḅọph bọ omheeraam mọ. (1 Pita 2:17) Ibadị ayira olhoghomha aani idiphọ aTannis, oniin onyọ umaranhi epẹ Kenya. Odị aḅẹm mọ, “Iḅeeraạn imhị olhegheri ghan ipẹ remitenhaan bọ buuḅi abumor r’abumaranhi phọ amhị oomo isiẹn aḅirinhi phọ.” Ika kụ idị aTannis r’irubal abunhọn Abugbaanhaạn aZihova roteẹny ghan iinhaghạn phọ? Emhiigh k’ 2013, yira roteẹny ghan iinhaghạn phọ siphẹ Esi Iinhaghạn phọ siphẹ osoph intanẹt phọ ayira, jw.org.

Esi Iinhaghạn phọ repamanạm ghan iinhaghạn dị eru inẹ ilọ Abugbaanhaạn aZihova ilọ asiBaibul dị omiteom, idị olhoghonhaạn ḍighaạgh we dị ekperenhom iiḅaghamhị emitenhaan, ruutu dị rologhoḍị ḅilhẹ r’inhọn iphigh araraạr dị emite. Riḅenhị ghan iyira ilọ abumor r’abumaranhi ayira dị molhọgh ikoli loor omheeraam mọ abidị. Esi Iinhaghạn phọ repạm ghan kẹn iinhaghạn ilọ araraạr okparamhị dị emiteghu dị emhoọgh maạr oḍighinhom r’oḍighi iphelhegbeel phọ ḅilhẹ r’aMemorial phọ. Abuọ anhiạn kụ rookpomoghi ghan bọ iinhaghạn phọ iphẹn phọ, kụ rookolhobi ghan ika?

Olhọgh Elhegh Iphigh Araraạr Ḅilhẹ R’ogẹ Iinhaghạn Phọ

Ekụ Iinhaghạn Emhụ Agadạ phọ (OPI) kụ rooḅakị ghan raraạr dị kolọgh siphẹ Esi Iinhaghạn phọ. Ekụ phọ ephẹn phọ edi ghan epẹ Olạ Agadạ phọ kụ rekumuan eeḍiạn iiḅakiọm Ekụ Abuukpomhoghiom mọ siphẹ Aloor Phọ Repogh Bọ. Abumor r’abumaranhi dị ropel li 100 kụ odi bọ siphẹ OPI phọ​—ibadị abidị odi ilhoghi aruutu abidị kụ rologhonhaạn ḍighaạgh​—buniin abugeeghiạ, bunhọn rowaaghị ghan raraạr kophogh, bunhọn rosigheọgh ghan sifoto, kụ abuerị phọ rogbạ ghan koteneghi. Bunhọn rokị ghan koghaaphạn buọ aGomẹt phọ, igbogh aruutu askul, r’aruutu iinhaghạn. Ekụ Iinhaghạn Ilạ Agadạ Oomo Isiẹn Aḅirinhi phọ (PID) dị repel li 80 kụ rologhonhaạn ghan ḍighaạgh OPI phọ.

Orue ookolhobian iinhaghạn, OPI rokumuan ghan r’PID ilạ agadạ. Mem dị abumor phọ omhiịn iyaạr aḍiḅeraạn, bidị rowaaghị ghan ni raraạr kophogh ilọ iyaạr phọ kụ ookpomhoghi iinhaghạn dị ekpẹ obeḍenhọm. Iphẹn phọ etue ni eḅeraạm oopuru awe sipuru r’oḅaanhaạn awe dị osilor. Mem lọ bidị mookpomhoghi riphigh phọ, kụ ogẹ emhuoghaạph phọ, ooḅenhion, obạl opogh, oḅarạm sifoto, kụ osighẹ okiọm Ekụ Abuukpomhoghiom mọ m’ophogh mughumọ enighẹ ni osighẹ oḍighinhom.

Ikpo-onhụ Osereghiạn

Buẹn r’ayira oḅọph bọ omheeraam mọ ologhoma ika ilọ Esi Iinhaghạn phọ? Oniin onyọ umaranhi epẹ Philippines dị oghol mọ Cheryl, aḅẹm mọ, “Ekạr kụ riḅeeraạn ghan imhị omhiighom aḍio phọ esi aạl ghan iinhaghạn ilọ oḍighom mọ aZihova r’awe phọ odị.”

Ibadị awe dị robạl ghan rokaạph ghan ni ilọ ogbaranhaạn phọ odi bọ igbo iinhaghạn phọ edi bọ jw.org r’inhọn odọ aruutu iinhaghạn. Tatiana, epẹ Kazakhstan, aḅẹm mọ: “Mị asereghiạn ni iduọn mị katue bọ ni abeḍenhọm iinhaghạn phọ edi bọ siphẹ jw.org. Iinhaghạn phọ eelheeny eḅilhẹ ekpẹ obeḍenhọm.” Oniin onyọ umaranhi epẹ Mexico dị oghol mọ Alma aḅẹm mọ: “Otomaạm ikarạph iinhaghạn phọ ronaghạn ghan bọ siphẹ igbe iinhaghạn phọ, Esi Iinhaghạn phọ edi bọ jw.org rekparamhị ghan ghụn oye.”

Esi Iinhaghạn phọ i/kpẹ obeḍenhọm bịn; eḅilhẹ kẹn rekparamị ghan omheeraam. Bernard, epẹ Kenya, aḅẹm mọ: “Esi Iinhaghạn phọ milhoghonhaạn imhị ḍighaạgh omhiịn abumor r’abumaranhi phọ odi bọ oomo aḅirinhi phọ idiphọ eghunotu amhị etigheri ekpisi phọ bidị odi bọ. Mị katue ni aḅarạm siḍien abidị r’iiḅaghamhị phọ abidị siphẹ iiḅereghị phọ amhị.” Onyọ umaranhi dị oghol mọ Bybron, epẹ Kenya, aḅẹm mọ: “Olhoghi amhị raḅaạl ghan ni agey mem dị mị amhiịn emhuoghaạgh dị eghaạph ilọ aBaibul dị omiteom onhọn onhụ! Arumhuoghaạph phọ iphẹn phọ riitughianhạm ghan imhị mọ aZihova ra/lọgh ghan we iiseẹny.”

Ghalhamọ r’iinhaghạn ilọ abumor phọ ayira dị osoman igbiphoghọm bịn remoọgh ghan ni egey etirom. AJackline, epẹ Kenya aḅẹm mọ “Ootughiạn ghan ilọ omheeraam mọ abidị mekạr kụ ekparamhị omheeraam mọ amhị. Mị ragbon ghan omhiịn iyaạr phọ elhoghonhaạn bọ bidị ḍighaạgh okparạm. Mị mamhiịn idị araraạr dị awe osighẹ mọ ibạm araraạr​—idiphọ iiḅereghị, aạl aBaibul, r’omhoọr asuọr​—reloghonhaạn ghan ḍighaạgh okparamhị abumor phọ ayira.”

Onyọ Umaranhi epẹ Costa Rica dị oghol mọ Beatriz asereghiạn iinhaghạn ilọ ekperenhom iiḅaghamhị dị emite. Odị aḅẹm mọ: “Esi Iinhaghạn phọ reḍighi ghan idị mị kamiịn ipẹ oḍighom mọ ayira rokem ghan bọ koḍighi ongọ bumor phọ ayira ipẹ rewạ bọ eten ephomhoghiạn. Iphẹn phọ ingọ imhị okuphom owol mọ ophọn phọ okạr ookpomhoghan aZihova.”

P’eeghe idị yira rosereghiạn iduọn rokem ghan bọ kuḅenhị yira iinhaghạn ilọ abumor phọ ayira oomo isiẹn aḅirinhi phọ ghalhomọ r’idị purukụ emite ni! Iphẹn phọ mi/tue idugh mughumọ nyinha resogh ghan bọ iisogh kengọ oḍighi oomo isiẹn aḅirinhi phọ, opol osogh phọ nyinha resogh ghan siphẹ donate.jw.org. Meḍighi iisogh phọ anyinha.